Pene 72
Tono Atura Iesu e 70
KO TE tuanga openga o te 32 T.N., e toru katoa mataiti mei to Iesu papetitoanga. Kare i roa ake to ratou tae anga i te Oroa Patia Puakapa i Ierusalema ra, e i te akara anga te vaitata ra ratou i reira. Ko te tika e, kua akapou a Iesu i te maata anga o te ono marama toe no tana angaanga orometua ra ki Iudea, me kare ki tetai pae o te Kauvai i Ioridana i te tapere o Perea ra. Te anoanoia ra kia oti te reira ngai i te raveia.
E tika, i muri ake i te Pasa o te 30 T.N., kua rave a Iesu e varu marama te tutu aere anga ki Iudea ra. Inara i muri ake i te tamata anga te ngati Iuda ra e ta iaia i te Pasa o te 31 T.N., kua rave aia i te apiianga ki Galilea e vaitata e pou katoa tetai mataiti e te apa ki reira. I te reira tuatau, kua akapapa aia i tetai akaaerenga maata e aronga tutu aere tei apii meitakiia, e apinga te reira kare aia i rave ana i mua ake. I reira kua tamata aia i te angaanga pakari i te akakitekite anga openga ki Iudea.
Kua akamata a Iesu i te reira angaanga na te iki anga e 70 au pipi e kua tono atura ia ratou e tataki rua. No reira e 35 katoa pupu o te aronga rave tutu aere i te Patireia i te reira ngai. Na mua teia aronga i te aere na roto i te au oire katoa e te au ngai tei akapapaia e Iesu kia aere atu ratou ko tana au apotetoro, i muri akera.
Kare ra a Iesu i tono atu i teia aronga e 70 kia aere ki te au sunago, kua karanga atura Iesu kia aere ratou ki te au ngutuare, ma te akataka anga: “E te are ta kotou e tomo ra, e akamata na i te karanga atu, ei au to teianei ngutuare. E tei reira te tamaiti no te au, e vai ra ta kotou au ra i rungao iaia.” Eaa ta ratou ka tuatua atu? Kua na ko atura Iesu: “E karanga atu kia ratou, kua vaitata mai nei te basileia o te Atua kia kotou na.” Te akakite maira ta Matthew Henry’s Commentary no runga i te angaanga a te aronga 70 ra: “Mei to ratou Pu rai, ta ratou ngai pouroa i aere ra, kua tutu aere ratou mei tera are ki tera aere.”
Te aiteite ra ta Iesu au apiianga i te aronga e 70 ra ki tana i oronga ki te 12 i tana tono anga ia ratou i te angaanga tutu aere i Galilea e vaitata i te okotai mataiti i mua akera. Kare e kua akamatakite anake ia i te aronga 70 ra i te patoi anga ta ratou ka aravei, i te teateamamao anga ia ratou no te oronga anga i te tuatua ki te aronga i te au ngutuare ra, mari ra kua oronga katoa aia i te mana kia akaora i te maki. No reira, kia tae atura Iesu i muri poto akera, e manganui te ka inangaro kia aravei i te Pu o te au pipi tei rauka ra ia ratou i te rave i te reira au mea umere.
E poto ua te tuatau o te tutu aere a te aronga e 70 ra e ta Iesu angaanga aru atu i muri ia ratou ra. Kare i roa ana kua oki atu te 35 pupu tutu aere i te Patireia ra, kia Iesu. Kua akakite rekareka atura ratou: “E te Atu, kua vi katoa te au demoni ia matou i to ingoa na.” No te reira ripoti meitaki kua rekareka a Iesu, e kua karanga atura aia: “Kua kite au ia Satani i te topa anga, mei te uira no runga i te rangi ra. I na, e akamana atu au ia kotou kia takatakai ua atu ki runga i te ovi e te sekopio.”
Kua kite a Iesu e i muri ake i te anauia mai anga te Patireia o te Atua ra i te tuatau o te openga ra, ka uriia mai a Satani e tana au temoni ki vao mei te rangi maira. Inara ko teia uriia anga ki vao te au temoni akara koreia ra na te au tangata ua nei, kua riro ei akapapu anga kapitiia mai, no te reira tupu anga te aere maira. No reira, te tuatua ra Iesu no te topa anga mai o Satani mei te rangi a te tuatau ki mua ei mea papu tika tikai ia. No reira na roto i te tu akatutu anga te akamana anga i te aronga 70 ra kia takatakai i te au ovi e te tekopio ra. Inara, e na Iesu ei: “Auraka ra kotou e rekareka i te mea i vi te au vaerua kino ia kotou: E rekareka ra i to kotou ingoa i tataia ki runga i te [au rangi ra, NW].”
Kua mareka roa a Iesu e kua akapaapaa atura i tona Metua i te ngai tangata no te akono anga i te reira au tavini akaaka nona ra na te reira mataara ririnui. I te ariu atu anga ki tana au pipi, kua karanga atura aia: “E ao to te mata i akara i te au mea ta kotou e akara nei: E akakite atu au kia kotou, e manganui te au peroveta, e te ui ariki, i anoano i te akara i te au mea ta kotou e akara nei, e kare akenei ratou i akara; e i te akarongo i te au tuatua ta kotou e akarongo nei, e kare akenei ratou i akarongo.” Luka 10:1-24; Mataio 10:1-42; Apokalupo 12:7-12.
▪ I ea a Iesu i te tutu aere anga i te toru mataiti o tana angaanga orometua, e ko teea te ngai i rave aia kia oti i tona ono marama openga ra?
▪ Kua tono atura Iesu i te 70 ki ea e kimi i te tangata?
▪ Eaa ra a Iesu i karangaʼi e kua kite ke atura aia i to Satani topa anga mei te rangi maira?
▪ Na teea tu i raukai i te aronga 70 ra i te takatakai i te ovi e te tekopio ra?