Pene 83

Akamanuiriia e Tetai Pharisea Rongonui

E MANUIRI a Iesu i te ngutuare o tetai Pharisea rongonui ra, te ngai koi akaora ua akera aia i tetai tangata mate i te koao. I ta Iesu akara anga i etai manuiri i te iki anga i te au ngai teitei i te kaingakai ra, kua apii atura aia i te apiianga no te taakaaka anga.

Kua akamarama atura Iesu: “Kia tuatuaia mai koe e aere ki te oroa akaipoipoanga, auraka e aere ki te ngai teitei i te kaingakai: ko te tuatua katoaia atu aea tetai tangata taoiau maata atu; Ko te aere atu oki taua tangata i tuatua ia korua ra, e te karanga atu kia koe e, Ka tuku mai i tenana ngai ki teianei tangata; ko te aere akama ua atu oki koe ki te ngai akaaka.”

Kua ako atura Iesu: “Kia tuatuaia koe ra, e aere ua atu ki te ngai akaaka; e kia tae mai tei tuatua kia koe ra, kia na ko mai aia kia koe e, E tama, e aere atu koe ki runga atu: e teitei atura koe ki mua i te aroaro o te aronga e noo katoa i te kaingakai ra.” I te taopenga anga kua tuatua maira Iesu: “Ko tei akateitei iaia uaorai, ka taakaakaia ïa; e tei taakaaka iaia uaorai, ka akateiteiia ïa.”

I muri akera kua tuatua a Iesu ki te Pharisea tei pati maira iaia e kua akataka atura e akapeea te akono i te kaingakai tei tau tikai i te Atua. “Kia akatupu koe i te kaingakai avatea, e te kaingakai aiai, auraka e tiki atu i toou au oa ra, e toou au taeake, e toou kopu-tangata, e te aronga tangata tupu apinga nui ra; ko te tiki katoa mai aea ratou ia koe, ka tutakiia mai aea koe. Kia akatupu ra koe i te pokai, ko te tangata rikiriki te tiki atu, ko te rima motu ra, ko te pirikoki, ko te matapo: E e [mataora, NW] toou i reira, kare oki a ratou kia tutaki mai ia koe.”

Na te oronga anga i te kai mei te reira na te aronga kare a ratou ra ka akatupu i te mataora no tei oronga atura no te mea mei ta Iesu i akataka atura ki tei akamanuiri iaia ra: “E tutakiia mai oki koe kia tae ki te tuakaouanga o te aronga tuatua-tika.” Te akamaaraara maira ta Iesu tuatua anga no teia kaikai anga puapinga, no tetai atu taeake akamanuiriia i tetai kaingakai ke ra. “E [mataora, NW] tona to te kai i te manga i te basileia o te Atua ra,” ta te reira manuiri ia i tuatua. Inara, kare ko te katoatoa e manako maata i te reira manakonako anga mataora, mei ta Iesu i akaari mai na te akatutu anga.

“E kaingakai maata ta tetai tangata, e kua karanga atura aia ki te tangata e manganui. . . . E kua tono atura i tona tavini e tiki i taua aronga i tuatuaia ra, e karanga atu, E aere mai, kua vave te kai, kare e ape toe. Kua kotoe ua atura ratou ravarai. Na ko maira tetai, I oko ana au i tetai kainga, e aere ana au e atoro e tikaʼi; kia tukuia au e koe. Kua tuatua maira tetai, I oko ana au i te puakatoro e rima zugo, e te aere nei au e timata; kia tukuia au e koe. Kua tuatua maira tetai, I akaipoipo ana au i te vaine, kare oki au e tika kia aere.”

Mei teaa ra te apikepike o te au kotoe anga! Te mea matauia na mua te akara anga i te kainga me kare te manu ei reira ka oko i muri akera, no reira kare e rapurapu te vaira no te akara i muri ake. Mei te reira katoa oki te akaipoipoanga o tetai kare e tau kia arai iaia kia kore e ariki i te reira patianga puapinga maata. No reira i te akarongo anga i te reira au kotoe anga, kua riri te pu, e kua akaue atura i tona tavini:

“E aere viviki ki te au arataa, e te au mataara, i te oire nei, e arataki mai i te tangata rikiriki, e te rima motu, e te pirikoki, e te matapo. Kua tuatua maira taua tavini ra, E te atu, kua oti akenei taau i akaue mai nei, e te atea ua nei rai. Kua karanga atura taua pu ra ki te tavini, E aere koe ki runga i te au ara tiroa e te au pae koro ra, e unuunumou tika atu ei ki te tangata kia aere mai, kia ki rava toku are. . . . Kare rava tetai, i taua aronga i tuatuaia ra, e kai iti ua ake i taku nei kaingakai.”

Eaa te turanga te akatakaia maira e te akatutu anga ra? Ko “te pu” te oronga maira i te kaingakai te akatutu maira ia i te Atua ia Iehova; “te tavini” tei rave ra i te patianga, ko Iesu Mesia ia; e ko te “kaikai maata o te aiai,” ko te tikaanga no te akatano anga no te Patireia o te au rangi ra.

Te aronga mua tei orongaia ra te patianga kia aere mai kia tau no te Patireia ra, i mua ake i etai katoa, ko te au arataki akonoanga ngati Iuda o to Iesu tuatau ra. Inara, kare ratou i ariki i taua patianga ra. No reira, akamata mai ia Penetekote 33 T.N., kua orongaia te rua o te patianga ki te aronga rikiriki e te aronga akaaka ua o te iti tangata ngati Iuda ra. Inara kare i rava tei akarongo atu kia akaki i te 144,000 noo anga i te Patireia o te Atua i te rangi ra. No reira, i te 36 T.N., e toru e te apa mataiti i muri akera, kua orongaia te toru o te patianga e te patianga openga ki te aronga kare i te ngati Iuda e tei kore i peritomeia e kua raveia te akaputu anga i te reira aronga tae roa mai ki to tatou tuatau nei. Luka 14:​1-24.

▪ Eaa te apiianga no te taakaaka ta Iesu i apii ra?

▪ Akapeea e raukai i te tangata pu ngutuare ra i te oronga i te kaingakai tei tau i te Atua ra, e eaa ka apai mai ei te reira i te mataora kiaia?

▪ Eaa ra i tu apikepike ei te au kotoe anga a te aronga tei patiia atura?

▪ Eaa te akatutuia maira e ta Iesu akatutu anga no te “kaikai maata o te aiai” ra?