E Ara Tamou i “te Tuatau Openga Ra”

“E akara tamou, e ara tamou, no te mea kare kotou i kite aea te tuatau akatakaia ra.”​—MAREKO 13:33, NW.

1. Eaa ta tatou ka rave i te eeu mai anga te tupuanga o te au mea poitirere i teia “tuatau openga ra”?

I TE eeu mai anga te tupuanga o te au mea poitirere i teia “tuatau openga ra,” eaa te manako tau no te au Kerititiano kia rave? (Daniela 12:4) Kare ratou i akaruke uaia ki roto i te ekoko anga. Na Iesu Karaiti i tuatua mai te totou no te akairo akaputuia te tupu nei i teia 20 anere mataiti. Kua totou mai aia i te au tu, e manganui te akairo ra i teianei tuatau mei te 1914 mairai e e takake ia. I tona kite meitaki i te totou a Daniela no runga i “te tuatau openga ra,” kua aru atu a Iesu i tana uaorai totou maata na te raurauanga i tana au pipi e “e ara tamou” ratou.​—Luka 21:36, NW.

2. Eaa ra i maataʼi te anoanoia kia ara tamou i te pae vaerua ra?

² Eaa ra i tau ei kia ara tamou? No te mea ko teia te tuatau kino roa i roto i te tuatua enua o te tangata nei. Ka riro mai ei kino me ka tuku ua te au Kerititiano ki te varea moe i te pae vaerua i teia tuatau nei. Me ka manako kore ua tatou me kare ka tuku ua i to tatou ngakau kia akateiaaia i te au pekapeka o te oraanga, ka o atu tatou ki roto i te turanga kino. Kua akamatakite maira a Iesu Karaiti ia tatou i roto ia Luka 21:34, 35: “E matakite ra ia kotou, ko te opue aea to kotou ngakau i te maata o te kai e te kona, e te pekapeka o teianei ao, ka rokoia mai ei kotou e taua rā ra, kare i manakoia atu. E rokoia mai oki tei noo i te ao katoa nei i te reira, mei te ereere ra.”

3, 4. (a) Eaa te aite anga o ta Iesu i tuatua ra e ka rokoia viviki mai taua ra riri o Iehova ra ki runga i te au tangata “mei te ereere ra”? (e) I te mea kare te Atua e akanoo ana i te ereere, eaa ra ka rokoia puiaʼi te au tangata e taua ra ra?

³ E tumu meitaki tikai ta Iesu tuatua anga e ‘ka rokoia viviki mai ki runga ia tatou mei te ereere’ taua ra o Iehova ra. E putuputu te ereere i te akanooia ma tetai potonga taura tapeka, e te akonoia ra ei opu manu rere e te au manu mamaata angai ra i ta ratou punua i te u. E apinga akapana to te ereere, e ko tetai te ka aere atu na reira ka takai na runga e ka akapana i te ereere. Ka topiri viviki te ereere, e ka mou tei aere na reira ki roto. E viviki ua te tupu anga te reira. Mei te reira katoa te tu, e na Iesu ei, ka poitirere ua te aronga angaanga kore e ka mou ia i “te rā e riri ei” te Atua.​—Maseli 11:4.

⁴ Ko Iehova ainei te akanoo maira i te ereere no te au tangata? Kare, kare ia e tapapa mai ana kia mou te au tangata kare ra e paruru, e ka akapou ia ratou ra. Inara ka mou mai te au tangata i taua ra ra no te mea kare to ratou manako mua i orongaia ki runga i te Patireia o te Atua ra. Te aere ra ratou i to ratou uaorai aerenga i te aruaru anga i te oraanga, ma te manako kore i te aiteanga o te au mea e tupu nei takapini ia ratou ra. Inara kare te reira e taui i ta te Atua akapapaanga tuatau. Tei iaia uaorai tana tuatau i akanooia no te tutaki anga kaiou. E mea aroa ra, kare aia e akaruke ua i te au tangata kia kite kore i tana akavaanga te aere mai nei.​—Mareko 13:10.

5, 6. (a) No te akavaanga te aere mai nei, eaa te apinga aroa ta Tei Anga maira i maani no te au tangata, inara eaa te tupu anga? (e) Eaa te ka uriuri manakoia ei tauturu ia tatou kia ara tamou?

⁵ Ko teia akamatakiteanga na mua, e apinga aroa ia na Tei Anga maata maira, te rave ra aia i te meitaki no te au tangata ora i konei i runga i tona takainga vaevae akatutuia ra. (Isaia 66:1) Te akaperepere ra aia i te aronga noo i te ngai te karangaia ra e ko te tuku anga i tona vaevae ki runga. E no reira, te akamatakite ra aia ia ratou i te au apinga te ka tupu a mua ake, na roto i tana au karere e to ratou au tauturu i te ao nei. (2 Korinetia 5:20) Inara, noatu te au akamatakiteanga ravarai tei orongaia ra, ka tupu mai taua mea ki te anaunga tangata nei i te tuatau manako koreia ra mei te mea rai e kua takai atu ratou ki roto i te ereere. Eaa ra te tumu? No te mea ko te maata anga o te au tangata te moe nei i te pae vaerua. (1 Tesalonia 5:6) E tokoiti ua te aronga te ka akarongo i te akamatakiteanga e ka ora atu ki roto i te ao ou a te Atua ra.​—Mataio 7:13, 14.

⁶ Akapeea tatou e ara tamou ei i reira, i teia tuatau o te openga nei kia o atu tatou ki roto i te aronga te ka akaoraia? Te oronga maira a Iehova i te tauturu anoanoia. E akamanako tatou e itu apinga te ka tau tatou kia rave.

Maro Atu i te Apinga Akaanga Ke i te Manako

7. Eaa te akamatakiteanga no runga i te apinga akaanga ke i te manako ta Iesu i oronga mai?

⁷ Te mea mua, ka tau tatou kia maro atu i te apinga akaanga ke i te manako. Ia Mataio 24:42, 44, kua na ko maira a Iesu: “Kia matakite oki, kare kotou i kite i te ora e tae mai ei to kotou Atu. E teianei kia vai teateamamao rai kotou, no te mea, ei te ora manako koreia e kotou, e tae mai ei te Tamaiti a te tangata.” Ko te tuatua ta Iesu e taiku i konei te akakite maira e i teia tuatau taitaia nei, e maata te apinga akaanga ke i te manako, e ko te anga ke te manako ka taki atu ki te akapouanga. I to Noa tuatau ra e manganui te au apinga akaapiapi i te tangata. Ko tei tupu ko te aronga anga ke ra to ratou manako “kare rava i kite” e eaa te tupu ra, e rokoia iora ratou e te Vaipuke ope takiri akera i te mate. No reira, kua akamatakite a Iesu: “Koia katoa te aerenga mai o te Tamaiti a te tangata nei.”​—Mataio 24:37-39.

8, 9. (a) Akapeea ta te au angaanga ua o te oraanga nei i te akaanga ke anga i to tatou manako kia kino? (e) Eaa te au akamatakite anga ta Paulo raua ko Iesu ra i oronga mai kia tatou?

⁸ E tamou ki te manako e, i tana akamatakiteanga ia Luka 21:34, 35, te tuatua ra a Iesu i te au tu ua o te oraanga, mei te kaikaianga, te inuanga, e te au pekapeka o te oraanga nei. E au apinga matauia e te au tangata ravarai, kapiti katoa oki te au pipi a te Atu a Iesu ra. (Akaaiteia atu kia Mareko 6:31.) Penei e kino kore ua teia au apinga, inara me ka tuku uaia kia tupu ka rauka te akaanga ke i to tatou manako, kia apiapi tatou, e na te reira e akatupu i te varea moe kino kia tatou i te pae vaerua.

⁹ E no reira, auraka tatou e ngakau kore i te apinga maata roa te puapinga​—koia te raukaanga te mareka anga o te atua ra. Kare e kia rave ua atu i te au mea ua o te oraanga nei, e rave anake tatou i te reira au mea i te kotinga tau no to tatou oraanga nei. (Philipi 3:8) Kare ratou e tau kia tukuia kia pokia te manako no te Patireia ra. Mei ta Roma 14:17 i tuatua ra, “kare oki te basileia o te Atua ra te kai, e te mea e inu, ko te tuatua-tika ra, e te au, e te reka i te Vaerua Tapu ra.” Kia maara i ta Iesu au tuatua i tana karanga anga: “E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotoa.” (Mataio 6:33) Pera katoa ia Luka 9:62, kua karanga a Iesu: “Kare rava e tangata i tuku i tona rima ki te arote, ka akaraʼi ki muri, e tau i te basileia o te Atua.”

10. Eaa te kino te vaira me kare to tatou mata e akara tikatika atu ki te akakoro anga?

¹⁰ Me akamata anake tatou i te aroteanga, ei akatutu anga, ka tau tatou kia aere tikatika ua. Ko te tangata arote te ka akara ki muri kare e rauka kia tikatika ua te arote anga. Kua anga ke tona manako e ka ngoie ua te tapae ke me kare te tapu uaia e tetai manamanata. Auraka tatou kia riro mei te vaine a Lota ra, tei akara ra ki muri e kore ake i tae ki te ngai e oraʼi. Ka tau tatou kia tamou i to tatou mata kia akara tikatika atu ki mua ki te akakoro anga. E raukai te reira ka tau tatou kia maro atu kia kore e anga ke te manako.​—Genese 19:17, 26; Luka 17:32.

E Pure ma te Akatenga Katoa

11. Eaa ta Iesu i akaketaketa maira i muri ake i te akamatakite anga ia tatou i te kino o te anga ke anga te manako ra?

¹¹ Inara, tera tetai atu apinga tau na tatou kia rave kia ara uaʼi tatou. Ko te rua o te apinga puapinga maata, ko te: Pure ma te akatenga katoa. I muri ake i te akamatakiteanga ia tatou i te anga ke te manako no te au tu angaanga matauia o te oraanga, kua oronga maira a Iesu i teianei ako anga: “E ara kotou, e tamou tikai i te pure, kia tau ia kotou te ora i teianei au mea katoa e vaitata mai nei, e kia tu kotou ki mua i te aroaro o te Tamaiti a te tangata.”​—Luka 21:36.

12. Eaa te tu o te pure te anoanoia ra, e eaa te ka tupu mai?

¹² E no reira, ka tau tatou kia tamou tikai i te pure no runga i te kino o to tatou turanga e kia vai matakite tatou. E no reira e aere atu tatou ki te Atua ra ma te akatenga tikai i te pure anga. Te karanga ra a Paulo ia Roma 12:12: “Tamou marie tikai i te pure.” Ia Ephesia 6:18 (NW), ka tatau tatou: “I te au tu pure ravarai e te pati anga akaaka . . . , e rave i te pure i te au atianga ravarai i te vaerua. E no te rave i te reira e ara ma te tiratiratu katoa oki.” Kare teia i te orongaanga i te pure mei te mea rai e e apinga noa ua nei kare i te mea maata. Te vai nei to tatou oraanga i roto i te tu kino. Ka tau tatou kia pati akatenga no ta te atua ra tauturu. (Akaaiteia atu kia Ebera 5:7.) Na te reira tu ka akatinamou tatou ia tatou uaorai i te pae ia Iehova. Kare e apinga ke e puapingaʼi i te tauturuanga ia tatou kia tupu teia mari ra kia ‘pure tatou ma te patianga akaaka i te au tuatau ravarai.’ Na Iehova i reira e akatinamou ia tatou ki roto i te tu matakite i te kino. Mei teaa ra te puapinga maata, kia aruaru i te pure!

E Akapiri Vaitata ki te Akaaerenga a te Atua e Tana Angaanga

13. Eaa te taokotai anga te ka anoanoia kia ara ua ei?

¹³ Te anoano nei tatou kia ora i teia au mea ravarai te ka tae mai ki runga i teianei ao. Te anoano nei tatou kia tu ki mua i te aroaro o te Tamaiti a te tangata, kia mareka aia ia tatou. E tupu ei teia te vaira te toru o te apinga ta tatou ka tau kia rave: E piri motu kore atu ki ta Iehova akaaerenga teokaratiki ra. Ka tau tatou kia piri taokotai atu auraka e taka ke i taua akaaerenga ra e kia rave katoa oki i tana au angaanga. Na teia tu ka akataka meitaki tatou ia tatou uaorai ei au Kerititiano te akara ra.

14, 15. (a) Na te rave anga i teea angaanga te ka tauturu ia tatou kia ara tamou? (e) Naai e tuku te tika e kua oti te angaanga tutu aere, e eaa te manako tau no tatou no te reira? (ng) A muri ake i te mate maata, eaa ta tatou ka kite me ka akara tatou ki muri, ki te tutuanga i te Patireia tei raveia ra?

¹⁴ Kapiti vaitata mai ki te reira ko te a o te apinga te ka tauturu ia tatou kia ara tamou. E mea tika e ko tatou etai i roto i te aronga te akamatakite ra i te au tangata i te openga te aere mai nei no teia akatereanga o te au mea nei. Kare e tupu te openga takiri o teianei akatereanga taito o te au mea nei kia oti roa te tutu aere anga i “teia tuatua meitaki o te patireia” kia tae ki ta te Atua Mana katoatoa ra i akakoro. (Mataio 24:14, NW) Kare na te Au Kite o Iehova e akataka te oti anga o te angaanga tutu aere. Kua tapu a Iehova i te reira tika kiaia uaorai. (Mareko 13:32, 33) Ko tatou ra, kua manako papu kia rave maroiroi ua atu i te tutuanga i te kavamani meitaki roa te ka rauka mai no te tangata nei, koia te Patireia o te Atua ra. Ka rokoia mai te “mate maata” ia tatou te rave ua atu ra i teianei angaanga. (Mataio 24:21) A te tuatau katoa ki mua, ka rauka i te aronga te ka ora, i te akara mai ki muri e ka akatika ma te ngakau katoa e kare a Iesu Karaiti i te peroveta pikikaa. (Apokalupo 19:11) Ka oti ra te angaanga tutu aere kia tae ki te tu maata rava atu i tei manakoia e te aronga te rave nei i te reira ra.

¹⁵ No reira rai, kia tae ki taua tuatau manako maataia ra kia oti teianei angaanga kia tau ki ta te Atua ra mareka anga, penei e maata atu te aronga te rave ra a reira i to tetai ua atu tuatau i mua akera. Mei teaa ta tatou akameitaki anga e e tuanga ta tatou i taua angaanga meitaki nei! Te akapapu maira te apotetoro ko Petero kia tatou e ko Iehova “kare rava i anoano e kia mate atu tetai, kia rauka katoatoa ra te tataraara.” (2 Petero 3:9) E no reira, te maroiroi ua atura te mana rave angaanga o te Atua Mana katoatoa i teia tuatau i to mua ana ra, e te anoano nei te Au Kite o Iehova kia rave ua atu i teia angaanga akakeuia e te vaerua ra. E no reira e akapiri vaitata atu ki te akaaerenga a Iehova, e kia maata te rave anga i te tutu aere. Na te reira e tauturu kia ara ua koe.

E Akara Matatio ia Koe Uaorai

16. Eaa tatou ka tau ei kia akara matatio ia tatou uaorai i to tatou turanga i te pae vaerua i teianei?

¹⁶ Te vaira te rima o te apinga na tatou kia rave kia ara uaʼi tatou. Ka tau tatou tataki tai kia akara matatio i to tatou uaorai turanga i teianei. E mea tika kia raveia i teianei kia maata atu i to mua ana ra. Ka anoanoia kia akapapu tatou e tei toai tua tatou i te tu anga tikai. Kua tuatua a Paulo ia Galatia 6:4 e: “Ka timata te tangata ravarai i tana uaorai angaanga.” E akara matatio iaia uaorai kia rotai ki ta Paulo au tuatua ia 1 Tesalonia 5:6-8: “Auraka tatou e moe, mei tetai papaki ra, kia ara ra, e e akono meitaki. Ko tei moe ra oki, i moe ïa i te po; e te akakona ra, e akakona ïa i te po. Ko tatou ra, ko to te ao ra, ei akono meitaki to tatou, ma te tapoki-umauma ra, ko te akarongo e te inangaro, i te kakau anga; e ma te manako ora ei pare.”

17. I te akara matatio anga ia tatou uaorai, eaa te au uianga ta tatou ka ui kia tatou uaorai?

¹⁷ Akapeea tatou nei? Me akara matatio tatou ia tatou uaorai na roto i te marama o te Tuatua Tapu, te kite ainei tatou e te ara nei tatou, ma te manako ora ei pare? E au tangata ainei tatou tei akataka papu ra ia tatou uaorai mei teianei akatereanga taito o te au mea nei e kare e ariki akaou i tona au manako? Tei ia tatou ainei tikai te vaerua o te ao ou a te Atua. Te matakite papu ra ainei tatou e te aere atu nei teia akatereanga ki ea? Me koia ia, kare tatou e rokoia mai e taua ra o Iehova ra mei te mea rai e e keia tatou.​—1 Tesalonia 5:4.

18. Eaa etai atu au uianga ke te ka tau tatou kia ui kia tatou uaorai, e eaa te tupu anga?

¹⁸ Inara, akapeea me ka akakiteia mai e ta tatou akara matatio anga ia tatou uaorai e te tauta ra tatou i te akanoo i tetai oraanga meitaki, reka, kare e manata, e tu ngoie ua? Akapeea me ka kite tatou e kua teiaa to tatou mata vaerua i te varea moe? Tei roto ainei tatou i te tu moemoea ua, i te aru anga i etai manako ua no teianei ao? Me koia ia, e ara tatou i reira!​—1 Korinetia 15:34.

E akamaaraara i te Au Totou Kua Tupu ra

19. Eaa etai au totou kua kite tatou i te tupu anga?

¹⁹ Kua tae mai tatou i teianei ki te ono o te apinga te ka tauturu ia tatou kia ara tamou: E akamaaraara ki runga i te au totou e manganui tei tupu ana i teia tuatau o te openga nei. Kua pati tatou i te 77 mataiti mei te openga o te tuatau akatakaia no te au etene ra mei te 1914 mairai. Ia tatou e akara ra ki muri e tere atu i te toru koata o te anere mataiti, ka kite tatou i akapeea te tupu anga tetai totou i muri ake i tetai​—te akaora anga i te akamori tika; te akaora anga i te toenga o tei akatainuia ra, kapiti katoa oki to ratou au oa, ki roto i tetai parataito vaerua; te tutuanga i te tuatua meitaki o te Patireia i te ao katoa nei; te mama mai anga te urupu maata. (Isaia 2:2, 3; te Isaia pene 35; Zekaria 8:23; Mataio 24:14; Apokalupo 7:9) Kua akamaataia te ingoa teitei o Iehova e tona ngateitei i te ao katoa e pini ua ake, pera katoa oki te tupu anga kia riro te mea ngiti okotai ei tauatini e ko te mea ngiti poepoe ra ei enua maroiroi ia, na ta Iehova ra akarapurapu anga i te reira i tona tuatau. (Isaia 60:22; Ezekiela 38:23) E ko te au orama a te apotetoro ko Ioane i te tataanga ia Apokalupo ra kua vaitata i teianei ki to ratou take.

20. Eaa te irinaki anga te tua aereia nei e te Au Kite o Iehova, e kua akapapu tikai ratou e eaa ratou ra?

²⁰ E no reira, kua tere atu i to mua ana, te manako ngaueue kore nei te Au Kite o Iehova i te tika i to ratou kiteanga i te aiteanga o te au tupu anga te au mea o teianei ao mei te 1914 mairai. I te mea tei ia ratou te reira irinaki anga, kua akapapu ratou e ko ratou te au apinga angaanga i roto i nga rima o te Atua Teitei Rava. Ko ratou te aronga tei akataoongaia kia tua aere i te tuatua a te atua i teia tuatau puapinga maata nei. (Roma 10:15, 18) Ae, kua tika katoa ta Iehova au tuatua no te tuatau o te openga nei. (Isaia 55:11) Ka tau ra teia ei akakeu ia tatou kia rave ua atu e tae roa kia kite tatou i te tupu anga openga o te au taputou katoatoa a te Atua ra na roto ia Iesu Karaiti.

Kua Vaitata Roa te Ora i Tei to Tatou Akarongo Anga

21. Eaa te itu o te tauturu no te araanga i te pae vaerua te vai nei ia tatou?

²¹ Te mea openga ko te itu o te tauturu i to tatou ara anga: E tamou ki roto i te manako e kua vaitata roa to tatou ora i to te tuatau i riro ei tatou kia akarongo. Ko te mea puapinga maata atu, ko te akatika anga i to Iehova tu ngateitei i te ao katoa e pini ua ake e te akatapu anga i tona ra ingoa kua vaitata roa. E no reira ko te anoanoia kia ara kua maata roa te tu rapurapu. Kua tata te apotetoro ko Paulo: “Kua kite tatou e kua tae ki te ora ara anga i to tatou moe: kua vaitata roa oki to tatou ora i teianei i tei to tatou akarongo anga.”​—Roma 13:11, 12.

22. Akapeea te akatupu anga kia tatou te vaitata mai anga to tatou ora?

²² I te vaitata roa mai anga to tatou ora, ka tau tatou kia ara tamou! Auraka tatou e tuku i tetai manako no tatou me kare no teianei ao kia akakore i to tatou ariki anga i ta Iehova e rave nei no tona au tangata i teia tuatau o te openga nei. (Daniela 12:3) E mea tau no tatou kia maata atu te tauta anga kia kore tatou e tapae ke i te mataara ta te Tuatua a te Atua i akataka mai no tatou. (Mataio 13:22) Te akataka papu maira te au mea e tupu nei e kua tae teianei ao ki tona au ra openga. Kare e roa atu ka takore ravaia ia e e tuatau ua atu kia atea te ngai no tetai ao ou no te tuatua tika.​—2 Petero 3:13.

23. Na teea tu ta Iehova tauturu mai anga ia tatou nei, e eaa te tupu anga meitaki?

²³ E ara tamou ua rai tatou i reira. Kare e aiteia ana i mua ana, kia matakite e tei ea tatou i te aerenga o te tuatau. Kia maara e, kare rava a Iehova e moe i teianei tumu nei. Kareka, ka tauturu ua atu aia ia tatou kia ara ua i teia tuatau o te openga nei. Kua vaitata te ope o te po. Te vaitata mai nei te ao. No reira e ara tamou! Kare e roa atu ka kite tatou i te ra manea rava o te au ra katoatoa, i te akatupu angaia e te Patireia Mesia ta Iehova ra akakoro anga no te enua nei!​—Apokalupo 21:4, 5.

Eaa Taau Au Pauanga?

◻ Eaa te aite anga o ta Iesu tuatua i tana tuatua anga e ka tae mai te ra o to te Atua riri ki runga i te au tangata “mei te ereere rai”?

◻ Eaa tatou ka tau ei kia maro atu i te akaanga ke anga te manako e akapeea ka raukai ia tatou te rave i te reira?

◻ Eaa te tu no te pure te anoanoia ra kia raukai te ara tamouanga?

◻ Eaa te tu pirianga oa e puapingaʼi?

◻ Eaa ka tau ei kia akara matatio ia tatou uaorai i te pae o to tatou turanga vaerua?

◻ Eaa ta te totou tuanga ka rave i to tatou ara tamouanga?