Pene 65

E Tere Muna ki Ierusalema

I TE tuatau pururu anga rau rakau i te 32 T.N., e te vaitata ra te Oroa Patia Puakapa. Kua rave a Iesu i te maata anga o tana angaanga ki Galilea mei te Pasa mai rai i te 31 T.N., i te tamata anga te ngati Iuda i te tamate iaia. Penei, mei reira mai e toru ua o Iesu aere anga ki Ierusalema no nga oroa mataiti e toru a te ngati Iuda ra.

Kua manono atura to Iesu nga taeake iaia: “Ka akaruke mai koe i teianei enua, ka aere atu koe ki Iudea.” Ko Ierusalema te oire maata o Iudea ra e ko te ngai akamori anga ia no tera enua katoa. Kua tamanako tona nga taeake e: “Kare ana e mea rave poiri; te rave nei koe i taua au mea, ka akakite ua atu koe ia koe uaorai ki te ngai tangata.”

Noatu rai e kare a Iakobo, a Simona, a Iosepha, e Iuda i irinaki e ko to ratou tuakana, koia a Iesu, ko te Mesia tikai ia, kua anoano ratou ra kia akaari aia i tona mana rave semeio ki te aronga katoa tei uipa atu ki te oroa ra. Inara kua matakite a Iesu i te kino i reira. Kua karanga aia: “Kare to te ao i makitakita mai ia kotou; te riri mai nei ra iaku, i te mea kua akakite ua atu au e, e tuatua kino ta to reira.” No reira kua karanga atura Iesu ki tona au taeake: “Ka aere kotou ki taua oroa ra; kare au e aere vave atu ki taua oroa ra.”

E itu ra taua Oroa Patia Puakapa ra. I te varu o te ra kua akaotiia ma te au angaanga tapu ra. E akairo te oroa ra no te openga o te mataiti tanu e e tuatau rekareka ma te akameitakianga. I etai ra i muri ake i te akaruke anga to Iesu nga taeake ma te urupu o te tere ra, kua aere poiri atura aia e tana au pipi, kare i aere ki te ngai e kite uaia mai i te ngai ­tangata ra. Kua na Samaria atura ratou, kare na te ngai aereia e te aronga maata ra i te pae o te Kauvai i Ioridana ra.

I te mea ka anoanoia te ngai noo anga no Iesu e tona pupu i tetai oire i Samaria, kua tono atu aia i nga karere i mua ake kia akateateamamao mai. Inara, kare te au tangata i akatika kia rave i tetai apinga na Iesu i te kite anga e te aere atura aia ki Ierusalema. No te riri, kua ui atura a Iakobo raua ko Ioane: “E te Atu, e tika aina ia koe kia akaue atu maua i te ai no runga i te rangi, kia topa mai kia pou atu ratou?” Kua ako atura Iesu ia raua no te manako akapera anga, e kua aere atura ratou e oire ke.

Ia ratou e aaere ra i te arataa, kua tuatua atu tetai tata tuatua kia Iesu: “E te Atu, ka aru atu au ia koe i toou au aerenga ravarai.”

Kua tuatua maira Iesu kiaia: “E ana to te suoli; e toanga to te manu o te reva; kareka te Tamaiti a te tangata nei, kare ona e urunga upoko.” Te akataka atura a Iesu e ka kite te tata tuatua ra i te tu ngata me riro mai aia ei pipi Nana. E ko tei tupu i te akara anga e e akaparau roa to te tata tuatua kia akatika i te reira tu oraanga.

Kua tuatua atura Iesu ki tetai tangata ke atu: “Ka aru mai iaku.”

Kua na ko maira aia, “E tuku ua ake koe iaku kia aere ana au e tanu i taku metua tane.”

Kua karanga atura Iesu kiaia: “Vaio atu, na tei mate e tanu i to ratou i mate ra; e aere ra koe e tutu aere i te basileia no te Atua.” I te akara anga kare i mate ake te metua o te reira tangata, no te mea me kua mate aia, kare e tau e tei reira tana tamaiti i te akarongo anga kia Iesu. Te tu rai e te pati ra te tamaiti no te tuatau kia tiaki aia kia mate tona metua. Kare aia i manako kia tuku i te Patireia ei apinga mua no tona oraanga.

Ia ratou e aere ua atura ki Ierusalema, kua karanga atura tetai atu tangata kia Iesu: “E te Atu, e aru atu au ia koe; e tuku ana ra koe iaku, kia aere au e poroaki ana i toku kopu-tangata.”

I te pau anga kua na ko atura Iesu: “Kare rava e tangata i tuku i tona rima ki te arote, ka akaraʼi ki muri, e tau i te basileia o te Atua.” Te aronga te ka riro ei pipi na Iesu ka tau kia akara to ratou mata i te angaanga no te Patireia. Mei te uri anga i te one ka riro ra kia mingi te aere anga mei ka kore te tangata arote ra e akara tika ki mua ra, mei te reira katoa te aronga katoatoa te ka akara ki muri ki teianei akatereanga taito o te au mea nei ka turori ke aia i te mataara te taki atura ki te ora mutukore. Ioane 7:​2-10; Luka 9:​51-62; Mataio 8:​19-22.

▪ Koai ma to Iesu au taeake, e eaa to ratou ra manako nona ra?

▪ Eaa ra to Samaria i tau kore ei te tu akono, e eaa ta Iakobo raua ko Ioane i inangaro i te rave?

▪ Eaa nga tuatua anga e toru ta Iesu i rave ra i runga i te arataa, e i akapeea tana akaketaketa anga i te umuumuia o te rave i te angaanga tuku atingaia ra?