Kia ‘Maata te Ua Anga’

¹ I te taangaanga anga i te au tuatuaanga akairo, kua akatutu a Iesu iaia uaorai e ko te vine mou, tona Metua te Tanu Kai, e tana au pipi akatainuia e te vaerua ko te au atava uua o te vine. I te akataka anga i te angaanga a te Tanu Kai akatutu, kua akakite a Iesu i te puapinga kia piri mou tikai ki te vine. (Ioane 15:1-4) Ko te apiianga koia oki, pouroa te aronga e pirianga uaorai to ratou kia Iehova, kia aite rai mei te atava uua o te “vine mou,” ko Iesu Karaiti. Kia uua maata ua rai tatou i “te ua o te vaerua” e te ua o te Patireia katoa.​—Gala. 5:22, 23, NW; Mata. 24:14; 28:19, 20.

² Ua o te Vaerua: Ka rauka to tatou tereanga pae vaerua i te vaitoia na te tu meitaki e akaari ana tatou i te ua o te vaerua. E aruaru ana ainei koe i te tatanu i te ua o te vaerua o te Atua na te apii e te akamanako putuputu anga i runga i te Tuatua a te Atua? (Philipi 1:9-11) Auraka e emiemi i te pure no te vaerua tapu, te akatupu ra i te au tu te akakaka ra ia Iehova e te akamaroiroi ra i te tereanga pae vaerua tamou.​—Luka 11:13; Ioane 13:35.

³ Ka tauturu katoa te tatanuanga i te ua o te vaerua ia tatou kia maroiroi atu ei au orometua. Ei akaraanga, ka akakeu te aroa e te akarongo ia tatou kia akanoo i tetai tuatau i roto i ta tatou papaanga angaanga kia piri putuputu atu ki roto i te angaanga orometua. Te au tu mei te au, akakoromaki, meitaki, maru, e te akatere uaorai, e tauturu ana ia tatou i te ariu meitaki atu ki te aronga patoi. E tauturu ana te rekareka ia tatou i te kite mai i te merengo anga i roto i te angaanga orometua noatu te akarongo kore o te au tangata.

⁴ Ua o te Patireia: Ka inangaro katoa tatou i te uua i te ua o te Patireia. Te o maira te reira i te oronga anga i ‘te atinga ra, i te akameitaki, koia oki ta te vaa nei, i te akapaatu anga i te ingoa o Iehova.’ (Ebera 13:15) E rave ana tatou i teia na te akakitekite anga ma te maroiroi e te tiratiratu i te tuatua meitaki. Te tauta ra ainei koe i te akamaata atu i te ua o te Patireia i roto i taau uaorai angaanga orometua?

⁵ Kua karanga a Iesu i tana au pipi tiratiratu e ka tukeke te maata o ta ratou ua ka ua mai. (Mata. 13:23) No reira, auraka tatou e akaaite ia tatou uaorai ki tetai atu mari ra kia oronga kia Iehova i to tatou maroiroi katoa. (Gala. 6:4) Te akara matatio anga tika tikai i to tatou uaorai au turanga, i te akamanakoanga i te Tuatua a te Atua, ka tauturu ia tatou kia akakaka ua rai ia Iehova na te ‘maata te ua anga.’​—Ioane 15:8.