Te Maara ra Ainei ia Koe?

Kua kite ainei koe i te au itiu o Te Punanga Tiaki Anga ei puapinga tikai ma te taangaangaia? Kore i reira e timata i taau i maara no te ka aru mai?

◻ Eaa te au tika te taumaroia ra no te patoi i te akangateiteianga i te ngai i tamanakoia e kua anauia a Iesu?

Kare te Puka Tapu i taiku ana i te ngai tikai i anauiaʼi a Iesu. Te oronga ua maira te au papaanga Evangeria o Mataio e Luka i te au mea i anoanoia. (Mataio 2:1, 5; Luka 2:4-7) Te akaari maira te tatauanga ia Ioane 7:40-42 e e kare te maata anga o te tangata i manako papu atu ana i te ngai i anauiaʼi aia, kua manako etai pae e kua anauia aia i Galilea. Pera katoa, i te tuatau o to Iesu uaorai oraanga i te enua nei, kare rava aia i akakitekite ana i te au papaanga tuatua o tona ngai anauanga.​—12/15, kapi 5.

◻ Akapeea e raukaʼi i tetai Kerititiano i te tamou ua atu i tona rekareka koi rave atu ei i te au tu ngata o te maki i te pae kopapa, te taitaia, e te tu ngata i te pae o te puapinga?

Te oronga maira te Tuatua na te Atua i te akapumaana anga e te arataki anga tei anoanoia. Na te tatauanga me kore te akarongoanga ki te au salamo, ka tupu mai te au akaoraora anga tei anoanoia. Kua ako mai a Davida ia tatou: “E tuku koe i taau apainga kia Iehova ra, e nana koe e tauturu mai.” Kua akapapu katoa aia ia tatou no Iehova e koia “tei akarongo i te pure ra.” (Salamo 55:22; 65:2) Ta Iehova akaaerenga, na roto i te au puka, te aronga pakari o te putuputuanga, te tu papa ua ra no te tauturu ia tatou i te rave anga i to tatou au manamanata.​—1/1, au kapi 14-15.

◻ Eaa te aiteanga i ta Iesu tuatua iaia e aere ra ki te ngai e patitiiaʼi aia: “Me te rave ra ratou i teia au mea koi mauu ei te tumu rakau, eaa te ka tupu me mae ake te reira?” (Luka 23:31, NW)

Te tuatua ra a Iesu no te tumu rakau o te enua ngati Iuda. No to Iesu noo anga i reira e tetai au toenga o te ngati Iuda tei irinaki iaia, kua vai rai etai ora mauu i roto i reira. Inara, te apai ke angaia teia mei roto mai i te enua, kua vai ua te tumu rakau mate i te pae vaerua, ei akaaerenga enua tei mae.​—1/15, kapi 9.

◻ Akapeea e raukaʼi i “tei ma ra i te ngakau,” tei akakiteia ia Mataio 5:8 (NW), te “kite i te Atua”?

Te ‘kite ra ratou i te Atua’ me kite ratou iaia e raverave ra no tona aronga akono i te tiratiratu. (Akaaiteia atu kia Exodo 33:20; Iobu 19:26; 42:5.) Inara, te tuatua Ereni ia Mataio 5:8 tei tuatuaia “kite” tona aiteanga katoa “kia kite ma te manako, kia marama, kia kite.” I te mea e kua akaata a Iesu ma te apa kore i to te Atua tu, kua rauka i “tei ma ra i te ngakau” i te “kite i te Atua” na roto i te kite oonu anga i te reira tu. (Ioane 14:7-9)​—1/15, kapi 16.

◻ Eaa tatou i taopenga ei e ko Iesu te angera maata ko Mikaela?

Te taiku ra te Tuatua na te Atua e okotai rai angera maata, e te tuatuaia ra te reira angera e ko te Atu ko Iesu tei akatuia maira: “Ko te Atu uaorai oki te ka eke mai mei te rangi mai ma te maeva, ma te reo o te angela maata, e ma te pu a te Atua.” (1 Tesalonia 4:16) Ia Iuda 9 te kite ra tatou i te ingoa o teia angera e ko Mikaela.​—2/1, kapi 17.

◻ Eaa te au ngai e a e raukaʼi ia tatou i te akaari i te tu ngateitei ki tetai atu au tangata?

Kia akaari tatou i te tu ngateitei ki te au tutara poritiki, ki te au pu angaanga, ki te au mema i roto i te ngutuare tangata, e ki te aronga i roto i te putuputuanga.​—2/1, au kapi 20-2.

◻ I mua poto ua ake i to Iesu matenga, eaa te akaraanga memeitaki tana i tuku no te aronga e au metua ruaine to ratou?

Ia Iesu e tautau ua ra ma te mamae i runga i te rakau tamamae anga, kua akamanako aia i te tu akono o tona metua vaine i te pae kopapa e i te pae vaerua e kua oronga aia iaia kia akonoia e kia tiakiia e tana apotetoro akaperepereia ko Ioane. (Ioane 19:25-27)​—2/15, kapi 8.

◻ Eaa a Iesu ka mamae ei?

Kua riro to Iesu au mamaeanga ei akaoti i te maro anga o te au tavini tiratiratu o te Atua. Kua akapapa rai te reira iaia i tana angaanga ei tetai Taunga Maata aroa ua no te tangata nei. (Ebera 4:15)​—2/15, au kapi 14-15.

◻ Eaa te au maro anga puapinga tei akatupuia e te patoi i Edene ra?

Ka rauka ainei i te tangata i te tutara iaia uaorai ma te manuia, takake mai mei te Atua? E tika ainei i te Atua kia maro i te tu kauraro anga no tona tu ngateitei? Na roto i te reira, ka iki ainei tetai ua atu au tangata i te tavini i te Atua ma te noinoi kore i to ratou uaorai anoano?​—3/1, kapi 6.

◻ Eaa etai pae i kai tarevake uaʼi i te au oroa Akamaaraanga?

Penei kare etai aronga pakari kore i ariki meitaki ake i ta te Atua au akakoroanga. Penei kare ratou i kite e ko te akatainuanga “tei runga te reira i te Atua, kare i tei inangaro ra me kore tei oro ra.” (Roma 9:16, NW) Kare ia tei runga i te tangata tatakitai kia manako e ka inangaro aia kia apainia aia ki roto i te koreromotu ou e kia riro mai ei tuanga kapitiia ki te Mesia. Ko ta Iehova ikianga te tare ra, e te akatika ra tona vaerua i te reira. (Roma 8:16; 1 Korinetia 12:18)​—3/15, kapi 21.

◻ Eaa te “reo ma” tei tuatuaia i roto ia Zephania 3:9 (NW)?

Ko te maramaanga tikai ia o te tuatua mou no runga i te Atua e tana akakoroanga.​—4/1, au kapi 21-2.