Pene 53

E Tutara Maroiroi Tei Anoanoia Ra

I TA Iesu angai anga i te aronga e au tauatini ua atura na te tu semeio, kua va ua te au tangata ra. “Ko taua peroveta mou rai teia, ko te ka aere mai ki te ao nei,” ta ratou ia i tuatua. Kua manako ratou ia Iesu e ko taua peroveta maata ia Mose ra pera katoa oki koia tikai te tutara anoano maataia. Kua manako ratou e tiki mai iaia e akaariki iaia.

Inara, kua kite a Iesu i te manako o te au tangata ra. No reira kua rapurapu aia i te kopae kia kore aia e mouria e ratou ra. Kua akatakake atura aia i te aronga tini i reira ra e kua akaue atura i tana au pipi kia na runga i te pai e akatere atu ei ki Kaperenauma. Kua oki akaou atura aia ki runga i te maunga e kua pure. I te reira po kua noo a Iesu koia anake ua i reira.

I mua poto ake ka maiata ei kua akara atura Iesu mei tona ngai teitei e kua kite atura i te au ngaru i te taori angaia e te matangi viviki. I te marama anga o te marama te vaitata ra i te ki, no te mea e te vaitata ra i te Pasa, kua kite atura Iesu i te pai ma tana au pipi te tauta ra kia tere ki mua atu i te au ngaru ra. Te oe ra te reira au tangata ma to ratou maroiroi katoa.

I to Iesu kite anga i te reira, kua eke atura mei te maunga e kua akamata i te aere atu ki te pai ra na runga atu i te au ngaru ra. Kua tae ki te toru me kare e a maire te tere anga te pai i tae atu ei a Iesu. Inara, kua aere tika aia mei te mea rai e kare aia e tapae atu. I te akara anga tana au pipi iaia, kua aue ratou e: “E turuma teia!”

Kua tuatua akamaroiroi atura Iesu: “Ko au teia; auraka e mataku.”

Inara kua karanga maira Petero: “E te Atu, ko koe tika ra, e tuatua mai koe kiaku kia aere atu ia koe na na runga katoa i te kare.”

Kua karanga atura Iesu: “Ka aere mai”!

Ei reira, kua eke maira Petero i te pai, aere ua atura kia Iesu na runga i te kare. Kia akara ra aia i te viviki anga o te matangi, kua mataku akera Petero, e te maremoia ra, kapiki atura: “E te Atu, kia ora au!”

I reira tikai kua akatika maira Iesu i tona rima, opu maira iaia, na ko maira kiaia: “E koe, te akarongo mea ngiti nei, eaa koe i [ekoko, NW] ei?”

I to Petero raua ko Iesu tae anga i muri ake ki runga i te pai ra, aki takiri akera te matangi, e kua poitirere tikai te au pipi ra. Inara ka tau ainei ratou kia pera? Naringa i mou ia ratou “te aiteanga o nga manga” (NW) na te ariki anga i te semeio maata ta Iesu i rave i nga ora tokoiti ua i mua akera i tana angai anga i nga tauatini tangata ki e rima ua manga e nga ika rikiriki e rua ra, kare e tau i reira kia umere e kua rauka iaia te aaere na runga i te vai e kia akaaki takiri i te matangi ra. Inara, i reira, kua tipapa maira te au pipi ki mua ia Iesu e kua na ko maira. “Ko te Tamaiti tikai koe a te Atua.”

Kare i roaia, kua tae atura ratou ki Genesereta, e ngai manea, e ngai uua e te paraaraa i vaitata ua ki Kaperenauma. Kua tutauia to ratou pai i reira. Inara i to ratou tae atu anga ki uta, kua kite te au tangata ra ia Iesu e kua aere ua atura e pini rava akera taua enua ra, e kimi i te aronga maki. I te apai anga mai taua aronga maki ra i runga i to ratou roi katoa e kia akatukia ua ake ratou i te tapa kakau o Iesu ra, kua ora ia ratou.

Ei reira, kua akara akera te urupu tei kite ra i te semeio angai anga i nga tauatini tangata ra, e kua akaruke a Iesu. I te taenga mai nga puke poti rikiriki mei Tiberia mai, kua kake atura ratou ki runga e kua aere atura ki Kaperenauma e kimi ia Iesu. I te kitea anga aia, kua karanga atura ratou: “E Rabi, i naea mai koe i ko nei?” Kua ako atura Iesu ia ratou, mei ta tatou ka kite i muri uake nei. Ioane 6:​14-25; Mataio 14:​22-36; Mareko 6:​45-56.

▪ I muri ake i ta Iesu angai semeio anga i nga tauatini tangata ra, eaa ta ratou i anoano kia rave kiaia ra?

▪ Eaa ta Iesu i akara mai mei runga i te maunga tana i aere ke atura, e eaa tana i rave?

▪ Eaa i kore ei e tau kia poitirere te au pipi i te reira au mea ra?

▪ Eaa tei tupu i muri ake i to ratou tae anga ki uta ra?