Kia Kite i te Meitaki o Taau Angaanga Pakari

1. Eaa te ka akaiti mai i to tatou maroiroi no te angaanga orometua?

¹ Kua angaia te tangata “kia kite tona ngakau i te meitaki i tana ra angaanga.” (Kohe. 2:24) Inara, me kare tatou e kite i te meitaki mei ta tatou angaanga orometua, ka kore to tatou rekareka e ka iti mai to tatou maroiroi. Eaa te ka tauturu ia tatou kia vai ua rai to tatou tu papu?

2. Eaa te tumu ka kore ei tatou e tapapa e ka ariu pouroa mai te tangata ki ta tatou angaanga orometua?

² Eiaa e Tapapa e ka Ariu Pouroa Mai te Tangata: Kia akamaara e noatu e tokoiti ua te aronga tei ariu mai ki ta Iesu au apiianga, kua puapinga rai tana angaanga orometua. (Ioa. 17:4) I roto i tana akatutuanga o te tangata ruru ua, kua totou a Iesu e i te openga kare te maataanga o te tangata e ariki i te ua o te karere Patireia. (Mata. 13:3-8, 18-22) Inara, e maata rai te meitaki e rauka maira i ta tatou tautaanga maroiroi.

3. Akapeea tatou e ‘uua mai ei’ noatu e iti ua te ariu maira ki ta tatou akakitekiteanga?

³ Peea Tatou e Uua Ai: Kia tau ki ta Iesu akatutuanga, te aronga tei ariki i te karere, ka ‘uua mai ratou.’ (Mata. 13:23) Me tupu mai te tumu o te titona e me pakari mai, e au ua ou te ka ua mai. No reira, ko te ua ta te au Kerititiano ka uua mai, kare ko te au pipi ou, mari ra ko te au ua Patireia e manganui tei tatanu uaia mai ana​—ta tatou au akakitekiteanga no runga i te Patireia. E maata te “meitaki” ka tupu e ka rauka ia tatou te merengo maata, noatu ka ariki mai te tangata e me kare. Te tauturu ra tatou i te akatapu i te ingoa o Iehova. (Isa. 43:10-12; Mata. 6:9) Te mataora nei tatou i te tikaanga ngateitei ei au oa rave angaanga na te Atua. (1 Kori. 3:9) E ka mareka a Iehova i “ta te vaa nei.”​—Ebe. 13:15, 16.

4. Eaa te tupu ra i roto i ta tatou angaanga orometua ma te kore tatou i kite?

⁴ Pera katoa, penei te tupu ra ta tatou angaanga pakari e kare tatou e kite ana. Kare e kore e ko tetai pae tei akarongo ia Iesu e tutu aere ra, kare i riro mai ana ei au pipi nana, no muri roa mai i te oti anga tana angaanga orometua i te enua nei. Mei te reira katoa te ua Patireia ta tatou i tatanu, penei kare e tupu vave i roto i te ngakau o te tangata, a muri roa mai penei ka aere mai aia ki roto i te tuatua mou ma te kore tatou i kite. Ae, e maata te meitaki ka rauka mai i roto i ta tatou angaanga orometua. No reira, ‘kia maata to tatou ua anga’ e kia akaari e e au pipi tatou na Iesu.​—Ioa. 15:8.