Pene 91

To Lazaro Akatuakaou Anga

KUA tae atura a Iesu ki te tanumanga o Lazaro, ma te aronga katoa tei aere kapiti atura ratou. E ana te reira, tei popaniia te ngutupa ki te toka. Kua karanga atura a Iesu, “Ka uri ke atu i te toka na.”

Kua arai atura a Mareta, no te mea kare aia i kite eaa ta Iesu i manako kia rave. “E te Atu,” e nana ei, “kua aunga i tenana, ko te po a oki teia.”

Kua karanga atura Iesu kiaia: “Kare au i karanga kia koe e, Kia akarongo koe ra, ka kite koe i te kakā o te Atua?”

E kua uri ke atura ratou i te toka. Akara atura te mata o Iesu ki runga e kua pure: “E taku Metua, e akameitaki au ia koe, ko koe i akarongo mai iaku nei. Kareka au, kua kite au e, ka akarongo ua mairai koe iaku; no teianei ra aronga i akapiri mai kiaku nei i karanga atu ei au, kia akarongo ratou e, naau au i tono mai.” Kua pure a Iesu i mua i te au tangata i reira kia kite ratou e ko tana ka rave ka tupu ia i te mana no ko mai i te Atua ra. I reira kua kapiki atura aia ma te reo maata: “E Lazaro, ka aere mai ki vao!”

Kua aere maira a Lazaro ki vao i reira. Kua takaiia nga rima e nga vaevae ki te au takai no te tanumanga, e kua tapokiia oki tona mata i te kakau. Kua karanga atura a Iesu, “Ka tatara, e tuku atu iaia kia aere ana.”

I te kite anga i te reira semeio, e manganui te au ngati Iuda tei aere mai e akapumaana ia Maria raua ko Mareta kua akarongo ia Iesu. Inara, ko tetai papaki, kua aere atu e akakite ki te au Pharisea eaa tei tupu. I reira tikai kua akapapa ratou e te kau taunga maata katoa oki i tetai uipaanga no te akaraanga teitei a te ngati Iuda, koia te Sunederi ra.

Kua kapiti te Sunederi i te au Pharisea e te au Sadukea, te kau taunga nunui, e pera katoa oki te taunga maata o te reira tuatau, koia a Kaiapha, e te kau taunga nunui no mua atu ra. Kua pekapeka te reira aronga: “Te aa ua nei tatou? maata rava ta teianei tangata akairo e rave nei. I vaio ua atu rai tatou iaia mei teianei rai, ka ope takiri te tangata i te akarongo iaia; e ka tae mai oki to Roma e rave i to tatou nei ngai, e te enua katoa oki.”

Noatu rai te akatika ua ra te au arataki o te au akonoanga atua e “e maata ta [Iesu] akairo e rave nei,” ko te apinga anake ta ratou i akamanako ana ko to ratou uaorai turanga e to ratou mana. Ko te akatu anga ia Lazaro ra e moto anga ririnui te reira i te au Sadukea, no te mea kare ratou e irinaki e e tuakaouanga tetai.

Kua tuatua a Kaiapha, penei e Sadukea aia ra, kua na ko maira: “Kare anake kotou i kite, E kare kotou i manako e, e mea meitaki ia tatou kia mate atu te tangata okotai, kia ora te tangata ravarai nei, auraka oki e mate te enua katoa.”

Na te Atua ra i akakeu ia Kaiapha kia tuatua i te reira, no te mea kua tata a Ioane i muri akera: “Kare ra [na Kaiapha] tikai taua tuatua ra.” Te aite anga tikai no ta Kaiapha tuatua e e mea tau kia tamateia a Iesu ei akakore i Tana ko anga kia pururu to ratou turanga mana e to ratou tika. Inara, kia tau ki ta Ioane ra, ‘kua totou a Kaiapha e kua akapapaia a Iesu kia mate kare no te iti tangata anake, mari ra kia raukai te au tamariki a te Atua ra i te akaputuia ki te ngai okotai.’ E tika oki, ko ta te Atua ia akakoroanga e kia mate tana Tamaiti ei oko no te au tangata ravarai.

Kua rauka i reira ia Kaiapha i te akakeu i te Sunederi ra kia akapapa e ta ia Iesu. Inara, penei kua kite a Iesu mei ia Nikodema i te reira akapapa anga, e mema oki aia no te Sunederi ra e e taeake katoa oki raua, e kua aere ke atura mei reira. Ioane 11:​38-54.

▪ Eaa ra a Iesu i pure ei i te ngai tangata ra i mua ake i te akatuakaou anga ia Lazaro?

▪ I akapeea te manako o te aronga tei kite ra i te reira tuakaouanga?

▪ Na teaa i akakite mai i te kino o te au mema o te Sunederi ra?

▪ Eaa ra ta Kaiapha i akakoro kia rave, inara eaa ta te Atua i taangaanga iaia kia totou?