Pene 73

E Samaria Takinga Meitaki

PENEI te vaitata ra a Iesu ki Betania, e oire mei te toru kiro mita mei Ierusalema mai. Kua aravei atura iaia tetai tangata kite i te Ture a Mose ra ma te uianga, kua karanga maira: “E te Orometua, akapeea au nei e raukaʼi iaku te ora mutu kore?”

Kua kite a Iesu e ko te reira tangata, e roia, te ui ra kare no te kite mari ra, no te mea te inangaro ra i te timata iaia. Penei ko te akakoro anga a te roia kia pau atu a Iesu na te tu e akariri ei i te manako o te ngati Iuda ra. No reira kua rave a Iesu na te roia ra e akakite iaia uaorai, na te ui anga: “Eaa tei tataia ki roto i te Ture ra? Te peea ra koe i te tatau anga?”

I tana pau anga, kua akono te roia ra i te kite oonu tikai, e kua taiku maira i nga ture a te Atua ia Deuteronomi 6:5 e Levitiku 19:18, i te na ko anga: “E inangaro atu koe i to Atua ia Iehova ma to ngakau katoa, e ma to [meta, NW] katoa, e ma to ririnui katoa, e ma to manako katoa; e e aroa atu i to tangata tupu mei te aroa ia koe uaorai.”

Kua karanga atura Iesu kiaia: “E tika taau i tuatua mai nei: ka ora koe kia pera.”

Inara, kare te roia ra i mareka. Kare te pauanga a Iesu i rava te akataka anga nona. Te anoano ra aia i te akapapu anga na Iesu mai e ko tona uaorai manako te tika ra e no reira e tuatua tika aia i tana uaorai akono anga ia etai ke ra. E no reira, kua ui maira aia: “Koai oki toku tangata tupu?”

Te manako ra te ngati Iuda e ko te tuatua “tangata tupu” te taiku ra i te au taeake ngati Iuda anake ua, mei tei akakiteia maira ia Levitiku 19:18 i te akara anga ua. Ko te tika oki, e noatu ko te apotetoro ko Petero kua karanga e: “Kua kite oki kotou e, kare e tau i te tangata ngati Iuda kia kapiti atu me kare kia aravei atu i te tangata o te enua ke ra.” (NW) No reira tera roia, e penei te au pipi katoa a Iesu ra, kua irinaki e e tuatua tika ta ratou me akono i to ratou au taeake ngati Iuda anake ua ma te takinga meitaki, i te mea, i to ratou manako, kare te aronga etene ra i te tangata tupu no ratou.

Ma te kore e akariri atu i te aronga te akarongorongo maira kiaia, akapeea a Iesu i te akatikatika anga i to ratou manako? Kua tuatua atura aia i tetai tua, penei kua akatumuia ki runga tikai i tei tupu. Kua karanga atura Iesu: “Kua aere atura tetai tangata [ngati Iuda] no Ierusalema ki Ieriko, rokoia iora aia e te anana keia; i aunaia e ratou tona kakau, e kua paruparu oki aia, aere atura ratou akaruke iora iaia, kua vaitata i te mate.”

Kua tuatua ua atura Iesu: “Kua aere ua maira tetai taunga na taua ara ra; e kia akara atura iaia, tapae atura aia, na tetai pae ara atura i te aere. E tetai ngati Levi oki i na vaitata maira i taua ngai ra, kua aere mai ïa kua akara, anga ke atura na tetai pae ara. Tetai tangata Samaria ra, te aere ua ra i tona aerenga, e tae atura ki taua ngai ra, e kite atura aia iaia, aroa atura.”

E manganui te au ­taunga e to ratou tauturu i te iero i noo ki Ieriko ra e ngati Levi, e 23 kiro mita te mamao i runga i tetai mataara kino tei eke maira ki raro e 900 kiro mita mei to ratou ngai angaanga i te iero i Ierusalema ra. Kua manakoia ra te taunga e te ngati Levi e ka tauturu atu i to raua taeake ngati Iuda tei rokoia e te tumatetenga. Inara kare raua i pera. Kareka ra, kua tauturu te tangata Samaria ra. E makitakita to te ngati Iuda i to Samaria ra, no te maata te reira tu kua akakino atura ratou ia Iesu i te au tuatua ketaketa ra na te tapa anga iaia “e Samaria.”

Eaa ta te tangata Samaria ra i rave ei tauturu i te tangata ngati Iuda ra? Kua karanga a Iesu e kua: “Aere atura kiaia, kua riringi iora i te inu e te wina ki roto i tona au puta, ra vaî atura, e kua akanoo atura iaia ki runga i tana uaorai puaka, arataki atura aia ki te ngai tapae anga, e tiaki marie atura iaia. E popongi akera, kia aere ke aia ra, kua kiriti iora aia i e rua denari [ko te tutaki ia no e rua ra] no roto i tona pute, e kua o ake ki te tangata are ra, kua karanga atura kiaia, e utuutu koe iaia nei, e kia riro taau moni, naku ïa e tutaki ia koe, kia oki mai au ra.”

I muri ake i te tuatua anga i te reira tua, kua ui atura Iesu ki te roia ra: “I taua nga tangata toko toru ra, koai te tangata tupu iaia, i toou manako anga, i rokoia e te anana keia ra?”

I te reka kore anga te manako no te oronga anga i te akameitaki no te tangata Samaria kua tuatua ua maira te roia ra: “Ko tei aroa atu iaia ra.”

“Ka aere koe, e akapera katoa,” ta Iesu ia i taopenga atu kiaia.

Naringa i akakite tika atu a Iesu ki te roia ra e e tangata tupu katoa teia nona te aronga kare i te ngati Iuda ra, kare ko te kore anake te reira tangata e ariki i te reira, e riro ra te maata anga o tei akarongorongo maira i te akatika i tona tua o te uriuri anga manako ma Iesu katoa ra. Na teia tua tau i te oraanga, i akataka na te mataara kare e rauka kia akaapaia e ko to tatou au tangata tupu te kapiti katoa ra i te au tangata kare no to tatou uaorai reo e te iti tangata. Mei teaa ra te umere o ta Iesu akono i te apiianga! Luka 10:​25-37; Angaanga 10:28; Ioane 4:9; 8:48.

▪ Eaa te au uianga ta te roia i ui atura kia Iesu, e eaa te akakoroanga no tana ui anga?

▪ Koai ta te ngati Iuda i irinaki e ko to ratou tangata tupu, e eaa te tumu i tau ei kia manakoia e kua o katoa te au pipi ki te reira manako?

▪ Akapeea ta Iesu oronga anga i te manako tika kia kore i rauka i te roia ra i te akaapa atu i te reira?