Pene 11
‘Na Mua te Kimianga i te Patireia’
1. (a) Eaa ra a Iesu i tuatuaʼi, i te 1,900 mataiti i topa, kia na mua i te kimi i te Patireia? (e) Eaa te uianga tau no tatou kia ui ia tatou uaorai?
E TERE atu i te 1,900 mataiti i topa, i tetai tuatua tei raveia i Galilea, kua raurau a Iesu i tona aronga akarongorongo: “E na mua ra kotou i te kimi i te basileia o te Atua, e te tuatua-tika nana ra.” Inara no teaa ra? Kare ainei e e manganui te au anere mataiti te mamao atu no te tuatau e akateronoiaʼi a Karaiti? Ae. Inara na te reira Patireia no te Mesia e akangateitei i to Iehova uaorai ingoa tapu e te akatupu i tana akakoroanga meitaki no te enua nei. Te aronga katoa te ka ariki tikai i te puapinga maata o te reira ka tuku rai ko te Patireia te tuanga mua i tona oraanga. Ko te tika te reira i te anere mataiti mua ra e te tika katoa rai i teianei i te mea te tutara nei te Patireia. Te akaari ra ainei toou tu oraanga e te na mua ra koe i te kimianga i te Patireia o te Atua?—Mata. 6:33.
2. Eaa te au apinga tei matauia no te au tangata kia aruaru pakari?
2 Ko te mea matauia e e maata atu te manako o te au tangata no etai atu au mea ke. Te aruaru pakari ra ratou i te apinganui e te kakau, te manga e etai atu apinga i te pae kopapa nei e te au mea e navenave ei na te moni e oko mai. (Mata. 6:31, 32) Te akaata maira to ratou tu oraanga e te akapou taime ra ratou uaorai no te tamataora. Kua tukuia te Atua ki te tuanga rua i to ratou oraanga—me te irinaki ra ratou iaia.
3. (a) Eaa te au tu apinga puapinga ta Iesu i akamaroiroi i tana au pipi kia kimi, e no teaa ra? (e) Eaa ra i tau kore ei kia maata roa te manako no runga i te au apinga tei anoanoia no te kopapa nei?
3 Inara kua oronga a Iesu i te ako ki tana au pipi e: “Auraka e akaputu i te apinga na kotou i teianei ao,” no te mea kare tetai o te reira au apinga e vai mai e tuatau ua atu. ‘Ka akaputu ra i nana ei, i te apinga na kotou ki runga i te rangi,’ na te tavinianga ia Iehova. Kua raurau aia i tana au pipi kia tamou i to ratou mata kia “meitaki,” na te akatika anga i to ratou manako ki runga i te apinga okotai ua, koia te akonoanga i to te Atua ra anoano. “Ko kotou nei oki, kare e tika kia akono atu i te Atua e te Mamona,” ko tana ia i tuatua kia ratou. Inara ka akapeea te au apinga ka anoanoia no te kopapa—te kai, te kakau e te are? “Auraka kotou e apiapi ua,” ta Iesu ia i ako atu. Kua taki atu aia i to ratou manako ki te au manu o te reva nei—na te Atua i angai ia ratou. Kua akamaroiroi aia i tana au pipi kia tuku na te au tiare e apii ia ratou—na te Atua i akakakau ia ratou kia manea. Kare aina i maata atu te meitaki o ta Iehova au tavini tangata kite i to ratou katoa? “E na mua ra kotou i te kimi i te basileia o te Atua, e te tuatua-tika nana ra,” i na Iesu ei, “e kapiti katoaia mai taua au mea [tau] katoa ra ia kotou.” (Mata. 6:19-34) Te irinaki ra ainei koe i te reira? Te akaari maira ainei taau angaanga i te reira?
Auraka e Tuku i te Tuatua Mou Patireia Kia Pokia Atu
4. Me e maata roa te manako o te tangata no runga i te au apinga i te pae kopapa, penei eaa te ka tupu? E akatutu mai.
4 Me ka maata rava te manako o tetai tangata no runga i te au apinga i te pae kopapa, ka kino te au tupuanga. Noatu rai me te karanga ra e te manako ra aia i te Patireia, me i roto i tona ngakau te tuku ra aia i etai apinga ke ki mua, ka pokia atu i reira te Patireia tuatua mou. (Mata. 13:18, 19, 22) Ei akaraanga, i tetai atianga kua ui atu kia Iesu tetai tutara mapu e apinga maata tana ra, “E akapeea au nei e raukaʼi iaku te ora mutu kore?” Na tana pauanga kia Iesu i akakite e e oraanga mako tona e te meitaki ra tana akono ia etai ke. Inara e maata rava tona manako no runga i tana au apinga. Kare e rauka iaia i te akatakake iaia uaorai mei taua au apinga ra e kia riro mai ei tangata aru ia Karaiti. No reira kua kopae aia i te tuatau tau nona te ka taki atu kia riro aia ei tutara kapitiia atu kia Karaiti i te Patireia i te rangi ra. Mei ta Iesu i tuatua ra i te reira atianga e: “E mea ngata no te aronga e moni ta ratou no te tomo atu ki te patireia o te Atua!”—Mareko 10:17-23, NW.
5. (a) Eaa te au mea i akamaroiroi atu ei a Paulo ia Timoteo kia rekareka, e no teaa ra? (e) Akapeea ta Satani taangaanga anga i te “inangaro maata no te moni” ei ereere no te akapou i te tangata?
5 E maata te au mataiti i muri mai, kua tata te apotetoro ko Paulo kia Timoteo, te noo ra ki Ephesia i reira, e ngai apinga nui ia. Kua akamaaraara atu aia kiaia e: “Kare ua oki a tatou apinga i apai mai ki teianei ao; e kua kitea tikaia e kare takiri e apinga e tika kia apai katoa kia aere ke tatou nei. E teianei, e kai ta tatou, e te kakau, kia mareka tatou i te reira.” Te tano ra te angaanga kia rauka ‘te kai e te kakau’ tau no te tangata e tona ngutuare tangata e mea tika ia. Inara kua akamatakite mai a Paulo e: “Kareka te aronga e māro e kia maata te apinga, e rokoia ïa e te timataanga, e te ereere, e te anoano neneva e manganui, e kino ei ra, e maremo takiri atu ei te tangata ki roto i te pou e te mate.” E kikite rai a Satani. Ei akamata anga penei ka akavare aia i te tangata ki te au mea rikiriki ua. E putuputu te aruia maira te reira e te taomianga maata atu—penei ka akakakeia tona turanga ki te angaanga e maata atu te moni mari ra e maata atu te taime ka anoanoia no roto mai i te tuatau tei akatakaia no te angaanga i te pae vaerua ra. Me kare tatou e matakite, ka rauka kia pokia e te “inangaro maata no te moni” te au apinga maata rava no te Patireia ra. Mei ta Paulo i taiku maira, “Kua taka ke rava oki tetai aronga i te akarongo nei, i te umuumu anga i te reira [i te moni], e kua ko mama rava ia ratou uaorai i te iriea e manganui.”—1 Timo. 6:7-10.
6. (a) Eaa ta tatou ka tau kia rave ei kopae ke atu i te ereere? (e) E mea tau tikai ainei te reira i te akara anga i te tu o teianei ao i te pae o te puapinga?
6 Ma te aroa tikai i tona taeake Kerititiano ra, kua raurau atu a Paulo kia Timoteo: “E rere ke koe i taua au mea nei,” e e “Kukumi i te kukumi anga meitaki o te akarongo.” (1 Timo. 6:11, 12, NW) Ka anoanoia te tauta anga pakari me kopae ke tatou kia kore e kikaia atu ki te mataara o te oraanga anoano apinganui o teianei ao te koropini nei ia tatou. Inara me ka tauta pakari tatou uaorai kia rotai ki to tatou akarongo, kare rava a Iehova e akaruke ia tatou. Noatu rai te moni oko maata e te totoa aere o te kore e angaanga, ka akapapu aia e ka rauka ia tatou te au apinga te anoano tikaia ra no tatou.—Ebera 13:5, 6.
Oronga Mai te au Pipi Mua ra i te Akaraanga
7. I to Iesu akaunga anga i te au apotetoro kia tutu aere i Iseraela, eaa tana i ikuiku kia ratou ra, e eaa ra i tau ei te reira?
7 I muri ake i ta Iesu apiianga tau i tana au apotetoro ra kua akaunga atu aia ia ratou ki Iseraela ra e tutu aere i te tuatua meitaki. “Te vaitata maira te patireia o te au rangi.” Mei teaa ra te mataora o te reira tuatua! I rotopu ia ratou a Iesu Karaiti ra, koia te Ariki Mesia ra. I te mea te tuku ra te au apotetoro ia ratou uaorai kia rave i te tavini atu i te Atua ra, kua raurau atu a Iesu ia ratou kia manako papu e ka akono te Atua ia ratou. No reira kua tuatua aia: “Auraka ei apinga e apai ia atu i to kotou tere, auraka ei tokotoko, auraka ei pute, auraka ei manga, auraka ei moni; auraka kia taki rua pereue i te tangata okotai. E te are ta kotou e tomo ra, ei reira noo ei, e ka aere atu ei.” (Mata. 10:5-10, NW; Luka 9:1-6; 10:4-7) Na Iehova e akono te au apinga anoanoia no ratou kia merengo na roto i te au rima o te au taeake Iseraela, i rotopu ia ratou te peu matauia no te akamanuiri i te au tangata ke ra.
8. (a) Eaa ra a Iesu i oronga ei i te au ikuiku anga tukeke i mua ua ake i tona matenga? (e) Noatu rai, eaa tei tau kia vai mai ei mea mua i to ratou oraanga?
8 I muri akera, i mua ua ake i tona matenga, kua akamatakite atu a Iesu i tana au pipi i te tika e ka rave ratou i te angaanga i raro ake i te au tu tauiia ra. Ei tupuanga i raro ake i te patoi anga a te aronga mana taoonga, penei kare te akamanuiri anga e ngoie ua i te orongaia i Iseraela ra. Pera katoa oki, kare e roa ka apai atu ratou i te tuatua no te Patireia ki te au enua Etene ra. Ei reira ka tau ratou kia apai i te “āriki moni” e te “pute.” Tera ra, ka rave ua atu ratou i te kimianga i te Patireia o Iehova na mua e te tuatua tika nana ra, ma te manako papu e ka akameitakiia e te Atua ta ratou tauta anga kia rauka te manga tei anoanoia e te kakau.—Luka 22:35-37.
9. (a) Akapeea ta Paulo tamou anga i te Patireia ki roto i te tuanga mua? (e) Akapeea tona au anoano i te pae kopapa te akonoia anga? (ng) Eaa te ako tana i oronga kia etai atu no runga i teia au mea?
9 Kua akaari te apotetoro ko Paulo i te akaraanga meitaki e e akapeea te akono i ta Iesu ako ra. Kua akanoo a Paulo i tona oraanga kia koropini i te angaanga orometua. (Angaanga 20:24, 25) I tona aere anga ki tetai ngai no te tutu aere kua akono aia i tei anoanoia nona uaorai na te rave anga i te angaanga maani puakapa. Kare ra aia i manako e na etai ke e akono iaia. (Angaanga 18:1-4; 1 Tesa. 2:9; 1 Kori. 9:18) Inara kua ariki aia i te akamanuiri anga ma te akameitaki no te au apinga orongaia nana i te inangaro o etai ke i te akakite i to ratou aroa e te manako ariki na teia mataara. (Angaanga 16:15, 34; Philipi 4:15-17) Kare aia i akamaroiroi atu i te au tane e te au vaine kia akangaropoina i ta ratou apainga no te ngutuare tangata kia raukaʼi te rave i te tutu aere, mari ra kia akono i ta ratou au apainga tukeke na te mataara tau. Kua ako atu aia ia ratou kia rave i te angaanga ma to ratou au rima e kia aroa i ta ratou tamariki e kia maoraora i te oronga kia etai atu. (Ephe. 4:28; 2 Tesa. 3:7-12; Tito 2:3-5) Kua raurau katoa aia ia ratou kia tuku i to ratou irinaki anga ki te Atua auraka ki te au apinga o te pae kopapa, e kia taangaanga i to ratou oraanga i te mataara te ka akaari e te marama meitaki ra ratou e eaa te au mea puapinga maata tikai i te oraanga nei. Kia rotai ki ta Iesu ra apiianga, tera te aite anga ko te kimianga i to te Atua ra Patireia na mua e te tuatua tika nana ra.—Philipi 1:9-11.
E Tamou i te Patireia na Mua i Toou Oraanga
10. (a) Eaa te aite anga no te ‘kimi i te Patireia na mua’? (e) Inara eaa te ka kore e tau kia akangaropoinaia?
10 Eaa te maata o ta tatou tua tatakitai anga i te tuatua meitaki o te Patireia kia etai atu? Tei runga tetai tuanga o te reira, i to tatou au turanga e, ko te maata anga, tei runga ia i te oonu o to tatou manako ariki. Kia tamou ki roto i te manako e kare a Iesu i karanga, ‘E kimi i te Patireia me kare atu aau angaanga no te rave.’ Kare katoa aia i karanga e, ‘E tuatua koe i te Patireia i tetai taime ua, te rave ra koe i tei anoanoia.’ Kare katoa aia i karanga e, ‘E akamata ma te totomapu no te au apinga o te Patireia ra; inara me ka akara anga roa atu te aereanga mai o te Akatereanga Ou, e rave ua atu i etai au apinga i te angaanga a te Atua mari ra e noo kia aite atu te oraanga mei etai aronga ke ra.’ I tona kite papu anga i te puapinga maata o te Patireia, kua akakite aia i te anoano o tona Metua no runga i te reira tumu, i te na ko anga: “E kimi tamou ra kotou i te patireia o te Atua.” Me kare, mei ta te apotetoro ko Mataio i tata ra e: “Na mua ra kotou i te kimi i te basileia o te Atua, e te tuatua-tika nana ra.” (Luka 12:31, NW; Mata. 6:33) Noatu rai te kitea ra e te maata anga o tatou e e mea tau kia rave i etai au tu angaanga ei akono i te au apinga tei anoanoia i te pae kopapa no tatou uaorai me kare no to tatou ngutuare tangata, me e akarongo tikai to tatou, ka koropini to tatou oraanga i te angaanga ta te Atua i akaue maira ia tatou no runga i tona Patireia. I te reira taime katoa oki kare tatou e akaruke ua i te apainga no to tatou ngutuare tangata.—1 Timo. 5:8; Maseli 29:15.
11. (a) Akapeea ta Iesu akatutu anga i te tika e kare e aiteite te angaanga tei oti i te katoatoa i te akatotoa anga i te tuatua no te Patireia? (e) Eaa te au tika te ka akatuke i te reira?
11 E maata atu te taime e rauka ana i tetai papaki o tatou i te tutu aere tei kore i rauka ana i etai atu. Inara i tana parapore no te au tu one ke ke kua akakite mai a Iesu e ko te aronga katoa tei aite to ratou ngakau ki te one meitaki ra ka akatupu te reira i te ua. Eaa te maata? E tukeke te au tu no te aronga tatakitai. Ko te pakari, te tu oraora o te kopapa e te au apainga i te ngutuare e au tumu katoatoa ia. Inara me e ariki anga ngakau tika tikai tetai, e maata te ka rauka i te raveia.—Mata. 13:19, 23.
12. Eaa te akakoroanga meitaki i te pae vaerua te akamaroiroiia ra te aronga mapu kia akamanako?
12 E mea meitaki te akanoo i te au akakoroanga ei tauturu ia tatou kia akatotoa i ta tatou tuanga i te angaanga no te Patireia. Ka tau te aronga mapu kia manako pakari i te akaraanga meitaki rava to te Kerititiano mapu e te totomapu ko Timoteo. (Philipi 2:19-22) Eaa atu rai tetai apinga meitaki na ratou kia rave mari ra kia o atu ki te angaanga orometua i te au taime ravarai i te akamutu anga i ta ratou apii? Pera katoa oki, te aronga kua pakari mai ka puapingaia na te akanooanga i te au akakoroanga meitaki i te pae vaerua.
13. (a) Naai e tuku te tika e eaa te ka rauka ia koe uaorai i te rave i te angaanga no te Patireia? (e) Me ka kimi tikai tatou i te Patireia na mua, e akapapu anga te reira i teaa?
13 Kare na te akaapaanga i te aronga ta tatou e manako ra e ka rauka kia maata atu te angaanga, ka tau tatou kia akakeuia e te akarongo kia akono kia tere tatou uaorai ki mua kia raukaʼi ia tatou te tavini ia Iehova e tae roa ki te kianga katoa te ka rauka i to tatou uaorai turanga no te rave. (Roma 14:10-12; Gala. 6:4) Mei tei akakiteia mai ra ia Iobu, kua maro a Satani e te manako maata ua ra tatou i ta tatou au apinga i te pae kopapa, to tatou uaorai meitaki e to tatou uaorai puapinga, e ko to tatou manako akakeu i te tavinianga ki te Atua e mea noinoi ia. Inara me te kimi tika ra tatou i te Patireia na mua, te o atu ra tatou i te akapapuanga e e pikikaa kino maata te Tiaporo. Te oronga ra tatou i te akapapuanga e eaa te mea mua i to tatou oraanga, kare ia i te apinga kopapa kare katoa oki i te meitaki no tatou uaorai mari ra ko te angaanga na te Atua. Ka akapapu tatou na te tuatua e te angaanga e e inangaro oonu to tatou ia Iehova, ta tatou turuanga tiratiratu i tona ra ngateitei e to tatou inangaro no te au tangata katoa.—Maseli 27:11; Iobu 1:9-11; 2:4, 5.
14. (a) Eaa ra ka puapingaʼi tetai papaanga no te angaanga tutu aere? (e) Eaa te maata o te rave anga a te Au Kite e manganui i te angaanga tutu aere, e no teaa ra?
14 Ka rauka na tetai papaanga e tauturu ia tatou kia maata atu te angaanga e oti i ta tatou e matau ana i te rave. E ‘tuatau tau’ ta Iehova uaorai no te raveanga i tana akakoroanga, e e mea meitaki no tatou kia aru i te reira. (Exodo 9:5; Mareko 1:15; Gala. 4:4) Me ka rauka, e meitaki te rave i te angaanga tutu aere kia okotai me kore ra e kia tere atu i te au taime tei akapapaia i te epetoma tatakitai. E au ngauru ua atu tauatini Kite no Iehova takapini i te ao katoa tei o atu ki te painia tauturu e te rekareka ra i te akapou e rua me kare e maata atu nga ora i te ra tatakitai, i te tutu aereanga i te tuatua meitaki. Ko tetai papaki te rave tamou ra; e ko etai, e tokoiti ua taime i te mataiti. E manganui etai atu tauatini te tavini ra ei painia tamou, i te raveanga e toru ora i te ra tatakitai, i te akakitekite aere i te tuatua no te Patireia. Ko tetai papaki, e painia takake e e aronga angaanga evangeria, te akapou ra e maata roa atu te taime i te angaanga no te Patireia. E noatu me te angaanga tutu aere ra me kare, ka rauka ia tatou te kimi i te au tuatau no te akakitekite i te manakonakoanga no te Patireia ki te aronga katoa te ka akarongorongo i te au atianga tau ravarai. (Akaaiteia atu kia Ioane 4:7-15.) Ka tau tatou katoatoa kia akamanako papu no runga i ta Iesu i totou ra e “e tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” Ka tau tatou kia umuumu i te rave kia ki te tuatau katoa e rauka no te reira angaanga.—Mata. 24:14; Ephe. 5:15-17.
15. I ta tatou angaanga orometua, eaa ra koe i manako ei e e tau te ako a 1 Korinetia 15:58 i teianei?
15 Te angaanga taokotai ra te Au Kite o Iehova i roto i te au tuanga ravarai i teianei ao, noatu tei ea te enua te noo ra ratou, te rave katoatoa ra i teia angaanga meitaki. Te akapiri ra ratou i te ako akauruia o te Puka Tapu kia ratou uaorai e: “Kia maroiroi kotou, auraka e ngaueue, kia maata nei te rave anga i te angaanga a te Atu, auraka e tivata, kua kite oki kotou e, kare te mea puapinga kore te angaanga a te Atu, ta kotou e rave na.”—1 Kori. 15:58.
Uriuri Akaou Anga
● Ia Iesu i tuatuaʼi kia na mua i te kimi i te Patireia, eaa tana e akataka maira ka tau kia tukuia ki roto i te tuanga rua?
● Eaa te manako tau no tatou no te akonoanga i te au apinga i te pae kopapa no tatou uaorai e to tatou ngutuare tangata? Eaa te tauturu te ka orongaia mai e te Atua no tatou?
● E tuke anga ainei tetai no te maata o ta tatou ka rave i te angaanga no te Patireia, penei kia rave ua tatou i tetai tuanga? No teaa ra?