Ka Ariki Ainei Koe Koia te Mesia?

KUA akapou a Iesu Karaiti e toru e te apa mataiti te tutu aereanga i te Tuatua na te Atua i rotopu i te au Iseraela. Inara i te tae anga ki te taime ka akamutu tana angaanga orometua i te enua nei, kua patoi te maata anga o tona aronga iaia ei Mesia, me kore “Tei Akatainuia” tei taputouia e te Atua. Eaa ra?

Te tauturu maira te Pipiria ia tatou kia akataka i te au tumu e manganui i kore ei te au ngati Iuda anere mataiti mua i ariki ia Iesu ei te Mesia. Te riro ra e toru o teia au tumu ei tapupu i te manganui mei te arikianga i to Iesu taoonga i teianei ei Ariki Mesia e tutara ra.

‘Te Inangaro nei Matou kia Kite i Tetai Akairo’

Tetai tumu i kore ei te au ngati Iuda anere mataiti mua i ariki i te Mesia no ta ratou kore anga e ariki i te au akairo Tuatua Tapu tei tou ra ki tona taoonga Mesia. I tetai au atianga, kua maro te au tangata e akarongo ra kia Iesu kia rave aia i tetai akairo no te akapapu e no ko mai aia i te Atua. Ei akaraanga, kua ripoti a Mataio 12:38 e kua karanga etai o te au tata e te au Pharisea e: “E te Orometua, te inangaro nei matou kia kite matou i tetai akairo ia koe.” Kare ainei kua akaari takere a Iesu i te au akairo kia ratou? E tikai oki.

I te tae anga ki te reira taime kua rave takere ana a Iesu i tetai au temeio. Kua taui aia i te vai ei uaina, kua rapakau i te tamaiti e mate ra, kua rapakau i te metua vaine ongai maki o Petero, kua tama i tetai tangata repera, kua akaaaere i tetai tangata ngoru, kua rapakau i te maki o tetai tangata tei makiia e 38 mataiti, kua akameitaki akaou i te rima paruparu o tetai tangata, kua akamaru i te au maki kino o te au tangata e manganui, kua rapakau i te tavini o tetai opita vaeau, kua akatu mai i te tamaiti a tetai vaine takaua mei te mate, e kua rapakau i tetai tangata matapo e te murare. Kua tupu teia au temeio i Kana, Kaperenauma, Ierusalema, e Naina. Pera katoa, kua totoa te au nuti no taua temeio ra ki Iudea e te au enua takapini.​—Ioane 2:1-12; 4:46-54; Mataio 8:14-17; 8:1-4; 9:1-8; Ioane 5:1-9; Mataio 12:9-14; Mareko 3:7-12; Luka 7:1-10; 7:11-17; Mataio 12:22.

Ma te taka meitaki, kare i rava kore ana te au akairo no te akapapu e ko Iesu te Mesia. Noatu e manganui tana au akairo i rave i mua i te au tangata, kare ratou i tuku ana i to ratou akarongo ki roto iaia. Te aronga tei kite i te akapapu anga e kua tonoia mai a Iesu e te Atua inara kare i ariki iaia ei te Mesia e aronga matapo ratou i te pae vaerua. E maro to ratou au ngakau e kare i akakeuia e te tuatua mou.​—Ioane 12:37-41.

Akapeea i to tatou tuatau nei? Te akakite ra etai au tangata e, “Ka irinaki ua au i taku ka kite ki toku nga mata.” Inara e kaveinga pakari ainei te reira no te rave? Te akakite maira te totou Pipiria e kua akaterono takereia a Iesu ei Ariki i te rangi i roto i te Patireia Mesia. Mei te mea e kitea koreia aia, ka anoano tatou i tetai akairo ei tauturu ia tatou kia kite ma te marama i tona taoonga tutara, tei akairo ra i te akamata anga o te au ra openga o teia akatereanga kino o te au mea nei. Te kite ra ainei koe i te akairo?​—Mataio 24:3.

Kia tau ki te Pipiria, te akamata anga o to Karaiti taoonga tutara ei Ariki Mesia ka akairoia e te au tamaki, te au ngaruerue enua, te rava kore o te kai, e te au maki mate ma te tupu anga maata rava. I te “tuatau openga,” ka kiteia te tu manako iaia uaorai, te noinoi, e te manako tapupu kore i roto i te au pirianga tangata. (2 Timoteo 3:1-5; Mataio 24:6, 7; Luka 21:10, 11) I te pae i te akapapu anga papaanga mataiti, e tere atu i te 20 au tu tukeke o te au ra openga e tou ra ki te akamataanga o te tutara anga o te Mesia i te 1914.​—E akara i Te Punanga Tiaki o Mati 1, 1993, kapi 5.

“Aronga Noinoi Moni”

Ko te anoano apinganui tetai tumu i patoi ei te au ngati Iuda ia Iesu ei te Mesia. Kua riro te akamanako puapinga maata roa anga i te apinganui ei tapu i te manganui mei te aruanga ia Iesu. Ei akaraanga, kua kiteaia te au Pharisea ei “aronga noinoi moni.” (Luka 16:14, NW) Ka tamanako ana i tetai tutara mapu apinganui tei aere ra kia Iesu e kua ui e akapeea e raukaʼi te ora mutu kore. “E akono koe i te au ture,” i na Iesu atu ei. “Kua ope te reira i te akonoia e au, . . . eaa ua te toe iaku?” i ui ei te tangata mapu, te kite anga e e maata atu tei anoanoia i te akono ua anga i tetai au ture. “Ka aere ka oko i taau apinga, ka apai atu ei na te putaua; e apinga taau i reira i te rangi; ka aere mai ei ka aru mai iaku,” i na Iesu atu ei kiaia. Mei teaa atura i tetai oronga anga​—kia riro mai ei pipi na te Mesia! Inara kua aere ke atura te tutara ma te aue. Eaa ra? No te mea e puapinga maata atu kiaia te apinganui i te enua nei i te apinganui i te rangi.​—Mataio 19:16-22.

Kare te turanga i taui ake. Te riroanga mai ei pipi ngakau tae na te Ariki Mesia tera te aiteanga te tukuanga i te au inangaro pae vaerua ki mua ake i tetai atu au mea ravarai, kapiti mai te au apinga o te enua nei. No tetai ua atu ma te manako anga apinganui, ka riro teia ei akaaoanga. Ei akaraanga, kua tuatua tetai tokorua mitinari i tetai enua Itinga ki tetai vaine no runga i te Pipiria. Te irinakianga e ka inangaro aia i te apii maata atu no runga i te Atua ko Iehova e tana Tamaiti, ko Iesu Karaiti, kua oronga te tokorua i Te Punanga Tiaki e te Awake! kiaia. Akapeea aia i te ariu anga mai? “Ka tauturu ainei teia au makatini iaku kia angaanga maata atu i te moni?” i ui ei aia. E maata atu to te vaine inangaro i te au mea apinganui i te au mea pae vaerua.

Kua apii taua tokorua ra i te Pipiria ki tetai tangata mapu tei akamata i te aere mai ki te au uipaanga i ko i te Are Uipaanga Patireia. “Te kaimoumou ra koe i toou taime,” i na tona nga metua ei kiaia. “Kore koe e aere i te rua o taau ngai angaanga no te aiai kia maata atu taau moni.” Mei teaa atura te maromaroa me akamaroiroi te au metua i ta ratou au tamariki kia tuku i te au mea apinganui ki mua ake i te apiianga no runga i te Ariki Mesia! “I tana apinganui katoatoa kare e rauka i te tutara i te oko e tai ngauru tauatini mataiti o te oraanga,” i karangaʼi tetai materi Tinito.

E manganui tei kite mai e na te apiianga no runga e te aruanga i te Ariki Mesia kare ia e vao mai i tetai ngai no te noinoi moni. Tetai Kite o Iehova tei rauka tana uaorai pitiniti i mua ana ma te au moni maata, kua karanga e: “Te rauka anga te moni maata e mea mareka tikaiia inara kare e anoanoia. Kare ko te moni te akariro ra i tetai tangata kia mataora.” E mema aia i teianei no te ngutuare Betela i tetai manga i Europa o te Taiate Punanga Tiaki.

“Te Mataku i te Ngati Iuda”

Ko te mataku i te tangata tetai tumu i kore ei te au ngati Iuda i ariki ia Iesu ei te Mesia. Na te ariki ua anga i tona taoonga Mesia i te ngai tangata te aiteanga ka takinoia to ratou tu. No etai pae e maata roa ia. Ka tamanako ana ia Nikodemo, e mema no te akavaanga teitei ngati Iuda tei kapikiia ko te Tuneteri. Tei umere i ta Iesu au akairo e te au apiianga, kua aaki aia: “E Rabi, kua kite matou e, e Orometua koe mei ko mai i te Atua ra: kare oki teianei au akairo taau e rave nei e tika i te tangata, auraka te Atua katoa ra.” Inara kua aere a Nikodemo kia Iesu i roto i te poiri, penei kia kore aia e kiteia e tetai atu au ngati Iuda.​—Ioane 3:1, 2.

No te manganui tei rongo ia Iesu i te tuatua anga, e puapinga maata roa atu te mareka anga a te tangata i to te Atua ra. (Ioane 5:44) Ia Iesu i Ierusalema no te Oroa Patiaanga Puakapa i te 32 T.N. nei, “maata rava akera te koumuumu anga a taua aronga katoa ra iaia.” Kare okotai i tuatua va ua ana ia Iesu “i te mataku i te ngati Iuda.” (Ioane 7:10-13) Pera katoa te nga metua o tetai tangata ta Iesu i rapakau ra i tona matapo kare i inangaro i te ariki i te temeio e no ko mai i te komono o te Atua. E “mataku [katoa to ratou] i te ngati Iuda.”​—Ioane 9:13-23.

I teia tuatau, kua kite etai pae e te tutara ra a Iesu i teianei ei Ariki Mesia i te rangi, inara te mataku ra ratou i te ariki va ua i teia. Kia ratou e mea maata roa i te ngere i to ratou turanga ma tetai atu. Ei akaraanga, i Tiamani, kua rave tetai Kite o Iehova i tetai uriuri anga Pipiria ma tetai tangata tei aaki e: “Ta kotou te Au Kite e tutu ra no runga i te Pipiria e tika ia. Inara me riro mai au ei Kite i teia ra, apopo ka kite pouroa te katoatoa i te reira. Eaa ta ratou ka manako i te ngai angaanga, i te ngai tangata i te pae mai, e te karapu ta toku ngutuare tangata e au e aere ra? Kare e rauka iaku i te akakoromaki i te reira.”

Eaa te akatupu ra i te mataku o te tangata? Na te tu parau, te inangaro kia matauia i rotopu i te kopu tangata e te au oa, te mataku o te aviri angaia e te taakama angaia, te apiapi o te tu tuke mei te katoa anga. Te riro ra taua au tu manako ngakau ei timata anga tikai no te aronga te akamata ra i te apii i te Pipiria ma te Au Kite o Iehova. Ei akaraanga, kua rekareka tetai mapu vaine i te apii no runga i te Parataito ta te Patireia Mesia ka akatumu ki runga i te enua i raro ake i te taoonga tutara o Iesu Karaiti. Inara e vaine inangaro tikai aia i te uraura, e kua riro te mataku i te tangata ei tapu iaia mei te tuatuaanga ki tetai atu no runga i teia manakonakoanga. I te openga, kua rauka iaia ma te mataku kore i te tuatua va ua no runga i te Pipiria. Kua kopae tona au oa uraura iaia, inara kua reka tana tane e tona nga metua i te reira. I te openga kua papetitoia te vaine ra e tona metua vaine, e kua akamata tana tane e tona metua tane i te apii i te Pipiria. Mei teaa atura i te tutaki no te autuanga i te mataku i te tangata!

Te Ariki Tikai ra Ainei Koe i te Mesia?

Ia Iesu e mate ra i runga i te rakau tamamae anga, tei reira etai o tana au pipi. Kua ariki ratou iaia ei te Mesia tei totouia ra. Tei reira katoa te au tutara ngati Iuda, tei maro mai rai i tetai akairo. “Ko te Mesia aia, te mea ikiia e te Atua ra, ka akaora aia iaia uaorai.” (Luka 23:35) Ka akamutu ainei ratou i te patianga no tetai akairo? E tatini ua atu au temeio ta Iesu i rave. Pera katoa, tona anauanga, angaanga orometua, akavaanga, tamate anga, e te akatuanga kua riro ei akatupu i te au totou Tuatua Tapu Epera e manganui.​—E akara i te “All Scripture Is Inspired of God and Beneficial,” tei neneiia e te Watchtower Bible and Tract Society of New York, Inc., kapi 343-4.

Te aronga tei aere mai na te pae kua akakino ia Iesu, te patoianga i te tika o tona taoonga Mesia. (Mataio 27:39, 40) Ma te manako apinganui kua akatuanga te au vaeau i te kakau o Iesu i rotopu ia ratou uaorai, te tua kerero anga no tona pereue. (Ioane 19:23, 24) I tetai au tu e tuanga ta te mataku o te tangata i rave i roto i teia. Ei akaraanga, ka tamanako ana ia Iosepha o Arimatea, e mema o te Tuneteri. “E pipi oki aia na Iesu, i mou poiri ua ra i te mataku i te ngati Iuda.” I muri ake i te matenga o te Mesia, kua akono a Iosepha raua ko Nikodemo i to Iesu kopapa. I reira a Iosepha i autu ei i tona mataku i te tangata.​—Ioane 19:38-40.

Naringa koe i noo i te anere mataiti mua, ka ariki ainei koe ia Iesu ei te Mesia? Na te pera anga kua umuumuia kia ariki koe i te tika Tuatua Tapu, te patoi i te manakoanga apinganui, e kare e tuku ua atu ki te mataku i te tangata. I teia au ra openga, ka tau tatou tataki tai kia ui kiaia uaorai, ‘Te ariki ra ainei au ia Iesu i teianei ei Ariki Mesia i te rangi?’ Kare e roa atu ana nana e rave i te au angaanga i te enua nei. Me tupu te reira, ko koe ainei tetai i rotopu i te aronga tei ariki tikai ia Iesu Karaiti ei te Mesia tei taputouia?

[Au Tutu i te kapi 28]

Auraka e uri ke mei te tika e ko Iesu te Ariki Mesia

[Tutu i te kapi 31]

Te apiianga i te Mesia te maata anga o te taime ka autuia te mataku o ta tetai atu ka tuatua