Tavinianga ia Iehova ma te Vaerua Tuku Atinga ia Koe Uaorai
“Me te anoano ra tetai i te aru mai iaku nei, e akaruke aia iaia uaorai e ka apai ei i tona rakau tamamae e ka aru tamou mai ei iaku.”—MATAIO 16:24, NW.
1. Akapeea ta Iesu akakite anga ki tana au pipi i tona matenga te vaitata maira?
I TE tuanga vaitata ki te Maunga Heremona tei tapokiia ra tona take e te kiona, kua itae atu a Iesu Karaiti ki tetai takainga maata i tona oraanga. I raro ake i te mataiti okotai te toe ra, tona ora anga. Kua kite aia i te reira; kare tana au pipi i kite. Kua tae mai te tuatau i teianei no ratou kia kite. E tika, kua taiku a Iesu i mua ake i tona matenga e vai maira, inara ko te tuatau mua teia i akataka meitaki ei aia i te reira. (Mataio 9:15; 12:40) Te tatau ra ta Mataio tataanga: “I reira to Iesu akamata anga atu i te akakite ki tana au pipi e, e aere aia ki Ierusalema e tikaʼi, e e rai tona rave kino angaia e te aronga pakari ra, e te kau taunga nunui ra, e te au tata tuatua, e e tamate ravaia oki, e akatu akaouia ra kia tae ki te po toru.”—Mataio 16:21; Mareko 8:31, 32.
2. Eaa to Petero manako i ta Iesu au tuatua no Tona mamaeanga i te tuatau ki mua, e eaa ta Iesu pau anga?
2 E tuatau poto ua to Iesu te vaira i mua ake i tona matenga. Inara, kua riri a Petero i taua tu manako no te tumatetenga ra. Kare e rauka iaia i te ariki e ka tamate tikaia te Mesia ra. E no reira, kua tuatua akaapa atura Petero i tona Pu. Kua akakeuia e te au manako anga meitaki roa, kua raurau atura aia ma te tu riri: “Auraka takiri ïa, e te Atu: eiaa koe e peraia mai.” Inara kua kopae viviki atura Iesu i to Petero tu takinga meitaki tau kore ra, ma te papu ra mei ta tetai akaparuparu anga i te mimiti o te ovi poitini ra. “Ka aere ke atu koe, e Satani, ki muri iaku, e maitu koe naku; kare koe i tau i ta te Atua ra, ko ta te tangata ra taau i tau.”—Mataio 16:22, 23.
3. (a) I akapeea ta Petero akariro anga iaia uaorai kia manako kore ua, ei rima rave no Satani? (e) Akapeea a Petero i te akamaitu anga i te mataara no te tuku atinga iaia uaorai?
3 Kua akariro kite kore ua a Petero iaia uaorai ei rima rave no Satani. Kua taka meitaki ta Iesu ra pau anga mei tana i pau atura ia Satani i te metepara ra. I reira kua tauta te Tiaporo i te timata ia Iesu ma tetai oraanga ngoie ua, e ariki anga ma te kore ua e mamaeanga. (Mataio 4:1-10) I teianei kua akamaroiroi atura Petero iaia kia maru ua te akono iaia uaorai. Kua kite a Iesu e kare te reira i te anoano o tona Metua. Ka tau tona oraanga kia riro ei tuku atinga iaia uaorai, eiaa i te akameitaki anga iaia uaorai. (Mataio 20:28) Kua riro a Petero ei maitu anga ki taua ravenga ra; kua riro tona tu tangi meitaki ra, te aiteanga ei ereere.a Inara, kua kite meitaki a Iesu e me ka ariki aia i tetai ua atu manako no te oraanga kare e tuku atinga, ka topa aia ki vao i ta te Atua ra akaperepere anga na te mou anga ki roto i te roromi matenga o te ereere a satani ra.
4. Eaa ra i kore ei e tau te oraanga pumaana no te ravenga noinoi ua kare no Iesu e tana au pipi?
4 E no reira, kua tau kia akatikatikaia to Petero ra manakoanga. Tana au tuatua kia Iesu ra te akataka maira i te manako tangata, kare i to te Atua. Ko te oraanga pumaana no te ravenga noinoi ua, e mataara mama ua kia kore te mamaeanga, kare ia no Iesu; kare katoa oki te reira oraanga no tana au pipi, no te mea kua tuatua katoa maira Iesu kia Petero e etai katoa atu o te au pipi ra: “Me te anoano ra tetai i te aru mai iaku nei, e akaruke aia iaia uaorai e ka apai ei i tona rakau tamamae e ka aru tamou mai ei iaku.”—Mataio 16:24, NW.
5. (a) Eaa te akaaoanga no te akonoanga i te oraanga Kerititiano? (e) Eaa nga apinga tau e toru ka anoanoia te Kerititiano kia vai teateamamao?
5 Kua taoki akaou e kua taoki akaou, a Iesu ki teia tumu tuatua taviri nei: koia te akaaoanga no te akonoanga i te oraanga Kerititiano. Kia tau ei ei au pipi na Iesu, ka anoanoia te au Kerititiano kia aite ki to ratou Arataki, kia tavini atu ia Iehova ma te vaerua o te tuku atinga ia ratou uaorai. (Mataio 10:37-39) E no reira, kua akapapa mai aia e toru nga apinga tau na te Kerititiano kia teateamamao i te rave: (1) akaruke iaia uaorai, (2) e mou i tona rakau tamamae, e te (3) aru tamou atu Iaia ra.
“Me te Anoano Ra Tetai i te Aru Mai Iaku Nei”
6. (a) Akapeea ta te tangata akaruke anga iaia uaorai? (e) Koai ta tatou ka tau kia akamareka kia maata atu ia tatou uaorai?
6 Eaa te aite anga o te akaruke aia iaia uaorai? Ko tona aite anga e kia kopae takiri tetai tangata iaia uaorai, mei te tu rai e matenga nona uaorai. Ko te aiteanga tumu tikai o te tuatua Ereni tei uriia e “akaruke” koia oki “kia tuatua kare”; tona aite anga “kia kopae takiri.” E no reira, me ka ariki koe i te akaaoanga no te oraanga Kerititiano, ka akaruke rekareka ua koe i toou uaorai inangaro, toou pumaana, toou anoano, toou mataora, e toou marekaanga. Ko te aite anga tikai, kia oronga koe i toou oraanga katoa e te apinga ravarai te kapitiia ra i te reira ki te Atua kia Iehova no te au tuatau ravarai. E maata atu te aite anga o te akaruke ia koe uaorai i te kopae ke anga i etai tu e navenave ei ra i etai tuatau anake ua. Kare, ko tona aite anga ra e ka akakore takiri tetai tangata i tona tikaanga ei pu nona uaorai e ka tuku atu iaia uaorai kia Iehova ra. (1 Korinetia 6:19, 20) Ko te tangata tei akaruke iaia uaorai ka akono aia kia mareka te Atua kare koia uaorai. (Roma 14:8; 15:3) Tera te aite anga e ko te au atianga ravarai o tona oraanga, ka tuatua aia e kare ki tona au anoano noinoi, e ae kia Iehova ra.
7. Eaa te rakau tamamae o te Kerititiano, e akapeea tana raveanga i te reira?
7 E no reira, ko te mou i toou rakau tamamae, e maata tona aite anga. Te raveanga i tetai rakau e apainga teiaa e e akatutu anga no te mate. Ka rekareka ua te Kerititiano kia mamae aia me ka umuumuia, me kare kia taakamaia me kare kia tamamaeia e tae roa kia tamateia no te mea e pipi na Iesu Karaiti. Kua na ko maira Iesu: “E tei kore e rave i tona uaorai [rakau tamamae, NW], ka aru mai ei iaku, kare aia e tau iaku.” (Mataio 10:38) Kare ko te katoaanga e mamae ra te rave ra i te rakau tamamae. E manganui te “au mamae” o te aronga rave kino, inara kare o ratou rakau tamamae. (Salamo 32:10, NW) Inara, ko te oraanga o te Kerititiano e oraanga rave anga i te rakau tamamae o te angaanga tuku atinga kia Iehova ra.
8. Eaa te akaraanga no te oraanga ta Iesu i akanoo mai no tana au pipi?
8 Ko te turanga openga ta Iesu i taiku mai e kia aru tamou atu iaia. Te umuumu ra a Iesu kare e kia ariki e kia irinaki anake tatou i tana i apii mari katoa ra, kia aru tamou i te akaraanga tana i akanoo maira no to tatou oraanga katoa. Eaa etai au tuanga puapinga maata te kitea ra i tona akaraanga no te oraanga? I tana oronga anga ki tana au pipi i te akauenga openga kia ratou, kua karanga aia: “E teianei, kare aere kotou, e akariro i to te pa enua katoa ei pipi . . . , ma te apii atu ia ratou, kia akono i te au mea katoa taku i akaue atu kia kotou.” (Mataio 28:19, 20) Kua tutu aere e kua apii katoa a Iesu i te tuatua meitaki o te Patireia. E kua pera katoa oki tana au pipi i reira e, kua rave katoa te putuputuanga Kerititiano mua ra i te reira. Na teia rave angaanga maroiroi, kapitiia atu ki to ratou kore anga i to teianei ao, na te reira i apai mai i te makitakita e te patoianga a teianei ao ki rungao ia ratou, tupu maira ta ratou rakau tamamae kia teiaa atu i te apai.—Ioane 15:19, 20; Angaanga 8:4.
9. I akapeea ta Iesu akono anga i etai tangata ke ra?
9 Ko tetai atu akaraanga taka meitaki tei kitea ra i to Iesu oraanga koia oki tana tu akono anga i etai atu tangata ke ra. E takinga meitaki aia e te ‘maru e te akaaka te ngakau.’ E no reira, kua manako ngakau akaouia te vaerua o te aronga akarongorongo atu iaia ra e kua akamaroiroiia na tona vai anga ia ratou ra. (Mataio 11:29) Kare aia i akaueue ketaketa ia ratou ra kia aru atu iaia, me kare i akanoo ture i muri ake i tetai ture e ka akapeea ratou i te rave anga; e kare katoa oki aia i akatupu atu i te manako ngakau no te apa ei opara ia ratou kia riro mai ei pipi nana. Noatu rai to ratou oraanga tuku atingaia, kua akaari mai ratou i te tu rekareka tikai. Mei teaa ra te tukeanga taka meitaki ki to te aronga no teianei ao te vaerua akanavenave ia ratou uaorai tei akairo maira i te “tuatau openga ra”!—2 Timoteo 3:1-4.
E Akatupu e e Tamou Marie i te Vaerua Tuku Atinga o Iesu Iaia Uaorai
10. (a) Kia tau ki ta Philipi 2:5-8, i akapeea ta Karaiti akaruke anga iaia uaorai? (e) Me e pipi tatou na Karaiti, eaa te tu manako tau no tatou kia akaari?
10 Na Iesu uaorai i akanoo mai i te akaraanga i te akarukeanga iaia uaorai. Kua mou aia i tona rakau tamamae e kua rave tamou i te reira na te raveanga i te anoano o tona Metua. Kua tata a Paulo ki te au Kerititiano i Philipi: “Kia okotai rai o kotou tu ngakau e to te Mesia ra to Iesu: Ko te tu ïa aia no te Atua, e kare aia i manako e, e apinga āru kia aite katoa aia i te Atua ra: Kua tuku ke atura ra aia i tona uaorai tu, e kua rave i to te tavini, i te riro anga mai mei te tangata nei te tu: E koia i kitea mei te tangata nei te tu: kua taakaaka iaia uaorai i te akonoanga e tae ua atu ki te mate, ki te mate [rakau tamamae, NW] ra.” (Philipi 2:5-8) Koai ra te ka rauka iaia i te akaruke takiri iaia uaorai kia maata atu i te reira? Me ko koe tetai na Iesu Karaiti e ko koe tetai e pipi nana, ka tau rai koe kia akono i te tu ngakau aite atu.
11. Te akonoanga i te oraanga tuku atingaia noai te anoano ta tatou ka akono?
11 Kua akakite mai tetai atu apotetoro kia tatou, koia a Petero, e i te mea i mamae a Iesu e i mate ia no tatou, e mea tau no te au Kerititiano kia akapapa ia ratou uaorai, mei te au vaeau papa meitaki ra, ma taua vaerua o Karaiti ra. Kua tata aia: “E teianei i mate ana te Mesia i te mate kopapa nei no tatou, ka akatara ia kotou uaorai i taua manako ra: ko tei mate tika i te kopapa ra kua kore ïa e rave i te ara: Kia kore aia e noo i te toenga o tona manga tuatau i te kopapa nei ma te akono i te anoano o te tangata, ma te akono ra i te inangaro o te Atua.” (1 Petero 3:18; 4:1, 2) Kua akaari taka meitaki mai to Iesu mataara tuku atinga iaia uaorai e i akapeea tona manako no te anoano o te Atua. E manako okotai ua tona i tana akamori anga, kua tuku ua aia i te anoano o tona Metua ki runga ake i tona uaorai, tae roa ki te take o tetai matenga rikarika.—Mataio 6:10; Luka 22:42.
12. I reka kore ainei te oraanga tuku atingaia kia Iesu uaorai? E akataka mai.
12 Noatu rai e ko to Iesu oraanga kua tuku atingaia e ia uaorai kua riro ei mea ngata roa e ei arataa akaaoanga nona kia aru, kare ra aia i kite e e reka kore te reira. Kareka ra, kua mareka tikai a Iesu i te kauraro anga i te anoano atua ra. Kua aite kiaia te raveanga i te angaanga a tona Metua ra ki te kai. Kua rauka iaia te merengo anga mei te reira maira, mei tetai tei kai ra i te kaikai anga meitaki. (Mataio 4:4; Ioane 4:34) E no reira me te anoano ra koe kia akaki tikaia koe i toou oraanga, kare e rave anga meitaki atu naau kia rave i te aru anga i te akaraanga a Iesu na te tatanuanga i tona tu manako ra.
13. Eaa te aroa i riro ei, ei mana tauturu i te vaerua tuku atinga ia koe uaorai?
13 E tika tikai, eaa te mana akakeuanga i muri i te vaerua o te tuku atinga anga ia koe uaorai? I roto i te tuatua okotai ko te, aroa. Kua karanga a Iesu: “‘E anoano atu koe i to Atua ia Iehova ma to ngakau katoa, e ma to [meta, NW] katoa, e ma to manako katoa.’ Ko te akauenga mua teia e tei maata. E mei te reira katoa te rua, ‘E aroa atu koe i toou tangata tupu mei te aroa ia koe uaorai.’” (Mataio 22:37-39) Kare e rauka i tetai Kerititiano i kimi i te meitaki nona uaorai e, i taua tuatau rai, ka akarongo katoaʼi i te reira au tuatua ra. Ka tau tona uaorai mataora anga e tona manako kia akatereia na mua roa na tona inangaro ia Iehova ra e na tona aroa i tona tangata tupu i muri akera. Ko ta Iesu ia akono anga i tona oraanga, e ko tana ia e manakonako maira i tana au pipi.
14. (a) Eaa te au apainga te akatakaia maira ia Ebera 13:15, 16? (e) Eaa te opara ra ia tatou kia tutu aere i te tuatua meitaki ma te tu totomapu?
14 Kua kite te apotetoro ko Paulo i te reira ture no te aroa. Kua tata aia: “Na ko tatou iaia ra i te apai i te atinga ra, i te akameitaki i te Atua, eiaa e tivata, koia oki ta te vaa nei, i te akapaatu anga i tona ingoa. Kareka te takinga-meitaki e te oronga, eiaa rava ïa e akatopaia: te pereperekavana ra oki te Atua i te reira atinga.” (Ebera 13:15, 16) Kare te au Kerititiano e oronga i te au atinga manu kia Iehova e te apinga mei te reira; e no reira, kare ratou e anoano i te kau taunga tangata nei i tetai iero kopapa ei akonoanga i ta ratou akamori anga. Na roto atu ia Iesu Karaiti ta tatou oronga anga i te atinga akapaapaa anga. E na roto i taua atinga akapaapaa anga ra, te akapaatu anga i tona ingoa, ta tatou ia akaari anga i to tatou inangaro i te Atua ra. Na reira tikai to tatou vaerua noinoi kore tei akaia ra ki roto i te aroa i te akamaroiroi anga ia tatou kia tutu aere i te tuatua meitaki ma te tu totomapu, e te tamata anga kia papa ua i te oronga ki te Atua i te ua o to tatou vaa. Na teia mataara ka akaari tatou i te aroa katoa oki no te tangata tupu ra.
Ka Apai Mai te Tuku Atinga ia Koe Uaorai i te Au Akameitakianga Apinganui
15. Eaa nga uianga akakeu manako no runga i te tuku atinga anga ia tatou uaorai te ka tau tatou kia ui ia tatou uaorai?
15 E tapu no tetai atianga e ka tamanako ei no runga i nga uianga te aru mai nei: Te akaari mai nei ainei te akaraanga o toku oraanga i teianei i tetai akonoanga tuku atinga iaku uaorai? Te tou atura ainei taku au akakoro anga ki te reira tu oraanga? Te kokoti ra ainei te au mema o toku ngutuare i te au puapinga i te pae vaerua mei taku akaraanga? (Akaaiteia atu kia 1 Timoteo 5:8.) Ka akapeea te au matiroeroe e te au vaine takaua? Te puapingaia ra ainei ratou i toku vaerua tuku atinga iaku uaorai? (Iakobo 1:27) Ka rauka ainei iaku i te akatotoa atu i te tuatau noku kia akapou i taku atinga akapaapaa anga i te ngai tangata? Te rauka ra ainei iaku i te itae atu i te tuatau no te painia, te angaanga i te Betela, me kare te angaanga evangeria i te enua ke, e rauka ainei iaku te aere ki tetai atu ngai te maata ra te anoanoia te aronga akakitekite i te Patireia?
16. Akapeea te tu karape i te tauturu anga ia tatou kia akono i te oraanga tuku atinga ia koe uaorai?
16 I etai tuatau e meangiti ua te tu karape te anoanoia ra kia itae atu ei ki te kianga te tuatau no te tavini anga ia Iehova ma te vaerua tuku atinga ia koe uaorai. Ei akaraanga, ko Janet, e painia tamou aia i Ekuatoa, te rave angaanga ra aia i te au taime ravarai. Kare i roa ana kua raveanga ngata i tana papaanga tuatau kia rauka iaia te ora umuumuia no te painia i te au taime ravarai ma te vaerua mataora. Kua iki aia kia akataka atu i te reira manamanata ki tona pu angaanga e kua pati atu kia tipuia tona au ora angaanga. I te mea kare te pu i rekareka kia akatopaia mai tona au ora angaanga, kua rave atu aia ia Maria, tei kimi ra i tetai angaanga no te tuanga tuatau ua kia rauka katoaʼi iaia te painia. Kua pati atu raua takitai me ka akatikaia kia angaanga no te apa ra, i te kapitianga no te ra okotai katoa. Kua akatika te pu angaanga i taua manako ra. Kua riro aua nga tuaine ra ei painia tamou i teianei. I te kiteanga i teia tupuanga meitaki, ko Kaffa, kua roiroi katoa oki i te angaanga i te au tuatau ravarai na taua kamupani rai e te raveanga ngata ra i tona taime no te painia, kua rave atu ia Magali e kua pati katoa atu i taua akapapa anga rai. Kua ariki katoaia te reira. E no reira, kua rauka i nga tuaine e a i te painia, kare e rua ua tei tae ra ki te turanga vaitata i te akarukeanga i te angaanga tutu aere i te au taime ravarai. Kua tupu te puapinga no te karape e te tamataanga.
17-21. Akapeea tetai nga tokorua akaipoipoia ra i te akamanako akaouanga i ta raua akakoroanga no te oraanga, e eaa te tupu anga?
17 Pera katoa oki, e akamanako ana i te arataa o te tuku atinga iaia uaorai tei aruia ra e Evonne i te tai ngauru mataiti kua topa. Kua tata aia i teia e aru mai nei ki te Totaiete Punanga Tiaki ia Me 1991:
18 I roto ia Okotopa 1982, kua tutaka matou ko toku ngutuare tangata i te Betela i Brooklyn. I te kiteanga i te reira kua akariro iaku kia anoano i te angaanga ki reira. Kua tatau au i tetai pepa patianga, e uianga tau tikai tetai i reira, ‘Eaa toou au ora i te angaanga tutu aere no nga marama e ono kua topa? Me i raro ake i te tai ngauru i te marama, e akataka mai eaa te tumu.’ Kare i rauka iaku te tamanako i tetai tumu tau no toku au ora meangiti ua, e no reira kua akanoo au i tetai akakoro anga e kua itaeia te reira no nga marama e rima.
19 “Noatu rai e ka rauka iaku i te tamanako i etai au kotoe anga tokoiti nei no te kore e painia, i toku tatau anga i te 1983 Yearbook of Jehovah’s Witnesses, kua papu toku manako e te vaira etai ke atura tei rauka ia ratou te takore atu i te au arairai anga maata atu i toku, kia raukai ia ratou te painia. No reira, ia Aperira 1, 1983, kua akamutu au i taku angaanga i te au tuatau ravarai e tutaki maata e kua riro mai au ei painia tauturu, e kua tomo atu au ki te pupu painia tamou ia Tepetema 1, 1983.
20 “I muri akera, kua rauka iaku te tuatau mareka anga kia akaipoipo i tetai tavini orometua meitaki ia Aperira 1985. E toru mataiti i muri mai, na tetai tuatua i te uruoaanga tapere no runga i te painia kua akakeuia taku tane kia koumuumu mai kiaku ma te uianga, ‘Te kite ra ainei koe i tetai tumu e kore ei e tau kia akamata au i te painia ia Tepetema 1?’ Kua kapiti mai aia kiaku i teia angaanga no nga mataiti e rua i muri maira.
21 “Kua akatika katoa oki taku tane kia rave i te angaanga patu anga i te Betela i Brooklyn no nga epetoma e rua e kua pati aia i te Porokarama Patu Anga o te Pa Enua Ravarai. E no reira ia Me 1989 kua aere maua ki Naiteria no te marama okotai i te tauturu i te patu anga i te opati manga. Apopo ka aere atu maua ki Tiamani, ei reira ka akanoonoo ei i te au pepa no te tomo atu ki Porani. Te rekareka nei maua i te o atu anga ki roto i taua angaanga manako maataia ra i te patuanga i te Opati Manga i Porani e kia riro ei tuanga no teia ravenga ou no te tavini anga i te au taime ravarai.”
22. (a) Penei mei ia Petero rai, akapeea tatou e riro ei ei maituanga no te tu kite kore ua? (e) Te tavinianga ia Iehova ma te vaerua tuku atinga ia koe uaorai kare te reira e irinaki ki runga i teaa?
22 Me kare e rauka ia koe uaorai te painia, ka rauka ainei ia koe te akamaroiroi atu i te aronga i roto i te tavini anga i te au taime ravarai kia rave tamou i ta ratou akameitaki anga penei katoa oki kia tauturu atu ia ratou kia rave ua atu i te reira? Me kare ka aite atu ainei koe ki tetai papaki o te au mema ngutuare me kare te au oa te manako ra e e meitaki ta ratou ikianga mei ia Petero ra, penei ka tuatua atu ki tetai tavini angaanga i te au taime ravarai e kia rave marie ua e kia akono ma te rave ngoie ua, kia takinga meitaki iaia uaorai, ma te kite kore e akapeea te reira e riro ei ei maitu anga? E tika, me kare e meitaki ana te oraanga kopapa o te painia e me kare aia e akono ana i te au apainga Kerititiano, penei ka tau aia kia akaruke i te tavini anga i te au taime ravarai no tetai tuatau. Kare te tavinianga ia Iehova ma te vaerua tuku atinga ia koe uaorai i te mea tata uaia ki runga i tetai pepa, mei te painia rai, te tangata angaanga i Betela, me kare tetai ke atura. Mari ra tei runga ia i to tatou uaorai tu ei peretana—to tatou manako, ta tatou ka rave, ta tatou akono ia etai ke ra, ta tatou akono i to tatou oraanga.
23. (a) Akapeea e raukai ia tatou te tamou i te rekareka o te rave angaanga kapitianga ma te Atua ra? (e) Eaa te akapapu anga ta tatou e kite ra ia Ebera 6:10-12?
23 Me e vaerua tuku atinga tikai to tatou uaorai, ka rauka ia tatou te rekareka no te riroanga ei oa angaanga no te Atua ra. (1 Korinetia 3:9) Ka rauka ia tatou te merengo anga i te kite anga e te akarekareka ra tatou i te ngakau o Iehova. (Maseli 27:11) E tei ia tatou te akapapu anga e kare a Iehova e akangaropoina ia tatou me ka vai tiratiratu tatou kiaia.—Ebera 6:10-12.
[Au Tataanga Rikiriki i Raro]
a I te reo Ereni, te “maitu anga” (σκάνδαλον, skanʹda·lon) i muatangana ko “te ingoa ia o te tuanga o tetai ereere e tamouia atura te maunu, e no reira, ko te ereere ia me kare ere uaorai.”—Vine’s Expository Dictionary of Old and New Testament Words.
Eaa Toou Au Manako?
◻ Akapeea a Petero i riro ei ei maituanga ma te kite kore ua i te mataara no te tuku atinga anga tetai iaia uaorai?
◻ Eaa te aite anga o te akaruke iaia uaorai?
◻ Akapeea te Kerititiano i te rave anga i tona rakau tamamae?
◻ Akapeea tatou i te akatupu anga e te tamou anga i te vaerua tuku atinga anga ia tatou uaorai?
◻ Eaa te mana opara tauturu i te vaerua o te tuku atinga anga iaia uaorai?
[Tutu i te kapi 10]
Te rekareka ra ainei koe kia akaruke ia koe uaorai, ka mou ei i toou rakau tamamae, e ka aru tamou ei ia Iesu?