Pene 2

Akangateiteiia i Mua Ake ka Anau Mai Aia

I MURI ake i te akakite atu anga a Gaberiela ki te tamaine ou ra kia Maria e ka anau aia i tetai pepe tamaroa te ka riro mai ei ariki mutu kore, kua ui atura Maria: “Akapeea teia e tupu ei, i te mea kare au i piri ake ki tetai tane no te ainga?”​—⁠NW.

“Ka eke mai te Vaerua Tapu ki rungao ia koe” ta Gaberiela ia i akataka atu, “e na te mana o Tei Teitei e tamaru i rungao ia koe; e tuatuaiaʼi oki tenana tamaiti tapu, i te Tamaiti na te Atua.”

Ei tauturu ia Maria kia irinaki i tana tuatua, kua na ko atura a Gaberiela: “E i na oki, to tuakana ko Elisabeta, kua to katoa aia i tana tamaiti i tona ruaine anga nei: ko te ono oki teia o tona marama, ko tei tuatuaia ra e, e pa. Kare rava oki e mea e kore e tika i te Atua.”

Kua ariki atura Maria i te tuatua a Gaberiela. E eaa tana i tuatua? “I na! ei tamaine tavini au no Iehova!” (NW) ko tana ia i karanga atu. “Kia peraia mai au mei taau i tuatua ana.”

I muri poto ake i to Gaberiela akaruke anga, kua akapapa a Maria e kua aere atura e aravei ia Elisabeta, tei noo ra ma tana tane, koia a Zakaria, i te enua maunga o Iudea ra. Mei to Maria kainga atu i Nazareta ra, e aerenga roa teia penei e toru me kare e a ra.

I to Maria tae atu anga ki te are o Zakaria, kua tomo atura ki roto e kua aroa atura. Ei reira, kua ki a Elisabeta i te vaerua tapu, e kua tuatua maira kia Maria: “Ko koe tei meitaki i te au vaine nei, e e meitaki oki te uanga o toou kopu. No te aa ra oki au i kiteia mai ei, i aere mai ei te metua vaine o taku Atu kiaku nei? I na oki, tei te o anga mai to reo i te aroa anga mai iaku nei ki roto i toku taringa, kua rere io nei te tamaiti i roto i toku kopu i te rekareka.”

I te akarongoanga i te reira, kua tuatua atura Maria ma te ngakau akameitaki: “Te akamaata nei toku meta ia Iehova, e kare e rauka i toku vaerua i te tapu i toku rekareka maata i te Atua koia toku Akaora; no te mea kua akara mai aia ki runga i te turanga akaaka o tona tamaine tavini. I na oki! mei teianei atu ka tuatua te au uki ravarai iaku e e mataora; no te mea na Tei mana maata rava i rave te au angaanga maata noku nei.” (NW) Inara, noatu te akaperepere maata tei akaariia ra kiaia, kua taki atura a Maria i te akangateitei anga katoatoa ki te Atua. “E ingoa tapu tona,” ko tana ia i tuatua, “E e vai rai tona aroa ki te aronga e mataku iaia ra, i tera uki, i tera uki.”

Kua rave ua atura Maria i te akapaapaaanga i te Atua na roto i te imene totou tei akauruia ra, i te na ko anga: “Kua akakite aia i te marōrō o tona rima, kua akangaoro aia i te manako ngakau o te aronga nengonengo. Kua uri aia i te aronga mana ki raro i to ratou [au terono] e kua akateitei i te aronga akaaka. Kua akaki aia i te aronga i ngere i te meitaki, e te aronga apinga nui kua akaokiia e ia ma te kore. Kua tauturu aia i tona tavini ia Iseraela, i te akamaara anga i tona aroa; Tana oki i tuatua mai i to tatou ai tupuna ra, kia Aberahama, e tona uanga e tuatau ua atu.”

Kua noo atura Maria ki ko ia Elisabeta ra no etai toru marama, e kare e ekoko anga e tauturu maata tana i rave i nga epetoma openga o to Elisabeta ra nui anga. I te mea meitaki tikai e ko teia nga vaine tiratiratu e rua, raua tokorua te nui ra i te tamaiti na te Atua i tauturu atu, kua kapitiia raua i te reira tuatau meitaki rava o to raua oraanga!

I kite ainei koe i te akangateitei anga tei tukua kia Iesu noatu rai e kare aia i anauia mai ake? Kua karanga a Elisabeta iaia e ko “taku Atu,” kua rere iora te tamaiti i roto i tona kopu ra kare i anauia ake, no te mataora i to Maria tae atu anga. I tetai pae, i muri akera kua akangateitei meangiti ua tetai papaki ia Maria raua ko tana tamaiti kare ra i anauia ake, ta tatou ia ka kite i muri akenei. Luka 1:​26-56.

▪ Eaa ta Gaberiela i tuatua ei tauturu ia Maria kia kite e akapeea aia ka riro ei kia nui?

▪ Akapeea te akangateitei anga ia Iesu i mua ake ka anauiaʼi aia ra?

▪ Eaa ta Maria i tuatua na roto i te imene totou i te akapaapaa anga i te Atua?

▪ Eaa te roa to Maria nooanga kia Elisabeta ra, e eaa i tau ei kia noo a Maria ki ko ia Elisabeta ra i te reira tuatau?