Pene 57

Ngakau Tangi no te Aronga Makiia

I MURI ake i te akaapa anga i te au Pharisea ra no ta ratou uaorai ikuikuanga, kua aere ke atura Iesu ma tana au pipi. Me maara ia koe, i mua poto akera i akakoreiaʼi tana tamata anga kia akataka ke atu ma tana au pipi e manga tuatau poto kia akaangaroi kua kitea ra ratou e te aronga e manganui. Kua aere atura aia ma tana au pipi ki te kotinga i Turia e Sidona, e manganui te au maire e aere atu ei ki te pae tokerau ra. I te akara anga ko teia anake ua te tere i aere ei a Iesu ma tana au pipi katoa kia mamao atu i te kotinga o Iseraela ra.

I muri ake i te kitea anga tetai are no te nooanga, kua akakite atura a Iesu e kare aia e inangaro kia kite etai atu aronga i to ratou ngai. Inara, noatu i teia ngai kare no te Iseraela ra, kare e rauka kia kore aia e kitea. Kua kitea aia e tetai vaine Ereni, tei anauia ki Phenia i Turia ra, e kua akamata i te pati anga na ko maira: “E te Atu, e te Tamaiti a Davida, e aroa mai koe iaku! kua maata te mate o taku tamaine i tetai demoni.” Inara, kare a Iesu i ki atu kiaia.

I muri akera, kua karanga maira te au pipi kia Iesu e: “E tuku atu iaia: te kapiki aere mai nei i muri ia tatou.” I te akamarama anga i tona tumu i kore ei i ki atu kiaia, kua na ko atura Iesu: “Kare au i tonokia mai i ko na, mari ra, ki te au mamoe i ngaro i te ngutuare o Iseraela.”

Inara, kare te reira vaine i tuku ana. Kua akavaitata ua maira aia kia Iesu tipapa atura ki mua iaia. Kua pati, “E te Atu, turu mai koe iaku!”

Mei teaa ra te akakeu anga i to Iesu ngakau ta te reira vaine pati akatenga anga! Tera ra, kua tou akaou atura aia ki tana apainga mua, koia oki kia rave angaanga no te iti tangata o te Atua i Iseraela ra. I reira katoa oki, penei ei timata anga i tona akarongo, kua taiku atura Iesu i te manako ngati Iuda no te aronga o etai atu enua ke ra, ma te maro atu anga: “Kare e tika kia rave i te kai a te tamariki, e titiri atu ei na te kuri [rikiriki, NW].”

Na tona reo tangi e tona tutu mata, kua akaari tikai a Iesu uaorai i tona au tu manako ngakau no te aronga kare i te ngati Iuda. Kua tamaru maira aia i te akaaite angaia to te Etene ra ki te kuri na te taiku anga ia ratou ei “kuri rikiriki,” me kare ei au punua kuri. Kare te reira vaine i riri, e kua tuatua maira no ta Iesu i taiku atura no te tu akavaavaa o te ngati Iuda e kua tuatua taakaaka ua maira: “Tika rai, e te Atu: te kai nei ra te kuri i te ungaungā kai i topa no runga i te kaingakai a to ratou pu.”

Kua karanga atura Iesu kiaia: “E maine, e akarongo maata toou: ko taau i inangaro ra, kia akaperaia koe.” E kua tupu te reira! I tona oki anga ki tona kainga, kua kite atura i tana tamaine i runga i te roi, e kua ora takiri akera ia.

Mei te kotinga taatai i Sidona, kua aere atura a Iesu e tana au pipi ki tetai pae o te enua ra, e tae atu ei ki te ngai akamata anga mai te Kauvai Ioridana ra. Penei kua na roto atu ratou i te vai i Ioridana i tetai ngai i runga ake i te pae roto i Galilea e tomo atura ki te kotinga i Dekapoli i te pae itinga ra o te tai ra. I reira kua kake atura ratou i tetai maunga, inara kua kitea ratou e te urupu tangata ra e kua apai maira i te maki, te pirikoki, te matapo, e pera katoa te murare, e manganui te aronga maki e te kopapa kino oki. Kua tuku iora ia ratou ki mua i to Iesu nga vaevae, e kua akaora atura aia ia ratou. Kua umere roa te au tangata katoa ra, i to ratou kite anga i te murare i te tuatua anga, te pirikoki i te aaere anga, e te matapo i te kite anga; e kua akapaapaa atura ratou i te Atua o Iseraela.

Kua akono atura Iesu i tetai tangata e taringa turi tona e e ngata roa nona kia tuatua. E ngoie ua te aronga turi ra i te taakamaia, e kino roatu oki i roto i te urupu tangata. Penei kua kite a Iesu i te reira tu mataku. E no reira kua arataki aroa atura iaia mei te urupu tangata ra e kia toe ko ia anake ua. Kia toe ra ko raua anake, kua akakite atura Iesu eaa tana ka rave nona, kua tuku atura i tona rima ki roto i ona taringa, tutua akera i te uavare, e kua akatukia atura i tona arero. Ei reira, nana akera Iesu ki te rangi, e kua ngunguru oonu iora ma te na ko anga: “Kia puata.” E kua ora maira te mana akarongo o te reira tangata, e kua rauka katoa oki iaia i te tuatua tika tikai.

Oti akera ia Iesu i te rave i te reira au akaora anga e manganui, kua akakite maira te au tangata tini ra i to ratou arikianga. Kua karanga ratou e: E mea tika rava te au mea ­katoa tana e rave nei; te akapuata nei aia i te turi, e te tuatua nei te murare iaia.” Mataio 15:​21-31; Mareko 7:​24-37.

▪ Eaa ra a Iesu i kore ei i akaora vave i te tamaiti a te vaine Ereni ra?

▪ I muri akera, kua arataki atu a Iesu i tana au pipi ki ea?

▪ I akapeea ta Iesu akono aroa anga i te tangata turi tei rave anga ngata ra nona kia tuatua?