“Koai Au nei i ta te Tangata Tuatua Anga?”

E TUATAU akaou ia no te Kiritimiti. Kua iki te au tangata takapini i te ao i te akamaara i tetai ra anau anga. Toai ra anau anga? Ko te Tamaiti ainei a te Atua me kare ko tetai tangata ngati Iuda te manako ua ra i te taui akaou i te akonoanga te autu ra i tona ngai i te anere mataiti mua? E ra anau anga ainei no tetai tangata te paruru ra i te putaua, ko tetai tangata meameaau te ka akatupu i te manamanata ki te Patireia o Roma tei tamate iaia ra, me kare penei e ko tetai tangata pakari te akakite ketaketa ra i te kite uaorai e e ngai oonu no te pakari? E tumu anga toou kia akamanako, ‘Ae, koai oki a Iesu Karaiti?’

Kua inangaro a Iesu uaorai i te kite i te pau anga a te tangata ki taua ui anga. “Koai au nei i ta te tangata tuatua anga?” tana ia i ui atu ki tana au pipi. (Mareko 8:27) Te tumu no te ui anga? E manganui tei akamutu takere i te aru iaia. I te akara anga kua oripu ua e kua reka kore tetai pae i te kopae anga aia i muri maira i ta ratou tauta anga i te akariro iaia ei ariki. Pera katoa, te akaao angaia mai e tona au enemi ra, kare a Iesu i akaari i tetai akairo mei te rangi ra i te akapapu e koai oki aia. No reira i te pauanga i taua ui anga ra, eaa ta tana au apotetoro i karanga i te akataka anga iaia ra? Kua akara ratou i etai au manako tei ariki maata ia i rotopu i te au tangata: “Ko Ioane

bapetizo ta etai, ko Elia ta tetai pae, ko Ieremia oki, e ko tetai o te au peroveta taito ra, ta etai.” (Mataio 16:​13, 14) Kare ra ratou i taiku mai ana i te au tuatua akakino anga e manganui tei tua ia i Paretaina i taua tuatau ra no runga ia Iesu—e tangata tuatua akakino, e tangata kite pikikaa, e peroveta pikikaa, e e tangata neneva.

Te Au Tu e Manganui o Iesu

Me ka ui a Iesu i taua ui anga ra i teia tuatau, penei e ka ui mai aia na roto i tetai mataara ke: “Koai ta te aronga kite e karanga ra e koai au?” Teia akaou, peneiake paa ka kapiti ia mai te au pau anga ki teia: E manganui te au manako ke ke. “Kia tau ki ta David Tracy o te Apii Teitei o Chicago, e tuke ke te au manako ke ke e te au uri anga a te au tangata e manganui no runga ia Iesu e eaa tana i tuatua e i rave ana.” Tere atu i te anere mataiti i topa, kua taangaanga te aronga kite i tetai au apinga ngata no te apii anga o te taiate tangata, te apii taineti tangata anga, e te au mataara tata anga ta ratou i tauta ana kia rauka mai te au pau anga ki te ui anga e koai tikai a Iesu. I te openga ra, koai ta ratou i kite i muri i te tu o Iesu?

Te manako ua ra etai aronga kite e ko te Iesu tuatua enua e peroveta ngati Iuda te apii ra i te ope anga o te au mea te umuumuanga i te tataraara. Inara, kua akamutu ua ratou i te kapikianga iaia ei Tamaiti na te Atua, te Mesia, e te Akaora. Kua manako ekoko te maata anga i te papa anga Pipiria no tona akamata anga i te rangi e tona tuakaou anga. Ko tetai pae, e tangata ua a Iesu e na roto i tona oraanga akatauanga e te au apiianga kua akakeuia te aronga akarongo e manganui e i te openga ra kua koropiniia te akono anga Kerititiano. E tei kiteaia i roto i te Theology Today, te akara katoa ra tetai pae ia Iesu ei “tangata kimi apa, ei tangata pakari tuitarere, me kare ei tangata purepure puapinga kore ua; ei tangata raverave i roto i te oire, tetai tangata atu pee te tuatua akakino ra i te pupu akaaere anga, me kare ko tetai tangata rima rave akamea ua te akakite ra i tona manako ki te au oire makitakita, putaua, kino maata o Paretaina takake ra.”

Te vai katoa ra te au manako tuke roa atu. Te mama maira te tutu o tetai Iesu kerekere i roto i te imene rap, te ati oire, e te ura.a Kua manako tetai pae e e vaine tikai a Iesu. I te tuatau maana o te 1993, kua kite te aronga matakitaki tei aere atu ki te Orange County Fair i California i tetai tiki o “Christie,” ko tetai vaine, taaka ko “Karaiti” i runga i te koroti. I taua taime rai i New York, kua akaariia mai​—a “Christa”​—tetai vaine “Iesu” patiaia. Kua akatupu taua nga tiki ra i te au taumaro anga. E i te akamata anga i te 1999, kua kiteaia mai e te aronga okooko ra i tetai voriumu “no te aroa o [taua] Iesu Tamaiti e tana puakaoa, ko Angel, i oronga ki tetai e tetai.” Kua akatakaia mai to raua piri anga mei tetai te “akakeu ia ra i te pae vaerua e te akaari anga e akapeea te tamaiti e te puakaoa i te akapapa anga kia akaatinga i to raua oraanga no tetai e tetai.”

E Tumu Maata Tikai Ainei Ia?

Eaa ra koe ka akamanako atu ei e koai oki e eaa oki a Iesu? Okotai tumu no te mea, kia taiku ia Napoleon, “e mana to Iesu Karaiti e kua tutara ki rungao i Tona au tangata noatu kare i akaraia Tona kopapa e ratou ra.” Na tana au apiianga maroiroi e na te tu o tona ora anga, kua tupu to Iesu mana ki runga i te au oraanga o te au tangata e pirioni ua atu no te tuatau vaitata i te rua tauatini mataiti. Mei ta tetai tata tuatua i akataka meitaki mai: “Pouroa te au vaeau tei aaere ana, e te aronga manua tei maaniia, e te au paramani ravarai tei noo ana, e te au ariki katoatoa tei tutara ana, kapiti katoaia ratou, kare i akatupu i te tupu anga te mana ririnui ki rungao i te oraanga o te tangata i te enua nei mei tona rai te tu.”

E tera tetai, te anoanoia ra koe kia kite e koai e eaa a Iesu no te mea tei iaia te tika anga o toou tuatau ki mua. Tei ia koe te tuatau kia riro ko tetai tangata o tetai kavamani tei akatumuia i te rangi ra​—te Patireia o te Atua i raro ake ia Iesu. Ka akaouia to tatou paraneta tei tamanamanataia ki tona tu mekameka tukeke ra e te tau anga ecological i raro ake i te arataki anga a Iesu. Kua akapapu mai te totou Pipiria kia tatou e na te Patireia o Iesu e angai i tei onge, e akono i te putaua, e akaora i te maki, e akaoki akaou mai i tei mate ki te ora.

Papu e ka inangaro koe i te kite e eaa te tu o te tangata te arataki ra i taua kavamani tei anoano maata ia. Ka tauturu te atikara te aru maira ia koe kia rauka te kite oonu i te Iesu tika tikai.

[Tataanga Rikiriki i Raro]