Au Uianga a te Aronga Tatau
Te tuatua a te apotetoro ko Paulo ia 1 Korinetia 15:29, te aiteanga ainei e kua papetitoia tetai au Kerititiano no te aronga tei mate?
Kare, kare te Pipiria e kare te tuatua enua i akakite mai ana i te reira.
Me tatauia teia irava i roto i te Pipiria ka manako tetai pae i to Paulo tuatau, e kua tupu te papetito ki te vai no te aronga tei mate. Ei akaraanga: “Me kare e tuakaou anga, eaa ta teia aronga ka rave tei papetitoia no tei mate?”—New International Version.
Inara, akamanako i te tuatua a te nga tangata apii Pipiria. Karanga a Dr. Gregory Lockwood e mei te mea kua raveia te papetito anga “no te aronga tei mate” e “papetito anga te reira, tei tamanakoia kare e akapapu anga i roto i te Pipiria e te tuatua enua.” Tata katoa te Professor ko Gordon D. Fee e: “Kare a te Pipiria e te tuatua enua akapapu anga no teia papetito anga. Kare te K[oreromotu] O[u] i taiku ana i te reira; e kare te reira i raveia e te au akonoanga e kare katoa te au akonoanga Kerititiano mua i rave ana i teia i te au anere mataiti i aereia mai.”
Karanga te Pipiria ki te au pipi a Iesu ka “akariro i to te pa enua katoa ei pipi; ka bapetizo atu ei ia ratou . . . , ma te apii atu ia ratou, kia akono i te au mea katoa taku i akaue atu kia kotou.” (Mata. 28:19, 20) I muri ake ka riro ei tetai tangata ei pipi, ka anoanoia aia kia apii, kia irinaki, e kia akarongo kia Iehova e Tana Tamaiti. Ko tetai tei mate takere e tei roto i te vaarua, kare e rauka iaia i te rave i te reira; e kare katoa tetai Kerititiano e ora ra, e rave i te reira nana.—Kohe. 9:5, 10; Ioa. 4:1; 1 Kori. 1:14-16.
Eaa i reira ta Paulo e tuatua ra?
Kua patoi tetai pae o Korinetia e ka akatuia mai tei mate. (1 Kori. 15:12) Karanga a Paulo e kua tarevake ratou. Karanga aia e kua ‘mate aia i te au rā katoa.’ E tika, te ora ra aia. Inara noatu te au tumatetenga tana i aro atu, kua papu iaia me mate aia ka akatuia mai aia ei vaerua ririnui, mei ia Iesu rai.—1 Kori. 15:30-32, 42-44.
Ka anoanoia to Korinetia kia mārama e ei au Kerititiano akatainuia, ka aro atu ratou i te au timataanga i te au rā katoa e ka mate i mua ake ka akatuia mai ei. Me “bapetizoia ki roto i te Mesia ra ia Iesu” te ō maira te “bapetizoia i roto i tona mate.” (Roma 6:3) To ratou papetito anga akatutu anga, ka taki atu te reira ki te mate e ka akatuia mai ki te rangi.
Tere atu i te rua mataiti i muri ake i to Iesu papetito anga ki te vai, akakite aia ki tana nga apotetoro: “Kia bapetizoia korua i te bapetizo e bapetizoiaʼi au nei.” (Mare. 10:38, 39) Kare a Iesu i papetitoia ki roto i te vai i te reira taime. Te aiteanga e ka arataki tona oraanga tiratiratu ki tona mate. Tata a Paulo no te aronga akatainuia e ka “mate kapipiti nei oki [ratou] ma ia katoa, kia akakakā kapipitiia ma ia katoa oki.” (Roma 8:16, 17; 2 Kori. 4:17) No reira ka mate ratou e kia akatuia ki te oraanga i te rangi.
Taka meitaki, kia maramaia ta Paulo tuatua e: “Kare ra, eaa iora tetai aronga i bapetizoiaʼi ei tuā i te aronga i mate ra, kia kore takiri te aronga i mate ra e tu akaou? eaa iora ratou i bapetizoiaʼi ei tuā i tei mate ra?”