Pene 20

Te Rua o te Semeio Iaia i Kana

I TO Iesu oki anga ki tona ngai kainga i muri ake i te tutu aere anga roa i Iudea, kare ia no te akaangaroi anga. Kareka ra, kua akamata aia i tetai angaanga maata atu i Galilea, te enua te reira i tupu ake ei aia. Inara, kare tana au pipi i noo atu kiaia ra, kua oki katoa ratou ki to ratou au ngutuare tangata e ki ta ratou angaanga i mua ana ra.

Eaa te tuatua ta Iesu i akamata i te tutu aere? Ko teia ia: “Kua vaitata mai nei te basileia o te Atua; e tataraara kotou, e ka akarongo i te evangelia nei.” Eaa ta ratou i rave? Kua ariki to Galilea ia Iesu. E kua akangateitei ratou katoa iaia ra. Inara, kare no tana i tuatua atura, mari ra, no te mea e manganui o ratou i te Pasa i Ierusalema i nga marama i mua akera e kua kite i te au akairo umere tana i rave i reira.

I te akaraanga kua akamata a Iesu i tana angaanga maata i Galilea ki Kana ra. Penei te maara ra ia koe e i mua akera, i tona oki mai anga mei Iudea ra, kua akariro aia i te vai ei uaina i tetai oroa akaipoipoanga i reira. I te rua o te semeio, kua maki kino roa te tamaiti a tetai tangata mana o te kavamani a te Ariki ko Heroda Anitipa ra. I te rongoanga e kua aere atu a Iesu mei Iudea ki Kana, kua aere atura taua tangata mana ra mei tona kainga mamao i Kaperenauma e kimi ia Iesu. No te maata i tona mii, kua raurau atura taua tangata ra: ‘Aere mai ine, ka aere, ka mate aea taku tamaiti.’

Kua pau maira a Iesu: ‘Ka oki ki toou kainga. Kua ora to tamaiti!’ Kua irinaki taua tangata mana a Heroda ra e kua akamata i tona tere roa ki te kainga. Te oki atura aia kua aravei maira tona au tavini iaia, ko ratou tei aere viviki maira e akakite kiaia e kua meitaki te au mea katoa ra​—⁠kua ora tana tamaiti! Kua ui atura aia: ‘I naea aia i meitaki mai ei?’

‘I nanai i te ora tai i te avatea,’ ta ratou ia i pau atu.

Kite akera taua tangata mana ra e ko te reira tikai te ora i karangaʼi a Iesu e, ‘Kua ora to tamaiti!’ I muri ake i te reira, kua riro mai taua tangata ra e tona ngutuare katoa ei pipi na te Mesia.

Riro akera a Kana ei ngai, i akairoia no tona oki anga mai mei Iudea, e kua raveia e Iesu e rua nga semeio ki reira. Kare ra ko te reira anake ua nga semeio tana i rave e tae roa mai ki te reira tuatau, inara e nga apinga maata ia no te mea na te reira i akairo tona oki anga ki Galilea.

Kua aere atura a Iesu ki te kainga i Nazareta. Eaa te tapapa maira iaia i reira? Ioane 4:​43-54; Mareko 1:​14, 15; Luka 4:​14, 15.

▪ I to Iesu oki anga ki Galilea, eaa tei tupu ki tana au pipi, e akapeea te aravei anga te au tangata iaia ra?

▪ Eaa te semeio ta Iesu i rave, e eaa ta te reira i akatupu ki te aronga tei o atu ki taua apinga ra?

▪ Eaa a Kana i akaperepereiaʼi e Iesu ra?