Pene Tai Ngauru Ma Rua
Te Aiteanga o Toou Papetito Anga
1. Eaa i tau ei te papetito anga i te vai kia riro ei manako anga na tatou tataki tai uaorai?
I TE mataiti 29 T.N., i to Iesu papetito angaia, kua tarukuia e Ioane Papetito ki roto i te Kauvai i Ioridana. Te akara atura Iehova uaorai e kua akakite i tona ra mareka anga. (Mataio 3:16, 17) No reira kua akanoo a Iesu i te akaraanga te ka aruia e tana au pipi katoatoa. E toru e te apa mataiti i muri akera, kua oronga atura Iesu i teianei au apiianga ki tana au pipi: ‘Ko te mana katoa o to te rangi e to te ao katoa nei, kua tukuia mai, tei iaku anake. E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te vaerua tapu.’ (Mataio 28:19, 20) Kua papetitoia ainei koe kia rotai ma ta Iesu i akaue maira i reira? Me kare ia, te teateamamao ra ainei koe kia rave i te reira?
2. No runga i te papetito anga, eaa te au uianga te tau ra kia pauia?
2 I aua turanga ra, e mea puapinga te kiteanga meitaki i te papetito anga no te katoatoa te anoano ra kia tavini ia Iehova e kia ora atu ki roto i tona ao ou no te tuatua tika. Te au uianga te tau ra te au pauanga te kapiti ra i teianei: Te aite ra ainei te papetito anga Kerititiano o teia tuatau mei to Iesu ra papetito anga? Eaa te aiteanga e kia papetitoia ‘i te ingoa o te Metua, e no te Tamaiti, e no te vaerua tapu’? Eaa te o atura i te akonoanga kia tau ki ta te papetito anga i te vai o te Kerititiano e akakite maira?
Au Papetito Anga Raveia e Ioane Ra
3. Kua kotingaia ta Ioane Papetito anga kiaai anake?
3 E vaitata i te ono marama i mua ake i to Iesu ra papetito angaia, kua aere a Ioane Papetito e tutu aere i te metepara i Iudea, i te na ko anga: “E tataraara kotou; te vaitata mai nei oki te basileia o te ao.” (Mataio 3:1, 2) Kua akarongo atura te au tangata i ta Ioane i tuatua e kua tauru ki to ratou ngakau. Kua aaki atea ua ratou i ta ratou au ara, e kua tataraara i te reira, e i reira kua aere mai kia Ioane kia papetitoia e ia i te Kauvai i Ioridana. Ko taua papetito anga ra no te au ngati Iuda.—Luka 1:13-16; Angaanga 13:23, 24.
4. Eaa ra te au ngati Iuda i te anere mataiti mua ra i umuumu rapurapuiai kia tataraara?
4 E rapurapu tikai te umuumu anga no taua aronga ngati Iuda ra kia tataraara. I te Maunga Sinai i te mataiti 1513 M.T.N., kua tomo atu to ratou ai metua ki roto i tetai koreromotu iti tangata—na te akatika anga tapu—ma te Atua ko Iehova ra. Inara no ta ratou ara maata, kare ratou i akono kia tau ki ta ratou au apainga i raro i taua koreromotu ra, no reira kua akaapaia ratou e te reira. Kia tae mai ki to Iesu tuatau kua kino rava to ratou turanga. Kua vaitata mai “taua rā maata e te mataku o Iehova ra” tei totouia maira e Malaki. I te 70 T.N., kua tae mai taua “rā” ra i te akapou angaia a Ierusalema e te au vaeau o Roma ra, tona iero, e tere atu i te mirioni au ngati Iuda. Kua tonokia atu a Ioane Papetito, ma te tu totomapu no te akamori mou, i mua ake i tana akapou anga ra “ei akonokono i tetai pae tangata e tau no te Atu.” Te umuumuia ra ratou kia tataraara i ta ratou au ara i te Ture koreromotu a Mose e kia teateamamao i te arikianga i te Tamaiti a te Atua, ia Iesu, ta Iehova i tono maira kia ratou.—Malaki 4:4-6; Luka 1:17; Angaanga 19:4.
5. (a) I to Iesu aere maianga kia papetitoia, eaa a Ioane i ekoko ei i teia? (e) Eaa tei akatutuia e to Iesu papetito anga?
5 I roto i te aronga tei aere maira kia Ioane kia papetitoia ko Iesu uaorai. Inara no teaa? Te kiteanga e kare a Iesu au ara kia aaki, kua tuatua atura Ioane: “Ko au oki taau e bapetizo e tikaʼi, e e aere mai oki koe kiaku nei?” Inara ko to Iesu papetito anga kia akatutu i tetai apinga tuke ra. No reira kua pau atura Iesu: “Ka tuku ua mai na: e pera oki tatou i te akatika i te au tuatua-tika katoa e tau ei.” (Mataio 3:13-15) No te mea kare a Iesu ara, kare tona papetito anga i akatutu mai i te tataraanga no te ara; kare katoa oki aia i umuumuia kia akatapu iaia uaorai ki te Atua, i te mea e mema aia no te iti tangata kua akatapu keia kia Iehova. Kareka ra, ko tona papetito anga i te 30 mataiti e mea taka ke kiaia anake, e kua akatutu mai te reira i te orongaanga iaia uaorai ki tona Metua i te rangi ra kia rave i Tona anoano ke atu.
6. Akapeea te manako akatenga o Iesu i te raveanga i to te Atua ra anoano nona?
6 Te o atura to te Atua anoano no Iesu Karaiti i te angaanga te kapitiia ra ma te Patireia. (Luka 8:1) Te o katoa ra te atinga i tona oraanga tangata apa kore ra ei oko e ei tumuanga oki no te koreromotu ou. (Mataio 20:28; 26:26-28; Ebera 10:5-10) Kua manako maata tikai a Iesu i ta tona papetito anga i te vai i akatutu maira. Kare aia i tuku i tona manako kia akaariu keia ki etai atu au apinga ke. Tae roa ki te openga o tona oraanga i te enua nei, kua mou piri aia i te raveanga i to te Atua anoano, i te akariroanga i te tutuanga i te Patireia o te Atua e ko tana angaanga maata.—Ioane 4:34.
Papetito Anga o te Au Pipi Kerititiano i te Vai
7. Mei te Penetekote 33 T.N., eaa tei akaueia ki te au Kerititiano kia rave ei kapiti anga ma te papetito anga?
7 Kua papetitoia te au pipi mua a Iesu ra e Ioane i te vai e kua aratakiia atu kia Iesu ei au mema manakonakoia no te Patireia o te rangi ra. (Ioane 3:25-30) I raro ake i ta Iesu ra arataki anga kua rave katoa teianei au pipi i etai papetitoanga, tei aiteite ra te puapinga mei ta Ioane papetito anga ra. (Ioane 4:1, 2) Inara, akamata mai i te Penetekote 33 T.N., kua akamata ratou i te akatupu i te angaanga kia papetito ‘i te ingoa o te Metua, e no te Tamaiti, e no te vaerua tapu.’ (Mataio 28:19) Ka kitea e koe te reira ei puapinga maata kia manako akaou e eaa te aiteanga o te reira.
8. Eaa te aiteanga e kia papetitoia “i te ingoa o te Metua”?
8 Eaa te aite anga o te reira e kia papetitoia “i te ingoa o te Metua”? Te aiteanga kia ariki i tona ingoa, tona turanga, te mana, te akakoroanga, e te au ture. E akamanako eaa te o atura ki teia. (1) No tona ingoa, te tuatua ra Salamo 83:18: “Ko Iehova toou ingoa, e ko koe anake Tei Teitei i te enua katoa nei.” (2) No tona turanga, te tuatua ra 2 Ariki 19:15: “E Iehova e, . . . ko koe te Atua, ko koe anake ra.” (3) No tona mana, te tuatua maira Apokalupo 4:11 kia tatou: “E tau te kakā ia koe, e te Atu, e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.” (4) Ka tika katoa tatou kia akatika e ko Iehova Tei Oronga i te Ora, tei akakoro katoa ra kia akaora mai ia tatou i te ara e te mate: “No ko mai te ora ia Iehova ra.” (Salamo 3:8; 36:9) (5) Ka tau tatou kia ariki e ko Iehova Tei Oronga i te Ture Teitei ra: “Ko Iehova oki to tatou akava; ko Iehova ta tatou tuku ture; ko Iehova to tatou ariki.” (Isaia 33:22) No te mea koia taua au turanga katoa ra, te raurauia maira tatou: “E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.”—Mataio 22:37.
9. Eaa te aiteanga e kia papetitoia “i te ingoa . . . no te Tamaiti”?
9 Eaa te aiteanga o te papetito anga “i te ingoa . . . no te Tamaiti” ra? Te aiteanga kia kite i te ingoa, te opita, e te mana oki o Iesu Karaiti. Te aiteanga o tona ingoa, Iesu “ko Iehova te Ora.” Te rauka maira tona opita mei te tika e koia te Tamaiti anau tai a te Atua, te mua o ta te Atua i anga mai. (Mataio 16:16; Kolosa 1:15, 16) Kua tuatua a Ioane 3:16 kia tatou no teia Tamaiti: “I aroa mai te Atua i to te ao nei [te au tangata tau kia okoia], kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” No te mea kua mate tiratiratu atu a Iesu, kua akatuakaouia mai aia e te Atua mei te mate maira e kua oronga atu i te mana ou kiaia. Kia tau ki ta te apotetoro ko Paulo, kua “akateitei rava atu ei te Atua [ia Iesu]” i te ao katoa e pini ua ake, e tu rua anake aia kia Iehova. No reira “kia tuku te au turi katoa ki raro . . . i te ingoa o Iesu; E kia aaki te au vaa ravarai e, ko Iesu Mesia te Atu, kia kakā te Atua Metua ra.” (Philipi 2:9-11) Te aiteanga o teianei kia akarongo i ta Iesu ra au akauenga, no ko mai ia Iehova uaorai.—Ioane 15:10.
10. Eaa te aiteanga e kia papetitoia ‘i te ingoa . . . no te vaerua tapu’?
10 Eaa te aiteanga e kia papetitoia ‘i te ingoa . . . no te vaerua tapu’? Te aiteanga kia akatika i te tuanga e te angaanga oki a te vaerua tapu. E eaa te vaerua tapu? Ko te mana rave angaanga o Iehova, tana e rave ra ei akatupu i tona au akakoroanga. Kua tuatua a Iesu ki tana au pipi: “Naku oki e pati atu i te Metua ra, e nana e oronga mai i tetai Akapumaana ia kotou, kia noo tikai ki o kotou nei e tuatau ua atu; Ko te vaerua tuatua-mou ra.” (Ioane 14:16, 17) Eaa ta teia ka tauturu ia ratou kia rave? Kua tuatua katoa a Iesu kia ratou: ‘Ka rauka ra to kotou mana i te vaerua tapu, kia aere mai aia i rungao ia kotou; e ei kite oki kotou noku i Ierusalema nei, e Iudea katoa oki e pini ua ake, e Samaria katoa oki, e tae ua atu ki te openga o te enua ra.’ (Angaanga 1:8) Na roto i te vaerua tapu ra, kua akauru katoa a Iehova i te tataanga i te Pipiria: ‘Kare oki to te inangaro o te tangata i tae mai ei te totou i taito ra; ko te au tangata tapu ra o te Atua tei tuatua i ta te vaerua tapu i tuku mai ia ratou ra.’ (2 Petero 1:21) No reira ka akatika tatou i te tuanga a te vaerua tapu me apii tatou i te Pipiria. Tetai atu tu ka akatika tatou i te vaerua tapu na te patianga ia Iehova kia tauturu mai ia tatou kia akaua mai ‘i te au ua o te vaerua,’ koia oki “te inangaro ïa, te rekareka, te au, te akakoromaki, te takinga-meitaki, te meitaki, te pikikaa kore, Te maru, te akono meitaki.”—Galatia 5:22, 23.
11. (a) Eaa te puapinga tikai no te papetito anga i to tatou tuatau nei? (e) Akapeea te papetito anga i aite ei ki te mateanga e te akatu maianga?
11 Te aronga mua tei papetitoia kia rotai ma ta Iesu i apii ra ko te au ngati Iuda e te au poroteraita ngati Iuda ra, akamata mai i te 33 T.N. E tuatau poto ua i muri akera, kua akatotoaia atu te tika ei au pipi Kerititiano ki to Samaria ra. E, i te 36 T.N., kua akatotoaia te kapiki anga kia kapiti katoa i te au Kenitara peritome koreia ra. I mua ake i te papetito angaia, kua rave te au Samaria e te au Kenitara i te akatapuanga ia ratou tataki tai kia Iehova kia tavini atu iaia ei au pipi na tana Tamaiti. Kua riro teia ei puapinga maata no te papetito anga i te vai o te au Kerititiano tae roa mai ki to tatou tuatau. Te taruku takiri anga ki roto i te vai e akatutu anga tau no teianei akatapuanga ia ratou uaorai, i te mea te akatutu maira te papetito anga i te tanumanga. Toou tomoanga ki raro i te vai papetitoanga ra te akatutu maira i to mateanga ki toou tu oraanga mua ra. Ko toou akatu maianga ki vao i te vai ra te akatutu maira i toou akaora maianga kia rave i te anoano o te Atua ra. Ko teianei ‘papetito anga okotai’ te kapiti ra ki te katoatoa tei riro maira ei Kerititiano mou. I te papetito angaia kua riro mai ratou ei Au Kite Kerititiano no Iehova, e au orometua akatapuia a te Atua ra.—Ephesia 4:5; 2 Korinetia 6:3, 4.
12. Te aiteite atura te papetito anga Kerititiano i te vai ki teaa, e i akapeea ra?
12 E maata te puapinga akaoraanga a taua papetito anga ra i nga mata o te Atua ra. Ei akatauanga, i muri ake i te taikuanga i te patuanga a Noa i te araka, i akaoraia ra aia e tona pamiri na roto i te Vaipuke, kua tata te apotetoro ko Petero: “Ko tei tau i te reira ra, ko te bapetizo ïa e ora katoaʼi tatou i teianei, (eiaa i te kopae anga i te viivii o te kopapa nei, i te tuatua ra i te akava-ngakau meitaki ra i te Atua,) i te tuakaouanga o Iesu Mesia ra.” (1 Petero 3:21) Kua riro te araka ei akapapu anga e kua rave tiratiratu a Noa i te angaanga ta te Atua i akaue ra. I muri ake i te otianga te anga anga i te araka ra, “i mate ei te reira enua i te tapoki angaia e te tai.” (2 Petero 3:6) Inara ko Noa e tona pamiri ‘i oraʼi i te vai nga tangata toko varu ra.’—1 Petero 3:20.
13. Te akaoraia maira te Kerititiano mei teaa na roto i te papetito anga i te vai?
13 I teia tuatau nei, te aronga te akatapu ra ia ratou uaorai kia Iehova na runga i te tumuanga o te akarongo i te Karaiti akatuakaouia ra ka papetitoia i te akatutu anga i taua akatapuanga ra. Ka rave ratou i te anoano o te Atua ra no to tatou tuatau e ka akaoraia mei teianei ao kino. (Galatia 1:3, 4) Kare ratou e aere akaou atu no te akapou anga ma te akatereanga kino o te au mea nei. Ka akaoraia ratou mei teianei tu kino e kua orongaia atu te akava ngakau meitaki e te Atua. Te akapapu atura te apotetoro ko Ioane ki te au tavini o te Atua: “Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.”—1 Ioane 2:17.
Te Akonoanga i ta Tatou Au Apainga
14. Eaa te papetito anga anake i kore ei ei akapapu anga i te ora?
14 Ka riro ei tarevake kia manako e ko te papetito anga e akapapu anga i te ora. E puapinga anake ia me kua akatapu tikai tetai tangata iaia uaorai kia Iehova na roto ia Iesu Karaiti e ka rave ei i te anoano o te Atua i muri akera, e kia tiratiratu tae roa ki te openga. “Kareka te tāpu tikai e tae ua atu ki te openga ra, ka ora ia.”—Mataio 24:13.
15. (a) Eaa to te Atua ra anoano i teia tuatau no te au Kerititiano papetitoia? (e) Akapeea te puapinga tau o te riroanga ei au pipi Kerititiano i to tatou au oraanga?
15 Kua kapiti to te Atua ra anoano no Iesu i te tu o tana taangaangaanga i tona oraanga ei tangata. Ka tukuia te reira ki raro i te matenga ei atinga. Ia tatou ra, ka orongaia to tatou au kopapa ki te Atua, e ka rave ua atu tatou i tetai oraanga tuku atinga ia tatou uaorai na te raveanga i to te Atua ra anoano. (Roma 12:1, 2) Kare tikai tatou e rave ana i to te Atua ra anoano me i etai atianga ka akono akakoro tatou ia tatou uaorai mei to te ao koropini ia tatou me kare me ka patu tatou i to tatou au oraanga takapini i te aruaruanga noinoi, ma te orongaanga i te tavini anga akameamea ua ki te Atua ra. (1 Petero 4:1-3; 1 Ioane 2:15, 16) I te ui anga tetai ngati Iuda eaa tana ka tika kia rave kia raukai te ora mutu kore, kua akakite atura Iesu i te puapinga o te akonoanga i te oraanga ma tikai. Inara i reira kua tou atura aia ki tetai apinga e maata atu te puapinga: te umuumuanga kia riro ei pipi Kerititiano, kia aru ia Iesu. Ka tika te reira ei mea maata i te oraanga. Kare te reira e tau ei tuanga rua ki te au aruaruanga kopapa nei.—Mataio 19:16-21.
16. (a) Eaa te apainga a te au Kerititiano katoatoa i te pae i te Patireia ra? (e) Mei tei akatutuia i te kapi 116 e te 117, eaa etai ravenga meitaki no te rave i te angaanga Patireia ra? (nga) Eaa te akakiteia maira e to tatou raveanga ma te ngakau katoa i te angaanga akakitekite aereanga ra?
16 Ka tau akaou kia akaketaketaia e te anoano o te Atua no Iesu kua kapiti i te angaanga puapinga maata i te kapiti anga ma te Patireia o te Atua ra. Kua akatainuia a Iesu uaorai ei Ariki. Inara iaia i te enua nei, kua rave katoa aia i te akakite anga totomapu i te Patireia ra. Tei ia tatou tetai angaanga aiteite i te akakitekite anga kia raveia, e tei ia tatou te au tumu ravarai kia rave i te reira ma te ngakau katoa. Na te raveanga i te reira, ka akakite tatou i to tatou ariki anga no te ngateitei o Iehova ra e pera katoa oki to tatou aroa no te au tangata. (Mataio 22:36-40) Ka akaari katoa tatou e te taokotaiia ra tatou ma te au oa akamori i te ao katoa nei, pouroa ratou e aronga tutu Patireia. Kapiti katoa, i te taokotai anga i te ao katoa, ka rave ua atu tatou kia tae ki te akakoro anga no te oraanga mutu kore i te tuanga o taua Patireia ra i te enua nei.
Uriuri Akaou Anga
• Eaa te au aiteite anga e te au tuke anga te vaira i rotopu i to Iesu ra papetito anga e te papetito anga i te vai i teia tuatau nei?
• Eaa te aiteanga e kia papetitoia ‘i te ingoa o te Metua, e no te Tamaiti, e no te vaerua tapu?’
• Eaa te o atura ki roto i te akonoanga i te au apai anga no te papetito anga Kerititiano i te vai?
[Tutu i te kapi 116, 117]
ETAI RAVENGA AKAKITEKITE I TE PATIREIA
Mei tera ngutupa ki tera ngutupa
Ki te au kopu tangata
Ki te au oa angaanga
Ki te au oa apii
I runga i te au arataa
Na te oki akaouanga ki te aronga inangaro
I te au apii Pipiria i te ngutuare