Pene 61
Akaoraia te Tamaiti Maki Temoni
I TE tuatau te takake atura a Iesu, a Petero, a Iakobo, e Ioane katoa oki, penei i runga i tetai tuaivi o te Maunga ko Heremona ra, kua o atu tetai papaki o te au pipi ra ki roto i te manamanata. I to Iesu oki mai anga kua kite pu aia e e tarevake tetai. E urupu te takako ra i tana au pipi, e te taumaro ra te au tata tuatua kia ratou. I te kite anga ia Iesu, kua poitirere te au tangata e kua oro atura e aravei iaia. Kua ui atura aia: “Eaa ta kotou e taumaro kia ratou nei?”—NW.
Kua aere maira tetai i taua urupu ra, tuturi atura ki mua ia Iesu e kua na ko atura: “E te Orometua, e, i arataki mai nei au i taku tamaiti ia koe nei, e vaerua murare tona; E te ngai e opukia mai ei aia iaia, e aaeia iora aia i reira ra, ukaia iora te vaa, e pakati oki te nio, e [apikepike, NW] roa akera: i tuatua na oki au i to au pipi e tuaru i te demoni, kare ra i tika ia ratou.”
Te akara anga kua aviri maata te au tata tuatua no tei kore i rauka i te au pipi i te akaora i te tamaiti ra, penei kua akaapa katoa i ta ratou tautaanga. I te reira tuatau kino maata tikai, kua tae atura Iesu. E kua karanga atura aia: “Aue ïa uki akarongo kore e! mei te aa te roa o toku noo anga ki o kotou nei? Mei te aa te roa o toku akakoromaki anga atu ia kotou?”
I te akara anga te tuatua atura Iesu ki te au tangata katoa i reira ra, inara kare e ekoko anga e te tuku tikaia atu ra ki te au tata tuatua, tei akatupu ra i te manata no tana au pipi. Ei reira, kua tuatua a Iesu no taua tamaiti ra: “E arataki mai iaia kiaku nei.” Inara i te aere mai anga taua tamaiti ra kia Iesu, kua tomoia maira aia e taua temoni ra, topa iora aia ki raro i te one, uti kino iora. Kua takaviri ua atura taua tamaiti ra i runga i te one e ukaia iora te vaa.
Kua ui atura Iesu: “Mei naea mai tona rokoia anga i teianei maki?”
Kua na ko maira tona metua tane: “Mei tona mea ngiti anga mai: kua manganui akenei te uri angaia ki roto i te ai, e ki raro oki i te vai, kia mate atu aia.” I reira kua pati atura tona metua tane: “Kia tika ia koe kia rave, e aroa mai koe ia matou, e e tauturu mai.”
Penei e au mataiti ua atu, te metua tane i te kimi anga i te tauturu. I teianei, no te kore i rauka i te au pipi a Iesu ra, kua kino roa atu tona manamanata. I te akamanako anga i te pati akatenga a te reira tangata ra, kua akamaroiroi atura Iesu i te na ko anga: “Ko tera tuatua e, ‘Kia tika ia koe’! E tika ra te au mea katoa nei ki tetai e akarongo ra tona.”—NW.
Kua kapiki ua maira te metua tane o taua tamaiti ra e: “Kua akarongo au!” e kua pati atura: “Ka tauturu mai koe iaku i toku ngai ngere i te akarongo nei.”—NW.
E kia akara atura Iesu i te au tangata i te oro ua anga mai kia ratou ra, kua kauvae atura aia i te temoni ra, na ko atura: “E tera ra vaerua murare e te turi, e aere koe ki vao, te akaue atu nei au ia koe, auraka e tomo akaou ki roto iaia.” I te aere mai anga taua temoni ra ki vao, kua rave akaou aia kia kapiki maata taua tamaiti ra, e kua akariro kia manganui tona uti anga. I reira kua takoto ua taua tamaiti ra mei te tu tangata mate ra i runga i te one, e kua karanga te au tangata e: “Kua mate rava [aia, NW]!” Inara kua mou atura Iesu i te rima o taua tamaiti ra, e kua tu mai aia ki runga.
I mua akera, i te tono anga i te au pipi ra kia aere e tutu aere, kua tuaru ratou i te au temoni. I teianei, i to ratou tae anga ki roto i te are, kua ui poiri maira ratou kia Iesu: “Eaa i kore ei i tika ia matou nei kia tuaru iaia ki vao?”
I te akakite anga e no to ratou ngere i te akarongo, kua karanga atura Iesu: “Kare teianei tu demoni e tae ua ki vao, mari ra i te pure.” E mea papu e kua teateamamao meitakiia no te tuaru i te reira temoni ririnui tei rave ra i teia angaanga. Ko te akarongo maroiroi ma te pure pati anga i ta te Atua tauturu ririnui tei anoanoia.
E kua karanga atura Iesu: “Tikai taku e karanga atu kia kotou nei, Angairi e akarongo to kotou mei tetai ua sinapi nei, ka tika ia kotou kia karanga atu ki teianei maunga, Ka aere i ko atu; e nana e aere ua; e kare rava e mea e kore e tika ia kotou.” Mei teaa ra te mana ririnui o te akarongo!
Te au arairai anga e te au tu ngata te arai ra i te tere anga ki mua i ta Iehova ra angaanga penei ka riro te akara anga e mei tetai maunga maata tikai kare ra e rauka kia kake atu na runga e kare katoa oki e rauka kia akaateaia atu. Tera ra, te akaari maira Iesu e, me tatanu tatou i te akarongo ki roto i to tatou ngakau, ma te pipi ki te vai e te akamaroiroi kia tupu, ka totoa rai kia pakari e ka akamaroiroi ia tatou kia akakore atu i te reira au arairai anga e te au tu ngata mei te maunga rai to ratou tu. Mareko 9:14-29; Mataio 17:19, 20; Luka 9:37-43.
▪ Eaa te tu tei akaaraveiia atu kia Iesu i tona oki mai anga mei te Maunga i Heremona ra?
▪ Eaa te akamaroiroi anga ta Iesu i oronga atu ki te metua tane o te tamaiti tei takinoia ra e te temoni?
▪ Eaa ra i kore ei i rauka i te au pipi ra i te tuaru i te temoni ra?
▪ Akapeea te mana ririnui o te akarongo i ta Iesu akaari anga maira i te ka rauka kia tupu i te reira ra?