Pene 59

Koai Tikai A Iesu?

I TE taenga atu te pai i apai atura ia Iesu e tana au pipi ki Betesaida, kua apai maira te au tangata i tetai tangata matapo kiaia e kua pati atura kiaia kia amiri atu i te reira tangata e ka akaoraʼi iaia. Kua mou a Iesu i tona rima e kua taki atura ki vao i te oire e, oti akera te tutua anga ki runga i tona mata, kua ui atura kiaia: “Te kite ra ainei koe i tetai apinga?”​—NW.

“Te kite nei au i te tangata,” ko ta tera tangata ia i karanga, “mei te rakau ra te tu, te aere ua ra.” I te tuku anga i tona nga rima ki runga i nga mata o taua tangata ra, kua akaora iora Iesu kia kite meitaki aia ra. Kua tono atura Iesu i taua tangata ra e oki ki te kainga ma te akaue atu auraka e aere ki te oire.

Kua aere atura a Iesu ma tana au pipi ki te au oire meangiti i Kaisarea Philipi ra, i te tuanga tokerau mamao roa o te Enua Taputouia ra. E mamao te kake aere anga, e vaitata e 30 maire, e tae ei ki taua ngai manea ko Kaisarea Philipi ra, e 1,150 tapuae te teitei ki runga ake i te tai ra. E rua paa ra te aerenga e tae ei ki reira.

I te aerenga i te mataara ra, kua tapae a Iesu koia anake ua i te pure. E iva ua me kare e tai ngauru ua marama toe i mua ake i tona matenga, e te manako ra aia no tana au pipi. E manganui kua akaruke i te aru anga iaia. Ko tetai pae kua kononinoni ua e kua mataora kore nona i kopae ra i te manako o te au tangata e akariro iaia ei ariki e pera katoa no tei kore aia, i oronga akairo no te rangi maira ei akapapu i tona taoonga ariki anga, i te akaaoanga a tona au enemi ra. Eaa ta te au apotetoro nana, e irinaki ra nona? I to ratou aere atu anga ki te ngai e pure ra aia, kua ui atura Iesu: “Koai au nei i ta te tangata tuatua anga?”

Kua tuatua maira ratou: “Ko Ioane Bapetizo ta etai, ko Elia ta tetai pae, ko Ieremia oki, e ko tetai o te au peroveta taito ra, ta etai.” Ae, kua manako te au tangata ra e ko tetai o te reira au tangata, a Iesu, tei akatuia no te mate maira!

Kua karanga atura Iesu: “Koai ra au nei i ta kotou na tuatua anga?”

Kua tuatua viviki maira Petero: “Ko te Mesia koe, ko te Tamaiti a te Atua ora.”

I muri ake i te akakite anga i tona mareka anga i ta Petero pau anga, kua na ko atura Iesu: “E karanga katoa atu au kia koe ra, Ko Petero koe; e ki runga i teia­nei papa e patu ei au i taku [putu­putu­anga, NW]; e kare rava ïa e rauka i te ­ngutupa o ade.” I reira ta Iesu akakite anga mua e ka patu aia i tetai putu­putu­anga e kare rava e rauka i te mate i te mou i te au mema ei tuikaa i muri ake i to ratou vai tira­tiratu anga i te enua nei. Kua karanga atura aia kia Petero: “E oronga atu oki au i te au taviri o te basileia o te [au rangi, NW] kia koe.”

Kua akakite atura Iesu e ka rauka ia Petero te au angaanga takake ra. Kare, kare i orongaia kia Petero te ngai maata i rotopu i te au apotetoro ra, kare katoa i akariroia ko ia ei tango no te putuputuanga. Ko Iesu uaorai te Papa e patuiaʼi te putuputuanga ki rungao iaia. Inara ka orongaia nga taviri e toru kia Petero no te vaʼi i te tika no nga pupu tangata kia tomo atu ki te Patireia o te au rangi ra.

Ka taangaanga a Petero i te taviri mua ia Penetekote 33 T.N. kia akakite ki te ngati Iuda tataraara ra eaa ta ratou ka tau kia rave e orai. I muri poto akera ka rave aia i te rua o te taviri ei akatuera ki to Samaria tei akarongo i te tika kia tomo atu ki te Patireia o te Atua. I te 36 T.N. ka rave aia i te toru o te taviri ei akatuera ki te au Etene peritome koreia ra, kia Korenelio ma tona au taeake, i taua tika rai.

Kua rave ua atura Iesu i tana uriuri manako anga ma tana au apotetoro katoa. Kua reka kore ratou i tana akakite anga i te au mamae e te mate tana ka aro atu i Ierusalema kare e roaia. No te kore i kite e ka akatuakaouia a Iesu ki te oraanga i te rangi ra, kua arataki ke atura Petero ia Iesu. Kua na ko atura: “Auraka takiri ïa, e te Atu: eiaa koe e peraia mai.” Kua anga ke maira aia, e tuatua atura Iesu: “Ka aere ke atu koe, e Satani, ki muri iaku, e maitu koe naku; kare koe i tau i ta te Atua ra, ko ta te tangata ra taau i tau.”

I te akara anga, e au tangata etai i te pae atu i tana au apotetoro ra tei aere kapiti ra ma Iesu, e kua kapiki atura aia ia ratou kia aere mai kiaia e kua akakite atura e kare i te mea ngoie ua te akariro anga ei pipi nana ra. “Me ka inangaro tetai i te aru mai iaku,” ko tana i karanga, “e akaruke aia iaia uaorai, e rave i tona rakau tamamae, ka aru tamou mai ei iaku. Ko tei umuumu atu i tona uaorai meta, ka ngere ia i te reira; Ko tei ngaro tona meta noku e no te nuti meitaki ka ora ia iaia te reira.”​—NW.

Ae, me ka akapapu ratou e e tau ratou no tana akaperepere, ka tau ta Iesu au pipi kia mataku kore e kia tuku atinga ia ratou uaorai. Kua karanga aia: “Ko te akama iaku, e taku nei tuatua, i teianei uki akaturi, e te rave ara, koia katoa, ta te Tamaiti a te tangata nei e akama, kia tae mai aia ma te au angela tapu, e te kakā o tona Metua.” Mareko 8:​22-38; Mataio 16:​13-28; Luka 19:​18-27.

▪ Eaa ra Iesu i manako maataʼi no tana au pipi ra?

▪ Eaa te au ­manako o te au ­tangata ra e koai a Iesu?

▪ Eaa nga taviri i oake atuia ra kia Petero, e akapeea te taangaanga i te reira ra?

▪ Eaa te ako tei rauka mai ia Petero, e no teaa ra?