Au Uianga a te Aronga Tatau

Kua akatupu ainei te tu apa ua o te vaine paretenia ko Maria i te tupu anga kino i te to anga o Iesu?

No te “anau anga o Iesu,” te akakite ra te tataanga akauruia e: “Kua momokoia tona metua vaine ko Maria na Iosepha, kare ra raua i moe i nui ei aia i te Vaerua Tapu.” (Mataio 1:18) Ae, kua rave te vaerua tapu o te Atua i tetai tuanga puapinga i roto i te nui anga o Maria.

Akapeea ra, i reira, a Maria? Kua tauturu atu ainei tona ua teera, me kare te ua, ki tona nui anga? Te manakoanga no runga i te au taputou a te Atua kia Aberahama, Isaaka, Iakobo, Iuda, e te Ariki ko Davida​—te ai metua o Maria​—te tamaiti ka anauia mai ka tau tikai e no roto mai i to ratou uanga. (Genese 22:18; 26:24; 28:​10-14; 49:10; 2 Samuela 7:16) Akapeea te tamaiti tei anauia kia Maria i te riro anga mai e ko tetai tuanga tau ia o taua au taputou tu-Atua? Kua riro aia ei tamaiti tikai nana.​—Luka 3:​23-34.

Kua mama atu te angera a Iehova ki te vaine paretenia ko Maria, te na ko anga: “Auraka e mataku, e Maria; kua kite aroaia mai koe e te Atua. E i na, ka to oki koe, e ka anau taau tamaiti, e naau e tapa i te ingoa ia Iesu.” (Luka 1:​30, 31) Te umuumuia ra te to anga e kia uua mai tetai ua. Te akaraanga, kua akatupu te Atua ko Iehova i te ua i roto i te tokara o Maria kia uua mai, te akatupuanga i teia na te taui anga i te oraanga o tana Tamaiti anau tai mei te ngai vaerua mai ki te enua.​—Galatia 4:4.

Ka rauka ainei tetai tamaiti tei toia mai na teia mataara e tetai vaine apa ua kia vai apa kore e kia kore te ara i roto i tona au mero kopapa? Akapeea te au ture no te tu anga i te angaanga anga me e kapiti anga to te tu apa kore ma te apa ua? Kia akamaara e kua taangaangaia te vaerua tapu i te tukuanga i te mana oraanga apa kore o te Tamaiti a te Atua ra te akatupuanga i te to anga. Kua akakore teia i te tu apa ua te vaira i roto i to Maria ua, te akatupuanga i reira i te akapapa anga o te tu tei apa kore ra mei tona akamata anga.

Noatu eaa te tu, ka papu ia tatou e kua akapapu te angaanga anga a te vaerua tapu o te Atua i taua taime kia manuia te akakoroanga o te Atua. Kua akamarama te angera ko Gaberiela kia Maria: “Ka eke mai te Vaerua Tapu ki rungao ia koe, e na te mana o Tei Teitei e tamaru i rungao ia koe; e tuatuaiaʼi oki tenana tamaiti tapu, i te Tamaiti na te Atua.” (Luka 1:35) Ae, kua akatupu te vaerua tapu o te Atua, mei tera te tu, i tetai arai anga paruru kia kore te tu apa ua me kare te tupu anga mamae ka akakino i te pepe e tupu maira mei te to anga e aere ua atu.

Te taka meitaki ra, te kaiou ra Iesu i tona oraanga tangata apa kore ki tona Metua i te rangi ra, kare ki tetai ua atu tangata. Kua ‘akono a Iehova i tetai kopapa’ nona, e ko Iesu​—mei te to anga e aere ua atu​—kua “viivii kore, e te taka ke oki i te aronga rave ara ra.”​—Ebera 7:26; 10:5.

[Tutu i te kapi 19]

“Ka to oki koe, e ka anau taau tamaiti”