To Iesu Oraanga e te Angaanga Orometua

Tupu Akera Tetai Taumaro Anga

I TE tuanga mua o taua aiai ra, kua apii atura Iesu i tetai apiianga meitaki no te rave angaanga taakaaka na te orei anga i te vaevae o tana au apotetoro. I muri akera, aia i orongaʼi i te Akamaaraanga no tona matenga te vaitata maira. I reira, e apinga poitirere tikai tei tupu no te mea koi oti ua akera taua ako anga ra. Kua o atu tana au apotetoro ki tetai taumaro anga veravera e koai i o ratou tei maata! I te akara anga, e tuanga te reira no tetai taumaro anga kua roa.

E tamanako ana e i muri ake i to Iesu akatuke angaia i runga i te maunga ra, kua taumaro te au apotetoro e koai i o ratou ra tei maata. Pera katoa oki, kua pati a Iakobo raua ko Ioane i tetai turanga teitei i te Patireia, tupu atura te taemoemo anga i rotopu i te au apotetoro ra. Ei reira, i tona po openga ia ratou ra, mei teaa ra to Iesu taitaia i te kite anga ia ratou te taumaro akaou ra! Eaa tana i rave i reira?

Kare aia i tuatua riri atu i te au apotetoro ra no to ratou tu, kua tuatua maru akaou atura Iesu kia ratou: “Te akateitei nei te ui ariki o te etene i rungao ia ratou; e taua aronga i akavi ia ratou ra, te tapaia nei ïa i te takinga-meitaki. Kareka kotou na, kare ia e tika kia pera. . . . Teiea oki tei maata, ko tei noo i te kaingakai ainei, e ko tei raverave ainei? kare ainei ko tei noo i te kaingakai?” I reira, kua akamaara atura ia ratou i tana akatauanga, kua na ko atura aia: “E tau ra au mei te tavini ra i roto ia kotou nei.”

Noatu rai to ratou tu apa ua, kua mou piri atu te au apotetoro ra kia Iesu i tona au timataanga. No reira kua karanga aia: “Mei toku Metua i akono i tetai basileia noku ra, kua akono katoa au ia kotou.” Ko teia koreromotu i rotopu tikai ia Iesu ma tana au pipi tiratiratu katoa te kapiti ra ia ratou kiaia kia o atu ki tona ngai ariki. E numero kotingaia e 144,000 anake ua te ka raveia ki roto i te reira koreromotu no tetai Patireia.

Noatu rai e kua orongaia ki te au apotetoro te reira manakonako anga meitaki kia piri atu kia Iesu i te tutaraanga Patireia, te vaira to ratou tu paruparu. Kua karanga atura Iesu e: “Ei teianei po e maitu ei kotou katoa iaku nei.” I te tuatua atu anga kia Petero e i pure ana Aia nona, kua raurau atura Iesu e: “Kia akaariuia mai koe ra, ka akatinamou atu i to au taeake.”

Kua akataka atura Iesu e: “E aku au tamariki e, e poto ua toku noo ki o kotou nei. E kimi kotou iaku: e taku i karanga atu ki te ngati Iuda ra e, Te ngai taku e aere nei, kare kotou e tae ake ki reira; ko taku ia tuatua kia kotou i teianei. E tuku atu au i te akauenga ou kia kotou. E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai. Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”

Kua ui maira Petero kiaia: “E te Atu, ka aere koe kiea?”

“I te ngai taku e aere nei, kare e tika ia koe kia aru mai iaku i teianei, ka aru maira koe iaku a muri atu,” ko ta Iesu ia i akakite atu.

Kua anoano a Petero kia kite aia: “E te Atu, eaa e kore ei e tika iaku kia aru atu ia koe i teianei? e oronga oki au i toku ora noou.”

Kua karanga atura Iesu kiaia: “Ka oronga koe i toou ora noku e? Tika, tika tikai taku e karanga atu kia koe, i teia rā, i teianei po, Kare e kakaoa te moa, ka tu toru atura oou uuna anga iaku.”

Kua tuatua patoi maira Petero: “Mate ua atu au ia koe na, kare rava ïa au e uuna ia koe.” Kua pera katoa mai etai atu apotetoro ra i te tuatua anga, e kua tuatua akamaata maira Petero: “Kia maitu te tangata katoa ia koe, kare takiri au nei e maitu!”

I te taiku anga i te tuatau i tono ra aia i tana au apotetoro i te tere tutu aere i Galilea ma te moni kore ra, e kare e pute kai, kua ui atura Iesu: “I ngere ainei kotou i tetai mea ngiti?”

“Kare rava!” ta ratou ia i pau atu.

Kua karanga atura aia: “I teianei ra, e āriki moni tana ra, e apai ïa, e tana katoa oki pute [kai, NW]; e kare ona e koke ra, e oko atu aia i tona kakau i te koke. E akakite atu oki au kia kotou, i te manga tuatua i tataia ra e, ‘Kua kapiti katoaia aia ki te aronga rave ara ra,’ e tupu ïa iaku nei; e te au tuatua noku ra, e ope ia i te tupu.”

Te tou atura Iesu ki te tuatau e patitiiaʼi aia ma nga tangata rave ara, me kare nga tangata rave kino ra. Pera katoa te akakite maira aia e i muri akera ka aravei atu tana au pipi i te takinga kino anga pakari. Kua tuatua maira ratou: “E te Atu, i na, e rua eianei puke koke.”

Kua na ko atura aia: “Oti ra ua.” Ka kite tatou a muri akenei, no te mea e koke ta ratou ka rauka ia Iesu i te ako atu i tetai atu apiianga meitaki. Mataio 26:31-35; Mareko 14:27-31; Luka 22:24-38; Ioane 13:31-38; Apokalupo 14:1-3.

◆ Eaa ra te taumaro anga a te au apotetoro ra i riro ei ei mea poitirere?

◆ Akapeea ta Iesu akono anga i te reira taumaro anga?

◆ Eaa tei akatupuia e te koreromotu ta Iesu i akono ma tona au pipi katoa ra?

◆ Eaa te akauenga ou ta Iesu i oronga, e eaa te puapinga maata o te reira ra?

◆ Eaa te manako papu ta Petero i akaari maira, e eaa ta Iesu i tuatua atu?

◆ Eaa ra ta Iesu akauenga kia rave i te moni e tetai pute kai i tuke ei i tana i oronga atu i mua akera?