E Ao to te Aronga te Tapapa Ra!

“I na, te aere atu nei au mei te keia ra. E ao to te tapapa e te tiaki marie i tona kakau.”​—APOKALUPO 16:15.

1. I te mea te vaitata mai nei te ra o Iehova, eaa ta tatou te ka tapapa atu?

KUA vaitata te ra maata o Iehova, te aite anga o te reira e tamaki! I roto i te orama, kua kite te apotetoro ko Ioane i etai “au vaerua demoni” mei te rana ra ko tei aere ki te “ui ariki,” me kare au tutara, o te enua nei. Kia rave i teaa? Eaa oki, “e akaputuputu ia ratou i te tamaki o taua rā maata o te Atua mana katoatoa ra”! Kua kapiti katoa mai a Ioane: “Kua akaputuputu iora ratou i tetai ngai, ko Aramagido te ingoa i te tuatua Ebera.”​—Apokalupo 16:13-16.

2. Koai a Goga o Magoga, e eaa te ka tupu me tamaki atu aia i te au tangata o Iehova ra?

² Kare e roaia, ka akakeu a Iehova i te tuanga poritiki o teianei akatereanga kia akapouia Babulonia Maata, koia te patireia akonoanga pikikaa o teianei ao. (Apokalupo 17:1-5, 15-17) Ei reira a Goga o Magoga, koia a Satani te Tiaporo tei uriia maira ki te tuanga o te enua nei, ka akanoonoo i tona au nuku e ka tamaki katoa atu i te au tangata ponuiaau o Iehova, tei akara anga paruru kore ua ra. (Ezekiela 38:1-12) Inara ka rave te Atua kia akaora i tona au tangata ra. Ka akairo mai te reira i te akamata anga o “taua rā maata e te rikarika o Iehova ra.”​—Ioela 2:31; Ezekiela 38:18-20.

3. Ka akapeea koe me akataka i te au tupu anga tei totouia maira ia Ezekiela 38:21-23?

³ Ae, ka akaora a Iehova i tona au tangata e ka akapou atu oki i te au tuanga openga ravarai o ta Satani akatereanga me tae tatou ki taua turanga o teianei ao te karangaia ra ko Aramakito. E tatau i te au tuatua totou a Ezekiela 38:21-23, e ka akara ngakau atu i te tupu anga. Ka taangaanga a Iehova i tona mana e akatopa i te ua vaipuke ra, te ua toka mamaata, te mura ai oki, te makimate akakino ra. Ka tupu te oripu ua ki te ao katoa i te uriia anga te au nuku o Goga ra ki roto i te oripu uaanga, ka tamaki atu ratou tetai i tetai. Tetai ua atu enemi o te Atua Mana Katoatoa ra ka akapouia me taangaanga a Iehova i tona mana ririnui kia akaora i tona au tavini ra. Me tae te “mate maata” totouia ra ki tona openga, kare rava e apinga toe o ta Satani akatereanga tau kore i te Atua ra. (Mataio 24:21) Inara, noatu rai ia ratou e mate atura ka kite te aronga rave kino ra e koai te akatupu ra i te tumatetenga no ratou. Te tuatua ra to tatou Atua autu uaorai e: “E kite oki ratou e ko Iehova au.” Ka rokoia teia au tupu anga umere i to tatou tuatau nei, i te tuatau o to Iesu parutia.

Aereanga Mai mei te Keia Ra

4. Na roto i teea tu to Iesu ra aereanga mai kia akapou i teianei akatereanga kino o te au mea nei?

⁴ Kua tuatua te Atu kaka ko Iesu Karaiti e: “I na, te aere atu nei au mei te keia ra.” Ka viviki ua te aereanga mai mei te keia ra, i tetai tuatau kare ra i manakoia, te moe ua ra te maata anga o te tangata. Me aere mai a Iesu mei te keia ra kia akapou i teianei akatereanga kino, ka akaora ra aia i te aronga te ara tika ra. Kua tuatua aia kia Ioane: “E ao to te tapapa e te tiaki marie i tona kakau, kia kore aia e aere taaka ua, e kua kite atura te tangata i tona akama.” (Apokalupo 16:15) Eaa te puapinga maata o taua au tuatua ra? E akapeea e raukaʼi kia vai ara ua tatou i te pae vaerua ra?

5. Eaa te akanoonoo anga no te tavini anga i te iero te vaira i to Iesu tuatau i te enua nei?

⁵ Te mea matauia, kare e kiritiia te kakau kia taaka ua tetai tiaki tei topa ra i te moe i tana angaanga. Inara kua tupu te reira i te iero i Ierusalema ra i to Iesu tuatau i te enua nei e e tavini ra te kautaunga e te ngati Levi oki i te iero i Ierusalema. I te 11 anere mataiti M.T.N. i akanoonooiaʼi e te Ariki ko Davida te kautaunga o Iseraela e au anere ua atura e te au tauatini ua atura aronga tauturu no te ngati Levi ki roto i tetai akaaerenga e 24 au tuanga ra. (1 Paraleipomeno 24:1-18) Kua rave te au tuanga tataki tai e tere atura i te tai tauatini aronga angaanga tereniia i tona tuatau i te raveanga i te au tuanga angaanga i te iero kare i raro ake i te rua taime i te mataiti no tetai epetoma katoa i te taime okotai ra. Inara, i te Oroa no te Puakapa, kua rave angaanga te katoa anga o te 24 tuanga ra. Kua anoano katoaia etai atu tauturu i te au oroa Pasa ra.

6. Penei eaa ta Iesu i taiku ra i tana tuatua anga, “E ao to te tapapa e te tiaki marie i tona kakau”?

⁶ I ta Iesu ra tuatua anga: “E ao to te tapapa e te tiaki marie i tona kakau,” penei te taiku ra aia i tetai ravenga tei aruia ra i reira tei kapiti ra i te angaanga ei tiaki i te iero. Te tuatua ra te Mishnah ngati Iuda e: “Kua rave te kautaunga i te tiaki anga i e toru ngai i te Iero: i te Pia o Abtinas, i te Pia o te Mura Ai, e i te Pia o Mua Ake i te Ai; e e rua ngauru ma tai ngai o te au ngati Levi: e rima i nga pa e rima o te Maunga Iero ra, e a i roto i tona tiava e a ra, e rima i nga pa e rima o te Paepae Iero ra, e a i vao o tona tiava o vao ra, e okotai i te Pia no te au Atinga, e okotai i te Pia o te Arai, e okotai i muri ake i te ngai o te Nooanga Aroa [i vao ake i te paruru i muri o te ngai Tapu Rava]. Kua tutaka aere te opita o te Maunga Iero ra i te au tiaki katoa ra ma te turama tutungiia ki mua iaia ra, e me kare tetai tiaki e tu ake e ka tuatuaʼi kiaia, ‘E te opita o te Maunga Iero ra, kia orana koe!’ e me ka kiteia e te moe ra aia, ka papa aia iaia ma tona tokotoko, e iaia te tika kia tutungi i tona kakau.”​—The Mishnah, Middoth (“Measurements”), 1, parakaoa 1-2, tei uriia e Herbert Danby.

7. Eaa ra te kautaunga e te ngati Levi tei rave ra i te angaanga tiaki i te iero ra i tau ei kia vai ara ua?

⁷ Te au ngati Levi e manganui e te kautaunga o te tuanga tavinianga ra kua ara i te po roa katoa i te tiaki anga e te paruru anga kia kore tetai te viivii ra e tomo atu i te paepae o te iero ra. I te mea kua aere te “opita o te Maunga Iero ra,” me kare “te rangatira o te iero ra,” takapini i te au ngai e 24 katoa i te tuatau o te au tiaki anga i te po ra, kua ara ua te tangata tiaki tataki tai ra i tona ngai me kare aia e anoano kia mou aia kare e tiaki ana.​—Angaanga 4:1.

8. Eaa te kakau akatutuia o te au Kerititiano ra?

⁸ Ka umuumuia te au Kerititiano akatainuia ra ma to ratou au oa tavini kia vai ara ua i te pae vaerua e kia tamou marie i to ratou kakau akatutuia ra. Ko teia te au akapapu anga i to tatou akataoonga anga ki te angaanga orometua i te iero vaerua o Iehova ra. I te kite anga i teia, tei ia tatou te vaerua tapu o te Atua, me kare te mana angaanga, ei tauturu ia i te rave anga i ta tatou au angaanga e te rave anga i ta tatou apainga ei aronga akakitekite i te Patireia. Ko te topaanga i te moe i ta tatou angaanga ei au orometua no te Atua ka tuku ia tatou ki te ngai kino o te mou anga ia Iesu Karaiti ra, koia te Rangatira o te iero vaerua maata ra. Me te moe ra tatou i te pae vaerua i taua taime ra, ka kiriti akatutuia to tatou kakau kia taaka ua e ka tutungiia to tatou kakau akatutuia ra. Inara akapeea tatou ka vai ara uaʼi i te pae vaerua?

Akapeea e Vai Ara Uaʼi Tatou

9. Eaa ra i puapinga maataʼi te apii anga i te Pipiria ma te tauturu anga a te au puka Kerititiano ra?

⁹ Te apii pakari i te au Tuatua Tapu ma te tauturu a te au puka Kerititiano ra ko tetai apinga akamatutu ia kia ara ua i te pae vaerua. Ka akapapa taua tu apii ra ia tatou no te angaanga orometua, ka tauturu oki ia tatou kia akakoromaki i te au tu kino, e ka akaari mai i te mataara kia tatou ki te mataora mutu kore. (Maseli 8:34, 35; Iakobo 1:5-8) Ka tau ta tatou apii kia rave marieia e kia tere ki mua. (Ebera 5:14–6:3) Te kaikai anga putuputu i te kai meitaki ka rauka kia tauturu ia tatou kia ara e kia matakite. Ka rauka i te reira te akakore atu i te tu paruparu e te varea moe ua penei ko tetai akairo no te kai tau kore ua. Kare e tumu no tatou kia apikepike ua i te pae vaerua e kia varea moe ua, no te mea e maata ta te Atua ra apinga oronga mai no te kai vaerua na roto mai i te aronga akatainuia ra koia “te tavini akono meitaki e te pakari.” (Mataio 24:45-47) Ko te kaikai anga putuputu i te kai vaerua na te apiianga ko koe anake e te apii ngutuare tangata oki ko tetai mataara ia e ara uaʼi e riro ei “kia tika te akarongo.”​—Tito 1:13.

10. Akapeea te tauturu anga a te au uipaanga Kerititiano ra, te au akaputuputu anga, e te au uruoaanga, ia tatou kia vai matakite i te pae vaerua ra?

¹⁰ Ka tauturu te au uipaanga Kerititiano, te au akaputuputuanga, e te au uruoaanga kia tamou tatou i te ara uaanga i te pae vaerua. Te oronga maira te reira i ‘te akamaroiroi anga e te au tuatau oki kia aroa atu tetai i tetai e te au angaanga memeitaki.’ E tau meitaki oki to tatou akaputuputu anga i te mea “te akara na [tatou] i taua rā ra i te vaitata anga mai.” E tika te vaitata maira taua ra ra i teianei. Ko “te ra ia o Iehova,” e akatikaʼi aia i tona tu ngateitei. Me e puapinga maata tikai taua ra ra kia tatou​—e te tau ra oki kia pera—​‘kare tatou e akaruke i to tatou uaorai akaputuputu anga.’​—Ebera 10:24, 25; 2 Petero 3:10.

11. Eaa ra i raukaʼi kia tuatuaia e e puapinga te angaanga orometua Kerititiano no te akamatakite anga ia tatou i te pae vaerua ra?

¹¹ Te umuumuia ra te rave anga i te angaanga orometua Kerititiano ma te ngakau katoa kia ara uaʼi i te pae vaerua. Te rave anga putuputu e te totomapu i te tutu anga i te tuatua meitaki ka akamatakite ia tatou. Te oronga maira ta tatou angaanga orometua i te au tuatau e manganui no tatou kia tuatua ki te au tangata i te Tuatua a te Atua ra, tona Patireia, e tana au akakoroanga. E mea akamerengoanga kia akakitekite aere mei tera are ki tera are, kia oki akaou ki te aronga inangaro, e te akono anga i te apii Pipiria i te au ngutuare i te au puka mei Te Kite te ka Arataki ki te Ora Mutu Kore. Kua rauka i te aronga pakari i Ephesia ra kia akakite e na Paulo i apii ia ratou “i te ngai tangata, e i tera are i tera are.” (Angaanga 20:20, 21) Inara, ko tetai papaki o te Au Kite tiratiratu no Iehova e au manamanata kino to ratou i te ora anga te arairai ra i ta ratou angaanga orometua, inara te kitea ra e ratou etai mataara kia tuatua atu kia etai ke ra no Iehova e tona ra arikianga e te rauka maira te rekareka maata i te raveanga i te reira.​—Salamo 145:10-14.

12, 13. No teea au tumu i tau ei tatou kia kopae ke i te kaikai anga maata e te inu anga maata oki?

¹² Na te kopaeanga i te kaikai maata e te inuanga maata ka tauturu ia tatou kia ara ua i te pae vaerua. I te tuatuaanga no tona parutia, kua raurau atura Iesu i tana au apotetoro: “E matakite ra ia kotou, ko te opue aea to kotou ngakau i te maata o te kai e te kona, e te pekapeka o teianei ao, ka rokoia mai ei kotou e taua rā ra kare i manakoia atu. E rokoia mai oki tei noo i te ao katoa nei i te reira, mei te ereere ra.” (Luka 21:7, 34, 35) Te kai tuauau e te kona kava kare i tau i te kaveinga Pipiria. (Deuteronomi 21:18-21) Te karanga ra a Maseli 23:20, 21 e: “Auraka koe e kapiti katoa ki te aronga i kona i te wina ra: ki roto i te aronga e kaituauau i te puaka. Ko te konā kava oki, e te kaki nui ra, ka putaua ïa; e na te moe ua e akakakau mai ki te kakau ngaengae.”​—Maseli 28:7

¹³ Noatu rai me kare i tae te kaianga maata e te inu maata ki te reira tu, inara, ka rauka i te reira i te akariro i te tangata kia varea moe, e kia kope e kia manako kore i te raveanga i te anoano o te Atua ra. E mea matauia ra, e ka tupu te au apiapi no te ora anga o te ngutuare tangata, te ora kopapa, e te vai atura. Inara, ka mataora tatou me ka tuku tatou i te au mea no te Patireia na mua i te oraanga e kia irinaki e ka oronga mai to tatou Metua i te rangi ra i te apinga na tatou. (Mataio 6:25-34) Me kare ra ka rokoia mai tatou e “taua rā ra” mei “te ereere ra,” penei mei tetai ereere akatukeia ra te ka opu mai ia tatou ma te kitea koreia me kare mei tetai ereere tei tukuia ra te maunu ki rungao, mei tei akainangaro maira e i muri akera ka mou i te au manu manako kore ua ra. Kare teia e rokoia mai me ka vai ara ua tatou, ma te matakite tikai e te noo nei tatou i “te tuatau openga.”​—Daniela 12:4.

14. Eaa tatou i tau ei kia rave i te pure anga akatenga?

¹⁴ Ko te pure akatenga tetai atu tauturu kia ara ua i te pae vaerua. I tana totou maata ra, kua raurau katoa maira Iesu: “E tenana, e ara kotou, e tamou tikai i te pure, kia tau ia kotou te ora i teianei au mea katoa te vaitata mai nei, e kia tu kotou ki mua i te aroaro o te Tamaiti a te tangata.” (Luka 21:36) Ae, kia pure tatou e kia vai tamou rai tatou ki to Iehova ra tua e kia rekareka i tetai turanga marekaia me aere mai a Iesu, koia te Tamaiti a te tangata, kia akapou atu i teianei akatereanga o te au mea nei. No to tatou uaorai meitaki e no te meitaki o te au taeake akarongo ra ta tatou e pure nei, ka umuumuia tatou kia ‘tamou marie i te pure.’​—Kolosa 4:2; Ephesia 6:18-20.

Te Pou Aere Nei te Tuatau

15. Eaa te akatupuia ra na ta tatou rave angaanga ei aronga tutu tuatua tika ra?

¹⁵ Ia tatou e tapapa atu nei i taua ra maata o Iehova ra, kare e ekoko anga e te anoano nei tatou kia rave i te maata katoa te ka rauka ia tatou i tana angaanga. Me ka pure akatenga tatou kiaia no teia, “e ngutupa maata e te meitaki” te ka kiritiia mai kia tatou no tetai angaanga. (1 Korinetia 16:8, 9) I ta te Atua tuatau akatakaia, ka rave a Iesu i te akavaanga e ka akataka i te “mamoe” tuatua tika tei tau ra no te ora mutu kore mei te “puaka-nio” tei tau ra no te akapouanga mutu kore. (Ioane 5:22) Kare na tatou e akataka ke i te mamoe mei te au puaka nio ra. Inara ko ta tatou angaanga ei aronga tutu tuatua tika i teianei te oronga ra i te tuatau no te au tangata kia iki i tetai oraanga no te tavini atu i te Atua e kia raukaʼi te manakonako anga kia akatakaia ki te ora anga me “tae maira [Iesu] ma tona kakā.” Te poto anga o te tuatau te toe nei no teia akatereanga o te au mea nei te akateitei atura i te anoano no te angaanga ma te ngakau katoa ia tatou e kimi ra i te aronga “i akonoia no te ora mutu kore.”​—Mataio 25:31-46; Angaanga 13:48.

16. Eaa ra tatou i tau ei ei aronga akakitekite totomapu i te Patireia?

¹⁶ I pou atu te tuatau no te ao o to Noa tuatau ra, e kare e roaia ka pou atu to teia akatereanga o te au mea nei. No reira kia riro tatou ei aronga akakitekite totomapu i te Patireia. Te puapingaia nei ta tatou angaanga tutu aereanga; no te mea i te au mataiti tataki tai e au anere ua atu au tauatini te papetitoia ra ei akatutu anga i to ratou akatapuanga ki te Atua. Kua riro mai ratou ei tuanga no ta Iehova ra akaaerenga akameitakiia​—“e aronga tangata nona, e te mamoe no tana ra koro.” (Salamo 100:3) Mei teaa ra te rekareka kia rave i te angaanga tutuanga i te Patireia te ka apai mai i te manakonako anga ki te aronga e manganui i mua ake i “taua rā maata e te rikarika o Iehova ra”!

17, 18. (a) Ia tatou e tutu aere ra, eaa te tu akono te ka tau tatou kia manako atu mei ko mai i tetai papaki ra? (e) Eaa te papu ra te ka rokoia ki te aronga taitoito ra?

¹⁷ Mei ia Noa ra, tei ia tatou te turu anga a te Atua e te paruru anga. Ae, te au tangata, te au angera akatutu kopapaia ra, e te au toa Uritumu katoa oki kua aviri atu i ta Noa tuatua, inara kare te reira i tapu iaia. I teia tuatau oki, te aviri ra etai me ka akakite tatou i te akapapu anga maata e te noo nei tatou i “te tuatau openga.” (2 Timoteo 3:1-5) Ko taua taitoito anga ra e akatupu anga ia i te totou a te Pipiria no runga i to Karaiti parutia, no te mea kua tata a Petero: “Kia tae ki te au ra openga ra, e kitea mai ei e aronga taitoito, i te akono anga i ta ratou uaorai anoano, E te tuatua anga mai e, Teiea ua [“te parutia taputouia,” NW] i karangaia ra? Te vai ua nei rai oki te au mea katoa nei mei te moe anga mairai o te ai metua ra, mei te maani anga mairai o te enua ra.”​—2 Petero 1:16; 3:3, 4.

¹⁸ Penei te manako ra te aronga taitoito o teia tuatau nei: ‘Kare e apinga i tauiia mei te maani anga mairai o te enua nei. Te aere ua atura te ora anga, te kaikai ra te au tangata, te inu ra, te akaipoipo ra, e te akono ngutuare tangata ra. Noatu me tei konei a Iesu, kare aia e rave i te akavaanga i toku tuatau nei.’ Mei teaa ra to ratou tarevake! Me kare ratou e mate mei tetai atu au mea i teianei, e mea papu e ka rokoia mai ratou e taua ra mataku o Iehova ra, mei te akapouanga tumatetenga i te Vaipuke ra i te apai anga mai i te openga ki tetai uki rave kino i te tuatau ia Noa ra.​—Mataio 24:34.

E Mea Tau ra kia Vai Ara Ua!

19. Eaa te manako tau no tatou i ta tatou au angaanga akariroanga tangata ei pipi ra?

¹⁹ Me kua akatapuia tatou kia Iehova, auraka tatou e akavareia kia moe na te manakoanga tika kore ra. E tuatau teia no te vai ara ua, kia akono i te akarongo i te au totou tu-Atua, e kia rave i ta tatou angaanga “e akariro i to te pa enua katoa ei pipi.” (Mataio 28:19, 20) I te mea te aro atu nei teia akatere anga i tona ope takirianga, kare e rauka ia tatou tetai atu angaanga maata atu i to te tavinianga i te Atua ko Iehova i raro ake i te arataki anga a Iesu Karaiti e te rave kapitianga i te angaanga tutu aere i “te evangelia o te basileia nei” kako rava ake te ao katoa nei i mua ake ka tae mai ei te openga ra.​—Mataio 24:14; Mareko 13:10.

20. Eaa te akatauanga tei akanooia maira e Kaleba raua ko Iosua, e eaa ta to raua aerenga i akakite maira no tatou?

²⁰ Kua tavini atu tetai papaki o to Iehova ra au tangata iaia no etai raungauru mataiti, penei i te tuatau e ora ra. E noatu rai me koi akamata ua akenei tatou i te takave anga i te akamori mou, kia aite tatou kia Kaleba tangata Iseraela ra “kua aru totomapu aia ia Iehova.” (Deuteronomi 1:34-36) Kua papa tikai raua ko Iosua kia tomo atu ki te Enua Taputouia i muri poto ake i to Iseraela akaora angaia mei te tuikaaanga i Aiphiti ra. Inara, ko to Iseraela aronga kua pakarikari maira, kua ngere i te akarongo e kua akapou e 40 mataiti i te metepara, te ngai ia i mate ei ratou. Kua akakoromaki a Kaleba raua ko Iosua i te au tu ngata kapiti katoa ma ratou ra i taua tuatau ra, inara i te openga kua tomo atu aua nga tangata e rua ra ki te enua tei taputouia maira. (Numero 14:30-34; Iosua 14:6-15) Me ‘ka aru totomapu tatou ia Iehova’ e ka tamou marie i te ara anga i te pae vaerua, ka rauka ia tatou te rekareka anga no te tomoanga ki te ao ou tei taputouia maira e te Atua.

21. Eaa ta tatou te ka kite i te tupu anga me ka vai ara ua tatou i te pae vaerua ra?

²¹ Te akapapu meitaki maira te au akakite anga e te noo nei tatou i te tuatau o te openga e te vaitata nei taua ra maata o Iehova ra. Kare teia i te tuatau no te varea moe e te manako kore anga i te raveanga i te anoano tu-Atua. Ka akameitaki anakeia tatou me ka vai ara ua i te pae vaerua e kia tamou marie i to tatou kakau akataka anga ei au orometua Kerititiano e ei au tavini oki no Iehova. Kia riro ia ei manako anga mou no tatou “kia matakite; kia mou piri tikai te akarongo; e akatangata pakari kotou; e akamaroiroi.” (1 Korinetia 16:13) Ei au tavini no Iehova, kia ngaueue kore e kia mataku kore oki tatou tataki tai. Ei reira tatou e riro ei ki roto i te aronga kua papa me tupu mai te ra maata o Iehova ra, ma te tavinianga tiratiratu i roto i te au pupu o te aronga mataora te vai tamou marie ra te matakiteanga.

Akapeea Koe me Pau?

◻ Akapeea taau akataka anga i to tatou kakau akatutuia ra, e akapeea e raukaʼi ia tatou kia tamou marie i te reira?

◻ Eaa etai mataara no te vai ara ua anga i te pae vaerua ra?

◻ Eaa ra i tau ei tatou kia manako atu e e aronga taitoito etai te vai maira, e eaa te manako tau na tatou no ratou ra?

◻ Eaa te manako tau na tatou no ta tatou angaanga akariroanga tangata ei pipi i teia tuatau openga nei?

[Tataanga i te kapi 16]

Kua rauka i te au Kerititiano te vaerua tapu o te Atua ei tauturu ia ratou kia noo araara ua e kia rave ua atu i ta ratou au angaanga

[Tutu i te kapi 15]

Te manako papu ra ainei koe kia vai ara ua i te pae vaerua e kia tamou marie i toou kakau akatutuia ra?