“Rave Mai i Taku Amo ki Rungao ia Kotou”
1 I roto i tetai ao ki i te au taomianga e te au taitaia, kua kite mai tatou i te akaoraanga tika tikai na te ariuanga ki ta Iesu patianga pumaana kia rauka te akaangaroianga tana i oronga mai i raro ake i tana amo. (Mata. 11:29, 30) I te arikianga i te amo ei pipi te kapiti maira ki tetai angaanga kare i te ngata ua mari ra e oraora katoa. Te piri maira te tutuanga i te tuatua meitaki o te Patireia e te tauturuanga i etai ke kia rauka te akaangaroianga ma tatou katoa i raro ake i ta Iesu amo anga maru.—Mata. 24:14; 28:19, 20.
2 Akaoraoraia mei te Angaanga Orometua: Kare a Iesu i pati ki tana au pipi e kia akauta atu i tana apainga ki ta ratou uaorai e amo ra. Kua pati aia kia ratou kia taui i ta ratou apainga teiaa ki tana mea mama ua. Kare tatou e akateiaa akaouia ana e te au taitaia e te tu puapinga kore o te au mea o teianei ao; e kare katoa tatou e angaanga ana no te au apinga nui papu kore. (Luka 21:34; 1 Timo. 6:17) Noatu e maata ta tatou angaanga e ka angaanga tatou kia rauka mai te au mea ka anoanoia no te au ra, kia akamou ra tatou i to tatou oraanga ki runga i te akamorianga i te Atua. (Mata. 6:33) Ka kite ua mai rai tatou i te angaanga orometua ei akaoraoraanga, kare ei apainga teiaa, me manako tau tatou ki te mea puapinga maata atu.—Phili. 1:10.
3 E tu matau na tatou i te tuatua i tetai ua atu apinga e akaperepere maata ra tatou. (Luka 6:45) E akaperepere maata ana te au Kerititiano katoatoa ia Iehova e te au akameitakianga Patireia tana i koreromotu mai. No reira e mea oraora tikai i te tuatua i te ‘evangelia meitaki’ e te akangaropoina i to tatou au manako apiapi, ia tatou i roto i te angaanga orometua! (Roma 10:15) E tika rai, me maata atu ta tatou raveanga i tetai apinga ka tukatau atu tatou e ka kite maata atu i te mataora. No reira, e akaoraoraanga me ka rauka ia tatou i te akapou maata atu i te taime ki te angaanga orometua. E akaoraoraanga tikai me ariu mai te tangata tataki tai ki ta tatou angaanga tutuanga! (Anga. 15:3) Noatu me aravei tatou i te aronga tu inangaro kore me kore tu patoi, ka rauka te akaangaroi i te pae vaerua mei te angaanga orometua me akamaara ua rai tatou e e mareka ana a Iehova i ta tatou au tautaanga e no tana akameitakianga ua i tupu mai ei tetai ua atu au tupuanga papu.—Anga. 5:41; 1 Kori. 3:9.
4 Na te arikianga i ta Iesu patianga, ka rekareka tatou i te tikaanga ngateitei i te tavinianga i te pae iaia ei au Kite no Iehova. (Isa. 43:10; Apo. 1:5) Kare e akaoraoraanga meitaki atu mei tera rai!