Eaa ra ka Aroa ei i Toou Tangata Tupu?

TEI runga ua te ora mutu kore i to tatou aroa i te Atua e te tangata tupu. Kua tukuia te reira manako i te tuatau o tetai pukapuka anga tei tupu e vaitata i te 2,000 mataiti i topa.

Ko tetai tangata ngati Iuda tei kite ra i te Ture a Mose kua ui aia kia Iesu Karaiti e: “Akapeea au nei e raukaʼi iaku te ora mutu kore?” Kua pau atu a Iesu: “Eaa tei tataia ki roto i te ture ra? te peea ra koe i te tatau anga?” I te taikuanga i te Ture, kua karanga te tangata e: “E inangaro atu koe i to Atua ia Iehova ma to ngakau katoa, e ma to vaerua katoa, e ma to ririnui katoa, e ma to manako katoa;” “e e aroa atu i to tangata tupu mei te aroa ia koe uaorai.” “E tika taau i tuatua mai nei,” i karangaʼi a Iesu. “Ka ora koe kia pera.”​—Luka 10:25-28.

No te reira, kua ui to Iesu tangata uiui e: “Koai oki toku tangata tupu?” Ma te kore i pau tika atu, kua akakite a Iesu i tetai tua akatutu anga no runga i tetai tangata ngati Iuda tei keiaia, tei papaia, e tei akarukeia kia mate. Kua aere mai e rua ngati Iuda​—te mea mua e kautaunga e oti ko te Levi a muri ake. Kua akara raua i te turanga o to raua taeake ngati Iuda inara kare i rave ana i tetai mea no te tauturu iaia. I tera mai ra kua aere mai tetai Samaria. No tona tangi, kua tama aia i te au ngai kinokino o te ngati Iuda tei mamae ra, e kua apai iaia ki tetai are noo anga, e kua oronga atu i te akono iaia.

Kua ui a Iesu ki tona tangata uiui e: “I taua nga tangata toko toru ra, koai te tangata tupu iaia, i toou manako anga, i rokoia e te anana keia ra?” Te taka meitaki ra, e ko te Samaria tu akaroa ra. No reira te akaari ra a Iesu e ka autu te aroa tangata tupu tikai ki rungao i te au kotinga eteniki (ethnic).​—Luka 10:29-37.

Ngere Anga i te Aroa Tangata Tupu

I teia ra te tupu ra te tauetono i rotopu i te au tangata o te au pupu eteniki tukeke. Ei akaraanga, i ou ake nei kua titiri te au Nati-ou i Tiamani i tetai tangata ki te one e kua takatakai iaia ki to ratou au puti teiaa, te atiatianga i tona au ivi umauma katoatoa. E oti kua pikao ratou iaia ki tetai kava kino e kua tutungi iaia ki te ai. Ko te tangata tei akarukeia kia mate ra kua taiaia aia no te mea kua manakoia e e ngati Iuda aia. I roto i tetai atu rave anga ke, kua pomu aiia tetai are i te pae ia Hamburg, te tau anga e toru au tangata Tureki kia mate​—ko tetai ia ratou e tamaine e tai ngauru mataiti.

I te ngai Pokana e te itinga mamao, te tamate ra te au tamaki anga eteniki i te tauatini ua atu au tangata. Kua mate tetai pae i roto i te taumaro anga i rotopu i te au tangata tuke no Pangaratete, Initia, e Pakitana mai. E i Aperika, kua riro te au tamaki anga kopu e te katiri ei tamate i tetai pae atu.

Te reka kore nei te maata anga o te au tangata i teia tu ta ua e kare rava e rave i tetai mea no te takino i to ratou tangata tupu. Ko te tika, te reka kore tikai ra te au pupu patoi anga mamaata i Tiamani i te ta ua eteniki i reira. Inara, te karanga ra The New Encyclopædia Britannica e: “Te manako ra te au mema o te vaitata atu i te katoa anga o te au peu o teianei ao i to ratou uaorai tu oraanga ei teitei atu i ta te au tangata tupu ra tei piri vaitata atura ratou.” Te riro ra teia au tu manako ei arai i te tu aroa tangata tupu. E mea ainei tetai ka rauka i te rave no runga i teia, i te mea tikai e te karanga ra a Iesu e tei runga ua te ora i te aroa o te Atua e te tangata tupu?

[Akameitakianga no te Tutu i te kapi 2]

Cover: Jules Pelcog/​Die Heilige Schrift

[Akameitakianga no te Tutu i te kapi 3]

The Good Samaritan/​The Doré Bible Illustrations/​Dover Publications, Inc.