“Auraka e Mataku, e Taku Anana Iti”

“Auraka e mataku, e taku anana iti; e mea anoano na to kotou Metua, i te oronga mai i te basileia no kotou.”​—LUKA 12:32.

1. Eaa te tumu anga o ta Iesu au tuatua e: “Auraka e mataku, e taku anana iti”?

“E KIMI ra kotou i te basileia o te Atua.” (Luka 12:31) I to Iesu tuatua anga i teia au tuatua ki tana au pipi, kua akakite aia i tetai kaveinga tei arataki maira i te manakoanga o te au Kerititiano mei tona tuatau ra tae roa mai ki to tatou nei. Ka tau te Patireia o te Atua kia mou i te ngai mua tikai i to tatou au oraanga. (Mataio 6:33) Inara, i roto i ta Luka tataanga, kua rave a Iesu i te tuatua akaperepereanga e te au tuatua akapapu akaouanga ki tetai pupu takake o te au Kerititiano ra. Kua na ko maira aia: “Auraka e mataku, e taku anana iti; e mea anoano na to kotou Metua, i te oronga mai i te basileia no kotou.” (Luka 12:32) Mei te Tiaki Mamoe Meitaki ra, kua kite a Iesu e te vaira te au tuatau uriia ki mua no tana au pipi piri vaitata kiaia. Inara kare e tumu no ratou kia mataku me ka kimi tamou ratou i te Patireia o te Atua. No reira, kare ta Iesu ako anga i tetai akauenga ngata roa. Kareka ra, e taputou aroa tikai ia tei rave ra i te akauru irinaki anga e te maroiroi.

2. Koai ma te aronga o te anana iti ra, e eaa ra i riro ei kia takake a ratou?

² Te tuatua ra a Iesu ki tana au pipi, e kua tapa aia ia ratou e “anana iti.” Te tuatua katoa ra aia ki te aronga ta Iehova ‘ka oronga mai i te basileia.’ Me akaaiteia atu ma te au urupu mamaata te ka ariki ia Iesu i te au tuatau i muri maira, e tokoiti tikai te numero o teia pupu. Kua manako katoaia ratou ei aronga oko maata no te mea kua ikiia ratou no tetai tuatau umere ki mua, kia taangaangaia ei rave i te angaanga ei ui ariki. Kua kapiki a Iehova to ratou Metua, koia te Tiaki Maata, i te anana iti ma te manako anga kia rauka ia ratou tetai tuanga i te rangi ma te kapiti anga ki te Patireia Mesia o Karaiti ra.

Te Anana Iti

3. Eaa te orama kaka no te anana iti ta Ioane i kite ra?

³ Koai ma, i reira, te aronga o teia anana iti no ratou taua manakonako anga umere ra? Ko ratou te au pipi a Iesu Karaiti te ka akatainuia ma te vaerua tapu. (Angaanga 2:1-4) I te kite anga ia ratou ei aronga imene i te rangi ma te au kinura i to ratou rima, kua tata te apotetoro ko Ioane: “Akara atura au, e i na, te tu ua ra te Punua-mamoe ki runga i te maunga ra i Siona, ma te tangata katoa i vaitata iaia okotai anere e a ngauru ma a i te tausani, ma tona ingoa e te ingoa o tona Metua i te tata angaia ki rungao i to ratou rae. Ko te aronga teia kare i viivii i te vaine ra; e paretenia oki ratou. Ko te aronga teia i aru i te Punua-mamoe i tona au aerenga ravarai. I okoia ïa aronga no roto i te tangata nei, ei popo mua na te Atua e na te Punua-mamoe ra. Kare rava e pikikaa i kitea i roto i to ratou vaa: kare oki a ratou e apa.”​—Apokalupo 14:1, 4, 5.

4. Eaa te turanga o te anana iti i runga i te enua nei i teia tuatau?

⁴ Mei ia Penetekote 33 T.N. mairai, kua tavini teia aronga akatainuia, tei anauia i te vaerua ei karere na Karaiti i runga i te enua nei. (2 Korinetia 5:20) I teia tuatau, e toenga ua to ratou te vai nei, i te tavini kapitianga ei te pupu tavini akono meitaki e te pakari. (Mataio 24:45; Apokalupo 12:17) Mei te mataiti 1935 maira, kua kapiti atu kia ratou te au “mamoe ke atu,” koia te au Kerititiano e manakonako anga to ratou no te enua nei, kua tae to ratou numero i teianei ki te au mirioni ua atu. Te tauturu nei teia aronga i te tutuanga i te tuatua meitaki i te pa enua ravarai.​—Ioane 10:16.

5. Eaa te tu manako o te toenga o te aronga o te anana iti, e eaa ra i tau ei kia kore ratou e mataku?

⁵ Eaa te tu manako o te aronga toenga o te anana iti te vai nei i runga i te enua? I te kiteanga e ka rauka ia ratou ‘tetai Basileia ngaueue kore,’ te akono nei ratou i te angaanga tapu ma te mataku tu Atua e te tapu. (Ebera 12:28) Te kite taakaaka ra ratou e e angaanga meitaki roa ta ratou te ka riro ei rekareka anga maata. Kua kitea e ratou “tetai poe meitaki maata roa” tei taikuia ra e Iesu i tana tuatua anga no te Patireia. (Mataio 13:46) I te vaitata mai anga te mate maata, te tu mou ra te aronga akatainuia a te Atua ma te mataku kore. Noatu rai te apinga te ka rokoia ki te ao o te tangata nei a te tuatau o “taua rā mataku maata o te Atu ra,” kare o ratou mataku tau kore no te tuatau ki mua. (Angaanga 2:19-21) Eaa oki ratou ka mataku ei?

Te Topa Nei te Numero

6, 7. (a) Eaa ra i meangiti roaʼi te numero o te anana iti te vai nei i te enua nei? (e) Akapeea te manako tau no te aronga tataki tai i te manakonako anga tana e tapapa atura?

⁶ I teia au mataiti ua akenei e meangiti ua te numero o te anana iti te vai nei i runga i te enua. Kua kiteia teia i te ripoti o te Akamaara Anga i te 1994. I roto i etai 75,000 au putuputuanga o te au tangata o Iehova i te ao katoa nei, e 8,617 ua tei akakite na te kai anga i te oroa i to ratou manako anga ei au mema no te toenga ra. (Mataio 26:26-30) Ei tuke anga, ko te katoatoa tei akaputuputu atu e 12,288,917. Kua kite te au Kerititiano akatainuia ra e ka tau kia manakoia teia. Kua akanooia e Iehova te numero kotingaia, e 144,000, ko ratou te anana iti, e no te akaputuputu mai aia i te reira mei te Penetekote 33 T.N. maira. E mea tau ra, ko te kapikianga i te anana iti ka tae ra ki te openga me ka vaitata te ki taua numero ra, e ko te akakite anga e kua ope te akaputuputuanga maata i teia aronga akameitaki takakeia i te 1935. Inara, ko te au mamoe ke atu i te tuatau o te openga nei kua totouia ka tupu ei “aronga maata rava, kare takiri e pou kia tatau, no te pa enua ravarai, e te au kopu ravarai, e te au iti-tangata ravarai, e te au reo katoa oki.” Mei te 1935 mairai ko te akaputuputuanga maata a Iehova no teia urupu maata, no ratou te manakonako anga no te ora mutu kore ki runga i te enua parataito.​—Apokalupo 7:9; 14:15, 16; Salamo 37:29.

⁷ Ko te maata anga o te aronga o te anana iti te vai nei i runga i te enua i teianei tei roto i to ratou 70, 80, e te 90 mataiti. E toko iti ua kua pati i to ratou 100 mataiti o te oraanga. Pouroa teia aronga, noatu eaa to ratou mataiti, te kite ra e na roto i te tuakaouanga no te rangi, ka kapitiia atu ratou ma Iesu Karaiti i te openga e ka tutara ma ia katoa i tona Patireia kaka ra. Ko te aronga o te urupu maata ka riro ei au tangata i te enua nei no raro ake ia Karaiti koia te Ariki ra. Kia rekareka ratou tataki tai no ta Iehova te vai maira no te aronga te inangaro ra iaia. Kare ia tatou te tika kia iki e eaa te manakonako anga kia mou atu. Na Iehova te reira e iki. Ka tau aua nga pupu e rua ra kia rekareka i to ratou manakonako anga no tetai tuatau mataora ki mua, me ki roto i te Patireia ki te rangi me kare ki runga i tetai enua parataito i raro ake i taua Patireia ra.​—Ioane 6:44, 65; Ephesia 1:17, 18.

8. Eaa te mamao o te rave anga i te akairoanga o te 144,000, e eaa te ka tupu me ka oti te reira?

⁸ Te anana iti e 144,000 katoa ra ko “te Iseraela o te Atua,” te mono atura i te Iseraela kopapa i roto i ta te Atua ra au akakoro anga. (Galatia 6:16) No reira, te toenga ko ratou te vai nei no taua iti tangata vaerua ra i te enua nei. Ko taua aronga te vai nei te akairoia ra no to Iehova mareka anga openga. I roto i te orama, kua kite te apotetoro ko Ioane i te tupuanga o te reira, e kua ripoti maira aia: “E kite atura au i tetai angela ke i te kake anga i te itinga o te rā ra, e tei iaia te akairo a te Atua ora ra: kua kapiki ua maira ma te reo maata i nga angela toko a ra, tei orongaia mai te mana no ratou kia rave kino i te enua e te tai, Na ko maira, Auraka na e rave kino atu i te enua, e te tai, e te au rakau, kia ope ra te au tavini o to tatou Atua i te akairoia e matou to ratou rae. Kua akarongo atura au i te maata anga o te aronga i akairoia ra: okotai anere e a ngauru ma a i te tausani i akairoia ra, no te au kopu ravarai o te tamariki [vaerua] a Iseraela ra.” (Apokalupo 7:2-4) I te mea ko teia angaanga akairoanga i te Iseraela vaerua kua mamao te rave anga kua vaitata i te oti, te akakiteia maira e kare e roa atu ka tupu te au tupuanga rekarekaia. Ko tetai apinga ko, “te mate maata,” me tukuia mai nga matangi e a no te akapouanga ki runga i te enua nei, e mea tau te vaitata rava nei ia.​—Apokalupo 7:14.

9. Eaa te manako o te anana iti i te tupuanga te numero o te urupu maata?

⁹ E au mirioni ua atu te numero o te aronga o te urupu maata kua akaputuia. Mei teaa ra te akapumaana anga a teia i te au ngakau o te aronga toenga ra! Noatu rai e te topa aere ra te numero o te aronga o te anana iti te vai nei rai i te enua nei, kua tereniia e kua akateateamamaoia e ratou te au tangata tau o te urupu maata ei rave i te au apainga no te akaaerenga a te Atua te totoa nei i te enua katoa. (Isaia 61:5) Mei ta Iesu rai i akakite maira, ka ora atura tetai aronga i te mate maata ra.​—Mataio 24:22.

“Auraka e Mataku”

10. (a) E te tamaki anga te vaitata ra i te akamataia ki runga i te au tangata o te Atua, e ka taki atu te reira ki teaa? (e) Eaa te au uianga te uiia ra kia tatou tataki tai?

¹⁰ Kua uriia mai a Satani ma tana au temoni ki te tuanga o te enua nei. Te akapapaia nei aia ma tona au nuku katoa kia rave i ta ratou tamaki anga maata ki runga i te au tangata o Iehova. Ko teia tamaki anga, tei totouia maira i te Puka Tapu, kua akatakaia e ko te tamaki anga a Goga o Magoga. Ki runga iaai tikai ta te Tiaporo akatika atu i tana takino anga? Kare ainei e ki rungao i te au mema openga o te anana iti ra, koia te Iseraela vaerua o te Atua ra, tei noo ponuiaau ua ra “ki runga i te ngai teitei i te enua ra”? (Ezekiela 38:1-12) Ae, inara ko te toenga o te pupu tiratiratu akatainuia ra, kapiti katoa ma to ratou au oa mou piri, koia te mamoe ke atu, ka kite e akapeea ta Satani tamaki anga i te topa viviki anga e tupuanga tuke i te tuanga a te Atua ko Iehova. Ka tamata aia i te paruru anga i tona au tangata, e na teia e akamata i “taua rā maata e te rikarika o Iehova ra.” (Ioela 2:31) I teia tuatau, te rave nei te tavini akono meitaki e te pakari i tetai angaanga puapinga maata, e akaoraanga tangata, na te akamatakiteanga i ta Iehova ka rave te aere mai nei. (Malaki 4:5; 1 Timoteo 4:16) Te rave ra ainei koe i taua angaanga ra, i te raveanga i te tutu aere anga i te tuatua meitaki o te Patireia o Iehova? Ka rave tamou ainei koe i te reira ei tetai akakitekite mataku kore i te Patireia?

11. Eaa ra i puapinga maataʼi te tu manako mataku kore i teia tuatau nei?

¹¹ I te manako anga i te turanga o te ao i teianei, mei teaa ra te tau no te anana iti kia akarongo i te au tuatua a Iesu kia ratou e: “Auraka e mataku, e taku anana iti”! E mea tau ra te reira tu akono mataku kore ra i te manako anga i te au mea ravarai te raveia nei i teianei kia rotai ma te akakoro anga a Iehova ra. Te kite ra te aronga tataki tai o te anana iti i tei anoanoia kia akakoromaki marie tae roa ki te openga. (Luka 21:19) Mei ia Iesu Karaiti, koia te Atu e te Pu o te anana iti, i akakoromaki marie ra e kua tiratiratu tae roa ki te ope anga tona oraanga i te enua nei, pera katoa oki te aronga tataki tai o te toenga ka tau katoa kia akakoromaki marie e kia tiratiratu.​—Ebera 12:1, 2.

12. Akapeea ta Paulo akamaroiroi anga i te au Kerititiano akatainuia ra, mei ta Iesu rai, kia kore e mataku?

¹² Pouroa te aronga akatainuia ra ka tau kia aiteite atu te manako anga ki to te apotetoro ko Paulo ra. E tamanako ana i akapeea tana au tuatua ei tetai tei akatainuia ei akakitekite ki te au tangata i te tuakaouanga te rotai ra ma ta Iesu akamaroiroi anga kia kore e mataku. Kua tata a Paulo: “E akamanako ia Iesu Mesia, no te uanga o Davida, ko tei akatuia mai mei te mate maira, mei tei te evangelia naku nei. I mate ei au nei i teianei kino, e kua tae rava ki te pirianganaoa nei, mei te mea e e tangata rave tuatua kino ra; kare ra te tuatua a te Atua i tapekaia ra. I akakoromaki marie ei au nei i te au mea katoa no te aronga i ikiia ra, kia rauka katoa ia ratou te ora i te Mesia ra ia Iesu, ma te kakā mutu kore ra. E tuatua-mou te manga tuatua e, Kia mate tatou ma ia katoa ra, e ora katoa tatou ma ia katoa oki: Kia akakoromaki katoa tatou i te kino ra, e basileia katoa to tatou ki ona ra: kia uuna tatou iaia ra, e uuna katoa aia ia tatou: Kia kore tatou e akono i te tuatua-mou, e tuatua-mou rai tana, kare e tika iaia kia uuna i tana uaorai.”​—2 Timoteo 2:8-13.

13. Eaa te au irinaki anga oonu ta te au mema o te anana iti e mou ra, e eaa ta te reira te akakeu ra ia ratou kia rave?

¹³ Mei te apotetoro ko Paulo rai, te rekareka ra te au mema te vai nei o te anana iti akatainuia ra kia akakoromaki marie i te au mamaeanga ia ratou e akakitekite ra i te tuatua mana tei tataia ra ki roto i te Tuatua a te Atua. Kua akaaka oonuia to ratou au irinaki anga ia ratou e mou ra i te au taputou tu Atua no te ora e no te oronga anga kia ratou i “te korona ora” me ka vai tiratiratu ratou tae roa ki te matenga. (Apokalupo 2:10) Na te kiteanga i tetai tuakaouanga viviki e te taui anga, ka taokotaiia mai ratou ma Karaiti, kia tutara kapipiti ma ia katoa ei au ariki. Mei teaa ra te autu anga no to ratou mouanga i te aerenga tiratiratu ei aronga akavi i teianei ao!​—1 Ioane 5:3, 4.

E Manakonako Anga Takake

14, 15. Eaa te takake o te manakonako anga o te tuakaouanga o te anana iti ra?

¹⁴ Te manakonako anga tuakaouanga te tapapaia ra e te anana iti e takake ia. I roto i teea au tu? Ko tetai apinga, te na mua ra ia i te tuakaouanga maata o “te aronga tuatua-tika e te aronga tuatua-tika kore.” (Angaanga 24:15) Te tika, ko te tuakaouanga o te aronga akatainuia ra te o atura ki roto i tetai papa anga puapinga maata, mei te akataka meitakiia ra e teia au tuatua te kitea ra ia 1 Korinetia 15:20, 23: “Kua tu akaou tikai ra te Mesia mei te mate maira, kua riro ïa ei momua no te aronga i topa te moe ra. E akonoia ra te tangata ravarai i tona uaorai pupu; ko te Mesia te momua; e i muri ake, ko to te Mesia ïa, kia mama mai aia ra.” Na te akono i te tu akakoromaki marie anga e te akarongo ta Iesu i akaari maira, kua kite te anana iti e eaa te vai maira no ratou me oti ta ratou angaanga i te enua nei, e maata oki mei te aerenga mai te Atu mou ra ki tona iero no te akavaanga i te 1918.​—Malaki 3:1.

¹⁵ Kua oronga katoa mai a Paulo i tetai atu tumu kia tatou kia kite i teia tuakaouanga ei mea takake. Mei tei tataia ia 1 Korinetia 15:51-53, kua tata aia: “I na, e akakite atu au kia kotou i te tuatua ngaro; Kare e mamia, mei te kamo anga mata nei, kia tae ki te pu openga ra. . . . E teianei kopapa pe ua, kia riro ei kopapa pe kore e tikaʼi, e teianei kopapa mate ua, kia riro ei kopapa mate kore e tikaʼi.” Ko teia au tuatua no te aronga o te anana iti ia tei mate i te tuatau o te parutia o Karaiti ra. Kare e moe i te mate no tetai tuatau roa, kua kakauia ratou ma te mate kore, “kare e mamia, mei te kamo anga mata nei.”

16, 17. No runga i to ratou manakonako anga no te tuakaouanga, akapeea te akameitaki takake anga i te au Kerititiano akatainuia ra i teia tuatau nei?

¹⁶ I roto i te marama o teia kiteanga, ka mou ia tatou te aiteanga o te au tuatua a te apotetoro ko Ioane te kitea ra ia Apokalupo 14:12, 13. Kua tata aia: “Teia te akakoromaki o te aronga tapu, ko tei tāpu i te au akauenga a te Atua, e te akarongo ia Iesu. E akarongo atura au i tetai reo no runga i te rangi, i te na ko anga mai iaku e, Ka tata na, E ao to te aronga e mate, ei roto i te Atu ratou ka mate ei, i teianei e a muri ua atu: koia ïa, te tuatua maira te Vaerua, kia akaea ratou i te rave i ta ratou angaanga, e e aru oki ta ratou angaanga ïa ratou.”

¹⁷ Mei teaa ra tetai tutaki takake te vaira no te toenga o te anana iti! Ka tae viviki mai to ratou tuakaouanga, i muri ua ake i to ratou topa anga i te moe i roto i te mate. Mei teaa ra te taui anga maata ta ratou ka kite ia ratou ka rave ei i ta ratou angaanga i te ngai tuanga vaerua! Ma te tupu anga te reira akakaka anga o te anana iti e ma te roa o te tupu anga te au totou puapinga maata o te Puka Tapu, e mea tau tikai no te au mema openga o te toenga o te anana iti ra e “auraka e mataku.” E na to ratou tu mataku kore e akamaroiroi i te aronga o te urupu maata, tei tau ra kia tatanu i tetai tu manako aiteite no te mataku kore ia ratou e tapapa atura ki te akaora anga i te tuatau maata rava te taitaia te ka kiteia i te enua nei.

18, 19. (a) Eaa ra i riro ei ei tuatau rapurapu to tatou e noo nei? (e) Eaa ra i tau ei kia kore e mataku tei akatainuia e pera katoa te au mamoe ke atu ra?

¹⁸ Na te akamanakoanga i te au angaanga a te anana iti ka rauka ia ratou e te urupu maata i te tamou marie i te matakuanga i te Atua mou ra. Kua tae oki ki te ora akavaanga nana, e kua riro ei mea oko maata te tuatau tau. Kua kotingaia, tikai, te tuatau no etai ke atu kia rave i te angaanga. Inara, ko tatou, kare e mataku e ka kore e tupu ta te Atua akakoro anga. Ka autu tikai te reira!

¹⁹ Kua akarongoia, e au reo mamaata i te rangi i te na ko anga e: “Ko te au basileia o teianei ao, kua riro ïa ei au basileia no to tatou Atu e no tana Mesia; e e vai rai te au iaia e tuatau e tuatau ua atu.” (Apokalupo 11:15) E tika tikai, te arataki nei te Tiaki Maata, koia a Iehova, i tana au mamoe katoatoa na “te au ara tuatua-tika, no tona ra ingoa.” (Salamo 23:3) Te arataki tikaia ra te anana iti ki to ratou tutaki i te rangi. E ko te au mamoe ke atu ka akaoraia na roto atu i te mate maata kia rekareka i te ora mutu kore i te tuanga o te Patireia kaka o te Atua i raro ake i te tutara anga a Iesu Karaiti. No reira, i ta Iesu atu au tuatua ki te anana iti ra, e tumu tika katoa kia akarongo atu to te Atua au tavini ravarai i runga i te enua nei ki tana au tuatua e: “Auraka e mataku.”

Ka Rauka Ainei ia Koe i te Akataka?

◻ Eaa ra tatou i tau ei kia manako e kia meangiti mai te numero o te anana iti?

◻ Eaa te turanga o te toenga o tei akatainuia ra i teia tuatau nei?

◻ Eaa ra i tau ei kia kore te au Kerititiano e mataku, noatu rai te vaitata maira te tamaki a Goga o Magoga ra?

◻ Eaa ra i takake ei te manakonako anga tuakaouanga o te 144,000, e maata oki i teia tuatau nei?