Te Akarongo Mou ra Ainei Koe i te Au Mea Katoa?
“Ko tei akarongo mou i te mea ngiti ra, kua akarongo mou katoa ia i te mea maata.”—LUKA 16:10, NW.
1. Eaa tetai o te au mataara e akarongo mou tikai ra a Iehova?
I TE ra e aere ra ki mua, e akara ana ainei koe eaa te tupu ana ki te ata o tetai tumu rakau i runga i te one? Ae, ka taui ua rai te tu e te aerenga o te ata! Te maataanga i te taime mei te ata rai te tu tinamou kore o te au tautaanga e te au taputouanga a te tangata. Kareka i tetai tua, kare te Atua ko Iehova, e taui ana ma te tuatau. I te taiku anga no runga iaia ei “Metua o te au marama o te rangi ra,” kua karanga te pipi ko Iakobo e: “Kare e tuke o te urianga o te ata kiaia, [me kore, “tukeanga me kore e ata e taui ana me uriia,” tataanga i raro ake, NW].” (Iakobo 1:17, NW) Aiteite ua to Iehova tu e ka rauka kia irinakiia, e tae ua atu ki te au mea iti poepoe rava. E “Atua tu akarongo mou” oki aia—Deuteronomi 32:4, NW.
2. (a) No teaa tatou ka akara matatio ei ia tatou uaorai i te akapapu e me e aronga akarongo mou tatou? (e) Eaa te au uianga no runga i te tu akarongo mou ta tatou ka akamanako?
2 Mei teaa ra to te Atua manako no runga i te tu irinakiia o tona aronga akamori? Mei to Davida rai, ko tei tuatua no runga ia ratou e: “Tei runga toku mata i te aronga akarongo mou o te enua nei, ka noo ei oki ratou ki oku nei. Ko tei aaere na te arataa apa kore ra, koia te ka tavini mai iaku nei.” (Salamo 101:6, NW) Ae, e mea rekareka roa na Iehova te tu akarongo mou o tona au tavini. Ma te tumuanga tau i reira, kua tata te apotetoro ko Paulo: “Ko te mea e akaraia nei i roto i te au akaaere koia oki kia kiteaia te tangata akarongo mou.” (1 Korinetia 4:2, NW) Eaa ta te vai akarongo mou anga e kapiti maira? I roto i teea au tuanga o te oraanga ka tau tatou kia akaari i te tu akarongo mou? Eaa te au akameitakianga no “tei aaere na te arataa apa kore ra”?
Te Aiteanga kia Vai Akarongo Mou
3. Eaa te akapapu maira e me e aronga akarongo mou rai tatou?
3 “E akarongo mou tikai to Mose ei tavini,” e akakite ra a Ebera 3:5, NW. Na teaa i akakeu i te peroveta ko Mose kia akarongo mou? I te patuanga e te akanooangaia te tapenakara, kua “akapera atura oki a Mose: te au mea ravarai ta Iehova i akaue mai kiaia ra, ko tana ïa i rave.” (Exodo 40:16) Ei aronga akamori ia Iehova, ka akaari tatou i te tu akarongo mou na te akono anga i te tavini iaia. Te kapiti maira tikai teia i te vai tiratiratu anga tatou kia Iehova me aro atu i te au timataanga ngata me kore i te au manamanata pakari. Inara, kare te manuia i te akono anga i te au timataanga maata i te tumu okotai ua i te akapapu mai i to tatou tu akarongo mou. “Ko tei akarongo mou i te mea ngiti ra, kua akarongo mou katoa ia i te mea maata,” i akakite ei a Iesu, “e ko tei tuatua tika kore i te mea ngiti ra, kua tuatua tika kore katoa ia i te mea maata.” (Luka 16:10, NW) Kia vai akarongo mou atu rai tatou i roto katoa i te au mea akara anga meangiti ua.
4, 5. Eaa ta to tatou tu akarongo mou i “te mea ngiti ra” e akaari maira?
4 E rua nga tumu puapinga no te akonoanga i te “mea ngiti ra” i te au ra ravarai. Te mea mua, te akaari maira te reira i to tatou manako ngakau no runga i to Iehova tu ngateitei. E akamanako ana i te timataanga no te tu tiratiratu tei tukunaia ki nga tangata mua, ko Adamu raua ko Eva. Kare taua umuumuanga ra e riro ei mea ngata ki runga ia raua. I te mea kua rauka te tikaanga ki te au tu kai katoatoa i roto i te kainga i Edene, ko ta raua ua rai ka kopae koia oki auraka kia kai i te ua o tera tumu rakau okotai ua—“te rakau e kite ei i te meitaki e te kino.” (Genese 2:16, 17) Tikaanga ka riro to raua tu akarongo mou i te akono anga i taua akauenga ngoie ua ra ei akatutu mai e kua turu nga tangata mua i ta Iehova tutaraanga. Na te aru anga i te au ikuikuanga a Iehova i roto i to tatou oraanga i tera ra e tera ra e akaari mai e tei te tua tatou o to Iehova tu ngateitei.
5 Te rua, ka riro to tatou tu ki “te mea ngiti ra” ei akakeuanga ki runga i ta tatou akono anga “katoa i te mea maata,” koia oki, me aro atu tatou i te au maroanga maata atu i roto i te oraanga. I roto i teia tu, e akamanako ana i tei tupu kia Daniela e tona au taeake Epera akarongo mou e toru—ko Hanania, Misaela, e Azaria. Kua apainaia ratou ei tuikaa ki Babulonia i te 617 M.T.N. I te tamarikianga, penei i to ratou mapuanga, kua apainaia atu teia toko a ki roto i te paepae o te Ariki ko Nebukanesa. I reira kua “akataka iora te ariki i te tuanga kai na ratou, no te au rā katoa, no roto i ta te ariki uaorai e no te wina oki tana i inu ra: kia akapera i te angai ia ratou e kia toru ua atu mataiti, e kia ope ka tu atu ei ratou ki mua i te aroaro o te ariki ra.”—Daniela 1:3-5.
6. Eaa te timataanga tei aro atu a Daniela e tona au oa Epera toko toru i roto i te paepae ariki o Babulonia?
6 Inara, kua riro te au apinga a te ariki o Babulonia, ei akatupu i tetai akaaoanga ki te au mapu Epera toko a. I te akara anga kua kapitiia mai te au kai tei araiia e te Ture a Mose ki roto i te au kai reka a te ariki. (Deuteronomi 14:3-20) Penei kare i akatae meitakiia te toto o te au manu tei taiaia, e ka riro te kai anga i taua kiko manu ra i te aati i te Ture a te Atua. (Deuteronomi 12:23-25) Penei kua oronga katoaia ana taua kai ra ki te au itoro, mei tei matauia e te aronga akamori i Babulonia i mua ake ka kai ei i te kaikaianga atinga au.
7. Eaa ta te tu akono o Daniela e tona au taeake toko toru e akaari maira?
7 Kare e ekoko e kare te au araianga no te kai i te mea puapinga roa ki te ngutuare tangata o te ariki o Babulonia. Inara, kua papu tikai ia Daniela e tona au oa i roto i to ratou ngakau e auraka kia taviivii ia ratou ki te kai tei araiia e te Ture a te Atua ki to Iseraela. Te o maira to ratou tu tiratiratu e te tu akarongo mou ki te Atua i roto i teia maroanga nei. No reira kua pati ratou i tetai kai vetitaporo e te vai, e kua orongaia mai te reira kia ratou. (Daniela 1:9-14) Ki tetai papaki tangata i teia tuatau, penei kare ta tera aronga mapu tane i rave i te mea puapinga roa. Inara, kua akaari mai to ratou tu akono i te Atua eaa tikai to ratou turanga i roto i te maroanga o to Iehova tu ngateitei.
8. (a) Eaa te au timataanga ngata o te tu tiratiratu tei aro atu te au Epera toko toru? (e) Eaa tei tupu mai no te timataanga, e eaa ta teia e akatutu maira?
8 Kua riro te akarongo mou i roto i tetai mea kare e akara anga puapinga roa ana ei akapapa anga i te au taeake toko toru o Daniela kia akono i tetai timataanga maata atu. E uri ki te pene 3 o te puka Pipiria o Daniela, e oti ka tatau ei noou uaorai e akapeea te au Epera toko toru i te aro anga atu i te utunga o te mate no tei patoi i te akamori i te tiki auro tei akatuia e te Ariki ko Nebukanesa. I te apaina anga ki mua i te ariki, kua akakite ratou i to ratou manako ngakau ma te mataku kore: “I na, e tika i to matou Atua, ta matou e akamori nei, i te akaora ia matou ra i te umu ai kakā ra: e nana rai matou e akaora i to rima, e te ariki. Kore oti ra, kare rai matou e araara i toou ra au atua, kia kite mai koe, e te ariki, kare oki e akamori i te tiki auro i akatuia e koe ra.” (Daniela 3:17, 18) Kua akaora ainei a Iehova ia ratou? Kua matemate te au tiaki tei titiri i te au mapu tane ki roto i te ai, kareka te au Epera akarongo mou e toru kua aere ora ua mai ki vao—kare oki i ka i te vera o te umu! Kua riro ta ratou akaraanga mou no te tu akarongo mou ei tauturu i te akapapa ia ratou kia vai akarongo mou ua atu i taua tuatau timataanga ngata ra. Kare ainei teia e akatutu maira i te puapinga o te vai akarongo mou ua i roto i te au apinga mea ngiti ra?
Tu Akarongo Mou no Runga i te “Au Apinga Tuatua Tika Kore Ra”
9. Eaa te aerenga tuatua a te au tuatua a Iesu i tataia i roto ia Luka 16:10, NW?
9 I mua ake i te taiku anga i te kaveinga e ko tei akarongo mou noatu i roto i te au apinga meangiti ua te akara anga te akarongo mou katoa ra ia i te au mea puapinga, kua ako atura a Iesu i te aronga e akarongo maira iaia: “E akariro i etai ke ra ei oa no kotou uaorai na roto i te au apinga tuatua tika kore ra, e kia kore atu te reira ra, ka riro atu ia kotou ia raua i roto i te au ngai nooanga mutu kore ra.” Kua tuatua akaou atu rai aia i te tuatua no runga i te tu akarongo mou i te mea ngiti ra. I reira kua karanga atura a Iesu: “No reira, me kare koe uaorai e akarongo mou ana i te au apinga tuatua tika kore ra, koai ia ka oatu na kotou na i te mea tika tikai? . . . Kare e tau i te tavini kia tavini i nga pu e rua; no te mea, ka riro aia i te riri i tetai e te inangaro i tetai, me kore ka piri aia ki tetai e ka akavaavaa i tetai. Kare oki e tau kia tavini kotou i te Atua e i te au apinga nui.”—Luka 16:9-13, NW.
10. Akapeea tatou i te akaari anga i te tu akarongo mou i roto i te taangaanga anga tatou i te “au apinga tuatua tika kore ra”?
10 Kia tau ki te aerenga tuatua, ko te aiteanga i te au tuatua a Iesu i roto ia Luka 16:10 (NW), no runga te reira i te taangaanga anga i te “au apinga tuatua tika kore ra,” ta tatou au mea puapinga me kore au apinga materia. Kua karangaia te reira e e au apinga tuatua tika kore—te moni tikai—tei raro te reira i te akatereanga a te tangata ara nei. Pera katoa, ka arataki atu te anoano maata kia rauka te au apinga nui ki te au angaanga tika kore. Ka akaari tatou i te tu akarongo mou na te taangaanga anga i te tu pakari i roto i te mataara e akapuapinga ra tatou i ta tatou au apinga meteria. Kare tatou e taangaanga i te reira no te au akakoroanga puapinga kore ua, ka inangaro ra tatou i te taangaanga i te reira i roto i te akamaata atu anga i te au mea o te Patireia e i te tauturu anga i te aronga ngere. Na te vai akarongo mou anga i roto i teia mataara nei, te akataeake ra tatou i te Atua ko Iehova e ia Iesu Karaiti, te nga pu o “te au ngai nooanga mutu kore ra.” Na raua e ariki mai ia tatou ki roto i teia au ngai nei, te oronga mai i te oraanga mutu kore no tatou i te rangi me kore i te Parataito i te enua nei.
11. No teaa kare ei e tau kia tapupu tatou i te akamarama anga ki te tangata ngutuare e ka ariki ua tatou i te au tauturu oronga ua ki te angaanga e raveia nei e te Au Kite o Iehova?
11 E akamanako, katoa, i ta tatou e oronga atura ki te tangata e oronga ra tatou i te au Pipiria me kore i te au puka akanooia ki roto i te Pipiria me tutu aere tatou i te karere o te Patireia e te akamarama kia ratou e ka ariki ua tatou i te au tauturu oronga ua no te angaanga e raveia nei e te iti tangata o Iehova i te ao katoa. Kare ainei tatou e oronga ra i tetai tuatau no ratou kia taangaanga ma te pakari i ta ratou au mea puapinga materia? Noatu oki te aiteanga mua o Luka 16:10 (NW), e no te taangaanga anga i te au mea puapinga materia, te akakite ra te kaveinga i reira e te tau katoa ra te reira ki tetai au tuanga ke atu o te oraanga.
E Puapinga Tikai te Tu Tuatua Tika
12, 13. I roto i teea au tuanga ka tau tatou kia akaari i te tu tuatua tika?
12 Kua tata te apotetoro ko Paulo: “No te mea te irinaki nei matou e e akava ngakau tika to matou, i te mea te inangaro nei matou i te akono kia tika matou uaorai i te au apinga katoa ra.” (Ebera 13:18, NW) Ko te “au apinga katoa ra” te papu ua ra e ka kapiti mai i te au mea katoatoa e o maira ki te akatereanga o te moni. E tutaki viviki ana tatou ma te tu tuatua tika i ta tatou au kaiou e te au tero. No teaa ra? No te akava ngakau oki tatou i pera ai e te mea maata roa atu no te inangaro i te Atua e i te akono anga i tana au ikuikuanga. (Roma 13:5, 6) E akapeea ana tatou me kite tatou i tetai apinga kare na tatou? Ka umuumu tatou kia akaoki atu i te reira ki tona pu tikai. E akakiteanga meitaki tikai te ka tupu me akamarama tatou e eaa te akakeu ra ia tatou kia akaoki i te apinga a tera tangata!
13 Kia vai akarongo mou e kia tika i roto i te au apinga katoa ka anoanoia te tu tuatua tika i ko i ta tatou ngai angaanga. Ka riro to tatou tu tuatua tika i te ngai angaanga i te akaariu mai i te manako ki te tu o te Atua ta tatou e turu ra. Kare tatou e “keia” taime ana no te kope. Mari ra, e angaanga pakari ana tatou, mei te mea ra e kia Iehova. (Ephesia 4:28; Kolosa 3:23) Kua tamanakoia e i tetai enua i Europa, e tai toru o te aronga angaanga e pati ana i tetai reta akatikaanga na te taote kia akaangaroi no te maki te rave ra i te reira na roto i te tu pikikaa. Kare te au tavini mou o te Atua e maani ana i tetai kotoeanga pikikaa i te kopae i te aere ki te angaanga. Tetai au taime, e orongaia ana te au turanga teitei ki te Au Kite o Iehova no te mea te kite ra te au pu i to ratou tu tuatua tika e te angaanga pakari.—Maseli 10:4.
Te Tu Akarongo Mou i Roto i ta Tatou Angaanga Orometua Kerititiano
14, 15. Eaa tetai au mataara ka rauka ia tatou i te akapapu e te vai akarongo mou ra tatou i roto i te angaanga orometua Kerititiano?
14 Ka akapeea tatou me akaari i te tu akarongo mou i roto i te angaanga orometua i orongaia mai kia tatou? “Kia oronga ua tatou ki te Atua i te atinga akapaapaa,” e karanga ra te Pipiria, ‘koia oki te ua o te vaa ra i te aakianga ki te katoatoa i tona ra ingoa.” (Ebera 13:15, NW) Ko te mataara maata roa atu i te akaari i te tu akarongo mou i roto i te angaanga orometua koia oki ko te piri putuputu anga ki roto i te reira. Eaa ra tatou ka akatika ai kia pou tetai marama ma te kore e akakitekite no runga ia Iehova e tona akakoroanga? Ka riro katoa te piri putuputu anga ki te angaanga tutuanga ei tauturu ia tatou kia akamaata atu i to tatou kite e te tu meitaki.
15 Tetai mataara meitaki ke mai i te akaari i te tu akarongo mou i roto i te angaanga tavinianga koia oki ko te taangaanga i te au manako i roto i Te Punanga Tiaki e Ta Tatou Angaanga Patireia. Me akapapa tatou e te taangaanga i te au tuatua akamataanga i akakiteia mai me kore i etai atu ka tau, kare ainei tatou e kite i te tutupuanga maata atu i roto i ta tatou angaanga orometua? Me aravei tatou i tetai tangata tei akaari mai i te inangaro i roto i te karere Patireia, e oki viviki ana ainei tatou i te utuutu i taua inangaro ra? E akapeea te au apiianga Pipiria penei tei akamata tatou ki te au tangata tei inangaro? Ka irinakiia ainei tatou e te vai akarongo mou ra ainei tatou i te akono anga i te reira? Ka riro te akapapu anga e te vai akarongo mou ra tatou i roto i te angaanga orometua i te arataki atu ki te ora no tatou e no te aronga katoa e akarongo maira ia tatou.—1 Timoteo 4:15, 16, NW.
Vai Takake Anga mei Teianei Ao
16, 17. Na roto i teea au mataara e rauka ai ia tatou te akaari e te vai takake ra tatou mei teianei ao?
16 I te pure anga ki te Atua, kua akakite a Iesu ki tana au pipi: “Kua tuku atu au i taau tuatua kia ratou; e te riri nei to te ao nei ia ratou, no te mea kare ratou no teianei ao, mei iaku nei rai oki kare i to teianei ao. Kare au i pure ia koe e, ka apai ke atu koe ia ratou i teianei ao, kia tiaki maira koe ia ratou, auraka ei kino. Kare ratou i to teianei ao, mei iaku nei rai oki, kare i to teianei ao.” (Ioane 17:14-16) Penei te ngaueue kore ra tatou e te papu tikai e kia vai takake mei teianei ao no runga i te au maroanga mamaata, mei te turanga neutara, te au orote e te au peu akonoanga, e te tu akono tau kore. Akapeea, ra, no runga i te au apinga rikiriki ua. Ka tano ainei e noatu kare tatou e kite ana, penei te akakeuia ra tatou e te au arataa o teianei ao? Ei akatauanga, me kare tatou e matakite, e mea ngoie roa no to tatou tu akamanea i te riro ei mea ngateitei kore e te tau kore! Kia vai akarongo mou ua rai ka anoanoia te “akatietie kore, e te akono meitaki” i te kakau e te akamaneaanga. (1 Timoteo 2:9, 10) Ae, “kare rava i tuku i te turorianga i te tangata ravarai, kia kore e akakinoia te taoonga; Te akakite ua nei ra matou uaorai e e rave angaanga na te Atua i te au mea katoa nei.”—2 Korinetia 6:3, 4.
17 No te inangaro i te akangateitei ia Iehova, ka akamanea tatou na te mataara ngateitei no ta tatou au uipaanga putuputuanga. Pera katoa me e maata tatou ka uipa i ko i ta tatou au akaputuputuanga e te au uruoaanga. Ka anoanoia kia tau e kia manea to tatou kakau. Ka riro teia ei akakiteanga ki etai ke e akara maira ia tatou. Te kite katoa maira te au angera i ta tatou angaanga, mei ta ratou i kite i ta Paulo e tona au taeake Kerititiano. (1 Korinetia 4:9, NW) Te tikaanga, kia tau ua rai to tatou kakau. Ki tetai aronga, penei e mea meangiti ua rai te tu akarongo mou i roto i te ikianga i te kakau, kareka ra i roto i te mata o te Atua e mea puapinga tikai te reira.
Au Akameitakianga no te Tu Akarongo Mou
18, 19. Eaa te au akameitakianga o te tu akarongo mou?
18 Kua tuatuaia ana te au Kerititiano mou ei “tavini meitaki o to te Atua aroa ua tei akaariia na te au mataara tukeke ra.” Ei tavini meitaki, te “irinaki ra [ratou] ki runga i te maroiroi ta te Atua ka oronga mai.” (1 Petero 4:10, 11, NW) Pera katoa, ei au tavini meitaki, kua orongaia mai kia tatou tetai apinga kare na tatou uaorai—te akaarianga i to te Atua aroa ua, tei kapiti mai i te angaanga orometua. I te akapapu anga ia tatou uaorai ei au tavini meitaki, ka irinaki tatou ki runga i te maroiroi e oronga maira te Atua, i “te mana maata atu i tei matauia.” (2 Korinetia 4:7, NW) E terenianga meitaki tikai i te tauturu ia tatou i te aro atu i tetai ua atu timataanga i te tuatau ki mua!
19 Kua imene te tata taramo: “E inangaro atu ia Iehova, e kotou te aronga tiratiratu nona ra. Te paruru nei a Iehova i te aronga akarongo mou ra.” (Salamo 31:23, NW) No reira kia papu tikai ia tatou uaorai e kia vai akarongo mou tatou, ma te irinaki pu tikai e ko Iehova “te Akaora o te au tu tangata ravarai, te aronga akarongo mou tikai.”—1 Timoteo 4:10, NW.
Maara Ainei ia Koe?
• No teaa tatou ka tau ei kia vai “akarongo mou i te mea ngiti ra”?
• Akapeea tatou i te vai akarongo mou anga
i roto i te tu tuatua tika?
i roto i te angaanga orometua?
i roto i te vai takake anga mei teianei ao?
[Au Tutu i te kapi 26]
Akarongo mou i te mea ngiti ra, akarongo mou katoa ia i te mea maata
[Au Tutu i te kapi 29]
‘Akono meitaki ia kotou uaorai i te au mea katoa nei’
[Tutu i te kapi 29]
Tetai mataara meitaki i te akaari i te tu akarongo mou koia oki na te akapapa meitaki anga no te angaanga orometua
[Tutu i te kapi 30]
Kia mako i te kakau e te akamaneaanga