“Tauturu mai Iaku i Toku Ngai Ngere i te Akarongo!”
“Kua na ko maira te metua tane o taua tamaiti ou ra: ‘E Akarongo toku! Ka tauturu mai iaku i toku ngai ngere i te akarongo!’”—MAREKO 9:24, NW.
1. Eaa tetai metua tane i tuatuaʼi, “Ka tauturu mai iaku i toku ngai ngere i te akarongo”?
KUA tu maira ki mua ia Iesu Karaiti te metua tane o tetai tamaiti tei nooia ra e te temoni. E inangaro maata to taua tangata ra kia akaoraia tana tamaiti ou ra! Kare i rava te akarongo o te au pipi a Iesu kia tuaru atu i taua temoni ra, inara kua kapiki atura tona metua e: “E akarongo toku! Ka tauturu mai iaku i toku ngai ngere i te akarongo!” Na te mana orongaia mai e te Atua, kua tuaru atura Iesu i taua temoni ra, kare e ekoko anga e kua akamaroiroi atu i te akarongo o te metua o taua tamaiti ra.—Mareko 9:14-29, NW.
2. No runga i te akarongo, eaa nga mataara e rua kare ra te au Kerititiano e akama?
2 Mei te metua manakonako meitaki o taua tamaiti ra, kare katoa te tavini tiratiratu o Iehova e akama kia tuatua e: “E akarongo toku!” Penei ka akakore te aronga aviri i te mana o te Atua ra, te tika o tana Tuatua, e pera katoa oki e te vai ra aia. Mari ra ka akatika ua te au Kerititiano mou e e akarongo to ratou i te Atua ko Iehova ra. Inara, i te tuatua poiri anga ki to ratou Metua i te rangi ra na roto i te pure, ka pati ua taua aronga tatakitai ra: “Ka tauturu mai iaku i toku ngai ngere i te akarongo!” Ka rave katoa oki ratou i te reira ma te akama kore, ma te kiteanga e noatu rai ko te au apotetoro a Iesu Karaiti kua pati: “E akamaata mai i to matou akarongo.”—Luka 17:5.
3. Eaa te tumu maata o ta Ioane taiku anga i te tuatua “akarongo” i roto i tana Evangeria, e eaa ra te reira i tau ei?
3 E maata te tuatua anga no te akarongo i te au Tuatua Tapu Ereni Kerititiano ra. Ko te tika, kua taikuia etai tu tuke o te tuatua Ereni tei kapitiia ki te “akarongo” i te Evangeria a Ioane e tere atu i te 40 patene te putuputu atu anga i ta etai atu Evangeria e toru kapiti katoaia ra. Kua raurau maira a Ioane e kare i rava kia tu anake i te akarongo; ko te akonoanga ra i te reira te mea maata ia. I tana tataanga i te 98 T.N., kua kite aia i te au kakave kavangia o te akonoanga patoi te tuatua mou i te itaeanga kia ereere i te au Kerititiano apikepike te akarongo. (Angaanga 20:28-30; 2 Petero 2:1-3; 1 Ioane 2:18, 19) No reira e mea puapinga kia akono i te akarongo, kia akakite i te reira na te au angaanga akono anga atua. E au tuatau ngata tei vai maira ki mua.
4. Eaa ra i kore ei e apinga te ka kore e rauka i te aronga e akarongo to ratou ra?
4 Na te akarongo e raukai i te au Kerititiano i te akono kia autu i te au tu ngata. Kua akakite atura Iesu ki tana au pipi e “angairi e akarongo to [ratou] mei tetai ua sinapi nei,” kare rava e mea e kore e tika ia ratou. (Mataio 17:20) Na te reira mataara, kua akaketaketa aia i te mana o te akarongo ra, e ua ia no te vaerua tapu. Kua akaketaketa atura Iesu i reira, kare i ta te tangata, mari ra ko ta te vaerua o te Atua, me kare mana rave angaanga, te ka rave. Ko te aronga na te reira i arataki kare e akariro i te au arai me kare manamanata rikiriki ua ei au mea mamaata. Na te akonoanga i te pakari te orongaia maira e te vaerua o te Atua na te reira e tauturu ia ratou kia akara tau i te au mea ravarai. Noatu ko te au manamanata kikino ra ka meangiti mai me ka tukua ki te mana tamou i te akarongo ra.—Mataio 21:21, 22; Mareko 11:22-24; Luka 17:5, 6.
Pureanga Kia Kore e Puapinga Kore te Akarongo
5-7. (a) Eaa te au tuatua akamatakiteanga no runga i te akarongo ta Iesu i tuatua i tana akamata anga i te Oroa Akamaara anga? (e) Akapeea te akarongo o Petero i te akariro anga kia rauka iaia i te akamaroiroi atu i tona au taeake ra?
5 I te 33 T.N., kua akono a Iesu i te Pasa no te taime openga ma tana au pipi katoa ra. I muri ake i tana tukuanga ia Iuda Ikariota kia aere ke atu, kua akono aia i te oroa Akamaara anga, i te na ko anga: “Ka akono au i te koreromotu ma kotou [tangata nei], mei toku Metua i akono ra i tetai koreromotu kiaku nei, no tetai patireia . . . E Simona, e Simona, i na! I pati ana a Satani kia ruruia kotou mei te titona rai. Mari ra kua pure au no kotou kia kore e ope to kotou akarongo; e ko kotou, kia oki akaou maira kotou, e akamaroiroi atu i to kotou au taeake.”—Luka 22:28-32, NW.
6 Kua pure a Iesu kia kore e ope te akarongo o Simona Petero ra. Noatu rai e kua tuatua akaparau a Petero e kare rava aia e akakore ia Iesu, e roa poto ake i muri iora kua rave aia i te reira e toru taime. (Luka 22:33, 34, 54-62) Kia tika ia, i te totou anga e ka papaia te Tiaki kia mate, e ka pueurikiriki ke oki te mamoe. (Zekaria 13:7; Mareko 14:27) Inara, i to Petero oki mai anga mei tona topa anga ki roto i te ereere o te mataku ra, kua akamaroiroi atura aia i tona au taeake i te pae vaerua. Nana i taiku i te tumu no te mono anga ia Iuda Ikariota pikikaa ra. I tona akonoanga ei vaa tuatua no te au apotetoro i te Penetekote 33 T.N., kua taangaanga a Petero i te mea mua o “nga taviri” ta Iesu i oronga atura kiaia, i te akatueraanga i te mataara no te au Ngati Iuda kia riro ei au mema no te Patireia ra. (Mataio 16:19, NW; Angaanga 1:15–2:41) Kua pati a Satani kia ruruia te au apotetoro ra mei te titona rai, inara kua akono te Atua kia kore ratou e ngere i te akarongo.
7 E tamanako ana i akapeea to Petero manako ngakau i tona akarongo atu anga ki ta Iesu tuatua e: “I pure ana ra au ia koe, kia kore e ope toou akarongo.” E tamanako ua! Kua pure tona Atu koia tona Pu kia kore e ope to Petero akarongo. E kare ia i ope, e kare i kore atu. Ko tei tupu, i te ra o te Penetekote, kua riro a Petero e etai atura ei aronga mua tei akatainuia i te vaerua tapu kia riro mai ei tamariki vaerua na te Atua, ei aronga tuangaia ma te Karaiti ra kia kaka ki te rangi. I te akono anga te vaerua tapu i te angaanga ki runga ia ratou ra na roto i te tu kare i kitea ana i mua ana, kua rauka ia ratou i te akakite i tona au ua, kapiti katoa oki te akarongo, kare i tupu i mua ana. E pauanga umere tikai no ta ratou pati anga: “E akamaata mai i to matou akarongo”!—Luka 17:5; Galatia 3:2, 22-26; 5:22, 23.
Aro Atu Anga i te Au Timataanga ki Mua ma te Akarongo
8. Eaa te akamatakiteanga tau ta te akaaerenga i oronga mai kia tatou no runga i te tupu anga o 1 Tesalonia 5:3?
8 A te tupu anga te totou Puka Tapu, kare e roa atu ka rongo tatou i te kapiki e e “Au e te tinamou!” (1 Tesalonia 5:3, NW) Ka timata ainei teia i to tatou akarongo? Ae, no te mea penei ka mou tatou kare i teateamamao no te akaraanga autu o te pa enua ravarai i te akatupu anga i te au. Inara kare tatou e o atu ki te vaerua o taua aronga akakitekite ra i te au me ka tamou tatou ki to tatou manako e kare te Atua ko Iehova e taangaanga i tetai ua atu rima rave no teianei ao ei akatupu i te reira akakoro anga. Tei iaia uaorai tana mataara no te apai mai i te au mou ra, e ko te reira na tona Patireia anake ua i raro ake ia Iesu Karaiti. E no reira, noatu e eaa te autu anga o to te pa enua i te akanooanga i te au ka riro ia ei mea poto ua e ei apinga no vao anake ua. Ei tauturu ia tatou kia vai teateamamao i te reira tu, ka tamou “te tavini akono meitaki e te pakari” i te akakite mai i te au akamatakiteanga tau kia kore te au tavini o Iehova e rokoia mai kare i papa i taua akakite anga akameamea ua ra i te “Au e te tinamou” na te au pa enua o teianei akatereanga taito o te au mea nei.—Mataio 24:45-47.
9. Eaa ka anoanoiaʼi te maroiroi e te akarongo no tatou a te akapou anga ia Babulonia Maata ra?
9 Ko te kapiki anga e e “Au e te tinamou!” ko te akairo ia no te “akapou anga viviki” te ka rokoia kia Babulonia Maata, koia te patireia o teianei ao no te akonoanga atua pikikaa. (Apokalupo 17:1-6; 18:4, 5) Ka timata katoa teia i te akarongo Kerititiano. I te pururu anga te akonoanga atua pikikaa kia kino, ka vai tamou ainei te Au Kite o Iehova ki roto i te akarongo? E mea papu ka pera ratou. Ko teia tupu anga—poitirere ua e te manakokoreia e te maata anga o te au tangata—kare ia na te raveanga a te tangata nei. Ka tau rai te au tangata kia kite e e akavaanga tikai ia na Iehova, i te akatapu anga i te ingoa kua roa ra te akakino angaia e te akonoanga atua pikikaa ra. Inara akapeea te au tangata ka kite ei me kare tetai e akakite kia ratou? E koai ma i te pae atu i te Au Kite o Iehova te ka tau kia manakoia ei akakitekite kia ratou i te reira?—Akaaiteia atu kia Ezekiela 35:14, 15; Roma 10:13-15.
10. Akapeea katoa oki ka riro ei te tamaki mai anga a Goga i te iti tangata o Iehova ei timata anga i to ratou akarongo?
10 Kua maroiroi te Au Kite akatainuia o Iehova e to ratou au oa e manakonako anga to ratou kia noo ki te enua nei, i te akakite atu kia etai ke ra i te akatupu anga i ta Iehova akavaanga ia Babulonia Maata e pera katoa te toenga atu o ta Satani akatereanga o te au mea nei. (2 Korinetia 4:4) I tana tuanga ei Goga o Magoga, te akatakaanga i tona turanga taakaakaia ra, ka akaputu a Satani i tana au nuku i te enua nei kia tamaki katoatoa atu i te au tangata o te Atua ra. Ei reira ka timataiaʼi te akarongo o te Au Kite o Iehova i te au mana paruru a te Atua ra. Inara ka rauka ia tatou te akarongo e mei ta te Tuatua a te Atua i totou maira, na Iehova e akaora i tona au tangata katoa.—Ezekiela 38:16; 39:18-23.
11, 12. (a) Na teaa i akapapu i te ora no Noa e tona ngutuare i te tuatau o te Vaipuke ra? (e) Eaa ta tatou ka kore e taitaia atu a te tuatau o te mate maata ra?
11 I teia tuatau nei, kare tatou i kite papu e ka akapeea a Iehova i te paruru anga i tona iti tangata a te tuatau o te “mate maata” ra, inara kare teia i te tumu no te ekoko anga e me ka rave aia i te reira. (Mataio 24:21, 22) Ka riro te turanga o te au tavini o te Atua i teia tuatau nei kia aite ki te tuatau ia Noa e tona ngutuare tangata i kite ra ia ratou uaorai i te tuatau o te Vaipuke ra. Kua topiriia ratou ki roto i te araka ma te au vai o te akapou anga tei takapini ra ia ratou, penei e tu mataku to ratou i te reira akakite anga mai i te mana no te Atua e kua pure akatenga ratou. Kare e akakite anga mai no te au Tuatua Tapu e i taitaiaia ratou e kua ui kia ratou uaorai: ‘Kua rava ainei te maroiroi o te araka kia kore e ngaa i te au mana akapou ra? Kua rava ainei ta tatou manga kia tae roa ki te openga o te Vaipuke? Ka rauka ainei ia tatou i te akono i te au tu taui anga i runga i te enua i muri akera.’ Kua akapapu maira te au mea i tupu e kare rava e akatumu anga no te reira au tu taitaia.
12 Ei akapapu anga i te ora no ratou, kua anoanoia kia akono a Noa e tona ngutuare tangata i te akarongo. Kua tau i reira te aruanga i te au akauenga e te aratakianga a te vaerua tapu o te Atua. A te tuatau o te mate maata, ka tau rai mei te reira katoa te puapinga kia aru tatou i te au aratakianga a te vaerua tapu e te akarongo anga i te au akauenga a Iehova ra na roto mai i tana akaaerenga. Ei reira kare a tatou tumu no te taitaia e te ui anga: ‘Akapeea ka merengo ei to tatou anoano no te au mea vaerua e te au apinga? Eaa te apinga te ka rauka mai na te aronga kua ruaine me kare no te aronga te anoanoia ra te vairakau takake me kare te utuutu anga tau? Akapeea ta Iehova rave anga kia ora atu tatou ki roto i te ao ou?’ Ma te akarongo maroiroi, ka akaruke te au tavini tiratiratu a Iehova i te au mea ravarai ki roto i tona nga rima tau ra.—Akaaiteia atu kia Mataio 6:25-33.
13. Kia akamata mai te mate maata ra, eaa ka tau ei tetai akarongo no tatou mei to Aberahama rai?
13 Kia akamata mai ra te mate maata, kare e ekoko anga ka akamaroiroi maataia mai to tatou akarongo. No te mea, ka kite ra tatou e te rave ra a Iehova i tana i tuatua maira e ka rave aia. Ka kite rai tatou i tana rave anga i te akavaanga ma to tatou uaorai mata! Inara ka rava ainei to tatou uaorai akarongo kia irinaki e i tana akapou anga i te aronga rave kino ra, ka akaora ra te Atua i tona iti tangata? Ka aite ainei tatou mei ia Aberahama rai, tei irinaki ra e ka rave ‘te Akava i to te ao katoa nei i te tika’ kare aia e akapou i te aronga tuatua tika ma te aronga rave kino katoa?—Genese 18:23, 25.
14. Eaa te au uianga te ka tau kia akakeu ia tatou kia akara matatio i to tatou akarongo e kia rave pakari i te akamaroiroi i te reira?
14 Mei teaa ra te puapinga no tatou i teianei kia akamatutu i to tatou akarongo! I te vaitata anga mai te openga o teianei akatereanga kino o te au mea nei, e tuku tatou na te vaerua o te Atua e akakeu ia tatou i “te tuatua tapu e te akono i te Atua.” (2 Petero 3:11-14) E kare tatou e akakinoia a te tuatau o te mate maata ma te au manako apiapi mei teianei: ‘Te tau nei ainei au no ta Iehova paruru anga? Ka rauka ainei iaku te rave kia maata atu tana angaanga? I rava ainei taku tauta anga i te aoao i te “tangata ou” ra? Mei iaku nei ainei te tu tangata ta Iehova ka anoano no te ao ou ra?’ Na te reira au tu uianga tau e akariro ia tatou kia akara matatio i to tatou akarongo e kia rave pakari kia akamaroiroi i te reira i teianei tikai!—Kolosa 3:8-10.
Te Akarongo ei Akameitaki Mai ia Tatou
15. Eaa ta Iesu i tuatua atu i etai taime ki te aronga tana i rapakau ra, inara eaa te reira i kore ei e tau e te turu ra i te akarongo rapakauanga i teia tuatau nei?
15 Kare a Iesu i rave i tana angaanga akaora i te aronga akarongo anake ua ra. (Ioane 5:5-9, 13) E no reira kare tana angaanga i turu i te apiianga tau kore i te tuatua tapu ra no te rapakau anga akarongo ra. E tika, i tuatua a Iesu i etai taime ki te aronga tana i akaora ra: “Kua ora koe i toou akarongo.” (Mataio 9:22; Mareko 5:34; 10:52; Luka 8:48; 17:19; 18:42) Inara na te tuatuaanga i te reira, te akakite ua atura aia i tetai tuatua mou: Naringa kare o te aronga maki ra akarongo e ka rauka ia Iesu te rapakauanga, kare ia ratou e aere mai kiaia no te rapakauanga i te akamata anga mairai.
16. Eaa te porokarama rapakauanga ta Iesu e arataki nei i teia tuatau?
16 I teia tuatau nei, te arataki ra a Iesu Karaiti i te porokarama akaoraanga i te pae vaerua, e e tere atu i te 4,000,000 te aronga tatakitai tei tuku ia ratou uaorai kia tau kia puapingaia i te reira. E Au Kite no Iehova, te rekareka ra ratou i te ora anga i te pae vaerua e noatu etai ua atu maki kopapa ia ratou ra. Te au Kerititiano akatainuia i rotopu ia ratou ra e manakonako anga to ratou no te rangi, e ‘e tamou ra ratou i to ratou mata ki te au mea mutu kore te akara koreia ra.’ (2 Korinetia 4:16-18; 5:6, 7) E ko te au Kerititiano e manakonako anga to ratou no te enua nei te tapapa atura ratou i te au angaanga umere roa no te akaoraanga i te kopapa te ka raveia i te ao ou a te Atua ra.
17, 18. Eaa te akapapa anga a Iehova te akatakaia maira ia Apokalupo 22:1, 2, e eaa te akarongo i anoanoiaʼi no tatou kia puapingaia mei te reira ra?
17 Kua taiku maira te apotetoro ko Ioane i ta te Atua ra akapapa anga no te ora mutu kore na roto i teianei au tuatua ia Apokalupo 22:1, 2: “Kua akakite maira aia iaku i tetai vai ora, e vai taʼe oki, mei te io te areare, no roto mai i te terono o te Atua e to te Punua-mamoe ra. E tei rotopu i te arataa i taua oire ra, e tei tetai pae vai e tetai pae, ko te rakau ora te tu anga, okotai ngauru ma rua tu o te ua, okotai marama okotai ua anga, e ope rava ake te au marama katoa ra: e te rau o taua rakau ra, ko te rapakau ïa i to te pa enua.” Ko te “vai ora” te kapiti ra i te tuatua mou a te Atua e etai katoa atu au akapapa anga na Iehova no te rapakauanga i te au tangata akarongo i te ara e te mate ma te oronga anga i te ora mutu kore no ratou na runga i te tumu anga o te atinga oko o Iesu ra. (Ephesia 5:26; 1 Ioane 2:1, 2) Ia ratou i te enua nei, kua inu te au pipi a Iesu o te 144,000 tei akatainuia ra, i te akapapa anga a te Atua ra na roto i te Karaiti e kua tapaia ko “te au rakau mamaata no te tuatua-tika ra.” (Isaia 61:1-3, NW; Apokalupo 14:1-5) Kua ua mai ratou e maata te ua i te pae vaerua i te enua nei. Ei aronga akatuakaouia ki te rangi, i te tuatau o te Tutara o te Karaiti no te Tauatini Mataiti, ka rave kapiti katoa ratou i te tua anga i te au apinga akapapaia no te oko te ka riro mai ei “rapakau ia i to te pa enua” mei te ara e te mate.
18 Ko te maroiroi atu to tatou akarongo i teianei au mea akapapa anga na te Atua ra ko te maata atu ia to tatou rekareka anga i te aru i te au aratakianga a tona vaerua kia rave ia ratou. Ka tupu mai te tu apa kore no te pae kopapa i te akono anga te tangata i te akarongo i te Karaiti e te tupu anga oki i te pae vaerua. Noatu rai e ka akaora temeioia te au tangata tatakitai i te au tu maki mamaata, ka raveia ra aia kia vaitata atu ki te tu apa kore ua i tana rave anga i te tika. Ka rave putuputu aia i ta te Atua ra akapapa anga no te rapakauanga na te atinga o te Karaiti ra. No reira ka riro te akarongo kia mana ki runga i to tatou akaora angaia e te akariro angaia kia apa kore i te pae kopapa ra.
“Akaoraia na Roto i te Akarongo”
19. Eaa i puapinga maataʼi kia tamou ngaueue kore i te akarongo?
19 E tae roa ki te akaatea anga mutu kore te poiri o teianei ao kino nei a te mamaiata o te ao ou a te Atua ra, e mea puapinga kia tamou ngaueue kore te au tavini o Iehova i te akarongo! Te aronga “akarongo kore” ka uriia ki roto i “te roto ai e te teio ra,” ko te rua ia o te mate. Ko te tuanga openga o te reira, ka tupu ia i muri ake i te timata openga a te openga o te Tutara anga o te Karaiti no te Tauatini Mataiti. (Apokalupo 20:6-10; 21:8) Mei teaa ra te akameitaki anga no te aronga te ka tamou i te akono i te akarongo e ka ora atu kia rekareka i te tuatau mutu kore ra!
20. Eaa te aiteanga taka ke o 1 Korinetia 13:13 a te openga o te Tutara a te Karaiti no te Tauatini Mataiti ra?
20 Ei reira teia au tuatua na Paulo ia 1 Korinetia 13:13 ka rave ei i tetai aiteanga taka ke: “Te vai nei te akarongo, te manakonako, e te aroa, e toru ra; ko tei maata ra i taua toru nei, ko te aroa ïa.” Kare tatou e anoanoia kia akono i te akarongo e ka riro te taputou totouia maira ia Genese 3:15 ei mea tika tikai me kare ei manakonako anga e ka tupu te reira. Ka tupu ia i reira ra. Ei aronga tiratiratu, ka rave ua atu tatou i te manakonako anga ia Iehova, ma te akarongo iaia e tana ra Tamaiti, e ka aroa atu ia raua na raua oki i akatupu i teia totou. Pera katoa oki, na te aroa oonu e te ngakau akameitaki no to tatou ora ka ruru katoa ia tatou ki te Atua na roto i te akamori anga aati koreia no te katoa ua atu o te tuatau.—1 Petero 1:8, 9.
21. Eaa ta tatou ka tau kia rave i teia tuatau nei kia “orai na roto i te akarongo”?
21 E meitaki maata te au akapapa anga ta Iehova i rave ei akamaroiroi i te akarongo na roto i tana akaaerenga. E akono i te reira katoatoa. E aere putuputu e rave te tuanga katoa oki i te au uipaanga a te iti tangata o te Atua ra. (Ebera 10:24, 25) E apii pakari i tana Tuatua e te au puka Kerititiano katoa. E pati akatenga kia Iehova i tona vaerua tapu ra. (Luka 11:13) E aru i te akarongo o te aronga te rave taakaaka ra i te aratakianga i roto i te putuputuanga. (Ebera 13:7) E kopae ke i te au timata anga o teianei ao. (Mataio 6:9, 13) Ae, e akaoonu atu i toou pirianga ma Iehova na te au mataara ravarai te ka rauka ia koe. I runga ravao, e tamou i te akono i te akarongo. Ei reira ka riro ko koe tetai i rotopu i te aronga te ka akamareka ia Iehova e ka rauka ia koe te ora, no te mea kua tuatua a Paulo: “Na . . . te aroa ua kotou i orai na roto i te akarongo, e kare te reira i te kaiou kia koe, e apinga oronga uaia mai na te Atua ra.”—Ephesia 2:8, NW.
Eaa Taau Au Pauanga?
◻ Eaa te au timataanga i te akarongo te vai maira ki mua tikai ia tatou nei?
◻ Na teea nga mataara e rua e raukai kia meitaki tatou i te akarongo?
◻ Kia tau ki ta 1 Petero 1:9, eaa te roa no tatou e tamou ei i te akarongo?
◻ Eaa te au akapapa anga no tatou kia akamaroiroi i to tatou akarongo?
[Tutu i te kapi 15]
Mei te metua tane tei rapakauia ra tana tamaiti e Iesu ra, te kite ra ainei a koe uaorai i te anoanoia kia maata atu te akarongo?
[Tutu i te kapi 17]
Te anoanoia ra te akarongo mei to Noa e tona ngutuare tangata katoa ra kia orai i te “mate maata ra”