Pene 48

Akarukeanga i te Are o Iairo e te Atoro Akaou Anga ia Nazareta

E MAATA tikai ta Iesu angaanga i te reira ra​—kua aere atura aia mei te Dekapoli na te tai atu, te akaora anga i te vaine maki i te atekeria ra, e te akatuakaouanga i te tamaine a Iairo. Inara kare i pou ake taua ra ra. I te akara anga ia Iesu i aere atu ei mei te are o Iairo ra, e tokorua nga tangata matapo tei aru maira iaia, ma te kapiki anga: “E te tamaiti a Davida ra, e aroa mai koe ia maua.”

Na te tapa anga ia Iesu ei “Tamaiti a Davida,” te akakite ra te reira au tangata i to ratou irinaki e ko Iesu te tuanga i te terono o Davida ra, no reira ko ia te Mesia tei totouia maira. Inara, i te akara anga ua e kare a Iesu i akarongo ana i ta raua kapiki anga no te tauturu, penei ei timata e me ka raurau ua atu rai raua. Inara kare te reira nga tangata i akamutu. Kua aru maira raua ia Iesu tae roa ki tona ngai noo anga, e i tona tomo anga ki roto i te are, kua aru maira raua iaia ki roto.

I reira kua ui atura Iesu: “Te manako na korua e, e tika tena iaku?”

Kua tuatua papu maira raua: “A[e], e te Atu.”

No reira, kua akatukia atura Iesu i to raua nga mata, e kua na ko atura: “I tau ki to korua akarongo kia tupu te reira kia korua.” (NW) Kua ako pakari atura Iesu ia raua: “Eiaa rava tetai tangata e kite.” Inara no te ki i te rekareka, kua kore raua i akono i ta Iesu i akaue atura, e kua tuatua atu nona ra e kako rava akera te reira enua.

Koi aere ua atura raua, te apaiia maira e te au tangata tetai tangata kua murareia i te temoni ra. Kua tuaruia e Iesu taua temoni ra, kua tuatua iora taua tangata ra. Kua umere taua aronga maata ra i te reira au semeio, na ko akera: “Kare akerai teia i kitea i Iseraela nei.”

I reira katoa oki te au Pharisea ra. Kare i rauka ia ratou te akakore i te reira au semeio ra, inara no te kino to ratou akarongo kore kua taiku akaou ratou i ta ratou akaapaanga i te tumu o ta Iesu au angaanga mana ra, kua na ko akera ratou: “Te tuaru nei aia i te demoni i te mana o te demoni maata ra.”

I muri poto akera, kua oki atura Iesu ki tona kainga oire i Nazareta, i teia taime ko ratou e tana au pipi i aere ei. Vaitata e mataiti i mua akera, i aere atu ei aia ki te sunago e kua ako atura i reira. Noatu rai e kua umere te au tangata i tana au tuatua mareka ra, kua riri ratou i muri akera i tana ako anga e kua tamata e ta iaia. No te aroa ra, kua tauta akaou atura Iesu i te tauturu i tona au tangata tupu i mua ana.

I etai atu ngai kua aere maata maira te au tangata kia Iesu, i konei ra kare ratou i pera. No reira, kua aere atura aia ki te sunago i te ako i te Tapati ra. Kua va ua te maata anga o te aronga tei akarongo atu kiaia ra. Kua ui iora ratou: “Noea te pakari e te ravenga mana a teianei tangata? Kare aina teia te tamaiti a te kamuta ra? e kare aina ko Maria te ingoa o tona metua vaine? e ko Iakobo, ko Iose[pha], ko Simona, e ko Iuda tona au taeake? E kare aina te noo nei tona au tuaine ki o tatou nei? Noea ra oki te au ravenga a teia tangata?”

‘E tangata ua a Iesu mei ia tatou nei rai,’ ko ta ratou ia i manako. ‘Kua kite tatou i tona tupu ake anga, e kua kite tatou i tona ngutuare tangata. Akapeea aia i riro ei ei Mesia?’ No reira noatu te au akapapu anga katoatoa​—tona pakari maata e tana au semeio—​kua kopae ratou iaia. No to ratou kite pu iaia, e pera katoa tona uaorai ngutuare tangata kua maitu iora ratou iaia, no reira a Iesu i manako ei: “Kare te peroveta i akavaavaaia, mari ra i tona uaorai enua, e i tona uaorai kopu tangata, e i tona uaorai ngutuare.”​—NW.

E tika, kua umere a Iesu i to ratou ngere i te akarongo. No reira kare aia i rave semeio i reira mari ra ko te tuku anga i tona nga rima ki rungao i te aronga tokoiti ua e kua akaora ia ratou ra. Mataio 9:​27-34; 13:​54-58; Mareko 6:​1-6; Isaia 9:7.

▪ Na te tapa anga ia Iesu ei “Tamaiti na Davida,” eaa ta nga tangata matapo ra i akaari e te irinaki ra raua?

▪ Eaa te akamarama anga no ta Iesu au semeio tei akatakaia maira e te au Pharisea?

▪ Eaa i tau ei ei tu aroa to Iesu kia oki e tauturu i te au tangata i Naza­reta ra?

▪ Eaa te tu aravei anga tei orongaia kia Iesu i Nazareta ra, e no

teaa ra?