Pene 49

Tetai Atu Tere Tutu Aere i Galilea

I TE pou anga e vaitata e rua mataiti i te tutu anga maroiroi tikai, ka akamata ainei a Iesu i te rave marie ua anga i te reira? Kare rava ia, kua akatotoa atura aia i tana angaanga tutu aere na te aere akaou atu anga i tetai atu tere, ko te toru ia ki Galilea. Kua aere atura aia ki te au oire e te au tapere meangiti katoatoa i te reira enua, ma te ako anga i roto i te au sunago ra e te tutu anga i te nuti meitaki o te Patireia. Kua akapapu maira tana i kite i te reira tere i te umuumu maataia kia akatereia atu te angaanga tutu aere.

I te au ngai ravarai ta Iesu i aere, kua kite aia i te ngere o te au urupu tangata i te akaora anga e te akapumaana anga i te pae vaerua. Mei te mamoe tiaki kore ra to ratou tu, kua ooreia e kua opara aereia, e kua aroa atura aia ia ratou. Kua karanga atura aia ki tana au pipi: “Te maata ua nei te mou, te iti nei ra te aronga e kokoti: E teianei, e pure kotou i te Atu o te mou, kia unga mai aia i tetai aronga ei rave i taua mou nana ra.”

E akapapa anga ta Iesu no te angaanga. Kua karanga atura aia ki tana au apotetoro e 12 ra, tana i iki e vaitata e mataiti i mua akera. Kua akataka atura aia e tataki rua, kia ono pupu no te tutu aere, e kua ako atura ia ratou. Kua na ko atura aia: “Auraka e aere atu ki te arataa o te etene ra, eiaa katoa e tomo atu ki te oire o to Samaria ra: Ka aere tika atura ki te au mamoe i ngaro i te ngutuare o Iseraela. E tutu aere kotou, na ko atu, Te vaitata mai nei te basileia o te [au rangi, NW].”

Ko te reira Patireia ta ratou ka tutu aere ko ta Iesu ia i apii atura ia ratou kia pure i tana pure akaraanga ra. Kua vaitata te Patireia no te mea i reira tikai te Ariki ta te Atua i akamana, koia a Iesu Mesia ra. Ei akapapu anga i te au tika e e komono tana au pipi no te reira kavamani maata atu i ta te tangata nei, kua oronga atura Iesu i te mana kia akaora i te maki e pera katoa kia akatu mai i tei mate ra. Kua akaue atura aia ia ratou kia rave ua i te reira ma te kore e tutakiia.

I muri akera kua tuatua atu ki tana au pipi auraka e akapapa apinga no te apai i to ratou tere tutu aere. “Auraka ei auro, e te ario, e te veo, i roto i to kotou tatua; Auraka ei pute e apaiia, auraka e taki rua pereue, auraka ei tamaka, auraka ei tokotoko: e tau oki i te rave angaanga tana kai.” Te aronga te ka ariki i te tuatua ra ka oronga mai i te kai e te ngutuare ei ngai nooanga. Mei ta Iesu i karanga ra: “E te oire e te vila ta kotou e tomo, e [kimi, NW] atu i to reira tangata e tau; ei reira noo ei kotou, e ka aere atu ei.”

Ei reira, kua oronga atura Iesu i te apiianga e akapeea ratou me aravei atu i te tangata o te ngutuare ma te tuatua no te Patireia ra. Kua apii atura aia: “E kia tomo atu kotou ki roto i te are, ka akaora atu i to reira. E te tau ra taua ngutuare ra, e vai rai ta kotou au i reira: kia kore ra e tau, e oki akaou mai ia ta kotou au ra ia kotou uaorai. E te kore e kite mai ia kotou, e kare oki e akono i ta kotou tuatua; kia aere atu kotou ki vao i taua are ra, e taua oire ra, ka ruru atu i te repo i to kotou vaevae.”

Kua akakite maira Iesu no te oire te ka kopae i ta ratou tuatua, e teimaa tikai te akavaanga ki rungao i te reira. Kua akataka maira aia: “Koia tikai taku e karanga atu kia kotou nei, Kia tae ki te rā akavaanga, e ngari ake to te enua ra to Sodoma e to Gomora, i to te reira oire.” Mataio 9:​35–​10:15; Mareko 6:​6-12; Luka 9:​1-5.

▪ I naea a Iesu i akamataʼi i te toru o tona tere tutu aere i Galilea, e eaa ta te reira i akapapu mai kiaia?

▪ I te tono anga i tana au apotetoro e 12 e aere e tutu aere, eaa tana au apiianga i oronga atu kia ratou ra?

▪ Eaa ra i tikai no te au pipi kia apii e te vaitata mai nei te Patireia?