Pene 84

Te Apainga Akono Anga ei Pipi

I MURI ake i te akaruke anga i te ngutuare o tetai Pharisea rongonui, penei e mema aia no te Sunederi, kua aere atura a Iesu ki Ierusalema. E urupu maata tei aru atu iaia. Inara eaa to ratou au manako? Eaa tikai te kapitiia ra ki te riro anga ei pipi mou nana?

Ia ratou e aere ra, kua ariu atura Iesu ki taua urupu ra e kua poitirere ratou i tana tuatua anga: “Ko te tangata e aere mai kiaku nei, e kare e makitakita i tona metua tane, e tona metua vaine, e tana vaine, e tana au tamariki, e tona au taeake, e tona au tuaine, e tona katoa uaorai [meta, NW], kare aia e riro ei pipi naku.”

Eaa te aiteanga o ta Iesu tuatua? Kare e kia makitakita tikai tana au pipi i to ratou au kopu tangata. Kareka ra, ka tau ratou kia makitakita ia ratou na te tu e kia mea ngiti mai to ratou inangaro ia ratou uaorai i to ratou inangaro iaia ra. Kua tuatuaia no to Iesu ra tupuna koia a Iakoba e, i “makitakita” (NW), aia ia Lea e e maata tona inangaro ia Rahela, tera te aiteanga e meangiti mai te inangaro ia Lea ia Rahela i tona teina ra.

E akamanako, katoa, kua karanga a Iesu e ka tau te pipi kia makitakita i “tona katoa uaorai meta,” me kare ora. I reira katoa oki te aiteanga o ta Iesu tuatua e ka tau te pipi mou kia maata atu te inangaro Kiaia i tona inangaro i tona uaorai ora. Te akaketaketa maira a Iesu e e apainga puapinga maata te riro anga ei pipi nana ra. Kare te reira i te apinga no te rave uaia ma te kore e akamanako papuia.

Te au tu ngata e te takingakino anga te o katoa maira ki te riro anga ei pipi na Iesu, mei tana i akakite maira: “E te kore e apai i tona uaorai [pou patia tamamae, NW] ka aru mai ei iaku, kare aia e riro ei pipi naku.” No reira ka tau te pipi mou kia akatika i te rave i te apainga o te akakinoia ta Iesu i akakoromaki ra, e kapiti katoa, me ka anoanoia, te mateanga i te rima o te au enemi o te Atua, kare e roa ka akatupuia e Iesu.

No reira, ko te riro anga ei pipi na Iesu, e tumu tau ia na te urupu tei aru ra iaia kia akamanako papu. Kua akaketaketa maira a Iesu i te reira tumu na tetai akatutu anga. “Ei akaraanga” (NW), kua karanga aia, “Koai ïa tangata i o kotou na, kia akakoro i te are e akatu, kare e timata ana i te noo ki raro, ka tatau ei i te apinga ei ou e oti ei, i te rava anga tona apinga? Ko te tamou aea aia i te tango ki raro, e kare akera i oti iaia, e riro oki te aronga i akara ra i te aviri mai iaia, Na ko maira, I timata io nei teianei tangata i te akatu i te are, e kare akenei i oti iaia.”

Te akatutu atura Iesu ki te urupu tei aru iaia ra e i mua ake ka riro ei ei pipi nana, ka tau kia ngaueue kore to ratou manako e ka rauka ia ratou te akatupu i tei kapitiia maira, mei te tangata rai tei anoano ra kia akatu i te are punanga ka akapapu na mua i te akamata anga e kua rava tana au apinga ei akaoti i te reira. I te oronga anga i tetai atu akatutu anga, kua tuatua akaou atura Iesu:

“E koai oki ïa ariki kia aere aia e tamaki atu ki tetai ariki, kare e noo ana ki raro, ka akaeatu marie ei i te tika anga iaia e tona aronga tangata okotai ngauru i te tausani, kia aravei ua atu aia i tetai e tiki e tamaki iaia ra, ma tona au tangata e rua ngauru i te tausani? E kare ra, e vaio atea tetai, ka tono atu ei i te karere e pati atu i te au.”

I reira a Iesu i akaketaketa atu ei i te tumu no tana akatutu anga, i te na ko anga: “Koia katoa oki kotou, ko tei kore i akaruke i te au mea katoa nana ra, kare aia e riro ei pipi naku.”

Ko te reira te mea tau na te urupu tei aru iaia ra, e, pera katoa oki etai atu tei kite ia Iesu ka tau kia akatika kia rave. Ka tau ratou kia papa no te tuku atinga i ta ratou au apinga ravarai​—te katoatoa rava o ta ratou au apinga, kapiti katoa to ratou uaorai ora—​me ka riro ratou ei pipi nana. Te akatika ra ainei koe kia rave i te reira?

“E mea meitaki te tai,” ta Iesu ia i tuatua ua atu ra. I tana Tuatua ki runga i te Maunga ra, kua karanga aia e ko tana au pipi “te tai no te enua,” tera te aiteanga tei ia ratou te mana no te vairakau i te au tangata, mei te tai tikai ra e vairakau ia. “Kareka kia mangaro te tai ra, eaa atura te mea e taitai ei? Kare e meitaki i te one, kare oki i te taruta teita,” e kua taopenga atura Iesu. “Ka tiria e te au tangata ki vao. E taringa tona ei akarongo ra, e akarongo aia.”

Kua akakite maira a Iesu e noatu ko te aronga e pipi nana no tetai tuatau, kare e tau kia akaapikepike i to ratou manako no te rave tamou. Me ka akapera ratou, ka riro ia ratou ei puapinga kore, ei apinga aviriia na teianei ao e ei mea tau kore ki mua i te Atua, ka riro ei akakino i te Atua ra. No reira, ka aite ki te tai kare e puapinga, kua viivii ia, ka titiriia ki vao, ae, ka akapouia. Luka 14:​25-35; Genese 29:​30-33; Mataio 5:13.

▪ Eaa te aiteanga o te “makitakita” i te au kopu tangata e pera katoa ia koe uaorai?

▪ Eaa nga akatutu anga e rua ta Iesu i akakite maira, e eaa to raua aiteanga?

▪ Eaa te tumu maata o ta Iesu ra tuatua taopenga no te tai ra?