To Iesu Oraanga e te Angaanga Orometua
Mamae Anga i te Kainga Ra
I TE oti anga ta Iesu pure, kua imene akapaapaa ratou ko tana au apotetoro tiratiratu e 11 ra kia Iehova. E kua eke maira ratou mei te pia i runga ra, kua aere atura ki roto i te anuanu o te poiri i te po ra, e kua oki atu na te o i Kiderona e tae atu ei ki Betania. Inara i te mataara, kua tapu ratou i tetai ngai meitaki, i te kainga o Getesemane. E ngai te reira i vaitata i te Maunga i Oliveta ra. E putuputu ana a Iesu i te uipa ratou ko tana au apotetoro i ko nei i rotopu i te au pu rakau orive ra.
Kua akaruke maira aia e toko varu o tana apotetoro—penei i vaitata ua te tomoanga ki te kainga ra—e kua akaue atura kia ratou: “E noo kotou i ko nei, kia aere au ki ko akera e pure.” Kua taki atura aia i etai toko toru—ko Petero, ko Iakobo, e Ioane—e kua aere mamao atura ki roto i te kainga ra. Kua iriea a Iesu e kua taitaia ravaia. Kua tuatua maira aia kia ratou, “kua pini rava toku meta i te mamae mate maata: e noo i ko nei, e ara tatou.”
Aere atura aia ki mua itio, tipapa iora ki raro ma te pure, na ko atura: “E taku Metua, kia tika, kia apai keia teianei kapu iaku nei: kia tupu ra toou anoano; auraka toku.” Eaa te aiteanga o tana tuatua? Eaa aia i “mamae mate maata” ravaʼi? Te unui ra ainei aia ki muri i tana tika i tuku kia mate aia ei oko?
Kare rava ia! Kare a Iesu e pati ana kia kore aia e mate. Noatu ko te manako kia kopae ke aia i te mate ei atinga, mei ta Petero i tuatua atura kiaia, e mea rikarika ia nana. Kareka ra, te mamae maata ra tona ngakau no tona mataku e ka akakinoia te ingoa o tona Metua, na te tu o tona mate anga te vaitata ra—ei tangata rave kino maata. Kua kite aia i reira e e tokoiti ua nga ora toe ka patitiia aia ki runga i te rakau ei tangata kino rava—ei tangata akakino i te Atua ra! Ko teia te tumu i maataʼi tona taitaia.
I muri ake i tana pureanga roa, kua oki akaou atura a Iesu, kite atura i nga apotetoro e toru te moe ra. I te tuatuaanga kia Petero, kua na ko atura aia: “Eaa oki tena? kare e tika ia kotou kia ara tatou i te ora iti okotai? E ara, e e pure oki kia kore kotou e rokoia e te timataanga.” Inara i te akatikaanga e kua roiroi ratou i te manamanata e te roa o te ora, kua karanga aia: “Kua tika oki i te vaerua, te parukaua nei ra te kopapa.”
Kua aere ke atura a Iesu no te rua o te taime e kua pati akaou atura kia akakore te Atua i “teianei kapu” iaia, koia oki, ta Iehova tuanga akamanaia ra, me kare tona anoano e nona. I tona oki akaou atu anga, kite atura aia i taua toko toru ra e te moe ra kare e pure ana kia kore ratou e rokoia e te timataanga. I to Iesu tuatua atu anga kia ratou, kare ratou i kite eaa ta ratou e paʼu atu kiaia.
I te openga, i te toru o te taime, kua aere ke atura a Iesu e vaitata i te pei anga i te toka kia mamao atu, tuturi atura ki raro e ma te kapiki anga maata e te au roimata katoa, kua pure aia: “E taku Metua kia tika ia koe, e akakore i teianei kapu iaku nei.” Kua kite tikai a Iesu i te mamae kino no te akakino anga te ka apaiia mai ki runga i te ingoa o tona Metua, no te tu o tona matenga ei tangata rave kino. Eaa ra, kia akaapaia ei te tangata tuatua akakino—mei tetai tei tao ra i te Atua—e vaitata i te maata rava no te akakoromaki!
Inara, kua rave ua atura a Iesu i te pure: “Kare ei taku i anoano, ei taau ra i anoano.” Kua kauraro ua atu a Iesu i to te Atua ra anoano. Ei reira, kua mama maira tetai angera no te rangi mai e kua akamaroiroi maira iaia ma etai au tuatua akamaroiroianga. Penei, kua akakite atu te angera kia Iesu e te kata mareka maira tona ra Metua iaia.
Mei teaa ra te reira apainga i runga i to Iesu nga pakuivi! Ko tona uaorai ora mutu kore e to te au tangata ravarai te tautau ra i roto i te arite. E maata roa atu te manata o te manako ngakau. No reira kua rave ua atura Iesu i te pureanga akatenga, e kua riro te pata anga o tona ou mei te topata anga toto rai i te topa anga ki te enua. Kua karanga The Journal of the American Medical Association, “noatu rai e e apinga teia kare e tupu putuputu ana, ko te ou toto . . . penei ka tupu anake i te tu maata roa tei takinoia e te manako ngakau.”
I muri akera kua oki akaou atura a Iesu ki tana nga apotetoro no te toru o te taime, e kite atura aia e te moe ra. Te roiroi kino ra ratou no te mii tikai. Kua karanga atura aia: “I te tuatau mei teia rai te moe na kotou e te akaangaroi ra! Otira ua! Kua tae ki te ora! I na! Kua tukuia te Tamaiti a te tangata nei ki te rima o te aronga ara. E tu, ka aere tatou. I na! Te vaitata maira te ka pikikaa mai iaku nei.”—NW.
E i reira ra, kare i oti taua tuatua nana ra, kua aere maira a Iuda Ikariota kiaia, ma te urupu tangata maata e ta ratou au mori e te au ramepa e te au taoonga tamaki oki. Mataio 26:30, 36-47; 16:21-23; Mareko 14:26, 32-43; Luka 22:39-47; Ioane 18:1-3; Ebera 5:7.
◆ I muri ake i te akaruke anga i te pia i runga ra, kua taki atura a Iesu i te au apotetoro kiea, e eaa tana i rave i reira?
◆ Ia Iesu e pure ra eaa ta nga apotetoro i rave ana?
◆ Eaa ra a Iesu i mamae maata ravaʼi, e eaa tana pati anga ki te Atua ra?
◆ Eaa te akakiteia maira i te pata anga to Iesu ou kia riro mei te topata anga toto rai?