Tatari Maira te Mataora Mutu Kore i te Aronga Oronga Tau i te Atua
“I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.”—IOANE 3:16.
1, 2. (a) Koai Tei maata rava i te Oronga ra, e eaa tana apinga aroa maata roa no te tangata nei? (e) I te orongaanga i tana apinga aroa maata rava, eaa te tu ta te Atua i akakite maira?
KO TE Atua ko Iehova Tei Oronga maata rava i te katoatoa. Nona tikai, koia Tei Anga maira i te rangi e te enua, ko ta te pipi Kerititiano ta Iakobo i tata ra: “Te au mea memeitaki i o maiia ra, e te au mea tika ravarai, no runga ïa, no runga mai i te Metua o te au marama ra, kare rava e tu ke ke iaia ra, kare oki e tu ke anga e ngai mea ngiti ua ake.” (Iakobo 1:17) Ko Iehova katoa oki Tei Oronga mai i te apinga aroa maata rava te ka rauka kia orongaia. No runga i tana apinga aroa maata rava ki te tangata nei, kua tuatuaia: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.”—Ioane 3:16.
2 Ko tei tuatua mai i taua au tuatua ra kare i tetai ke atu mari ra ko taua Tamaiti anau tai a te Atua uaorai. Ka tau rai te tamaiti anau tai a tetai metua e ka ariki e ka aroa i te metua mei te reira te tu ei tumu no tona oraanga e no te au mea memeitaki ravarai tei orongaia maira ei rekarekaanga no tona oraanga. Inara kare to te Atua ra aroa i orongaia no teia Tamaiti okotai anake ua. Na te oronga anga i te reira apinga aroa ki etai katoa o tana au mea ora i anga ra ka akakite mai i ta te Atua ra akonoanga i te aroa na roto i te turanga maata roa. (Akaaiteia atu kia Roma 5:8-10.) Te kitea papu nei teia me ka akara matatio tatou i te aite anga tika tikai o taua tuatua “oronga” ra i roto i teia tataanga nei.
Te Apinga Aroa a te Atua ko “Tana Tamaiti Akaperepere”
3. I te pae atu i “tana tamaiti akaperepere,” koai etai atu tei rekareka i te aroa o te Metua i te rangi ra?
3 No tetai tuatau kare ra i akakiteia mai, kua rekareka te Atua i tona uaorai kapiti anga ma teia Tamaiti anau tai koia—“tana Tamaiti akaperepere”—i te tuanga i te rangi ra. (Kolosa 1:13) I taua tuatau roa ra, kua tupu te aroa e te inangaro o te Metua e te Tamaiti no raua raua rai kia maata, e kare e aroa mei to raua rai tetai i tetai. Ko etai atu au mea ora tei angaia maira e te Atua na roto mai i tana Tamaiti anau tai ra kua aroa katoaia ratou ei au mema no te anau a te atua ra ko Iehova. E no reira, kua tutara te aroa ki rungao i te anau katoatoa a te Atua ra. E tau tikai te tata anga i te Au Tuatua Tapu ra e ko te “Atua oki te aroa.” (1 Ioane 4:8) No reira ko te anau a te atua ra ko te aronga katoa tei aroaia e te Metua ra, koia te Atua ko Iehova ra.
4. Eaa i tere atu ei i te ngere anake ua i te pirianga oa tei tupu i ta te Atua ra orongaanga i tana Tamaiti, e noai ma te reira orongaanga?
4 I te piri anga vaitata te au ere i rotopu ia Iehova raua ko tana Tamaiti anau mua ra kua riro to raua ngere anga i te reira pirianga vaitata ei mea maata rava ia. (Kolosa 1:15) Inara ko te ‘orongaanga’ i teia Tamaiti anau tai kua riro kia tere atu i te akangereanga te Atua iaia uaorai i tona piri anga ma “tana Tamaiti akaperepere” ra. Kua tae roa te reira ki ta Iehova ra akatikaanga i tana Tamaiti kia kite i te mate e kua takoreia atu ei mema no ta te Atua ra anau no te ao katoa e pini ua ake. Ko te reira e matenga no te aronga kare ra ratou i te au mema no ta te Atua ra anau. Kare e rauka ia Iehova i te oronga i tetai apinga aroa kia maata atu i te reira no te au tangata tei ngere ra mari ra ko tana Tamaiti anau tai, koia ta te Au Tuatua Tapu i akataka maira e ko “te akamataanga o te au mea katoa tei angaia e te Atua ra.”—Apokalupo 3:14, NW.
5. (a) Eaa te tu kino i rokoia ki te anau a Adamu ra, eaa tei umuumuia e to te Atua ra tu tuatua tau i te tuanga o tetai o Tana au tamariki tiratiratu ra? (e) Eaa ta te Atua ka umuumu i te apinga aroa maata roa nana ra no tona uaorai tuanga?
5 Kua kore nga tangata tokorua mua ra, koia a Adamu raua ko Eva, i tamou i to raua ngai ei nga mema no te anau a te Atua ra. Ko te reira to raua tu i kiteia e raua uaorai i muri ake i te tuaru angaia ki vao i te kainga i Edene ra no te araanga ki te Atua. Kare e i kore anake raua i nga mema no te anau a te Atua ra mari ra kua riro katoa raua ki raro ake i te akautunga no te mate. E no reira, kare te manamanata no te akaoraanga anake ua i to raua au uanga kia rauka ta te Atua akaperepere anga ei au mema no tana anau ra mari katoa ra ko te akakoreanga i te akautunga a te Atua no te mate ia ratou ra. Kia tau ki te angaanga a te tuatua tika o te Atua ra, ka umuumuia e te reira kia mate tetai o ta te Atua ra ko Iehova tamariki ei mono, me kare ei oko. E no reira, ko te uianga maata, koia oki: Ka akatika ainei tei ikiia kia mate aia ei mono no te au tangata ara nei? Pera katoa oki, ei akatupuanga i te reira ka umuumu katoaia tetai temeio i te tuanga a te Atua Mana katoatoa ra. Ka umuumu katoaia tetai akakite anga maata rava aite koreia no te aroa o te Atua ra.—Roma 8:32.
6. Akapeea te Tamaiti a te Atua ra i tau ei no te turanga o te au tangata ara ra, e eaa tana i tuatua no te reira tu.
6 Ko te Tamaiti anau mua a Iehova anake ua te ka tau no te umuumu anga takake o te turanga te kapiti ra i te au tangata ara nei. Koia oki te tu tikai o tona Metua i te rangi ra i te akaarianga inangaro no te au mema o te anau akatupuia maira e te Atua e kare tetai ke atu o roto i te au tamariki a te Atua ra i aite atu kiaia. I te mea pouroa etai katoa atu au mea ora kite tei angaia maira nana katoa ratou i vai mai ei, e mea tau ra e ka maata tona inangaro ia ratou ra. Pera katoa oki, ko te aroa tetai tu maata o te Tamaiti anau tai a Iehova ra, koia a Iesu Karaiti, no te mea “ko te kakā oki aia o tona [to te Atua] tapunui, e ko te tutu tikai nona uaorai.” (Ebera 1:3) I te akaarianga i tona inangaro tikai kia akakite i tona aroa maata na te orongaanga i tona ora no te au tangata ara nei, kua tuatua atura Iesu ki tana au apotetoro 12 ra: “Kare oki te Tamaiti a te tangata i aere mai kia taviniia tona, e tavini ra, e kia oronga atu aia i tona ora ei oko no te tangata e manganui.”—Mareko 10:45; akara katoa ia Ioane 15:13.
7, 8. (a) Eaa ta Iehova ra akakoroanga i te tono mai anga ia Iesu Karaiti ki te ao o te tangata nei? (e) Eaa te tu angaanga ta te Atua i tono maira i tana Tamaiti anau tai kia rave?
7 E tumu takake ta te Atua ko Iehova ra tonoanga mai ia Iesu ki roto i teianei ao putaua o te tangata nei. Ko te aroa o te Atua te akakeu anga i te reira, no te mea kua tuatua a Iesu uaorai: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore. “Kare oki te Atua i tono mai i tana Tamaiti ki te ao nei e akaapa mai i to te ao, kia ora ra to te ao iaia.”—Ioane 3:16, 17.
8 Na runga i tetai angaanga no te ora ta Iehova ra tono aroa mai anga i tana Tamaiti anau tai ra. Kare te Atua i tono mai i tana Tamaiti ki konei ei akava i to teianei ao. Naringa i tonokia mai te Tamaiti a te Atua ra no te reira angaanga akavaanga, kua riro i reira te manako anga no te au tangata ravarai ei mea puapinga kore ua. Ko te tuku anga i te tika no te akavaanga kino ra ta Iesu Karaiti ka tuku ki runga i te uanga tangata ka riro mai ei akaapa anga kia mate atu. (Roma 5:12) E no reira, na teia akakite anga takake i te aroa no te Atua ra, kua kopaeia atu e te Atua te tuku anga tika no te mate tei tau ra ki to te tuatua tau tikai i umuumu maira.
9. Eaa to te tata taramo ko Davida manako no runga i ta Iehova ra orongaanga?
9 I te au mea ravarai, te akakite maira e te akaari maira te Atua ko Iehova i te aroa ei tuanga maata rava no tona ra tu. Ka tika ra kia tuatuaia e te oronga aroa ua mai ra te Atua kia tere atu i tei rava o te au mea memeitaki katoa ra na te aronga akamori tiratiratu iaia i runga i te enua nei. Mei te reira oki to te tata taramo ko Davida ra manako no te reira tumu i tana tuatua anga ki te Atua: “Te maata oki o te au mea memeitaki naau, i tei vaooia e koe no te aronga i mataku ia koe ra! i tei akonoia no te aronga i irinaki ia koe ra, ki mua i te aroaro o te tamariki a te tangata nei.” (Salamo 31:19) I to Davida tuatau ariki anga ki rungao i te iti tangata o Iseraela ra—ae, i tona oraanga katoa ei mema no taua iti tangata ra tei ikiia ra e te Atua—kua putuputu aia i te kite i te meitaki o Iehova. E kua kite a Davida e e maata te reira tu.
Te Ngaro Anga ia Iseraela te Apinga Aroa Maata Mei te Atua Maira
10. Eaa te Iseraela i taito ra i tuke ei i etai iti tangata ravarai i runga i te enua nei?
10 I te mea ko Iehova tona Atua, kare a Iseraela i taito ra i aite atu ki etai atu iti tangata ke i te enua nei. Na roto i te peroveta ia Mose ra ei rotopu, kua apai mai a Iehova i te au uanga o Aberahama, o Isaaka, e to Iakoba katoa ki roto i tetai pirianga koreromotu ma ia uaorai katoa oki. Kare aia i rave akapera i tetai ua atu iti tangata kia tau ki te reira tu. E no reira, kua rauka i te tata taramo tei akauruia ra kia tuatua: “Kua akakite aia i tana tuatua kia Iakoba; i tana au akonoanga e tana au tuatua-tau kia Iseraela. Kare aia i pera ki te pa enua ravarai: e tana ra au tuatua-tau, kare ïa ratou i kite. Alelu Ia”!—Salamo 147:19, 20.
11. Tae roa mai ki teea tuatau to Iseraela rekareka anga i te tu akaperepereia e te Atua ra, e akapeea ta Iesu ra akakite anga i te taui angaia to ratou pirianga?
11 Kua noo tamou te iti tangata kopapa o Iseraela ki roto i te reira pirianga akaperepereia ma te Atua ra e tae roa ki tana kopae anga ia Iesu Karaiti ei te Mesia i te mataiti 33 o to tatou Tuatau Noa Nei. E tuatau mii tikai no Iseraela ra i ta Iesu oronga atu anga i teia akakite anga tangi tikai: “E Ierusalema e, e Ierusalema e, tei ta i te au peroveta, e tei peî oki ki te toka te aronga i tonokia atu ia koe na, manganui toku inangaro anga i te akaputuputu i to tamariki, mei te moa e akakoukou i tana anaunga i raro ake i tona peau, kare ra i tika ia kotou! I na, kua vaio taneia to kotou nei are.” (Mataio 23:37, 38) Kua akakite ta Iesu au tuatua ra e ko te iti tangata Iseraela ra, noatu rai i akaperepereia ana e Iehova i mua ana, kua ngaro taua apinga aroa takake mei te Atua maira ia ratou ra. Eaa i peraʼi?
12. Koai ma te ‘tamariki a Ierusalema,’ e eaa te aite anga e kia akaputu a Iesu ia ratou ra?
12 I te taiku anga i te tuatua “tamariki,” te tuatua ra a Iesu no te ngati Iuda anake tei peritomeia ra te kopapa tei noo ra ki Ierusalema ei komono i te iti tangata ngati Iuda ra. E raukai ia Iesu i te akaputu mai i te ‘tamariki a Ierusalema’ ka riro tona aite anga e kia apai mai aia i te reira au “tamariki” ki roto i tetai koreromotu ou ma te Atua, koia uaorai ei Rotopu ia Iehova e te reira ngati Iuda kopapa ra. (Ieremia 31:31-34) Ka tupu mai i te reira te akakore anga ara, no te mea ko te akakoroanga ia o te aroa o te Atua ra. (Akaaiteia atu kia Malaki 1:2.) Ei apinga aroa maata tikai te reira.
13. No ta Iseraela kopae anga i te Tamaiti a te Atua ra eaa te ngere anga tei tupu, inara eaa i kore ei i meangiti mai to Iehova rekarekaanga?
13 Kia rotai atu ki tana Tuatua totou, kua tiaki roa a Iehova no te tuatau tau i mua ake ka oronga atu ei ki te aronga kare ra i te ngati Iuda i te apinga aroa kia riro mai ratou ei tuanga no taua koreromotu ou ra. Inara na to ratou kopae ke anga i ta te Atua uaorai Tamaiti, koia te Mesia ra, kua ngere taua iti tangata Iseraela kopapa ra i te reira apinga aroa maata. Kua akatau atura a Iehova i te reira kopae ke anga i tana Tamaiti na te akatotoaanga i teia apinga aroa ki te au tangata i te pae atu i te iti tangata ngati Iuda. Na teia mataara, kua tamou ua atu to Iehova rekareka ei Tei Oronga Maata ra kare i meangiti mai.
Te Mataora no te Orongaanga
14. Eaa a Iesu Karaiti i riro ei ei te mea ora rekareka roa i te ao katoa e pini ua ake?
14 Ko Iehova “te Atua mataora.” (1 Timoteo 1:11, NW) Na te orongaanga kia etai ke ra tetai apinga ia te akariro ra iaia kia mataora. E i te anere mataiti mua T.N., kua karanga tana Tamaiti anau tai e: “E maata te mataora o te orongaanga i to te rave mai.” (Angaanga 20:35, NW) Kia tau ki teia kaveinga, kua riro a Iesu ei te mea ora mataora roa tei angaia e Tei Anga maira i te ao katoa e pini ua ake. Naea ra? no te mea, i te pae atu i te Atua ia Iehova uaorai, na Iesu Karaiti i oronga te apinga aroa maata roa na te tukuanga i tona oraanga ki raro ei puapinga no te au tangata nei. Ko te tika ra, koia ‘Tei akatere mataora i te mana.’ (1 Timoteo 6:15) E no reira na Iesu i akakite mai i te akaraanga no tana i tuatua ra no te maata te mataora i te orongaanga ra.
15. No teea akaraanga kare rava a Iehova e akamutu, e akapeea tana au mea ora kite ka kite ei i tetai tuanga o tona mataora anga?
15 Kare te Atua ko Iehova e kore i Tei Oronga maoraora ua ki tana au mea ora kite katoatoa e ka vairai koia ei akaraanga meitaki roa no te orongaanga, na roto ia Iesu Karaiti. Mei te Atua e kite ra i te tu mareka i te orongaanga i te au apinga aroa meitaki kia etai ke ra, e kua tuku katoa aia i te vaerua oronga ua ki roto i te au ngakau o tana au mea ora kite i runga i te enua nei. Na taua mataara rai te akaari maira e te aru ra ratou i tona tu tikai e kua kite oki i tetai tuanga o tona ra mataora anga. (Genese 1:26; Ephesia 5:1) E tau i reira, kua tuatua atura Iesu ki tana au pipi: “Ka oronga, e ka rauka ta kotou; e ki te aite, e taomiia, e ruruia, e maringi ua atu, na te tangata e riringi mai ki roto i to kotou kakau. Ko te aite ta kotou e aite atu, ko ta kotou rai ia kia akaaiteia mai.”—Luka 6:38.
16. Eaa te orongaanga ta Iesu i tuatua maira ia Luka 6:38?
16 Na Iesu i akanoo mai no tana au pipi tetai akaraanga meitaki roa i te maani anga tetai mataara na te orongaanga ei rave anga kia aru atu. Kua akakite aia e ka meitaki te tupuanga o te reira orongaanga i te tuanga a te aronga te rave atura. Ia Luka 6:38, kare e te tuatua ua ra a Iesu no te orongaanga i te au apinga aroa no te pae kopapa. Kare aia e tuatua atura ki tana au pipi kia aruaru i tetai mataara te ka akangere ia ratou i te pae kopapa. Mari ra, te arataki ra aia ia ratou na tetai mataara te ka oronga atu i te tu akatupu anga i te pae vaerua.
Akapapu Anga i te Mataora Mutu Kore
17. Eaa te apinga aroa umere tikai ta te Atua ra i tuku ki rungao i tona Au Kite i teia au ra openga nei?
17 Mei teaa ra te meitaki ta Iehova apinga aroa, koia te Upoko o te au mea ravarai i angaia maira, tana i oronga ki tona Au Kite i teia au ra openga nei! Kua oronga mai aia i te tuatua meitaki o tona Patireia. Tei ia tatou nei te angaanga meitaki no te akakitekite aere i te Patireia o te Atua tei akanooia ra ki roto i nga rima o tana Tamaiti tutara, koia a Iesu Karaiti. (Mataio 24:14; Mareko 13:10) Te akariro angaia ei Au Kite tuatua no te Atua Teitei Rava e apinga aroa aite koreia ia, e ko te mataara meitaki na tatou no te rave i te orongaanga tei aru i te Atua ra na te tua anga i te tuatua no te Patireia ma etai ke atu ra i mua ake i te openga o teianei akatereanga kino o te au mea nei.
18. Ei Au Kite no Iehova, eaa ta tatou ka oronga ki etai ke atura?
18 Kua taiku maira te apotetoro ko Paulo i te au tu ngata tei tupu kiaia i tana akakitekiteanga i te tuatua no te Patireia ra kia etai ke. (2 Korinetia 11:23-27) Pera katoa oki te Au Kite o Iehova i teia tuatau nei kua o atu ki roto i te au tu ngata e kua akaruke i te au meitaki no ratou uaorai i te tauta anga kia oronga atu i te manakonakoanga no te Patireia kia etai ke ra. Penei kare tatou e inangaro kia aere atu ki te au ngutupa o te au tangata ke, me e akama to tatou. Inara ei au pipi na Karaiti, kare e rauka ia tatou kia kopae ke, me kare kia tapae ke, i te angaanga orongaanga i te au mea vaerua kia etai ke ra na te tutuanga i “teia tuatua meitaki o te Patireia.” (Mataio 24:14, NW) Ka tau kia aite to tatou tu manako ki to Iesu ra. I tona aro atu anga i te mate, kua pure aia: “E taku Metua, . . . kia tupu ra toou anoano; auraka toku.” (Mataio 26:39) I te tumu no te orongaanga kia etai ke ra i te tuatua meitaki o te Patireia, ka tau te au tavini o Iehova kia rave i to te Atua ra anoano, auraka ei to ratou uaorai—tana i inangaro, auraka ei ta ratou i inangaro.
19. Koai ma te aronga no ratou te “au ngai nooanga mutu kore” ra, e akapeea e raukai ia tatou i te akaoaoa atu kia ratou ra?
19 Ka kapitiia to tatou taime e ta tatou apinga ki roto i te reira orongaanga, inara ma te oronga anga kia tau i te Atua ra, ka akapapu tatou e ka tamouia to tatou mataora e tuatau ua atu. No teaa ra? No te mea kua na ko atura Iesu: “E akariro i etai ke ra ei oa no kotou uaorai na roto i te au apinga tuatua tika kore ra [“apinganui o teianei ao,” New International Version], e kia kore atu te reira, ka riro atu koe ia ratou ki roto i te au ngai nooanga mutu kore ra.” (Luka 16:9, NW) E mea tau no tatou kia rave i ta tatou “au apinga tuatua tika kore ra” ei akariro ia koe ei oa no Tei ia raua ra “te au ngai nooanga mutu kore ra.” Ei Tei Anga maira, kua riro no Iehova te au apinga ravarai nei, e kua akatuangaia tana Tamaiti anau tai ei Tuanga no te au mea ravarai. (Salamo 50:10-12; Ebera 1:1, 2) E riro ei ei oa no raua, ka tau tatou kia akono i ta tatou apinganui na te mataara te ka apai mai i te marekaanga kia raua. Te kapiti katoa ra teia i te tu manako tika i te taangaanga i te au apinga kopapa nei ei puapinga no etai ke ra. (Akaaiteia atu kia Mataio 6:3, 4; 2 Korinetia 9:7) Ka rauka ia tatou i te akapou te moni na roto i tetai mataara tika ei akamaroiroi i to tatou pirianga oa ma te Atua ko Iehova raua ko Iesu Karaiti. Ei akaraanga, ka rauka ia tatou te rave i te reira na te oronga rekareka anga i ta tatou apinga ei tauturu i te au tangata e ngere tikai to ratou ra e i te akapouanga i ta tatou au apinga ei akatere atu i te angaanga no te Patireia o te Atua ra.—Maseli 19:17; Mataio 6:33.
20. (a) Eaa ka raukai ia Iehova raua ko Iesu te taki atu ia tatou ki roto i te “au ngai nooanga mutu kore ra,” e ko aea te reira au ngai? (e) Eaa te au angaanga na tatou e tuatau mutu kore ua atu?
20 No to raua tu mate kore, ka rauka kia riro te Atua ko Iehova e Iesu Karaiti ei nga Oa mutu kore no tatou e ka rauka ia raua i te taki atu ia tatou ki te “au ngai nooanga mutu kore ra.” Ka rauka te reira me ki te rangi ra ma te au angera tapu ravarai me kare ki runga i te enua nei i te Parataito akaoraia ra. (Luka 23:43) Na te apinga aroa oronga uaia mai e te Atua ra koia a Iesu Karaiti i raukai teia au mea ravarai. (Ioane 3:16) E ka akono te Atua ko Iehova na Iesu e rave ua atu te orongaanga ki te au mea katoatoa tei angaia maira, no Tona uaorai mataora anga takake ra. Ko te tika e, no te tuatau mutu kore ua atu ka rauka ia tatou te tuatau no te orongaanga i raro ake i te turanga ngateitei o te Atua ko Iehova i te ao katoa e pini ua ake e te ariki anga o tana Tamaiti anau tai, to tatou Atu e te Akaora, koia a Iesu Karaiti. Na te reira e akatupu i te mataora mutu kore no te aronga oronga katoa ra kia tau ki te Atua ra.
Te Maara Ra Ainei Koe?
◻ Eaa te umuumuia ra i te apinga aroa maata roa a te Atua no runga i tana tuanga?
◻ Eaa te tu angaanga ta te Atua i tono maira i tana Tamaiti?
◻ Koai te mea ora mataora roa i te ao katoa e pini ua ake, e no teaa ra?
◻ Akapeea te aronga oronga tau i te Atua ra ka kite ei i te mataora mutu kore ua atu?
[Tutu i te kapi 10]
Te ariki nei ainei koe i te apinga aroa orongaia mai e te Atua koia tana Tamaiti ei atinga oko?
[Au Tutu i te kapi 12]
Te na mua ra ainei koe i te kimi anga i te Patireia o te Atua na te tutuanga i te tuatua meitaki e te turuanga i taua angaanga ra ma taau au apinga ravarai?