Au Uianga a te Aronga Tatau

Kua nui takere ainei a Maria, tei riro mai e ko te metua vaine o Iesu, i te aere anga aia i te atoro i tona kopu tangata ko Elisabeta?

Ae, te akara anga kua nui aia.

Ia Luka pene 1, ka tatau tatou na mua no runga i to Elisabeta nui anga, te vaine a te taunga ko Zakaria, tei anau mai ia Ioane (Papetito). Ia Elisabeta ‘e tae akera ki te ono o te marama, kua [atoro] te angela ko Gaberiela’ ia Maria no te akakite kiaia e ka nui mai aia e ka anau mai i te “Tamaiti na Tei Teitei.” (Luka 1:26, 30-33) Inara i naea a Maria i nui ei?

Te akakite maira ta Luka tataanga e i reira kua teretere atu a Maria ki Iudea i te atoro i tona kopu tangata i nui ko Elisabeta. Te aravei anga nga vaine e rua, kua rere te pepe (ko Ioane) i roto i te kopu o Elisabeta. Kua taiku atu a Elisabeta i te ‘uanga o te kopu o Maria,’ e kua kapiki ia Maria “te metua vaine o taku Atu.” (Luka 1:39-44) No reira ko te taopenga anga tau e kua to takere a Maria, e kua nui aia i te aere anga aia i te atoro ia Elisabeta.

Te tatau ra a Luka 1:56 e: “Noo aturā Maria ki o Elisabeta ra e toru marama, oki maira ki tona ngutuare.” Kare teia irava e te oronga maira i te tare anga tika tae roa mai ki te karena tano tikai o te ra. Te tuatua ra te reira “e toru marama,” te ka tuku ia Elisabeta ki roto i tona iva marama no te nui anga.

I muri ake i te riro mai anga ei tauturu no Elisabeta i te tuatau openga o tona nui anga, kua akaruke a Maria no tona kainga i Nazareta. Penei kua kite a Maria e me anau a Elisabeta (ia Ioane), penei ka maata mai te aronga atoro, ko etai ia ratou e au kopu tangata. Ka riro te reira ei mea manata me kore ei taakama anga no tetai vaine ou kare i akaipoipo e e nui rai aia. Mei teaa te roa i to Maria nui anga i te akaruke anga aia no Nazareta? Mei te mea “e toru marama,” aia ma Elisabeta ra penei tei roto a Maria i te toru marama me kore te akamata ra i roto i te a marama o tona nui anga i te oki anga aia ki Nazareta.