“Ka Aru Mai ei Iaku”
1 E manganui te au tangata te akamou ra i to ratou oraanga i te akamarekaanga ia ratou uaorai, inara e maata te taime kare ratou e mataora ana. Ei tukeanga, kua akakite mai a Iesu i tetai oraanga no te oronga anga karapii kore te ka apai mai i te mataora tikai. (Anga. 20:35) Kua karanga aia: “Ko tei inangaro i te aru mai iaku ra, e akaruke aia iaia uaorai, . . . ka aru mai ei iaku.” (Mareko 8:34) E maata atu te inangaroia ra e kia kopae ke tetai iaia uaorai i tetai au tu navenave tikai i tetai au taime. Te aiteanga te akonoanga i te au ra tataki tai kia akamareka kare ia tatou uaorai, mari ra ia Iehova.—Roma 14:8; 15:3.
2 Akamanako ana i te akaraanga o te apotetoro ko Paulo. No “te meitaki maata ra i to kite i taku Atu ra ia Iesu Mesia,” kua akaruke a Paulo i te aruaruanga i te au inangaro uaorai e kua akatapu iaia uaorai ki te akatereanga i te au inangaro o te Patireia ki mua. (Philipi 3:7, 8) “E kua tika rava iaku” i karanga ei aia, “i te akaope i toku nei ririnui e kia ope rava” i te tavinianga i tetai atu. (2 Kori. 12:15) Ka tau meitaki tatou tataki tai kia ui: ‘Peea ua ra au i te akonoanga i toku taime, maroiroi, au kite, e taku au apinga? Te akamou ra ainei au ki te akatereanga i toku uaorai au inangaro, me te kimi ra au i te akamareka ia Iehova?’
3 Au Atianga i te Oronga: I te au mataiti ravarai, te oronga ra te au tangata o te Atua i te au pirioni ora e tere atu ki te angaanga akaora anga ora no te tutu anga i te Patireia. I roto i te putuputuanga, te akono kapiti ra te mapu e te pakari i te au tukuanga angaanga tukeke te puapinga ra i tetai ke. E maata katoa te angaanga te raveia nei te piri atura ki te au akaputuputuanga e te au uruoaanga e pera katoa ki te patuanga e te akono anga i te au are te taangaangaia ra kia akatere i te akamori mou ki mua. E akamanako ana i te tauturu aroa orongaia e te au taeake te tavini ra i runga i te au Kumiti Aravei Anga i te Are Maki e te Pupu Aravei i te Aronga Maki. Pouroa taua au tautaanga akaatinga uaorai kua riro ei akameitakianga ki to tatou taokotaianga taeake Kerititiano!—Sa. 110:3.
4 Ka tupu mai te au atianga kia oronga ia tatou uaorai i roto i te au mataara tukeke me tupu ana tetai tumatetenga me kore tetai tupuanga poitirere. Inara, e maata te taime, ka kite ua mai tatou e te inangaro ra tetai taeake Kerititiano i tetai tauturu me kore tetai akamaroiroianga. (Maseli 17:17) Me oronga ua atu tatou ia tatou uaorai i te tavini atu i tetai ke e i te akatere i te au inangaro no te Patireia, te aru ra tatou i te akaraanga o Iesu. (Philipi 2:5-8) Kia aruaru tatou kia rave ua atu rai i te reira.