Tei te Ngai Mua Ainei te Atua i Roto i Toou Ngutuare Tangata?

“E anoano atu koe i toou Atua ia Iehova ma to ngakau katoa.”​—MAREKO 12:29, 30.

1. Mei teaa te puapinga e kia inangaro tatou ia Iehova?

“KO TEEA tei maata i te au akauenga katoa?” i ui ei tetai tangata tata kia Iesu. I te mea e ka oronga i tona uaorai manako, kua pau atu a Iesu i tana uianga na te taikuanga i te Tuatua na te Atua ia Deuteronomi 6:4, 5. Kua pau aia e: “Teia tei maata o te au akauenga katoa ra, ‘E akarongo mai koe, e Iseraela; Ko to tatou Atua ra ko Iehova, okotai oki Iehova:’ ‘E anoano atu koe i toou Atua ia Iehova ma to ngakau katoa, e ma to vaerua katoa, e ma to manako katoa, e ma to ririnui katoa.’”​—Mareko 12:28-30.

2. (a) Eaa te patoi anga ta Iesu i aro atu? (e) I tetai au taime eaa te ka akariro kia ngata i te akamareka ia Iehova?

² Ei akarongo atu ki ta Iesu i karanga e ko te akauenga maata​—te mea puapinga rava ­atu—te umuumuia ra kia rave ua rai tatou i tei marekaia e Iehova. Kua pera a Iesu, noatu e i tetai atianga kua rave te apotetoro Petero i te mea ke mei to Iesu kaveinga ra, e i tetai atu atianga ra kua pera katoa tona uaorai kopu tangata. (Mataio 16:21-23; Mareko 3:21; Ioane 8:29) Akapeea me tei roto uaorai koe i tetai turanga mei teia? Akapeea me inangaro te au mema ngutuare tangata ia koe kia akamutu i taau apii Puka Tapu e toou pirianga ki te Au Kite o Iehova. Ka tuku ainei koe i te Atua i te ngai mua na te raveanga i tei marekaia e ia? Ka vai ainei te Atua i te ngai mua, noatu e penei ka patoi te au mema ngutuare tangata i taau au tauta anga no te tavini iaia?

Te Ereere o te Patoi Anga Ngutuare Tangata

3. (a) Eaa ta te au apiianga a Iesu ka akatupu ki te ngutuare tangata? (e) Akapeea te au mema ngutuare tangata i te akaari anga e koai ta ratou e inangaro maata ra?

³ Kare a Iesu i akameangiti ana i te tu ngata te ka tupu mai me patoi tetai pae o te ngutuare tangata i te mema te ariki ra i tana au apiianga. “E kitea oki to te tangata nei enemi i roto i tona uaorai ngutuare,” i na Iesu ei. Inara, noatu te reira tupu anga maromaroa, kua akaari a Iesu e koai te ka vai i te ngai mua i te na ko anga e: “Ko tei maata tona inangaro i tona metua tane e tona metua vaine, e mea ngiti iaku, kare aia e tau iaku; e tei rai tona inangaro i te tama e te tamaine, e mea ngiti iaku, kare aia e tau iaku.” (Mataio 10:34-37) Ka tuku tatou i te Atua ko Iehova i te ngai mua na te aruanga i te au apiianga a tana Tamaiti, ko Iesu Karaiti, “te tutu tikai [o te Atua] uaorai.”​—Ebera 1:3; Ioane 14:9.

4. (a) Eaa ta Iesu i tuatua te ka o mai ki roto i te riro anga mai ei pipi nana? (e) Na teea tu te au Kerititiano kia makitakita i te au mema ngutuare tangata?

⁴ I tetai atu atianga ia Iesu e uriuri ra i te ka o tikai ki roto i te riro anga mai ei pipi mou nana, kua karanga aia e: “Me ka aere mai tetai kiaku nei e kare i makitakita i tona metua tane e tona metua vaine e tana vaine e tana tamariki e tona au taeake e tona au tuaine, ae, e pera katoa oki i tona uaorai meta, kare aia e tau ei pipi naku.” (Luka 14:26, NW) Kare te aiteanga o ta Iesu tuatua e kia makitakita tikai tana au pipi i to ratou au mema ngutuare tangata, mei te mea e kua akaue aia i te au tangata kia aroa katoa i to ratou au enemi. (Mataio 5:44) Mari ra, te aiteanga o ta Iesu tuatua koia kia meangiti mai te inangaro o tana au pipi no te au mema ngutuare tangata i to ratou inangaro no te Atua. (Akaaite ia Mataio 6:24.) I te marama anga i te reira, te karanga ra te Puka Tapu e kua “makitakita” a Iakoba ia Lea e kua inangaro ia Rahela, tera te aiteanga kare aia i inangaro ia Lea mei tana i inangaro maata ra i tona teina, ko Rahela. (Genese 29:30-32, NW) Pera katoa to tatou uaorai “meta,” me kore ora, i na Iesu ei, e tau ia kia makitakitaia, me kore kia meangiti mai te inangaroia, ia Iehova ra!

5. Akapeea a Satani i te takino kikite anga i te akapapa anga ngutuare tangata?

⁵ Tei Anga ra e Tei Oronga Mai i te Ora, te tau ra Iehova kia akono puia e tona au tavini katoatoa. (Apokalupo 4:11) ‘Ka akamingi au i taku turi ki raro i te aroaro o te Metua,’ i tata ei te apotetoro Paulo, ‘nona oki te ingoa i tapaia i te kopu-tangata ravarai, to te rangi, e to te ao katoa nei.’ (Ephesia 3:14, 15) Kua anga a Iehova i te akapapa anga ngutuare tangata na tetai tu umere e e inangaro natura to te au mema ngutuare tangata no tetai e tetai. (1 Ariki 3:25, 26; 1 Tesalonia 2:7) Inara, te takino kikite ra te Tiaporo ko Satani i teia inangaro natura no te ngutuare tangata, tei kapiti mai i tetai anoano no te akamareka i te aronga akaperepereia ra. Te akamura ra aia i te ai o te patoi anga ngutuare tangata, e e manganui te kite ra i te reira ei akaaoanga ki te tu anga papu atu no te tuatua mou Puka Tapu i roto i te reira.​—Apokalupo 12:9, 12.

Aroanga Atu i te Akaaoanga

6, 7. (a) Akapeea te au mema ngutuare tangata i te tauturu angaia kia ariki i te puapinga o te apii Puka Tapu e te pirianga Kerititiano? (e) Akapeea tatou i te akaari anga e te inangaro tikai ra tatou i to tatou au mema ngutuare tangata?

⁶ Eaa taau ka rave me maroia koe kia iki i rotopu i te akamarekaanga i te Atua me kore te akamarekaanga i tetai mema ngutuare tangata? Penei ka manako kino koe e kare te Atua e tapapa mai ia tatou kia apii i tana Tuatua e te taangaanga i tana au kaveinga me ka akatupu te reira i te taumaro anga ngutuare tangata? Inara ka akamanako ana. Me tuku koe i te au ma te akamutu i taau apii Puka Tapu me kore pirianga ki te Au Kite o Iehova, akapeea i reira te aronga akaperepereia ra e marama ei e ko te kite tika tikai o te Puka Tapu e ikianga ia no te ora e te mate?​—Ioane 17:3; 2 Tesalonia 1:6-8.

⁷ Penei ka akatutu tatou i te turanga na teia tu: Penei e kaki maata tikai to tetai mema ngutuare tangata i te kava. Na te kopaeanga me kore te akatika ua atu anga i tona manamanata kai kava ka riro ainei te reira ei mea puapinga tikai kiaia? Ka meitaki atu ainei i te akono ua i te au na te tuku ua atu anga ma te kore e rave i tetai mea no tona manamanata? Kare, penei ka akatika koe e e meitaki rava atu i te tauta i te tauturu iaia kia autu atu i tona manamanata kai kava, noatu e ka anoanoia te akakoromaki anga atu i tona tu riririri e te au tamataku anga. (Maseli 29:25) Ma te aiteite, me e inangaro tikai toou i te au mema ngutuare tangata, kare koe e tuku ua atu i te au ki ta ratou au tauta anga i te akamutu i taau apiianga i te Puka Tapu. (Angaanga 5:29) Na te tu papu anake anga atu e raukaʼi ia koe i te tauturu ia ratou kia ariki e na te akono anga i te au apiianga a Karaiti e ora tikai ia no tatou uaorai.

8. Akapeea tatou i te puapinga anga mei te tika e kua rave tiratiratu a Iesu i to te Atua anoano?

⁸ Penei i tetai au taime ka riro te tukuanga i te Atua i te ngai mua ei mea ngata tikai. Inara e akamaara, kua pera katoa rai a Satani i ngata ei ia Iesu i te rave i to te Atua anoano. Inara kare rava a Iesu i tuku ana i te au; kua akakoromaki aia i te mamae o tetai rakau tamamae anga no tatou nei. “To tatou Ora [ko] Iesu Mesia,” i na te Puka Tapu ei. “Ko tei mate no tatou.” (Tito 3:6; 1 Tesalonia 5:10) Kare ainei tatou e rekareka ana e kare a Iesu i tuku ana i te au ki te patoi anga? No te mea kua akakoromaki aia i tetai mate anga akaatinga, ka rauka ia tatou te manakonakoanga o te oraanga mutu kore i roto i tetai ao ou ponuiaau o te tuatua tika na te taangaanga anga i te akarongo ki roto i tona toto tei akamaringiia.​—Ioane 3:16, 36; Apokalupo 21:3, 4.

Tetai Tutaki Anga Maata ka Rauka

9. (a) Akapeea te au Kerititiano i te pirianga ki roto i te akaora anga i tetai atu? (e) Eaa te turanga o to Timoteo ngutuare tangata?

⁹ Kua kite ainei koe e ka rauka katoa ia koe i te piri atu ki roto i te akaoraanga i tetai atu, kapiti mai te au kopu tangata akaperepere ravaia ra? Kua raurau te apotetoro Paulo ia Timoteo: “E tamou tika rai i te reira [tei apiiia ra koe]: tei te akapera oki e oraʼi koe, e te aronga katoa e akarongo mai ia koe ra.” (1 Timoteo 4:16) Kua noo a Timoteo ki roto i tetai ngutuare veeia ra, no te mea e tangata irinaki kore tona metua tane Ereni. (Angaanga 16:1; 2 Timoteo 1:5; 3:14) Noatu e kare tatou i kite e me kua riro mai rai to Timoteo metua tane ei tangata irinaki, penei kua pera atu rai no te mea kua akatupu maataia e te tu akono meitaki o tana vaine, ko Eunike, e to Timoteo.

10. Eaa te ka rauka i te au Kerititiano i te rave no to ratou au tokorua irinaki kore?

¹⁰ Te akakite maira te Tuatua Tapu no te au tane e te au vaine tei mou tiratiratu ra i te tuatua mou Puka Tapu e ka riro ratou ei akaoraanga i to ratou au tokorua Kerititiano kore na te tauturuanga ia ratou kia riro mai ei aronga irinaki. Kua tata te apotetoro Paulo e: “E vaine akarongo kore ta tetai taeake, e i tika i taua vaine ra kia noo rai kiaia, auraka aia e tuku ke atu iaia. E e tane akarongo kore ta tetai vaine ra, e i tika i taua tane ra kia noo rai kiaia, eiaa aia e tuku ke atu iaia. Eaa oki koe e kite ei, e maine e, kare taau tane e ora ia koe? e eaa oki koe e kite ei, e tama e, kare taau vaine e ora ia koe?” (1 Korinetia 7:12, 13, 16) Kua akatutu te apotetoro Petero e akapeea te au vaine, mei tera te tu, te akaora anga i ta ratou au tane, te raurauanga e: “E kauraro marie i ta kotou au tane ra; kare tetai pae e akarongo i te tuatua ra, kia rauka mai ratou i te akono meitaki o ta ratou au vaine, auraka atu rai te tuatua.”​—1 Petero 3:1.

11, 12. (a) Eaa te tutaki anga tei rauka i te tauatini ua atu au Kerititiano, e eaa ta ratou i rave i raukaʼi te reira? (e) E akakite mai i tetai kite anga o tetai mema ngutuare tangata tei tutakiia no te akakoromaki anga tiratiratu.

¹¹ I te au mataiti i ou ake nei e manganui te au tauatini aronga tei riro mai ei Au Kite o Iehova i muri ake i te au marama pera katoa te au mataiti o te patoianga i te angaanga Kerititiano o to ratou au kopu tangata Au Kite. Mei teaa atura i te tutaki anga meitaki no te au Kerititiano tei vai tiratiratu ra, e mei teaa atura i te akameitakianga ki te aronga tei patoi i mua ana! Ma te reo aue, kua akakite tetai tangata pakari Kerititiano e 74 mataiti e: “E akameitaki putuputu ana au i taku vaine e te au tamariki no te mou piri anga i te tuatua mou i taua au mataiti i toku patoi anga ia ratou.” Kua karanga aia e e toru mataiti kua arai pakari tikai aia i tana vaine mei te tuatua anga i te Puka Tapu kiaia. “Inara kua taangaanga aia i te au ravenga piri anga manako ki runga iaku,” i nana ei, “e kua akamata i te akakitekite mai kiaku iaia e maoro ra i toku nga vaevae. Mei teaa atura toku rekareka e kare aia i tuku ana i te au ki taku patoi anga!”

¹² Kua tata tetai atu tane tei patoi i tona ngutuare tangata e: ‘Ko au te enemi kino rava atu o taku vaine no te mea i muri ake i te rauka anga iaia te tuatua mou, kua tamataku au iaia, e e karo ana maua i te au ra ravarai; koia oki, naku ua rai e akamata ana i te karo. Inara noatu rai; kua mou piri ua rai taku vaine i te Puka Tapu. E tai ngauru ma rua mataiti i topa i taku patoi pakari anga i te tuatua mou e te patoi i taku vaine e te tama. No raua roaʼi, ko au te komono o te Tiaporo.’ I muri akera kua akamata te reira tangata i te akara matatio i tona tu. ‘Kua kite mai au e mei teaa tikai toku tu kino,’ i akakite ei aia. ‘Kua tatau au i te Puka Tapu, ma te akameitaki i te reira apiianga, i teianei e Kite papetitoia au.’ Ka akamanako ana i te tutaki anga maata a te vaine, ae, te tauturu anga i te ‘akaora i tana tane’ na te akakoromaki tiratiratu anga i tana patoi anga e 12 mataiti!

Apiianga Mei ia Iesu

13. (a) Eaa te apiianga maata e tau te au tane e te au vaine kia apii mei to Iesu tu oraanga? (e) Akapeea te au tangata tei ngata ra i te kauraro ki to te Atua anoano e puapingaʼi mei te akaraanga o Iesu?

¹³ Te apiianga maata e tau te au tane e te au vaine kia apii mei to Iesu tu oraanga koia oki ko te akarongo i te Atua. “Kare oki au i tukumoe i te rave i te mea e mareka mai ei aia,” i na Iesu ei. “Kare au i kimi i toku uaorai anoano, ko te anoano ra o te Metua ko tei tono mai iaku nei.” (Ioane 5:30; 8:29) Noatu e kua reka kore a Iesu i tetai tuanga ngai o to te Atua anoano, kua akarongo rai aia. “Kia tika ia koe ra, e apai ke atu koe i teianei kapu,” i pure ei aia. Inara kua tuatua viviki katoa aia e: “Kia tupu ra toou anoano, auraka toku.” (Luka 22:42) Kare a Iesu i pati ana ki te Atua kia taui i Tona anoano; kua akaari aia e e inangaro tikai tona i te Atua na te kauraroanga ma te akarongo ra i tetai ua atu mea i tau ki to te Atua anoano nona ra. (1 Ioane 5:3) Te tuku ua anga i te Atua i te ngai mua, mei ta Iesu i rave ra, e mea puapinga tikai ia e autu ei kare i roto anake i te oraanga takaua mari katoa ra i roto i te oraanga akaipoipo e te ngutuare tangata. Ka akara ana e akapeea teia ka pera ei.

14. Akapeea etai au Kerititiano me manako ma te tau kore ra?

¹⁴ Mei tei akakiteia i mua atu ana, me tuku te aronga irinaki i te ngai mua no te Atua, ka rave ratou i te noo tamou ma to ratou au tokorua irinaki kore e e putuputu ana te taime ka tauturu te reira ia ratou kia riro mai ei aronga te ka ora atu. Noatu e me e tokorua irinaki raua roaʼi, penei kare to raua akaipoipoanga i te mea tau tikai. No te au tu ara, kare te au tane e te au vaine e manako ua ana i te au manako aroa no tetai e tetai. (Roma 7:19, 20; 1 Korinetia 7:28) E aere mamao rava atu ana etai pae i te aruaru kia rauka mai tetai tokorua ke, noatu e kare a ratou tumu anga Tuatua Tapu no te kopae. (Mataio 19:9; Ebera 13:4) Ka karanga ratou e ko teia te mea meitaki rava atu no ratou, e to te Atua anoano no te au tane e te au vaine kia noo kapiti e ngata roa ia. (Malaki 2:16; Mataio 19:5, 6) Kare e ekoko anga ko teia tetai o taua tu te manakoanga i te au manako tangata kare i to te Atua ra.

15. No teaa ra te tukuanga i te Atua i te ngai mua ka riro ei ei paruru anga?

¹⁵ Mei teaa atura i te paruru anga i te tuku i te Atua i te ngai mua! Te au tokorua akaipoipo tei pera ra ka tauta ratou i te noo kapiti tikai e e rapakau i to ratou au manamanata na te taangaanga anga i te ako anga o te Tuatua na te Atua. I reira ratou e kopae atu ei i te au tu mamae ngakau ravarai te ka tupu mai mei te kopae anga i tona anoano. (Salamo 19:7-11) Kua akatutuia teia e tetai tokorua mapu, tei vaitata ra i te kopae, kua manako atu i te aru i te ako anga a te Puka Tapu. I te au mataiti i muri mai i te akamanako anga te vaine i te rekareka tana i kite ra i roto i tona oraanga akaipoipo, kua karanga aia e: “Ka noo ana au ki raro ka aue me akamanako au e naringa kare kua noo takake rai maua ko taku tane i taua au mataiti ravarai i aereia mai. Ka pure au ki te Atua ko Iehova ma te akameitaki iaia no tana ako anga e te arataki anga tei akataokotai ra ia maua i roto i tetai pirianga mataora mei teia.”

Te Au Tane, te Au Vaine​—E Aru ia Karaiti!

16. Eaa te akaraanga ta Iesu i akanoo no te au tane e te au vaine?

¹⁶ Ko Iesu, tei tuku ua ana rai i te Atua na mua, te akanoo ra aia i tetai akaraanga umere no te au tane e te au vaine, e ka meitaki ratou me akarongo meitaki ratou i te reira. Te raurauia ra te au tane kia aru i to Iesu tu te taangaanga anga i te taoonga upoko maru ki rungao i te au mema o te putuputuanga Kerititiano. (Ephesia 5:23) E ka rauka i te au vaine Kerititiano i te apii mei te akaraanga tarevake kore o Iesu no te kauraro anga i te Atua.​—1 Korinetia 11:3.

17, 18. Na teea au tu ta Iesu akanoo anga i tetai akaraanga memeitaki no te au tane?

¹⁷ Te akaue ra te Puka Tapu: “E te au tane ra, e aroa atu kotou i ta kotou au vaine, mei te Mesia katoa i aroa i te ekalesia, e kua oronga iaia uaorai ei oko.” (Ephesia 5:25) Tetai tu puapinga ta Iesu akaari anga i tona aroa no tana putuputuanga pipi koia oki na te riro anga mai ei oa piri vaitata no ratou. “Kua karanga ra au kia kotou e, e oa,” i na Iesu ei, “kua akakite oki au kia kotou i te au tuatua ravarai taku i kite i taku Metua ra.” (Ioane 15:15) Ka akamanako ana i te au taime ravarai ta Iesu i akapou no te tuatua ki tana au pipi​—te au uriuri anga e manganui tikai tana i rave ma ratou ra—​e no te tu papu tana i tuku ra ki roto ia ratou! Kare ainei te reira i tetai akaraanga meitaki rava no te au tane?

¹⁸ Kua manako tikai a Iesu i tana au pipi e kua inangaro ia ratou ma te ngakau tae ra. (Ioane 13:1) Me kare tana au apiianga e taka meitaki ana kia ratou, kua rave aia i te tuatau ma te akakoromaki ra i te akataka meitaki atu i te reira kia ratou. (Mataio 13:36-43) E te au tane, e mea puapinga katoa ainei kia koe te turanga pae vaerua o taau vaine? Te akapou ainei koe i tetai tuatau ma ia ra, te akapapu anga e kua rauka ia korua roaʼi te au tuatua mou Puka Tapu ma te taka meitaki i te manako e te ngakau ra? Kua aru a Iesu i tana au apotetoro i te angaanga tutu aere, penei te terenianga ia ratou tataki tai. Te aru ra ainei koe i taau vaine i te angaanga tutu aere, te piri anga ki roto i te au atoro anga i tera are i tera are e i te raveanga i te au apii Puka Tapu?

19. Akapeea te tu o ta Iesu rave anga atu i te au apikepike tupu ua o tana au apotetoro i te akanoo anga i tetai akaraanga no te au tane?

¹⁹ I roto tikai i te raverave anga atu ma te au tu ara o te au apotetoro kua oronga mai a Iesu i tetai akaraanga meitaki rava no te au tane. I te tuatau o tana kaikai anga openga ma tana au apotetoro, kua kite aia i tetai vaerua tauetono e tupu ra. Kua akaapa pakari ainei aia ia ratou? Kare, mari ra kua tama taki tai aia i to ratou nga vaevae ma te tu akaaka. (Mareko 9:33-37; 10:35-45; Ioane 13:2-17) Te akaari ra ainei koe i teia tu akakoromaki ki taau vaine? I te mea e ka kopekope ua no runga i tetai tu apikepike tupu ua ra, te tauta ra ainei koe i te tauturu iaia ma te tu akakoromaki e te itae i tona ngakau na roto i toou akaraanga? Te papu ra ka ariu mai te au vaine ki teia tu tangi ma te aroa, mei tei tupu ki te au apotetoro i muri mai.

20. Eaa ta te au vaine Kerititiano auraka rava e ngaropoina, e koai tei orongaia mai ei akaraanga no ratou?

²⁰ Te anoano katoaia ra te au vaine kia akamanako ia Iesu, tei kore rava i ngaropoina ana e “to te Mesia upoko, ko te Atua ïa.” E kauraro ua ana rai aia i tona Metua i te rangi. Ma te aiteite ra, auraka te au vaine e ngaropoina e “to te vaine ra upoko, ko te tane ïa,” ae, ko ta ratou tane to ratou upoko. (1 Korinetia 11:3; Ephesia 5:23) Kua raurau te apotetoro Petero i te au vaine Kerititiano kia akamanako i te akaraanga o te “au vaine tapu” o te au tuatau mua, ko Sara tikai, “i akarongo ia Aberahama, i te tuatua anga atu kiaia, E atu.”​—1 Petero 3:5, 6.

21. No teaa ra te akaipoipo anga o Aberahama raua ko Sara i autu ei inara to Lota raua ko tana vaine kare i autu?

²¹ Ko te tika kua akaruke a Sara i tetai kainga meitaki i roto i tetai oire puapingaia no te aere atu i te noo ki roto i te au puakapa i tetai enua ke. No teaa ra? No te mea ainei e e reka ake aia i te reira tu oraanga? Kare. No te mea kua pati tana tane iaia kia aere? Kare e ekoko anga e ko teia tetai tika, mei te mea kua inangaro e kua akangateitei a Sara ia Aberahama no te mea no tona au tu akono i te Atua. (Genese 18:12) Inara te tumu maata i aru ei aia i tana tane koia oki no tona aroa no Iehova e tona anoano ma te tae o te ngakau i te aru i te arataki anga a te Atua. (Genese 12:1) Kua kite aia i te rekareka i te akarongo anga i te Atua. Ko te vaine ra a Lota, i tetai tua, kua emiemi aia i te rave i to te Atua anoano e i reira te akara anga ki muri te inangaroanga i te au mea tei akarukeia ki muri i roto i tona kainga oire ko Sodoma. (Genese 19:15, 25, 26; Luka 17:32) Mei teaa atura i tetai ope anga kino ki te reira akaipoipo anga​—no te mea ua nei e no tona tu akarongo kore i te Atua!

22. (a) Eaa te akara matatio anga uaorai ta te au mema ngutuare tangata ka rave ma te pakari ra? (e) Eaa ta tatou ka uriuri i roto i te apii ka aru mai?

²² No reira ei tane me kore ei vaine, e mea puapinga kia ui koe kia koe uaorai, ‘Tei te ngai mua ainei te Atua i roto i toou ngutuare tangata? Te titau tikai ra ainei au i te akatupu i te tuanga angaanga ngutuare tangata ta te Atua i oronga mai ki aku? Te tauta ainei au ma te tae o te ngakau i te inangaro i toku tokorua e te tauturu i te reira kia rauka me kore kia tamou i tetai pirianga meitaki ma Iehova ra?’ I roto i te maata anga o te au ngutuare tangata te vai katoa ra te au tamariki. Te ka aru mai ka uriuri tatou i te tuanga angaanga a te au metua e te anoano no raua roaʼi e ta raua tamariki kia tuku i te Atua i te ngai mua.

Te Maara Ainei Ia Koe?

◻ Eaa ta te au apiianga a Iesu ka akatupu ki te au ngutuare tangata e manganui?

◻ Eaa te tutaki anga tei rauka ra i te tauatini ua atu au Kerititiano tiratiratu?

◻ Eaa te ka tauturu i te au tokorua kia kore e rave i te tu akono tau kore e te kopae?

◻ Eaa ta te au tane ka apii mai mei te akaraanga o Iesu?

◻ Akapeea te au vaine i te rave anga atu no te turu i tetai akaipoipo anga mataora?

[Tutu i te kapi 10]

Akapeea a Sara i te turu anga atu kia autu tona akaipoipo anga?