Pene 113

Tu Akaaka i te Pasa Openga

I RARO ake i ta Iesu akaue anga, kua tae ke a Petero raua ko Ioane ki Ierusalema e teateamamao no te Pasa. No muri akera a Iesu ma etai atu apotetoro e tai ngauru ra, i tae atu ei i te aiai avatea ra. Te topa atura te ra ki te ngai opunga, ia Iesu e tona tere i eke atu ei i te Maunga o Oliveta ra. Ko te tuatau openga teia no Iesu e akara atu ei i te oire mei teia maunga atu e kia tae roa ki muri ake i tona tuakaouanga.

Kare i roa ana kua tae atura a Iesu e tona tere ki te oire e kua aere atu ki te ngutuare te ngai e akono ei ratou i te Pasa. Kua kake atura ratou ki te pia i runga ra, i reira kua kitea e ratou e kua oti te au teateamamao anga ravarai no ta ratou akono anga takake i te Pasa ra. Kua akara atu rai a Iesu ki teia atianga, mei tana i karanga ra: “E anoano maata toku i te kai i teianei pasa, ko au e ko kotou katoa, ka mate atu ei au.”

Te peu tei matauia, e a kapu uaina tei inumia ra e te aronga akono i te Pasa. I muri ake i te raveanga i te toru o te kapu, kua akameitaki atura a Iesu e kua na ko atura: “Ka rave mai i teia, ka tua na kotou: E karanga atu oki au kia kotou, Kare au e inu akaou i to te ua vine, e kia tae ua atu ki te basileia o te Atua ra.”

I te tuatau te kaikai ra ratou, tu akera a Iesu ki runga, kopae atura i tona kakau, rave atura i tetai kakau orei, kua akaki iora i tetai pa i te vai. Te mea matauia, na te tangata o te ngutuare e akapapa kia oreiia nga vaevae o te manuiri ra. Inara i te mea kare te tangata o te ngutuare i teia atianga nei, na Iesu i akono i teia angaanga. E tau ua na tetai ua atu o te au apotetoro ra e rave te reira; inara, i te mea te vai ra tetai pekapeka ia ratou ra, kare tetai i o ratou i rave i te reira. I teianei e akama to ratou i to Iesu akamata anga i te orei i to ratou vaevae.

I to Iesu ra tae atu anga kia Petero, kua arai maira aia: “Auraka rava koe e orei i taku vaevae.”

“Kia kore au e orei ia koe ra, kare rava aau tuanga iaku nei,” ta Iesu ia i karanga atu kiaia.

Kua tuatua maira a Petero: “E te Atu, eiaa mari taku vaevae anake ua, ko toku rima katoa e toku upoko katoa oki.”

Kua karanga atura a Iesu: “Ko tei paî ra, oti ra ua ïa, mari ra ko tona vaevae anake ra te orei, ko tona kopapa katoa ra, kua mā ïa: e kua mā oki kotou, kare ra i ope.” Kua tuatua aia i te reira no te mea te kite ra aia e te akapapa ra a Iuda Ikariota e pikikaa iaia.

I te oti anga ia Iesu te orei i te vaevae o te 12 katoa ra, kapiti katoa oki to tei pikikaa iaia, koia a Iuda, kua aoao aia i tona kakau e kua noo akaou atura i te pae o te kaingakai. Ei reira kua karanga atura aia: “Te kite na kotou i taku i rave nei ia kotou? Te karanga nei oki kotou e, ko au te Orometua, e te Atu: e tuatua tika oki ta kotou; koia tikai oki au nei. E kua orei na oki au, ko te Atu e te Orometua, i to kotou vaevae, kia orei katoa oki kotou i to kotou uaorai vaevae e tikaʼi. Kua tuku atu na oki au i te akaraanga na kotou, ko taku i raveo ia kotou nei, kia akapera katoa kotou. Tika, tika tikai taku e karanga atu kia kotou, Kare te tavini i maata atu i tona pu, e te karere, kare ïa i maata atu i tei tono mai iaia ra. E ao to kotou, te aronga i kite i teianei au tuatua, kia akono kotou i te reira.”

Mei teaa ra te apiianga manea no te angaanga taakaaka! Kare e tau te au apotetoro kia kimi i te ngai i mua ra, ma te manakoanga e e turanga maata to ratou e ka tau etai atu kia tavini atu ia ratou. Ka tau ratou kia aru i te akaraanga ta Iesu i akanoo maira. Kare teia i te oreianga vaevae ei peu ua. Kare, mari ra no te inangaro tikai kia tavini atu ma te kore e akono i te tu o te tangata, noatu peea te akaaka me kare te reka koreia o te reira angaanga. Mataio 26:​20, 21; Mareko 14:​17, 18; Luka 22:​14-18; 7:44; Ioane 13:​1-17.

▪ Eaa te apinga takake no to Iesu ra akara anga ia Ierusalema iaia i aere atura ki roto i te oire e akono i te Pasa ra?

▪ I te tuatau o te Pasa ra, penei ko teea te kapu ta Iesu i tuku atu ki tana au apotetoro e 12 i muri ake i tana akameitakianga ra?

▪ Eaa te angaanga tei matauia no te au manuiri i to Iesu tuatau i te enua nei, e eaa ra i kore ei i raveia i te tuatau i akono ei a Iesu e tana au apotetoro i te Pasa ra?

▪ Eaa ta Iesu akakoroanga i tana rave anga i te angaanga akaaka ra i te oreianga i te vaevae o tana au apotetoro ra?