Au Uianga a te Aronga Tatau

Eaa te tu tei tau kia akaariia i te au papetito anga Kerititiano?

E uianga meitaki tikai te reira, no te mea noatu e kua papetitoia te maataanga o te aronga tatau, te o maira ratou ki teia, mei te aronga katoa e papetitoia ra. Ka tuatua ana tatou na mua no runga i te aronga e papetitoia ra, te na roto ra i te taruku takiri anga ki raro i te vai. Eaa tikai to ratou tu?

Ia Mataio 28:19, 20, kua akakite a Iesu i tana au pipi kia aere e kia akariro i te au tangata ei pipi, te apiianga e te papetitoanga atu ia ratou. Kare aia i oronga mai i te papetito anga ei tupuanga manako ngakau maata, e raveanga tei tupu mai no roto i te rekareka anga poto ua. E takainga pakari tikai teia, mei ta tatou i kite mei to Iesu akaraanga. Te karanga ra a Luka 3:21 e: “I bapetizo katoaiā Iesu, e te pure ra aia, mavete akera te rangi.” Ae, kua akamanako pakari tikai to tatou Akaraanga i te papetito, ma te pure. Kare e rauka ia tatou i te akamanako atu iaia, i muri ake i te kakeanga mai ki runga mei raro mai i te vai, te maanianga i tetai akairo no te autu anga, te aoa anga, me kore ra te tatakianga i tona nga rima ki roto i te reva, noatu e i rave ua ia ake ana e etai pae tetai au mea mei teia te tu. Kare, ia Ioane Papetito anake i ko iaia ra, kua anga atu Iesu ki tona Metua na roto i te pure.

Inara, kare te Puka Tapu e karanga ana e ko te papetito anga e tupuanga poiri ia e te reka koreia, te umuumu anga i tetai tu takake me kore tuatua anga i te tuatau o te papetito anga, mei tei umuumuia e tetai au akonoanga i roto ia Kerititome i teia tuatau. Ina, e akamanako ana i te ra o te Penetekote, te na roto anga te manotini anga o te au ngati Iuda e te au pipi akonoanga i te papetito anga Kerititiano. Kua apii ke ana ratou i te Ture a te Atua e kua rauka tetai pirianga kiaia. No reira kua anoano uaia ratou kia apii e kia ariki i te Mesia, ia Iesu. I te rauka anga ia ratou te reira, kua tau ratou kia papetitoia.

Te ripoti ra a Angaanga 2:41 e: “E te aronga katoa i āriki marie i tana tuatua, bapetizoia iora ïa.” Te tatau ra te urianga Puka Tapu a Weymouth e: “Te aronga, i reira, tei ariki rekareka i tana tuatua kua papetitoia.” Kua kite ratou i te rekareka i roto i te au nuti mataora no runga i te Mesia, e e mea papu tikai e kua totoa atu te reira rekareka anga ngakau tae ki te papetito anga tikai, e papetito anga ki mua i te au anere e te au anere ua atu aronga akarakara mataora. Kua akara katoa mai te au angera i te rangi e kua rekareka. E akamaara ana i te au tuatua a Iesu: “E karanga atu au kia kotou, Mei te reira katoa te tu o to te au angela a te Atua ra rekareka, kia tataraara te tangata rave ara okotai ra.”​—Luka 15:10.

Te vaira te au mataara tukeke te ka rauka ia tatou tataki tai te akaata atu i te pakari anga e pera katoa te rekareka anga o te papetito anga. I roto i tetai au akonoanga ko te aronga ka papetitoia ka aoao i te au kakau teatea me kore i te au kakau kerekere. Kare ua rai e turuanga mei te Tuatua Tapu mai no runga i te reira umuumu anga. Inara, kare e tau te au kakau pai vai angiangi, me no te tane me kore no te vaine. E mei tei akakiteia, i te kakeanga mai ki runga mei raro mai i te vai, auraka rava te Kerititiano ou e maani i tetai au akatutu anga takake me kore ra e rave mai i tetai au mea mei te mea ra e kua rauka iaia tetai autu anga maata. Ka mataora te katoa anga o te taeake Kerititiano i te mea e kua papetitoia te reira tangata ou. E mea tau e kia kite aia e ko teia akatutu anga i tona akarongo e takainga mua ia ki te aerenga roa o te tu tiratiratu e raukaʼi te mareka anga a te Atua.​—Mataio 16:24.

Ko tatou, te aronga akarakara i tetai papetito anga papuriki, te kapiti atura i roto i te rekareka anga o te atianga, me ko tetai tikai o to tatou kopu tangata te ka papetitoia me kore ra ko tetai tangata tei apiiia e tatou i te Puka Tapu. Inara, e o takiri atu ei ki te reira, ka tau tatou kia akarongo atu i te katoa anga o te tuatuaanga ma te au tangata ikiia, kia akarongo atu ia ratou e pau ra ki mua i te papuriki i te au uianga tei orongaia atu kia ratou, e kia piri atu i roto i te pure. Te raveanga i te reira ka tauturu ia tatou kia akara atu i te papetito anga ma te tau tikai; ka rauka ia tatou ta te Atua akaraanga no te reira. I muri ake i te rave anga i te papetito anga, no to tatou rekareka kare e umuumuia tetai akaariari anga autu, tetai ruru tiare, me kore tetai pati ei akangateitei i te tangata tei papetitoia. Inara ka rauka ia tatou i te aravei atu i to tatou tungane me kore tuaine ou i te akakite atu i to tatou mareka anga no runga i te takainga tei apainaia e te oronga atu i tetai ariki anga maanaana tikai ki roto i to tatou akataeake anga Kerititiano.

Ei akakite anga poto ua, i reira, pouroa tatou katoatoa, kapiti katoa mai te aronga tei tuku ua atu ki te taruku anga ki raro i te vai, ka tau kia akono i te papetito anga ma te tau tikai. Kare te reira i te taime no te akakite anga i te au manako ngakau maata, no te tamataora anga, me kore ra no te tarekareka anga. Inara kare katoa te reira i te taime poiri me kore reka koreia. Ka rauka ia tatou te rekareka i te mea e kua kapiti mai te aronga ou ia tatou ki runga i te mataara ki te oraanga mutu kore. E ka rauka ia tatou te ariki rekareka i to tatou au tungane e te au tuaine ou.

[Tutu maata i te kapi 31]