Pene 104

Rongoia te Reo o te Atua i te Toru o te Taime

IAIA i te iero ra, kua tamanako roa ana a Iesu no tona matenga tei vaitata ua ra aia i te aro atu. Ko tona manako maata e eaa te tupu anga ki te ingoa o tona Metua, no reira kua pure aia: “E taku Metua, e akakakā i toou ingoa.”

I reira, kua aere maira tetai reo mana no te au rangi mai, i te na ko anga: “Kua akakakā au, e ka akakakā akaou atu rai au.”

Kua va ua ra te aronga tangata tei tu takapini iaia ra. Kua karanga tetai papaki: “E angela tei tuatua maira kiaia.” Kua na ko akera tetai aronga e e mangungu. Inara, ko Iehova ko te Atua tikai tei tuatua maira! Kare ra te reira, i te taime mua i rongoiaʼi te reo o te Atua i te tuatua anga kia Iesu.

I to Iesu papetito anga, e toru e te apa mataiti i mua akera, kua rongo a Ioane Papetito i ta te Atua ra tuatua no Iesu e: “Taku Tamaiti akaperepere teia, kua mareka rava au iaia.” Ei reira, e tetai tuatau i muri ake i te Pasa o mua akera, i to Iesu akatuke angaia ki mua ia Iakobo, ia Ioane, e ia Petero katoa oki, kua rongo ratou i ta te Atua tuatua anga: “Ko taku Tamaiti akaperepere teia, kua mareka rava au iaia; e akarongo kotou iaia.” E i teianei, no te toru o te taime, ia Nisana 10, e a ra i mua ake i to Iesu ra matenga, kua rongo akaouia e te tangata te reo o te Atua. Inara i teia taime kua tuatua a Iehova kia akarongoia e te aronga tangata e manganui!

Kua akataka maira a Iesu e: “Kare noku i tae mai ei taua reo nei, no kotou ra.” Na te reira i oronga mai i te akapapu anga e ko Iesu tikai te Tamaiti a te Atua, koia te Mesia i totouia maira. “E teianei e akaapaiaʼi teianei ao,” e na Iesu ei, “ei teianei ka eke ai te ariki o teianei ao.” Na to Iesu oraanga tiratiratu, i akapapu e ko Satani te Tiaporo ra, te ariki ia o teianei ao, e ka tau kia “eke,” kia tamateia.

I te tou anga ki te au tupu anga no tona matenga te vaitata maira, kua karanga a Iesu: “Kareka kia apaiia au ki runga ra, ka tōia mai e au te [au tu] tangata katoa kiaku nei.” Kare tona matenga i te mea e kua ruti aia, no te mea na te reira, ka raukai iaia i te to mai ia etai atura kiaia uaorai kia rekareka katoaʼi ratou i te ora mutu kore.

Inara kua patoi atura tera urupu tangata: “I kite akenei matou i te ture ra, ka tika te Mesia i te ora ua anga; eaa oki koe i karanga mai ei e, Ka apaiia te Tamaiti a te tangata ki runga? Koai oki taua Tamaiti a te tangata ra?”

Noatu rai te au akapapu anga katoa ra, kapiti katoa oki i te rongo anga i to te Atua uaorai reo, kare te maata anga i o ratou ra i irinaki e ko Iesu te Tamaiti mou a te tangata, koia te Mesia i totouia maira. Inara, mei tana i rave e ono marama i mua akera i te Oroa Puakapa ra, kua tuatua akaou a Iesu nona uaorai e ko “te mārama” ia e kua akamaroiroi atura i tei akarongo maira: “Ka akarongo kotou i te mārama, koi vai ake to kotou mārama, kia riro kotou ei tamariki no te mārama.” I muri ake i tana tuatua anga i te reira, kua aere atura a Iesu e kua pipini, penei no te mea te vaitata ra tona oraanga i te tamateia.

No te kore te ngati Iuda ra i akarongo ia Iesu te akatupu ra i te au tuatua a Isaia no te ‘akapoia to ratou mata, kua ta pakariia to ratou ngakau kia kore ratou e ariu mai e ka akaoraia ratou.’ Kua kite a Isaia na roto i te orama i te paepae o Iehova i te rangi, kapiti katoa oki ia Iesu i tona ora anga kaka ma Iehova ra i mua ake i tona riro mai anga ei tangata. Tera ra, ko te ngati Iuda, i te akatupu anga i ta Isaia i tata ra, kua kopae marokiakia i te akapapu anga e ko teia tikai Tei taputouia maira ei Akaora ia ratou.

I tetai pae, e manganui to te aronga tutara (penei e au mema no te akavaanga teitei o te ngati Iuda, koia te Sunederi) kua akarongo ia Iesu ra. Ko Nikodemo raua ko Iosepha no Arimatea etai o teia aronga tutara. Inara ko te au tutara, i reira ra, kare i akakite i to ratou akarongo, no te mataku ko te akaateaia i to ratou turanga i roto i te sunago. Mei teaa ra te maata i te ngere o te reira aronga ra!

Kua rave ua atura a Iesu i te akakite e: “Ko te akarongo mai iaku ra, kare ïa ko au tana e akarongo maira, iaia ra i tei tono mai iaku nei. Ko tei akara mai iaku ra, kua akara aia i tei tono mai iaku nei ra. . . . Kia kite ra te tangata i taku ra tuatua, e kare i akarongo ra, kare ïa ko au te akaapa iaia: kare au i aere mai e akaapa mai i to te ao, e akaora ra i to te ao. . . . Na te tuatua taku i apii ra, e akaapa iaia kia tae ki te rā openga ra.”

Na to Iehova aroa i te au tangata o te ao nei i akakeu iaia kia tono mai ia Iesu kia ora tei akarongo kiaia ra. Na te akarongo i te au mea ta te Atua i akaue atura ia Iesu kia tuatua, na te reira e akataka i te aronga te ka akaoraia. Ka raveia te akavaanga “i te rā openga ra,” i te Tauatini Mataiti no te Tutara Anga o te Mesia ra.

Kua ta openga atura a Iesu i te na ko anga: “Kare oki i taku uaorai te tuatua taku i karanga atu na; na te Metua ra i tono mai iaku nei, i akaue mai iaku i te tuatua, kia tuatua au e kia apii au. Kua kite oki au e, ko te ora mutu kore ïa tana i akaue ra; e teianei ko taku e tuatua nei, ko ta te Metua ïa i akaue mai iaku, ko taku e tuatua nei.” Ioane 12:​28-50; 19:​38, 39; Mataio 3:17; 17:5; Isaia 6:​1, 8-10.

▪ No teea nga atianga e toru ra i rongoiaʼi te reo o te Atua i te tuatua anga no Iesu ra?

▪ I akapeea te kite anga te peroveta ko Isaia ra i to Iesu kaka?

▪ Koai ma te au tutara tei akarongo kia Iesu ra, inara eaa ratou i kore ei i tuatua akakite iaia?

▪ Eaa “te rā openga ra,” e na teea tu te akava anga i te au tangata a reira?