Pene 66

I te Oroa Patia Puakapa

KUA rongonui a Iesu i te tuatau vaitata i te toru mataiti mei tona papetito angaia ra. E manganui te au tauatini tei kite i tana au semeio, e kua totoa te au ripoti no tana au angaanga i rave takapini te enua. I teianei i te akaputu anga mai te au tangata no te Oroa Patia Puakapa ki Ierusalema, kua kimi ratou iaia i reira. Kua inangaro ratou kia kite, “teiea aia nei?”

Kua riro a Iesu ei tumu patoitoi anga. “E tangata meitaki aia,” ta tetai papaki i tuatua. “Kare, te tapikipiki ua nei aia i te tangata,” ko ta tetai aronga ia i karanga. E maata te koumuumu anga mei te reira te tu i te tuatau o te akamata anga te oroa. Inara kare e tangata i mataku kore kia tuatua nona i te ngai tangata. No te mea te mataku ra te au tangata i te akautunga a te au arataki ngati Iuda ra.

E tae akera i rotopu i taua oroa ra, kua tae atura Iesu. Kua aere atu aia ki te iero, e kua umere tikai te au tangata i te meitaki o tana apiianga. I te mea kare a Iesu i aere ana ki te apii a te au rapi ra, kua va ua iora te ngati Iuda na ko akera: “Noea ra te kite o teianei tangata, kare oki aia i apiiia?”

“Kare taku uaorai i taku e apii nei,” ta Iesu ia i akamarama atu, “nana ra, na tei tono mai iaku nei. Ko tei anoano marie i te akono i tona inangaro, ka kite aia i taku e apii nei, e na te Atua ainei, e naku uaorai ainei.” Kua piri vaitata ta Iesu apiianga ki te ture a te Atua ra. No reira, e mea tau kia kitea e te kimi ra aia i te kaka no te Atua, kare nona uaorai. Kua ui atura Iesu: “Kare ainei a Mose i tei tuku mai i te ture na kotou?” Na te tu ako kua karanga atura aia: “Kare rava tetai o kotou i akono i taua ture ra.”

“Eaa kotou e umuumu mai ei iaku e ta?” Ta Iesu ia i ui atu.

Kare tetai aronga i kite i te reira tauta anga, no te mea e manuiri ua ratou i te oroa ra. Kua manako ratou e e mea tau kore kia anoano tetai ua atu tangata e ta i te puapii meitaki. No reira kua irinaki ratou e e maki to Iesu nona i manako akapera. “E demoni toou,” ta ratou ia i karanga. “Koai tei umuumu ia koe e ta?”

Te umuumu ra te au arataki ngati Iuda e ta ia Iesu, noatu rai e kare te urupu tangata ra i kite. I ta Iesu akaora anga i tetai tangata i te Tapati e mataiti e te apa i mua akera, kua tauta te au arataki ra e ta iaia. E no reira a Iesu i akakite atu ei i to ratou manako tau kore na te ui anga kia ratou: “I peritomeia te tangata i te rā sabati, kia kore e aatiia te ture a Mose; te makitakita mai ainei kiaku, i te mea, kua akaora rava au i tetai tangata i te sabati? Auraka e akava ua i te tu i vao ake, ka akava ra i te tuatua tau tikai.”

Kua na ko akera tetai pae tangata no Ierusalema, tei kite ra i te tu manako i reira e: “Kare ainei teia te tangata ta ratou i kimi nei e ta? E i na, te tuatua akakite ua nei aia, e kare ua a ratou tuatua kiaia. Kua kite pu tikai aina te au tutara e, ko te Mesia mou teia?” Kua akataka maira teia aronga no Ierusalema i te tumu i kore ei ratou i irinaki e ko Iesu te Mesia i te na ko anga: “Kua kite ra tatou i te ngai no reira mai teianei tangata; kia tae maira te Mesia, kare e tangata e kite i te ngai no reira mai aia ra.”

Kua karanga atura Iesu: “Te kite na kotou iaku, e te ngai no reira mai au nei: Kare au i aere ua mai, kareka tei tono mai iaku nei, e tuatua-mou tana, kare kotou i kite iaia. Kareka au, kua kite au iaia, mei reira mai oki au nei, e nana oki au i tono mai nei.” Ei reira kua kimi atura ratou i te ravenga e opu iaia, penei e tuku iaia ki te tapekaanga me kare e ta iaia. Inara kare i rauka ia ratou no te mea kare i tae te tuatau no Iesu kia mate.

Inara, e manganui tei akarongo ia Iesu, mei tei tau ra kia pera ratou. Eaa oki, kua aaere aia na runga i te vai, kua tamaru aia i te matangi, kua akamarino i te tai ngaru kino, e au tauatini ua atu te aronga tana i angai i te manga tokoiti ua e nga ika, kua akaora i te maki, kua aaere te pirikoki, akapuera i te mata o te matapo, kua akaora i te repera, e kua akatu i tei mate ra. No reira kua ui ratou e: “Kia tae mai te Mesia, e maata ainei tana akairo e rave i ta teianei tangata i rave?”

I te akarongo anga te au Pharisea i te au tangata i te koumuumu anga no teia au apinga, kua tono atura ratou e te kau taunga nunui, i te aronga taoonga e opu ia Iesu. Ioane 7:​11-32.

▪ I naea a Iesu i tae atu ei ki te oroa, e eaa ta te au ­tangata tuatua nona ra?

▪ Eaa ra tetai pae i tuatuaʼi e, e temoni to Iesu?

▪ Eaa te manako o te au tangata o Ierusalema no Iesu ra?

▪ No teaa ra te aronga e manganui i akarongo ei ia Iesu?