Eaa te Tuatau ki Mua no te Au Mamoe e te Au Puakanio?

“E nana e akataka ia ratou, mei te tiaki mamoe e akataka i te mamoe e te puaka-nio ra.”​—MATAIO 25:32.

1, 2. Eaa ra i tau ei kia manako maata tatou i te parapore o te mamoe e te au puakanio?

KO IESU KARAITI tikai te Puapii maata rava i runga i te enua nei. (Ioane 7:46) Ko tetai o tana au ravenga apiianga na te au parapore, me kare akatutu anga. (Mataio 13:34, 35) E ngoie ua teia inara e maata te ririnui i te orongaanga i te au tuatua mou totou oonu i te pae vaerua ra.

² I te parapore o te mamoe e te puakanio, kua tou maira a Iesu i te tuatau nona e rave ei na roto i te angaanga taka ke: “E kia tae maira te Tamaiti a te tangata ma tona kakā, e . . .” (Mataio 25:31) Ka tau teia kia akamanako ia tatou no te mea ko te akatutu anga ia i akaoti ei a Iesu i tana pauanga i te uianga: ‘Eaa te akairo o toou aerenga mai, e te openga o teianei ao?’ (Mataio 24:3) Inara eaa te aite anga o teia no tatou nei?

3. I te tuanga mua o tana tuatua anga, eaa ta Iesu i tuatua te ka tupu i muri ua ake i te akamata anga te mate maata ra?

³ Kua totou maira Iesu i te au tupu anga maata te ka rokoia “i muringao” i taua mate maata ra, “kare e roaia” ko te au tupu anga ta tatou e tatari nei. Kua karanga aia e ei reira “te akairo o te Tamaiti a te tangata” e mama mai ei. Ka akatupu teia i tetai manata maata ki “te au kopu-tangata ravarai o te ao nei” ka “kite ratou i te Tamaiti a te tangata i te aere anga mai na roto i te tiao rangi, ma te mana, e te kakā maata.” Ka aere kapiti mai te Tamaiti a te tangata ma “tana au angela.” (Mataio 24:21, 29-31)a Akapeea i reira te parapore o te mamoe e te puakanio? Kua tuku te au Puka Tapu ou i te reira ki roto i te Mat pene 25, inara e tuanga ia no ta Iesu pauanga, i te orongaanga mai i etai atu tu no tona aerenga mai ma te kaka e te manakoanga ki runga i tana akavaanga i “to te pa enua ravarai.”​—Mataio 25:32.

Au Akatutu i Roto i te Parapore

4. Eaa te taiku anga akamataanga no Iesu ta te parapore no te mamoe e te au puakanio i tuatua mai, e koai atu te o maira ki roto i taua tutu ra?

⁴ Kua akamata a Iesu i te parapore i te na ko anga: “E kia tae maira te Tamaiti a te tangata.” Penei kua kite koe koai “te Tamaiti a te tangata.” E putuputu te aronga tata Evangeria i te taiku i te reira tuatua no Iesu. Noatu rai ko Iesu uaorai kua pera aia, kare e ekoko anga no te manako anga i te orama a Daniela no “tetai mei te Tamaiti a te tangata ra” i te akavaitata anga mai ki to te Au Ra Taito ra kia orongaia mai “te mana, e te kakā, e te basileia nona.” (Daniela 7:13, 14; Mataio 26:63, 64; Mareko 14:61, 62) Noatu rai e ko Iesu te mea maata i roto i taua parapore ra, kare ra ko ia anake ua to te reira. I mua akera i teia tuatua anga, mei tei taikuia maira ia Mataio 24:30, 31, kua na ko maira aia e kia ‘tae mai te Tamaiti a te tangata ma te mana e te kakā maata,’ ka akono tana au angera i tetai tuanga puapinga maata. Mei te reira katoa, te akaari maira te parapore o te mamoe e te puakanio i te au angera ma Iesu i tona ‘noo anga ki runga i tona terono kakā’ i te akava. (Akaaite ia Mataio 16:27.) Inara ko te Akava e tana au angera tei te rangi, pera katoa ainei te au tangata tei tuatuaia ra i te parapore?

5. Akapeea tatou i te akataka anga i te “au taeake” o Iesu ra?

⁵ Na te akara anga i te parapore ra te akakite mai ra i nga pupu e toru te tau ra kia akatakaia e tatou. Kapiti atu ki te mamoe e te puakanio, kua taiku maira te Tamaiti a te tangata i te toru o te pupu tei akatakaia ra ei akatakaanga i te mamoe e te puakanio. Kua tapa a Iesu i teia pupu toru e au taeake vaerua nona. (Mataio 25:40, 45) Ka tau ratou e e aronga akamori mou, no te mea kua tuatua a Iesu: “Te akono i te inangaro o taku Metua . . . , ko toku ia taeake, taku tuaine, e taku metua vaine.” (Mataio 12:50; Ioane 20:17) Kia taka meitaki ra, kua tata a Paulo no te au Kerititiano e tuanga ra “no te uanga o Aberahama” e e au tamariki ra na te Atua. Kua karanga aia i teia aronga e “au taeake” no Iesu e “ko tei rauka katoa te kapiki anga no te rangi maira.”​—Ebera 2:9–​3:1; Galatia 3:26, 29.

6. Koai ma “te aronga mea ngiti” o to Iesu au taeake?

⁶ Eaa ra a Iesu i taiku ei i “tetai mea ngiti rava” o tona au taeake nei? Te akakite maira taua au tuatua ra i ta te au apotetoro i akarongo ana i mua akera. I te akatuke anga ia Ioane Papetito, tei mate ra i mua ake i to Iesu matenga e no reira e manakonako anga tona no runga i te enua nei, ma to te aronga te ka rauka ia ratou te oraanga ki te rangi; kua na ko maira a Iesu: “Ta te vaine i anau nei, kare atu ïa e maata atu ia Ioane bapetizo nei: ko te iti rava ra i te basileia o te ao [rangi] ra, e maata atu ïa iaia.” (Mataio 11:11) Ko tetai papaki o te aronga te aere ra ki te rangi penei e maata ta ratou i rave i roto i te putuputuanga, mei te au apotetoro rai, e ko etai e mea ngiti mai ta ratou, inara e au taeake ratou katoatoa no Iesu i te pae vaerua. (Luka 16:10; 1 Korinetia 15:9; Ephesia 3:8; Ebera 8:11) No reira ra, me i akara anga mea ngiti ua tetai papaki i runga i te enua nei, e au taeake anake ratou nona ra e kua tau kia akonoia ratou ei au taeake nona.

Koai ma te Mamoe e te Au Puakanio?

7, 8. Eaa ta Iesu i tuatua no te mamoe ra, no reira eaa ta tatou ka manako no ratou ra?

⁷ Ka tatau tatou no te akavaanga i te au mamoe ra: “Ei reira [a Iesu] e tuatua mai ei kia ratou ki tona rima katau ra, Ka aere mai kotou, te aronga i akaoraia e taku Metua, e noo ki te basileia i akonoia no kotou mei te maani anga mairai i te enua nei: I pongi ana au, e kua angai mai kotou iaku; i kaki vai ana au, e kua akainu mai kotou iaku: i tangata ke ana au, e na kotou i kite mai iaku: I putaua ana au, e kua akakakau mai kotou iaku: i maki ana au, e kua utuutu mai kotou iaku: i tapekaia ana au, e kua aere ake kotou iaku. Ei reira te aronga tuatua-tika e karanga atu ei, e na ko atu ei kiaia ra, E te Atu, i naea matou i akaraʼi ia koe i te pongi anga, e kua angai? e te kaki anga vai, e kua akainu? I naea matou i kite atu ei ia koe i te tangata ke anga, e kua kite atu? e te putaua anga, e kua akakakau atu? I naea oki matou i akaraʼi ia koe i te maki anga, e i roto i te are tapekaanga, e kua aere atura ia koe ra? Ei reira te Ariki e tuatua mai ei kia ratou, na ko maira, Koia mou taku e karanga atu kia kotou nei, Ko kotou i pera i tetai taeake mea ngiti rava o taku au taeake nei, kua pera mai ïa iaku.”​—Mataio 25:34-40.

⁸ E mea tau ra, ko te au mamoe te ka akatakaia ki te pae katau o Iesu ma te ngateitei e te akaperepere te akatutu maira i tetai pupu tangata. (Ephesia 1:20; Ebera 1:3) Eaa ra ta ratou i rave e i naea oki? Kua karanga a Iesu e kua rave takinga meitaki ratou ma te akangateitei, e kua oronga ua i te kai nana, te inu, e te kakau, ma te tauturuanga iaia i tona maki anga me kare iaia i te are tapekaanga. I te tuatua anga te mamoe e kare ratou i rave i teia kia Iesu uaorai, kua akakite atura aia e i turu ana ratou i tona au taeake i te pae vaerua ra, koia te toenga o te au Kerititiano akatainuia ra, no te reira tu kua rave ratou i te reira kiaia.

9. Eaa ra i kore ei e tau kia tupu te parapore ra i te Tauatini Mataiti ra?

⁹ Kare te parapore ra e tupu i te tuatau o te Tauatini mataiti, no te mea kare tei akatainuia ra e riro ei au tangata ongeia, kaki inu, makiia, me kare tapekaia. Inara, e manganui o ratou, kua kite i te reira tu i te tuatau o te openga o teia akatereanga o te au mea nei. Mei te uriia mai anga a Satani ki raro ki te enua nei, kua akariro aia i te toenga o tei akatainuia ra ei apinga taka ke no tona riri, ma te apai mai anga i te avirianga, te tamamae, e te mate ki runga ia ratou.​—Apokalupo 12:17.

10, 11. (a) Eaa ra i tau kore ei kia manakoia e te kapiti ra te mamoe i te aronga ravarai te rave ra i tetai angaanga takinga meitaki ki te au taeake o Iesu? (e) Koai ma tei tau ra e ko ta te au mamoe i akatutu maira?

¹⁰ Te tuatua ra ainei a Iesu e ko te aronga katoatoa e rave i tetai takinga meitaki mea ngiti ua ki tetai o tona au taeake ra, mei te orongaanga i tetai potonga varaoa, me kare e karati vai, te tau ra ei tetai o teia au mamoe? E tika e, ko te orongaanga i taua tu takinga meitaki ra penei ka akaata mai i te takinga meitaki o te tangata, inara, i te akara anga tikai e maata atu te piri maira ki te au mamoe o teia parapore nei. Ei akatauanga, kare a Iesu e tuatua ana no te aronga irinaki kare e Atua ra me kare no te au orometua te ka rave i tetai angaanga takinga meitaki ki tetai o tona au taeake ra. Ei tuke anga, e rua taime o Iesu i karangaʼi i te mamoe ra ei “aronga tuatua-tika.” (Mataio 25:37, 46) No reira ka tau te au mamoe ra ei aronga tei rave ra i te tauturu anga na te​—rave turuanga—​i te au taeake o Karaiti no tetai tuatau e kua akono i te akarongo tae roa kia rauka tetai turanga tuatua tika ki mua i te aroaro o te Atua ra.

¹¹ I te au anere mataiti kua topa, e manganui mei ia Aberahama rai kua rekareka i tetai turanga tuatua tika. (Iakobo 2:21-23) A Noa, a Aberahama, e etai atu o te aronga tiratiratu ra ka kapitiia atu ki roto i te “mamoe ke atu” te ka akatuangaia i te oraanga ki roto ia Parataito i raro ake i te Patireia o te Atua ra. I teia au tuatau ua ake nei e au mirioni ua atu kua tamata i te akamori mou ei mamoe ke atu e kua riro mai ei “anana okotai” ma te aronga akatainuia ra. (Ioane 10:16; Apokalupo 7:9) Ko teia aronga ma te manakonako anga no te enua nei te kite ra i to Iesu au taeake ei au karere no te Patireia e no reira kua tauturu atu ia ratou​—i te pae kopapa e te pae vaerua oki. Te akamanako ra a Iesu e kua raveia kiaia ta te mamoe ke atu i rave ki tona au taeake i te enua nei. Ko taua aronga te ora ra me aere mai aia i te akava anga i to te pa enua katoa ka akatakaia ratou ei mamoe.

12. Penei eaa te mamoe i ui ei e i akapeea ratou i te rave anga i te au takinga meitaki kia Iesu?

¹² Me te rave nei te mamoe ke atu i te tutuanga i te tuatua meitaki i teianei ma te aronga akatainuia ra e te tauturu atura ia ratou, eaa ra ratou ka ui ei e: “E te Atu, i naea matou i akaraʼi ia koe i te pongi anga, e kua angai? e te kaki anga vai, e kua akainu?” (Mataio 25:37) Penei e tuke tuke te au tumu. E parapore teia. Na te reira, ta Iesu akaari anga i tona manako oonu no tona au taeake i te pae vaerua; te manako ngakau ra aia ma ratou katoa, te mamae ra ma ratou katoa. Kua tuatua a Iesu i mua akera e: “Ko tei kite mai ia kotou, kua kite mai ïa iaku, e te kite mai iaku nei, kua kite mai ïa i tei tono mai iaku nei.” (Mataio 10:40) I teia akatutu anga, kua akatotoa maira Iesu i te kaveinga, i te akaarianga e ko tei raveia (e meitaki me kare e kino) ki tona au taeake ka itae atu ia ki te rangi ra; mei te mea rai e kua raveia kiaia i te rangi ra. Pera katoa, te akaketaketa maira Iesu i konei i to Iehova turanga no te akavaanga, ma te akataka anga e ko ta te Atua akava anga, me e akaperepere anga me kare e akaapa anga, e mana ia e te tika. Kare e rauka i te au puakanio i te oronga i te kotoe anga, ‘E, naringa oki matou i akara mata tika atu ia koe na.’

13. Penei eaa te aronga i te tu mei te puakanio rai i karangaʼi ia Iesu ei “Atu”?

¹³ Me kite anake tatou e aea e raveiaʼi te akava anga te akakiteia maira i roto i te parapore, ka marama atu tatou e koai ma te au puakanio ra. Ko te tupu anga o te reira a te tuatau “e kiteaʼi te akairo o te Tamaiti a te tangata ki runga i te rangi: e ei reira te au kopu-tangata ravarai o te ao nei e aue ei, kia kite ratou i te Tamaiti a te tangata i te aere anga mai . . . ma te mana, e te kakā maata.” (Mataio 24:29, 30) Te aronga ora atu i te mate ki runga ia Babulonia Maata ra ko ratou tei akono aviri atura i te au taeake o te Ariki penei i teianei ka karanga rapurapu i te Akava ei “Atu,” ma te manakonako anga kia akaora i to ratou au oraanga.​—Mataio 7:22, 23; akaaite ia Apokalupo 6:15-17.

14. Na runga i teea tumu anga ta Iesu akava anga i te mamoe e te au puakanio?

¹⁴ Inara, kare ta Iesu akava anga e akatumuia ki runga i te au tuatua anga rapurapu a te aronga aere pure i mua ana, te aronga irinaki kare e Atua, me kare etai ke atura. (2 Tesalonia 1:8) Kareka ra, ka akara akaou te akava i te tu ngakau e te au angaanga kua topa a te au tangata noatu rai ki “tetai taeake mea ngiti rava [o tona au taeake].” E tika rai, te topa aere nei te numero o te au Kerititiano akatainuia te toe nei ki runga i te enua. Inara, me te vai maira te aronga akatainuia, ko ratou ra “te tavini akono meitaki e te pakari,” i te oronga anga i te kai vaerua e te arataki anga, te vaira te tuatau no te aronga tau ei mamoe kia rave i te meitaki ki taua pupu tavini ra, mei ta te ‘aronga maata rava no te pa enua ravarai, e te au kopu ravarai, e te au iti-tangata ravarai’ i rave ra.​—Apokalupo 7:9, 14.

15. (a) Akapeea tetai aronga e manganui i te akaari anga ia ratou uaorai e mei te puakanio rai te tu? (e) Eaa i tau ei kia kopae tatou i te tuatuaanga e e mamoe tetai me kare e puakanio?

¹⁵ I akapeea te akono angaia te au taeake o Karaiti e pera katoa te au mirioni ua atu au mamoe ke atu tei kapitiia ra ma ratou katoa ei anana okotai ra? Penei e manganui te au tangata kare ra i takinga kino atu i te au komono o Karaiti ra, inara kare katoa oki ratou i akono atu i tona au tangata ma te aroa. I te ikianga i teianei ao kino, kua kopae ke te aronga mei te puakanio rai te tu i te tuatua no te Patireia, me i akarongorongo tika tika atu me kare na tetai atu tu. (1 Ioane 2:15-17) Inara, i te openga tikai, ko Iesu tei akatakaia ei rave i te akava anga. Kare ia tatou te tika i te akataka koai ma te mamoe e koai ma te au puakanio.​—Mareko 2:8; Luka 5:22; Ioane 2:24, 25; Roma 14:10-12; 1 Korinetia 4:5.

Eaa te Tuatau ki Mua no Nga Pupu Tataki Tai Nei?

16, 17. Eaa te tuatau ki mua te vai maira no te mamoe?

¹⁶ Kua oronga maira a Iesu i tana akava anga i te mamoe ra: “Ka aere mai kotou, te aronga akaoraia e taku Metua, e noo ki te basileia i akonoia no kotou mei te maani anga mairai i te enua nei.” Mei teaa ra tetai patianga maanaana​—“Ka aere mai”! Ki teaa? Ki te ora mutu kore, mei tana i akakite maira i te akaoti anga ra: “Te aronga tuatua-tika ra [ka tomo atu ratou] ei te ora mutu kore ïa.”​—Mataio 25:34, 46.

¹⁷ I te parapore o te au tareni ra, kua akakite maira Iesu e eaa te umuumuia ra no te aronga te ka tutara ma ia katoa ki te rangi, inara i teia parapore te akakite maira aia e eaa te manakoia maira i te aronga ei au tangata no raro ake i te Patireia. (Mataio 25:14-23) E mea tau ra, no to ratou turu anga i te au taeake o Iesu ma te ngakau katoa ra, ka akatuangaia te au mamoe i tetai ngai i te tuanga o tona Patireia i te enua nei. Ka rekareka ratou i te oraanga ki runga i te enua parataito​—e manakonako anga ta te Atua ra i teateamamao mai no ratou “mei muatangana mai o teianei ao” o te au tangata tei rauka ra kia okoia mai.​—Luka 11:50, 51.

18, 19. (a) Eaa te akava anga ta Iesu ka rave no te au puakanio? (e) Eaa ka papu ei ia tatou e kare te au puakanio e aro atu i te tamamaeanga mutu kore?

¹⁸ Mei teaa ra te tuke anga te akava anga te ka tukuia ki runga i te au puakanio ra! “Ei reira aia e tuatua ake ei ki tei te rima kaui, E aere ke atu kotou, e te aronga taumaaia, ki roto i te ai mate kore, tei akonoia no te diabolo e tana au angela. I pongi ana au, e kare akenei kotou i o mai kai naku: i kaki vai ana au, e kare akenei kotou i akainu mai iaku: I tangata ke ana au, e kare kotou i kite mai iaku: i putaua ana au, e kare kotou i akakakau mai iaku; i maki ana au, e i tapekaia ana au, e kare kotou i akono mai iaku. Ei reira ratou e tuatua ake ei kiaia, e na ko ei ra e, E te Atu, i naea matou i kite atu ei ia koe i te pongi anga, e te kaki anga vai, e te tangata ke anga, e te putaua anga, e te maki anga, e i roto i te are tapekaanga, e kare i takinga-meitaki atu ia koe? Ei reira aia e tuatua ake ei kia ratou, e na ko ei ra e, Koia mou taku e karanga atu kia kotou na, Kare kotou i akapera ki tei mea ngiti rava i roto ia ratou nei, kare katoa ïa i pera mai iaku.”​—Mataio 25:41-45.

¹⁹ Kua kite te aronga apiipiiia i te Puka Tapu e kare te aite anga o teia e e au meta mate kore to te aronga mei te puakanio rai te tu ka mamae ki roto i te ai mate kore. Kare, no te mea e meta te au tangata; kare o ratou meta mate kore. (Genese 2:7; Koheleta 9:5, 10; Ezekiela 18:4) Na te tukuanga i te tika no te au puakanio kia uriia ki roto i te “ai mutu kore,” te akataka ra te Akava i te aite anga e akapouanga kare e manakonako anga no te tuatau ki mua, ko te reira katoa oki te openga mutu kore no te Tiaporo e tana au temoni. (Apokalupo 20:10, 14) No reira, te akanoo maira te Akava a Iehova i nga akava anga tuke tetai i tetai. Kua tuatua aia ki te mamoe ra, “Ka aere mai”; ki te au puakanio ra, “E aere ke atu kotou.” Ka akatuangaia te mamoe i te “ora mutu kore.” Te au puakanio ka rauka ia ratou “te mate mutu kore.”​—Mataio 25:46.b

Eaa to te Reira Aite Anga no Tatou?

20, 21. (a) Eaa te angaanga puapinga maata na te au Kerititiano kia rave? (e) Eaa te akataka keanga te raveia nei i teianei? (ng) Eaa te turanga o te au tangata me akamata mai te tupu anga o te parapore no te au mamoe e te au puakanio ra?

²⁰ E maata ta nga apotetoro e a tei akarongo atura i ta Iesu pauanga no te akairo o tona parutia e te openga o te akatereanga, kia akamanako. Ka anoanoia ratou kia ara e kia matakite. (Mataio 24:42) Ka anoano katoaia ratou kia rave i te angaanga akakite aere tei taikuia ra ia Mareko 13:10. Te rave maroiroi ra te Au Kite o Iehova i te reira angaanga i teia tuatau nei.

²¹ Inara, eaa te aite anga o teia maramaanga ou no te parapore o te mamoe e te au puakanio kia tatou nei? Ae, kua akamata ke ana te au tangata i te akataka anga ia ratou. Ko tetai papaki tei runga i ‘te mataara pararauare te taki atura ki te akapouanga,’ e ko etai ke atu te tauta ra kia vai mai ki runga i ‘te arataa o iti te taki atura ki te ora.’ (Mataio 7:13, 14) Inara ko te tuatau e akakite ei a Iesu i tana akava anga openga ki runga i te mamoe e te au puakanio tei akaataia maira i te parapore te vai maira ki mua. Me aere mai te Tamaiti a te tangata i tana tuanga ei Akava, ka akataka aia e manganui te au Kerititiano mou​—ko “tetai aronga maata rava” tikai o te mamoe akatapuia ra—​te ka tau kia na roto atu i te tuanga openga o “te mate maata” kia tae atu ki roto i te ao ou. Ka tau te reira manakonako anga ei tumu no te rekareka anga i teianei. (Apokalupo 7:9, 14) I tetai pae, e numero tini maata rava no “to te pa enua ravarai” kua akapapu ia ratou uaorai kia aite atu ki te au puakanio marokiakia ra. “Ka aere ke atu ratou ki te mate mutu kore.” Mei teaa ra te meitaki anga no te enua nei!

22, 23. I te mea a te tuatau ki mua te tupuanga o te parapore ra, eaa ra i puapinga maataʼi ta tatou angaanga tutu aereanga i teia tuatau nei?

²² I te mea ka tupu i te tuatau poto ki mua te akava anga te akatakaia maira i te parapore, noatu rai i teianei te tupu nei tetai apinga puapinga maata. Te rave nei tatou te au Kerititiano i tetai angaanga akaora oraanga na te akakitekiteanga i tetai tuatua te ka akatupu i tetai akataka keanga i roto i te au tangata. (Mataio 10:32-39) Kua tata a Paulo: “‘Ko te kapiki i te ingoa o [“Iehova,” NW] ra, e ora ïa.’ Eaa ua ra te tangata e tikaʼi kia kapiki atu kiaia i tei kore i akarongoia e ratou ra? e eaa oki ratou e tikaʼi kia akarongo iaia i tei kore i kitea e ratou ra? e eaa oki ratou e kite ei i te akakite kore?” (Roma 10:13, 14) Te itae nei ta tatou angaanga tutu aereanga ki te au tangata e te tere atu i te 230 au enua ma te ingoa o te Atua e tana tuatua no te ora. Ko te au taeake akatainuia o Karaiti te rave nei i te aratakianga i teia angaanga. E vaitata i te rima mirioni o te mamoe ke atu kua kapitiia kia ratou i teianei. E ko te au tangata takapini i teianei ao te akarongorongo maira i te tuatua te akakiteia ra e te au taeake o Iesu.

²³ E manganui te akarongorongo ra i ta tatou tuatua ia tatou e tutu aere ra mei tera are ki tera are me kare i tetai ua atu tuatau. Penei ka kite etai atu i te Au Kite o Iehova e ta tatou e komono ana na roto i te au tu kare ra tatou i kite. Me tae mai te tuatau akava anga, eaa te maata o ta Iesu ra akamanako anga no te apainga a te katoatoa e te tuanga tau na te ngutuare tangata? Kare e rauka ia tatou i te tuatua, e e puapinga kore kia ta manako ua. (Akaaite ia 1 Korinetia 7:14.) E manganui i teianei te ariu atura i te taringa turi, te aviri ra, me kare te piri atura i te takinga kino tikai i te au tangata o te Atua. No reira, e tuatau kino teia; penei te tupu atura te reira aronga kia riro mei ta Iesu ka akava ra ei au puakanio.​—Mataio 10:22; Ioane 15:20; 16:2, 3; Roma 2:5, 6.

24. (a) Eaa ra i puapinga maataʼi no te aronga tataki tai kia akarongo meitaki mai i ta tatou tutuanga? (e) Kua tauturu teia apii ia koe uaorai kia akono i teea tu manako i taau angaanga orometua?

²⁴ Inara, e mea mataora, e manganui te akarongo meitaki maira, ka apii i te Tuatua a te Atua, e ka riro mai ei Au Kite o Iehova. Penei ko tetai papaki te akara anga mei te puakanio rai te tu, ka taui e ka riro mei te tu mamoe rai. Ko te tumu ia e ko te aronga te akarongo maira e te turu ra i te toenga o te au taeake o Karaiti te oronga maira i teianei i te akapapu anga te ka oronga i tetai tumu anga no ratou kia akatakaia ki te pae katau o Iesu, a te tuatau poto ki mua, i tona noo anga ki runga i tona terono i te rave i te akava anga. Te akameitakiia nei teia aronga e ka tamou marieia no te akameitaki angaia. E no reira, ka tau teia parapore kia akakeu ia tatou kia maroiroi atu te rave i te angaanga Kerititiano. I mua ake ka reiti roaʼi, ka anoano tatou kia rave i te ka rauka katoa ia tatou i te akakitekite anga i te tuatua meitaki o te Patireia e na te reira mataara ka oronga kia etai atu i te tika kia akarongo. Ei reira ka akaruke atu kia Iesu te tika kia rave i te akava anga, te akaapa anga me kare te akaperepere anga.​—Mataio 25:46.

[Au Tataanga Rikiriki i Raro]

Te Maara Ainei Koe?

◻ Eaa te au tu aiteite i rotopu ia Mataio 24:29-31 e Mataio 25:31-33 te akaari ra e ko te parapore no te mamoe e te au puakanio ko te tuatau ki mua tona tupu anga, e anaea te reira?

◻ Koai ma “te aronga mea ngiti” o to Iesu au taeake ra?

◻ Akapeea ta Iesu taiku anga i te tuatua “aronga tuatua-tika” i te tauturu anga ia tatou i te akataka anga e koai ta teia e tuatua ra e koai ta ratou kare ra e akakite mai ana?

◻ Noatu rai e ko te tuatau ki mua e akatupuiaʼi taua parapore ra, eaa ra i puapingaʼi e te rapurapu ta tatou tutu aere anga i teianei?

[Pia/​Tutu i te kapi 24]

E TAMANAKO I TE AU TU AITEITE

Mataio 24:29-31 Mataio 25:31-33

Ko ia ma tana au angera Ka tae mai te au angera ma ia katoa

Ka kite te au kopu tangata ravarai E akaputuputuia to te pa enua ravarai; ka akavaia o te ao nei iaia te au puakanio i te openga (ka ope te mate maata)

[Akameitakianga]

Garo Nalbandian