Kua Tare Ainei Koe i te ka Pou?

“EAA! Koe ka patoi ei i tetai oronga anga vavaria?” Kua poitirere te akaaere i tana i rongo ra. Tona akaaere i raro ake iaia, e vaine tei akangateiteiia no tona tu karape e te tu akono memeitaki, koi patoi ua akera i tetai oronga anga no te apii i te enua ke no te rua mataiti e ka tutakiia e te kamupani. Eaa aia i pera ei?

No te ariki i te oronga anga, kua akamarama te vaine e, ka takake aia mei tana tane e te nga tamariki ra e rua. Ka mii tikai aia ia ratou. E ko tei puapinga maata atu, ka ngaropoina iaia tana au angaanga tei orongaia mai e te Atua ei vaine e te metua vaine. Te ka pou i te pae o te manako ngakau e te pae vaerua, e teitei rava te reira no te tutaki. No reira, i muri ake i te tareanga i te ka pou, kua manako aia i te patoi i te oronga anga.

Eaa taau ka rave naringa ko koe tera i tona ngai ra? E tikai, kare te katoa anga e akatika ki te tuku anga tei raveia e teia vaine Kerititiano nei ra. Ko etai pae, mei tona au taeake angaanga ra, penei ka manako ratou e kua kaimoumou aia i tetai tuatau meitaki no te akamaata atu anga i tana angaanga. Ka akaapa katoa tetai pae iaia no tei kore i akamanako i tona ngutuare tangata i te tuatau ki mua, i te mea e ka viviki ua te rua mataiti i te topa ki muri. Inara kare tana tuku anga i te mea manako rere ua me kore ra te ngoie ua. Kua akatumuia te reira ki runga i te manako tau e te au kaveinga tau tikai. Eaa te reira?

E Maata Atu i te Kite Ua

Te tangata kite pakari rava atu tei aaere i te enua ra, ko Iesu Karaiti, kua oronga mai aia i te arataki anga i roto i tetai o tana au parapore. “Koai ia kotou te inangaro ra i te patu i tetai punanga e kare i noo na mua ki raro i te tare i te ka pou, no te akara e me ka rava rai tana no te akaoti i te reira?” I ui ei a Iesu. “Te openga, e tuku aia i tona pange inara kare e rauka i te akaoti i te reira, e e akamata atura te aronga akarakara i te aviri iaia ra, te na ko anga e, ‘Kua akamata teia tangata i te patu inara kare i rauka i te akaoti.’”​—Luka 14:28-30, NW.

Ka akatika te katoatoa e e mea tau e te pakari no te tare i te ka pou i mua ake ka manako atu ei i te rave i tetai ua atu mea puapinga. Ei akaraanga, me ka inangaro tetai tangata i te oko i tetai are, ka rapurapu ainei aia ki roto i te tainaanga i tetai papaanga angaanga ma te kore e kimi atu i tona tutaki e te akapapuanga e ka rauka iaia i te tutaki no te akaoti i te reira rave anga angaanga? Ka manakoia aia e e auouo i te mea e ka rave aia i te reira. Ae, e mea tau e te pakari no te tare i te ka pou i mua ake ka akamataʼi tetai i tetai angaanga.

Eaa tikai ra te manako ta Iesu e tuatua ra i te reira parapore? I mua ake ka tuatuaʼi i te parapore, kua karanga aia: “Ko tetai ua atu tei kare i apai i tana rakau tamamae anga e te aru maira iaku ra kare aia i te pipi naku.” (Luka 14:27, NW) No reira, te akaari maira te aerenga tuatua e kare a Iesu e oronga anake ua ra i etai ako anga tau e te pakari ra no ta tatou angaanga o te au ra ravarai. Mari ra, te tuatua ra aia no runga i te tareanga i te ka pou i roto i te riroanga mai ei pipi nana.

I roto i tana parapore, te tou ra a Iesu e e riro mai e ei pipi ka o mai te au taui anga e te au atinga. No teaa ra? No te mea kua ki teia akatereanga o te au mea nei i te manako apinganui e kua akakeuia e te manako iaia uaorai. I te maata anga o te au tangata te manako ua ra ratou i te akamerengoanga i to ratou uaorai au anoano i te pae kopapa, e meangiti ua me kare te kore anga e manako i to ratou anoano i te pae vaerua me kare to ratou pirianga ki te Atua. (2 Timoteo 3:1-4) Inara ko teia tu, me kore vaerua, e tuke tikai te reira mei tei akaariia e Iesu Karaiti. Kua karanga aia, “kare oki te Tamaiti a te tangata i aere mai, kia taviniia atu aia, kia tavini ra e kia oronga i tona meta ei oko ei tupau no te manganui.” Kua tuku aia i te puapinga maata rava atu ki runga i te au mea vaerua kare i te au mea kopapa i tona karanga anga e: “Ko te vaerua ia tei oronga maira i te ora; kare rava o te kopapa puapinga.”​—Mataio 20:28, NW; Ioane 6:63, NW.

I to Iesu ako anga i te aronga tei inangaro kia riro mai ei au pipi nana ra kia tare i te ka pou, te tuatua tikai ra aia, kare no runga i te au puapinga i te pae kopapa, inara te au puapinga i te pae vaerua. Eaa tei puapinga rava atu kia ratou, ko te au apinga i te pae kopapa tei rauka ra i teianei ao me ko te au puapinga i te pae vaerua o te apii anga ei pipi? I muri ake i te orongaanga i te parapore e tetai atu, ko teia te tumu i taopenga ei aia: “No reira, e papu ei ia koe, kare tetai ia kotou tei kore i akaruke i tana au apinga ravarai e rauka kia riro mai ei pipi naku ra.” (Luka 14:33, NW) Te ka riro mai ei pipi ra, te puareinga ainei aia e te papa ra no te rave i teia atinga, me kore ra e apinga teitei roa ainei teia no te tutaki?

Tetai Akara Anga ma te Tau

Noatu e ka riro te au mea i te pae kopapa ei apai mai i te au puapinga tei viviki te kitea maataia ko te au puapinga mei te au mea pae vaerua te riro maata atura te reira ei mea ope kore e te merengoanga. Kua manako a Iesu na teia tu: “Auraka e akaputu i te apinga na kotou i teianei ao, i te ngai e pou ei i te uu, e te pe, i te ngai e tomoia, e e keiaiaʼi e te keia. Ka akaputu ra i te apinga na kotou ki runga i te rangi, i te ngai e kore ei e pou i te uu e te pe, kare oki te keia e tomo i reira ka keiaʼi.” (Mataio 6:19, 20) I to tatou tuatau, te kake anga o te au apinga ki runga, te topa anga o te puapinga o te au apinga kimi puapinga, te kore anga te au pangika e autu, e te vai atura, kua akatupu teia kia puapinga kore te manganui tei tuku i to ratou irinaki tikai ki roto i te au apinganui i te pae kopapa. Inara te raurau ra te apotetoro ko Paulo ia tatou e “e akono nei, eiaa i te au mea i akaraia ra, i te au mea akara koreia ra: ko te au mea e akaraia nei oki, no teia ua nei ïa tuatau; kareka te au mea akara koreia ra, e tika ïa i te vai ranga.” (2 Korinetia 4:18) Akapeea ra, e raukaʼi ia tatou i te tatanu i teia akara anga?

Ka rauka ia tatou na te aruanga i to tatou Tutu e te Akaraanga, ko Iesu Karaiti. Iaia i te enua nei, kare aia i tetai tangata tei kopae iaia mei te au tamataora anga, mei tei kitea e kua piri ana aia ki roto i te kaikai anga akaipoipoanga e te au kaikai anga tamataora. Inara, kua akariro tikai aia i te au mea pae vaerua ra ei mea mua kiaia. E raukaʼi i te akatupu i te anoano o tona Metua, kua puareinga rai aia i te akaruke i te au mea tei tamanakoia e e au anoano. Kua akakite aia i tetai taime e: “E ana to te suoli; e toanga to te manu o te reva; kareka te Tamaiti a te tangata nei, kare ona e urunga upoko.” (Luke 9:58) Kua manako aia i te raveanga i te anoano o tona Metua ei mea puapinga rava e te mareka anga e kua tuatua aia ma te ngakau tae tikai e: “Teia taku kai, ko te akono i tona anoano, to tei tono mai iaku ra, ma te akaoti i tana angaanga.”​—Ioane 4:34.

Kua akaari a Iesu i tona tu manako puapinga na tana kopae anga i te au timata anga a Satani. Kua tauta te Tiaporo no te maani ia Iesu kia rave i Tona mana tei orongaia mai e te Atua kia puapinga Aia uaorai, no te akamerengo i Tona au anoano i te pae kopapa, e kia rauka te tu rongonui e te matauanga i teianei ao. Kua kite meitaki a Iesu e ko teia au puapinga tau kore ra ka rauka anake te reira ma tetai tutaki anga teitei​—te ngere anga i ta te Atua mareka anga—​e tutaki anga tei teitei atu i tana e anoano ra no te tutaki, no te mea kua akaperepere aia i tona pirianga meitaki ma tona Metua i runga rava atu i te au mea ravarai. No reira aia i kopae ei i ta Satani au oronga anga ma te papu, ma te kore e tapupu anga.​—Mataio 4:1-10.

Ei au pipi na Karaiti, te inangaro tikai ra tatou kia rauka katoa te tu manako puapinga mei to tatou Pu rai. I roto i teianei akatereanga o te au mea nei i raro ake i te akaaerenga a Satani, e manganui te au mea te akaraanga e te taputou maira i te au puapinga memeitaki inara ka riro tikai ia ei mea kino ki to tatou pirianga ki te Atua. Ko te au mea mei te kimi tamou anga i te au taoonga teitei i te ngai angaanga, te aruaruanga i tetai apii anga teitei no te akamaata i to tetai taoonga, te akainangaroanga i te aronga irinaki kore, me kore ra te rave anga i te au ravenga pitiniti tau kore ka arataki ngoie ua atu te reira ki te ngere anga i te akarongo e i te openga kua topa atu mei te mareka anga a Iehova. Kia tare meitaki tatou i te ka pou me aravei atu tatou i teia au timata anga.

E Paruru Anga te Kite Mou

I nga mea mataiti i topa akenei, kua rauka i tetai tangata mapu Kerititiano i roto i tetai oire maata i te Itinga Mamao no te aere atu ki tetai enua no tetai apiianga maata. Noatu e kua rauka takere iaia tetai apiianga angaanga meitaki ra e tetai ngai angaanga e meitaki te tutaki, kua manako aia e kare teia i rava; kua inangaro aia i te akameitaki atu i tona turanga i te oraanga. Kua tauta te au taeake Kerititiano i te uriuri kiaia te au manako o te Tuatua Tapu tei uriuri ua akera tatou, inara e ketaketa tikai aia e kua rave atura i tana i parani. Inara i te akamata anga kua mou aia i tona akarongo, ma te maria kua ngaro aere tona tu ariki no te tuatua mou Puka Tapu, e kua akamata te tu ekoko i te tupu. I roto anake ua i te mataiti ra, kua ngaro tona akarongo tikai e kua tuatua e e tangata aia kare ona irinaki anga. Ma te orongaia, te raukaanga tetai turanga teitei na roto i te apiianga angaanga maata kua apai mai te reira i tetai manga tu merengo anga. Inara ei kaka no tetai tuatau poto, mei teaa te tutaki anga maata tana i tutaki​—te pueurikiriki anga tona akarongo e te ngereanga i te ora mutu kore!​—1 Timoteo 1:19.

I tetai tua, ko te aronga tei patoi i te tuku i tetai ua atu mea kia takino i to ratou pirianga ki te Atua kua kokoti ratou i te au akameitakianga maata mei ko mai ia Iehova.

Tetai akaraanga ko tetai tangata mapu e piti­niti akamanea anga are tana i roto rai i te oire tei taikuia i runga akenei. I muri ua ake i nga mea marama te akamata anga i te apii i te Puka Tapu ki te Au Kite o Iehova, kua aravei aia i tetai oronga anga timata anga​—no te rave i tetai $30,000 angaanga maani akaou anga. Inara ka o mai te kopaeanga i te aru i te au papaanga ture no te akatu i tetai apinga tei tureia. I te mea kua apii aia e kia aru te au Kerititiano i te au ture, kua kite aia e na te ariki anga i te angaanga tera te aite anga ka ngere aia i ta te Atua mareka anga. (Roma 13:1, 2) I muri ake i te akara meitaki anga i te turanga, kua patoi atu aia i te angaanga. Eaa tei tupu? Kua riro mai teia rave anga ma te akarongo ei taui i tona tere anga ki mua i te pae vaerua. I roto i te mataiti, kua akatapu aia iaia e kua papetitoia. Kua oko aia i tana pitiniti e kua rauka mai tetai ngai angaanga tei tuku iaia ra kia maata atu tona taime no te au mea pae vaerua. Te tavini nei aia ia Iehova ma te rekareka e te maroiroi.

Kua tare teia nga tangata mapu i te ka pou. Eaa te tuke i ta raua iki anga? Ko te kite pakari mei te Atua! Akapeea ra? Ko te kite pakari e ravenga te reira o te tuku anga i te kite kia taangaangaia ei apai mai i te au puapinga ope kore, e te aite anga o te kite pakari mei te atua ko te kite tei tau ra ki te akakoro anga o te Atua no tatou. Koi raukaʼi etai kite o te Puka Tapu i teia nga tangata mapu ra, na ta raua taangaanga anga i te reira i arataki atu ki te tupu anga tuke. Te karanga ra te puka a Maseli e: “Me tomo te kite pakari ki roto i toou ngakau e riro maira te kite uaorai ei mea reka ki toou tikai meta ra, e riro te ravenga manako ei tamou ma te paruru ia koe, na te akara anga karape uaorai e paruru ia koe, no te akaora ia koe mei te mataara kino ra.”​—Maseli 2:10-12, NW.

Ta te Atua Tuatua, koia te Puka Tapu, e tumu ia o te kite pakari tika tikai te ka rauka ia koe i te aru i te arataki anga me rave koe i te au tuku anga puapinga. Auraka e riro ra ma te kite i toou uaorai nga mata, e aru i te ako anga: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.” (Maseli 3:5, 6) Kia taakaaka tatou e te puareinga kia apiiia, te kopaeanga i te vaerua anoano noou uaorai e te vaerua irinaki kore o teianei ao te maata ra i teia tuatau.

Ae, kare e rauka ia tatou i te kopae i te kokotianga i ta tatou i ruru ra, e te tau ua ra te reira i te mea e te tau ra kia akakoromaki tatou i te ka tupu mei te au tuku anga e te au iki anga ta tatou i rave. (Galatia 6:7, 8) No reira e tare i te ka pou i mua ake i te au ravenga angaanga. Auraka e tuku i tetai ua atu meitaki kia keia ia koe ra mei toou tu vaerua me kore toou pirianga ki te Atua ko Iehova. E pure no te kite pakari e te akava anga meitaki no te rave i te au tuku anga tika, no te mea ko te au tuku anga taau ka rave i teianei penei e riro te reira ei tuke i rotopu i te ora e te mate​—ma te mutu kore ra!​—Akaaiteia atu kia Deuteronomi 30:19, 20.

[Au Tutu i te kapi 28]

Ka tuku ainei aia i te au angaanga i te pae vaerua i te ngai mua i te oraanga me kore ra tetai angaanga noa nei?