Kia Vai Takake Ua

Kua apii a Iesu i tana au pipi “kare kotou i to teianei ao.” (Ioane 15:19) Te aiteanga kia vai takake ua​—kare ratou e piri ki roto i te angaanga poritiki e te au tamaki o teianei ao. Kare i te mea māmā kia vai takake ua. Penei ka akavaavaaia tatou. Akapeea tatou me vai takake ua e kia vai tiratiratu ki te Atua ko Iehova?

1. Eaa te manako o te au Kerititiano mou no te au kavamani a te tangata?

Te akangateitei ra te au Kerititiano i te kavamani. Mei ta Iesu i karanga “ka apai mari i ta Kaisara ra kia Kaisara”​—koia oki, kia aru tatou i te ture o te enua, mei te tutaki i te tero. (Mareko 12:17) Te apii maira te Pipiria e te tutara ra te au kavamani a te tangata no te mea te akatika ra a Iehova ia ratou kia tutara. (Roma 13:1) Kua mārama tatou e kua kotingaia te mana tutara o te au kavamani a te tangata. Irinaki tatou i te Atua e tona Patireia i te rangi kia rapakau i te au manamanata o te tangata.

2. Akapeea tatou me akaari kia vai takake ua?

Mei ia Iesu, kare tatou e ō ki roto i te angaanga poritiki. Te kite anga te tangata i tetai o te au semeio a Iesu kua tauta ratou i te akariro iaia ei ariki i te enua nei, kare ra aia i akatika ana. (Ioane 6:15) Eaa te tumu? No te mea, mei tana i tuatua i muri mai, “kare to teianei ao taku basileia.” (Ioane 18:36) Ei pipi na Iesu, ka vai takake ua tatou. Ei akaraanga, kare tatou e aere ki te tamaki. (E tatau ia Mika 4:3.) Ka akangateitei tatou i te au akairo o te enua​—mei te au reva​—kare ra tatou e akamori i te reira. (1 Ioane 5:21) E kare tatou e piri ki tetai tua e kare e patoi i tetai ua atu pupu e te au mema poritiki. Te akaari ra tatou e te vai tiratiratu ra tatou ki te kavamani a te Atua​—ko tona Patireia.

KIMI OONU

3. Vai takake ua te au Kerititiano mou

Kua akanoo a Iesu e tana au pipi i te akaraanga no tatou. E tatau ia Roma 13:​1, 5-7 e 1 Petero 2:​13, 14. E oti, akatangi i te VITIO e te uriuri i te au uianga ka aru mai.

VITIO: Vai Takake Ua te au Kerititiano Mou​—Tuanga 1 (4:28)

• Eaa tatou ka akangateitei ei i te au kavamani a te tangata?

• Eaa tetai au mataara ka kauraro tatou ia ratou?

I te tuatau tamaki, penei ka vai takake ua tetai au enua, inara kua tauturu i te nga tua o te tamaki. Eaa tikai te turanga kia vai takake ua? E tatau ia Ioane 17:16. E oti, akatangi i te VITIO e te uriuri i te uianga ka aru mai.

VITIO: Vai Takake Ua te au Kerititiano Mou​—Tuanga 2 (3:11)

• Eaa te aiteanga kia vai takake ua?

Akapeea me akaue te kavamani kia rave koe i tetai angaanga tei patoi i te ture a te Atua? E tatau ia Angaanga 5:​28, 29. E oti, akatangi i te VITIO e te uriuri i te au uianga ka aru mai.

VITIO: Vai Takake Ua te au Kerititiano Mou​—Tuanga 3 (1:18)

• Me e taumaro anga tetai i rotopu i te ture a te tangata e ta te Atua, koai ta tatou ka akarongo?

• Akakite mai i tetai au turanga kare te au Kerititiano e akarongo ki te au kavamani?

4. Kia vai takake ua i te pae o te manako e taau ka rave

E tatau ia 1 Ioane 5:21. E oti, akatangi i te VITIO e te uriuri i te au uianga ka aru mai.

VITIO: Kia Ngakau Toa te au Kerititiano Mou​—Kia Vai Takake (2:49)

• I roto i te vitio, eaa te tumu kare a Ayenge i piri ana ki roto i te pupu poritiki e te au tarekareka anga a te kavamani mei te akaepaepa anga i te reva?

• I toou manako kua rave ainei aia i te iki anga tau?

Eaa atu tetai au ngai ka timataia to tatou turanga kia vai takake ua? Akatangi i te VITIO, e oti uriuri i te au uianga ka aru mai.

VITIO: Apiianga Mei Te Punanga Tiaki​—Vai Takake Ua Mei Teianei Ao Oripu Ua (5:16)

• Akapeea me vai takake ua i te tuatau tarekareka anga tipoti?

• Akapeea me vai takake ua noatu me takinokinoia e me ka puapingaia mei te au iki anga a te aronga poritiki?

• Akapeea te au nuti me kore te au pirianga tangata me takino i to tatou turanga vai takake ua?

APIIANGA

Ka angaanga pakari te au Kerititiano kia vai takake ua i te pae o te manako, te tuatua, e ta ratou ka rave.

Uriurianga

• Eaa ta tatou kaiou ki te au kavamani?

• Eaa tatou ka vai takake ei i te pae o te poritiki?

• Eaa te au turanga te ka timata i to tatou tu vai takake ua?

KIMI KIMI

Eaa ta tatou ka rave kia vai takake ua?

Kare a Iehova i Akangaropoina Ana ia Matou (3:14)

Eaa ta te au pamiri ka akapapa no te au timata anga kia vai takake ua?

Kia Vai Takake Ua i te Ngai Tangata (4:25)

Eaa te tumu kare te paruru anga i to tetai enua i te turanga ngateitei rava atu ka rauka i tetai tangata?

“Kare Rava e Mea e Kore ei e Tika i te Atua” (5:19)

Akamanako akapeea me vai takake ua i teianei ao me rave i te au iki anga i te ngai angaanga.

“Ei Runga Iaia Uaorai ta te Tangata Ravarai Apainga” (Te Punanga Tiaki, Mati 15, 2006)

Ka tupu rai te patoi anga e te takinokino anga ki te au Kerititiano. Ka mataku ainei tatou?

1. Eaa tatou ka tapapa atu ei i te takinokino anga?

Karanga te Pipiria: ‘Te aronga katoa e akono i te Atua, ei roto i te Mesia ia Iesu, e takinga-kino katoaia.’ (2 Timoteo 3:12) Kua takinokinoia a Iesu no te mea kare aia no teianei ao o Satani. Kare katoa tatou no teianei ao, e kare tatou e poitirere me takinokinoia tatou e te au kavamani e te au akaaereanga akonoanga o teianei ao.​—Ioane 15:​18, 19.

2. Akapeea tatou me akapapa no te takinokino anga?

Ka anoanoia tatou i teianei kia irinaki pu tikai ia Iehova. E akanoo i te tuatau i te au rā ravarai kia pure kiaia e te tatau i tana Tuatua. E aere putuputu ki te au uipaanga. Ka akamaroiroiia koe ma te ngakau toa me takinokinoia noatu mei te pamiri. Kua tata te apotetoro ko Paulo, tei takinokinoia: “Ko Iehova toku tauturu, kare au e mataku.”​—Ebera 13:6.

Ka ngakau toa tatou me tutu aere ua. Ka akamaroiroi ia tatou kia irinaki pu tikai ia Iehova auraka e mataku. (Maseli 29:25) Me ngakau toa koe i te tutu aere i teianei, ka papa ua koe i te tutu aere noatu te arai anga a te kavamani.​—1 Tesalonia 2:2.

3. Akapeea tatou e puapinga ai ma te tiratiratu me takinokinoia?

Kare tatou e reka me takinokinoia, me vai tiratiratu ra tatou, ka matutu atu te akarongo. Ka piri vaitata tatou kia Iehova no te mea ka tauturu aia ia tatou noatu te paruka ua. (E tatau ia Iakobo 1:​2-4.) Ka mamae a Iehova me takinokinoia tatou, e ka mareka rava aia me vai tiratiratu tatou. Karanga te Pipiria: “Kia mate ra kotou ma te akono meitaki, ka akakoromaki ei kotou, e mea meitaki ïa i te Atua.” (1 Petero 2:20) Me vai tiratiratu tatou ka oronga mai a Iehova i te ora mutu kore i te ao ou e kare rava te akamorianga mou e patoiia.​—Mataio 24:13.

KIMI OONU

4. Ka vai tiratiratu koe noatu te patoi anga a te pamiri

Akakite a Iesu e kare te pamiri e turu i ta tatou ikianga kia akamori ia Iehova. E tatau ia Mataio 10:​34-36, e oti uriuri i teia uianga:

• Eaa te ka tupu me inangaro tetai o te pamiri i te tavini ia Iehova?

VITIO: Akono a Iehova ia Maua (5:13)

• Eaa taau ka rave me arai tetai o te pamiri e tetai oa ia koe kia tavini ia Iehova?

E tatau ia Salamo 27:10 e Mareko 10:​29, 30. Me tatau i teia nga irava, uriuri i teia uianga:

• Akapeea teia taputou te tauturu anga ia koe me patoi mai te pamiri e te au oa?

5. E akamori ia Iehova noatu te takinokino anga

VITIO: Kia Ngakau Toa Noatu te Takinokino Anga (6:27)

• Akapeea te au akaraanga i roto i teia vitio te akamaroiroi anga ia koe kia ngakau toa?

E tatau ia Angaanga 5:​27-29 e Ebera 10:​24, 25. Me tatau i teia nga irava, uriuri i teia uianga:

• Eaa i puapinga ai kia akamori ia Iehova noatu me araiia ta tatou tutu aere e te au uipaanga?

6. Tauturu a Iehova kia vai tiratiratu koe

VITIO: Akamaroiroi te Atua ko Iehova Iaku (3:40)

• I roto i te vitio, eaa tei tauturu i teia Au Kite kia vai tiratiratu?

E tatau ia Roma 8:​35, 37-39 e Philipi 4:13. Me tatau i teia nga irava, uriuri i teia uianga:

• Akapeea teia irava te akapapu anga e ka rauka ia koe kia vai tiratiratu noatu te timata anga?

E tatau ia Mataio 5:​10-12, e oti uriuri i teia uianga:

• Eaa koe ka mataora ai noatu te takinokino anga?

APIIANGA

Mareka rava a Iehova i ta tatou tauta anga i te tavini iaia noatu te takinokino anga. Ka vai tiratiratu tatou ma tana tauturu!

Uriurianga

• Eaa te au Kerititiano ka tapapa atu ei i te takinokino anga?

• Eaa taau ka rave i teianei kia papa koe no te takinokino anga?

• Eaa te ka tauturu ia koe kia tavini ia Iehova noatu te timata anga?

KIMI KIMI

Akara akapeea tetai mapu tane te akamārama anga i ta Iehova tauturu kia vai tiratiratu aia e kia vai takake noatu i roto i te are auri.

Akakoromaki Noatu me Takinokinoia (2:34)

Akara eaa tei tauturu i tetai nga tokorua kia tavini tiratiratu ia Iehova no tetai tuatau roa noatu te patoi anga.

Tavini Anga ia Iehova i te Tuatau Taui Ua (7:11)

Apii kia kite akapeea me vai tiratiratu noatu te takinokino anga.

“E Akapapa i Teianei no te Takinokino Anga” (Te Punanga Tiaki, Tiurai 2019)

Akapeea me patoi mai te pamiri, e akapeea me akatupu i te ‘au e kia vai tiratiratu kia Iehova?

“Apai Mai te Tuatua Mou, ‘i te Tamaki, Kare i te Au’” (Te Punanga Tiaki, Okotopa 2017)