No Tei Pure Aia

I ROTO ia 1 Tesalonia 5:17, 18, te tuatua ra te apotetoro ko Paulo e: “Auraka e tukutuku i te pure. E akameitaki i te Atua i te au mea katoa ra; ko to te Atua ïa anoano i te Mesia nei ia Iesu ia kotou na.” Inara te imiimi ra ainei koe i te oronga i te akameitaki anga ia koe e reka ra i tetai kaikai anga i te ngai tangata, mei to roto i te are kaikai anga? Te tamanako anga i ta Iesu akamatakite anga no te pure akaariari ua, e mea maramaia e penei kare tetai e inangaro kia akaraia mai aia e koia ia. (Mataio 6:5, 6) Noatu rai, penei ka akaraia mai tetai pure tau e te mako ma te marekaia.

Teia tetai kiteanga a tetai orometua mapu te tavini ra i te Betela i Brooklyn, te opati maata i te ao katoa o te au Kite o Iehova. Te kaikai popongi ra aia i tetai are kaikai anga, te parani anga e ka aere aia ka aravei i te pupu te ka kapipiti atu no te angaanga tutu Patireia aere i roto i tana putuputuanga i te reira ngai. Te tae anga mai tana kai popongi, kua oronga aia i tetai pure na te tu matauia. Te puera anga mai aia i tona nga mata, kua kite atu aia i tetai vaine tuati e tu ua ra te akara matariki maira iaia.

Kua ui atu aia, “te pure ra koe kare ainei?” Te pau anga atu aia e ae, kua tuatua aia: “Penei paa e ko koe tetai o te au Kite o Iehova. Ko toku nga metua rai tetai. Kare rava au i akao ana iaku ki roto i ta raua akonoanga, inara kua kite au e kia pera au. Penei e e tiki au i tetai patianga tei rauka i te tutaki na mua ake o Te Punanga Tiaki Anga e te Awake! Ka rauka ainei iaku te reira na roto ia koe?”

“Vaitata rai e raovaia au e taku kai,” i maaraʼi i teia taeake mapu. Noatu rai, kua rauka iaia i te tua e rua patianga tei rauka i te tutaki na mua ake e te nga makatini ou kiaia e te akanoo no te atoro akaou​—no tei pure aia.