Pene 75

Te Tumu o te Rekareka

I TANA rave anga i te angaanga tutu aere i Galilea, kua akono a Iesu i te au semeio, e i teianei kua rave akaou aia i Iudea. Kua tuaru aia kia aere ki vao i tetai tangata te temoni tei akamuteki ra iaia. Kua va ua iora te au tangata, inara kua tuatua maira tetai papaki patoi ra i taua arairai anga i tuatuaia i Galilea ra. “Te tuaru nei aia i te demoni i te mana o te demoni maata ra o Belezebuba,” ta ratou ia i karanga. Ko tetai pae kua anoano i tetai akapapu anga maata atu mei ia Iesu mai ei akataka iaia ra, e kua tamata ratou e timata iaia na te pati anga akairo no runga i te rangi.

I te kite anga e eaa to ratou manako, kua tuatua atura Iesu i te pau anga ki te aronga patoi iaia i Iudea ra mei tana i tuatua atura ki te aronga i Galilea ra. Kua kite ra aia e ko te patireia ravarai i mavete e rave iaia uaorai ka inga ia. “E” kua ui aia, “kia mavete a Satani e rave iaia uaorai, eaa oki tona basileia e mou ei?” Kua akaari atura aia i te kino o te turanga o te aronga patoi iaia ra i te na ko anga: “Te tuaru nei ra au i te demoni i te rima o te Atua, kua rokoia tika ïa io nei ra kotou e te basileia o te Atua.”

E mea tau no te aronga tei akara i ta Iesu au semeio i rave ra kia tuatua no te reira mei ta te aronga i akara i ta Mose ra rave anga i tetai semeio i te au anere mataiti i muana. Kua karanga ratou e: “Ko te mangamanga rima teia no te Atua.” (NW) Na “te mangamanga rima no te Atua” katoa oki i tarai i te Ture Ngauru ki runga i nga papa toka ra. Na “te mangamanga rima o te Atua”​—koia tona vaerua tapu, me kare mana angaanga—​i raukai ia Iesu i te tuaru i te au temoni ki vao e pera katoa te akaora maki. No reira kua rokoia tikai teia aronga patoi nei e te Patireia o te Atua, no te mea, i reira tikai a Iesu koia te Ariki tei akamanaia no te Patireia, i rotopu ia ia ratou ra.

Ei reira kua akatutu atura Iesu i tona mana te tuaru i te temoni e e akapapu anga i tona mana i rungao ia Satani, kia aere maira tetai tangata ririnui maata ua atu e mate iora iaia tetai tangata tiaki i tona are tei papa meitaki ra tana apinga tamaki. E kua taiku akaou katoa maira aia i te akatutu anga tana i tuatua ra i Galilea no tetai vaerua viivii. Kia akaruke taua vaerua ra i tetai tangata, inara kare taua tangata ra i akaki i te ngai kua atea ra ki te au mea meitaki, ka oki akaou mai taua vaerua ra ma etai atu toko itu ra, e kino maata ua atu te openga o taua tangata ra i tei muatangana.

I te akarongo atu anga ki taua apiianga ra, kua kapiki ua maira tetai vaine no taua aronga tangata ra e: “E ao to te kopu i apai ia koe, e te u taau i ngote ra!” I te mea ko te umuumu o te au vaine ngati Iuda katoa ra e kia riro aia ei metua vaine no tetai peroveta e e maata atu oki e no te Mesia ra, kua kitea puia e ka tuatua akapera teia vaine nei. Kua manako rai aia e ko Maria tikai te ka mataora no te mea e metua vaine no Iesu.

Inara, e viviki ua a Iesu i te akatikatika atu i taua vaine ra no runga i te tumu o te rekareka. Kua karanga atura aia “Kare,” na ko atura aia, “mari ra, e ao to te aronga tei akarongo i te tuatua a te Atua e kua mou i te reira.” Kare rava a Iesu i tuatua ana e, kia akangateitei takakeia tona metua vaine, koia a Maria. Kareka ra, kua akakite aia e ko te rekareka mou ra ka kiteaia i te tavini tiratiratu anga no te Atua, kare no tetai pirianga me kare ravenga kopapa nei.

Mei tana i rave i Galilea, kua pera katoa a Iesu i te ako anga i to Iudea no te pati anga i tetai akairo no te rangi mai. Kua karanga atura aia kia ratou e kare e akairo te ka orongaia atu mari ra ko te akairo o Iona. Kua riro a Iona ei akairo no tona toru ra ki roto i te kopu o te ika e pera katoa tana rave anga mataku kore i te tutu anga, tei akariro maira kia tataraara to Nineve. Kua karanga atura Iesu: “E i na, e maata teia ia Iona.” Mei te reira katoa oki te ariki vaine o Seba tei umere ra i te pakari o Solomona ra. Kua karanga katoa a Iesu: “E i na, e maata teia ia Solomona.”

Kua ako atura Iesu e kia tutungi te tangata i te ramepa kare e tuku atu ki te ngai ngaro me kare ki raro ake i te kete ra ei runga ra i te vairanga ramepa kia kiteaʼi e te tangata te marama. Penei te akakite maira aia e ko te apii anga e te rave anga semeio ki mua i te reira aronga marokiakia i roto i te au tangata tei akarongo maira kiaia i aiteite ra ki te uuna anga i te marama o te ramepa. Kare i meitaki te mata o te reira aronga, me kare, kare i tau te akara anga, no reira kare i puapinga te akakoro anga o tana au semeio i rave ra.

Koi oti ua ake ra ia Iesu i te tuaru i te temoni e kua rauka i tetai tangata muteki i te tuatua. E mea tau teia kia akakeu i te tangata meitaki te mata, me kare tau te akara anga, ei mata akapaapaa i teia ravenga kaka e kia akakitekite aere i te nuti meitaki! Inara, kare teia i tupu ki teia aronga patoi. No reira kua tuatua taopenga atura Iesu: “E tenana e matakite, kia kore e riro te mārama i roto ia koe na ei poiri. Kua pini katoatoa oki to kopapa i te mārama, kare e ngai toe, e riro toou na pininga i te mārama, mei te mārama lamepa mura ra i te kakā anga.” Luka 11:​14-36; Exodo 8:​18, 19; 31:18; Mataio 12:​22, 28.

▪ Eaa tei tupu i ta Iesu akaoraanga i te tangata ra?

▪ Eaa “te mangamanga rima o te Atua,” e akapeea te rokoia anga te aronga akarongo atura ia Iesu e te Patireia o te Atua?

▪ Eaa te tumu o te rekareka mou ra?

▪ Akapeea e raukai i tetai tangata te mata meitaki?