Pene 133

Oti Katoa ia Iesu ta te Atua i Pati

KIA takoreia atu e Iesu Mesia koia te Ariki Toa ra a Satani ma tona ao tuatua tika kore katoa oki, mei teaa ra te akatupu anga a te reira i te rekarekaanga! Ei reira ka akamataʼi te Tutara a Iesu no te Tauatini Mataiti ma te au tikai!

I raro ake i te arataki anga a Iesu ma tona au oa ariki katoa ra, ka rave te aronga te ka ora atu ia Aramakito i te tama i te au apinga toe mai tei kino i taua tamaki tuatua tika ra. Penei katoa oki ka anau tamariki no tetai tuatau te aronga te ka ora atu i te enua nei, e ka rave katoa ratou i te angaanga marekaia i te tatanuanga i te enua kia riro ei kainga manea tikai.

Ei muri akera ka akaoki mai ei a Iesu i te aronga kare i kitea e e ia mirioni no roto mai i to ratou tanumanga kia rekareka i teia Parataito manea. Ka rave aia i te reira ei akatupu anga i tana uaorai taputou: “Te vaitata mai nei oki te ora e aere mai ei te aronga katoatoa i roto i te au menema akamaara anga . . . ki vao.”

I roto i taua aronga ta Iesu ka akatu mai ki runga ko te tangata rave kino tei mate i te pae iaia ra i runga i te rakau tamamae anga. E akamanako ana e i taputou a Iesu kiaia: “E tika tikai taku e tuatua atu kia koe i teianei ra, Ka aravei katoa taua ki Parataito.” Kare, kare taua tangata ra e raveia atu ki te rangi kia tutara katoa ei ariki ma Iesu, e kare katoa oki a Iesu e riro akaou ei tangata e ka noo ei ki te enua Parataito ma ia katoa ra. Mari ra, ka kapiti atu a Iesu ma taua tangata rave kino ra i mua ana na roto i Tana akatuakaou anga iaia kia ora ki roto ia Parataito e ka akono ei i tei anoanoia nona, i te pae kopapa e te pae vaerua, mei tei akatutuia maira i te kapi ka aru mai.

E tamanako ana i te reira! I raro ake i ta Iesu akono anga aroa, ka tupu mai te uanga tangata katoatoa​—⁠te aronga te ka ora ia Aramakito to ratou uanga, e te tauatini ua atu mirioni o tei mate te ka akatuakaouia mai e ka akarongo iaia​—⁠ka riro mai ei au tangata apa kore ua ratou. Na roto mai i tana Tamaiti tiratiratu, ia Iesu Mesia, ka noo te vaerua ma te au tangata katoa. “E,” mei ta te reo ta Ioane i akarongo ra no te rangi mai i te na ko anga, “nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa.” Kare e tangata i runga i te enua nei e mamae me kare e makiia.

Kia tae ki te openga o te Tauatini Mataiti o to Iesu Tutara anga, ka riro te tu mei ta te Atua rai i akakoro i te akamata anga ra, i tana tuatua anga ki nga tangata mua e rua, kia Adamu raua ko Eva, kia anau raua e akaki i te enua. Ae, ka ki te enua katoa i te uanga tuatua tika o te au tangata apa kore ua ra. Ka tupu teia no te mea ka orongaia te au puapinga o to Iesu atinga oko ki te au tangata ravarai. Ka takore ravaia te mate no te ara mai a Adamu ra!

E na reira, ka oti takiri ia Iesu te au mea katoatoa ta Iehova i pati atu kiaia. Ei reira, i te openga o te tauatini mataiti ra, ka oronga atu aia i te Patireia e te uanga tangata apa kore katoatoa ki tona Metua. Ei reira te Atua e tuku mai ei ia Satani e tana au temoni mei roto mai i te vaarua takere kore mei te mate rai te tu kare e angaanga. Eaa ra te akakoro anga?

A te openga o te tauatini mataiti, ko te maata anga o te aronga te ka noo ki Parataito ko te aronga akatuakaouia mai kare ra i timataia to ratou akarongo. I mua ake i to ratou mateanga, kare ratou i kite i ta te Atua au taputou e no reira kare i akakite ana i to ratou akarongo i te reira au mea. Ei muri ake ra i te akatuakaou angaia e ka apiiia i te au tuatua mou no te Puka Tapu, kua ngoie ua no ratou i Parataito, kare e patoi anga, no te tavini i te Atua. Inara me ka orongaia te tuatau no Satani kia tamata i te arai ia ratou kia kore e tavini ua atu ki te Atua, ka rauka ainei ia ratou i te akapapu i te tu tiratiratu i raro ake i te timataanga? Ei akaoti anga i teia uianga, ka tukuia mai a Satani.

Te akakite maira te akakiteanga kia Ioane e a muri ake i te Tauatini Mataiti o to Iesu Tutara anga, ka autu ra a Satani i te akaariu ke anga i tetai papaki o te au tangata kia kore e tavini atu ki te Atua, kare ra i akatakaia mai to ratou numero. Inara i reira, kia oti taua timataanga openga ra, ka akapouia e mutu kore ua atu a Satani, tana au temoni, e te aronga katoa te ka rauka ia Satani i te arataki ke. I tetai pae, ko te aronga tei timata papuia, te aronga te ka ora tiratiratu atu ka ora ua atu ma te rekareka anga i te au akameitakianga a to ratou Metua i te rangi ra e tuatau e tuatau ua atu.

Te taka meitaki ra, kua akono a Iesu, e ka akono ua atu rai, i te tuanga maata i te akatupuanga i ta te Atua au akakoro anga kaka ra. Mei teaa ra te tuatau meitaki ki mua no tatou kia rekareka i te tupu anga o tana au mea ravarai i rave ei Ariki maata na te Atua i te rangi ra. Inara, kare e ngaropoinaia ia tatou tana au mea ravarai i rave iaia e tangata ra.

Kua mareka ua a Iesu i te aere mai anga ki te enua nei e kua apii maira ia tatou no tona Metua. Kapiti katoa ki teia kua akaari maira aia i te au tu meitaki maata o te Atua ra. Te akakeuia nei to tatou ngakau ia tatou ka akamanako ei i tona teitei maroiroi e te mataku kore, tona pakari aite koreia, tona kite meitaki ei puapii, tona mataku kore ei arataki, e tona tu aroa maru ma te kite. Kia akamanako tatou i tona mamae anga kare e rauka kia akatakaia iaia i orongaʼi i te oko, na te reira anake ra ka raukai ia tatou te ora, e mea papu tikai e ka akakeuia to tatou ngakau ma te ariki anga iaia ra!

E tika tikai, ko tetai tangata meitaki rava ia ta tatou i kite i teia apiianga i te oraanga o Iesu! Te kitea puia ra e te taka meitaki ra tona turanga teitei. Te akakeuia nei tatou kia taiku akaou i te au tuatua a Ponotio Pilato koia te kavana o Roma ra: “Ka akara mai ana i taua tangata nei!” E tika rava, “Taua tangata,” nei te tangata maata rava atu tei ora ana!

Na to tatou arikianga i tona atinga oko, ka rauka te takore atu ia tatou nei i te apainga o te ara e te mate tei tuangaia mai mei ia Adamu ra, e ka riro ko Iesu ei “Metua no te tuatau mutu kore” no tatou. Pouroa te aronga te ka rauka ia ratou te ora mutu kore ka tau kia kite kare i te Atua anake mari katoa ra i tana Tamaiti, ia Iesu Mesia. Kia riro taau tatauanga e te apii anga i teia puka ei tauturu atu ia koe kia tamou i taua kite te oronga maira i te ora! 1 Ioane 2:17; 1:7; Ioane 5:​28, 29, NW; 3:16; 17:3; 19:5; Luka 23:43, NW; Genese 1:28; 1 Korinetia 15:​24-28; Apokalupo 20:​1-3, 6-10; 21:​3, 4; Isaia 9:⁠5.

▪ Eaa tetai tuatau mataora no te aronga te ka ora atu ia Aramakito e ta ratou anau?

▪ Kapiti atu ki te aronga te ka ora atu ia Aramakito ma ta ratou anau koai katoa oki te ka rekareka ia Parataito, e na teea tu to Iesu kapiti mai anga kia ratou?

▪ Eaa te ka tupu i te openga o te tauatini mataiti, e eaa ta Iesu ka rave i reira?

▪ Eaa a Satani ka tukuia mai ei ki vao i te vaarua takere kore, e eaa te ka tupu kiaia i muri akera e ki te aronga katoa te ka aru iaia ra?

▪ Akapeea a Iesu ka riro ei ei “Metua no te tuatau mutu kore” no tatou?