Mika

4 E RIRO kia tae ki te au rā openga ra, e akatinamouiaʼi te maunga ra o te are o Iehova ki runga i te take o te au maunga ra, e ka akateiteiia ïa ki rungao i te au tuaivi ra, e ka uipa mai te au tangata ki reira.

2 E manganui te enua e aere, ma te tuatua e, Aere mai, ka aere tatou ki runga i te maunga o Iehova, e ki te are o te Atua o Iakoba, e nana e apii mai ia tatou i tona au aerenga; e ka aere tatou na tona ra au arataa. I na Ziona atu oki te ture i te riro anga atu, e te tuatua a Iehova, i na Ierusalema atu ïa.

3 E nana e akava i rotopu i te tangata e manganui, e e akamura i te au enua ririnui i te atea ke ra; e tupaki ratou i ta ratou au koke ei auri arote, e ta ratou au korare ei tipi tope ïa, kare tetai enua e apai i te koke ki runga i tetai enua kare oki ratou e apii akaou i te tamaki.

4 E noo ra ratou ravarai ki raro ake i tana uaorai vine, e ki raro ake i tana uaorai suke, e kare tetai e akamataku mai; ko te vaa oki o Iehova Sabaota ra, tei tuatua mai.

5 Kia aaere ua te tangata ravarai i te ingoa o tona uaorai atua, ka aaere ra tatou i te ingoa o Iehova, o to tatou Atua, e tuatatau ua atu.

6 I taua rā ra, te tuatua mairā Iehova, e uipa mai ei au i tei pirikoki, e tei tuaruia ki vao, e tei makiia iaku ra, e akaputuputuia mai ïa e au.

7 E akariro oki au i tei pirikoki ra ei toenga, e tei tuku mamaoia, ei enua ririnui; e ei ia Iehova oki te au ki runga ia ratou i te maunga ra i Ziona, i teianei e tuatau ua atu.

8 Ko koe oki, e te punanga o te anana ra e, e te maunga o te tamaine a Ziona, e tae mai ïa kia koe, ko te au muatangana te ka tae mai, te basileia o te tamaine a Ierusalema ra.

9 E tenana, eaa koe i kapiki nui ei? kare ainei e ariki i roto ia koe na? kua mate ainei to au tumu korero? i rokoiaʼi koe e te mamae mei te vaine anau ra?

10 Akamamae ana, ka akaanau ana, e te tamaine a Ziona! mei te vaine anau ra; ei tenana oki koe e aere ei mei roto i te oire, ka noo ei ki roto i te koro, ka aere oki koe e tae rava atu ki Babulonia; ei reira koe e akaoraiaʼi, ei reira koe e okoiaʼi e Iehova i te rima o toou au enemi ra.

11 E teianei kua kuku mai te au enua e manganui ki runga ia koe, ko tei tuatua e, Kia viivii atu aia, e kia akara o tatou mata ki runga ia Ziona.

12 Kare ra ratou i kite i te manako o Iehova, kare oki ratou i kite i tana i akono ra; e akaputuputu oki aia ia ratou mei te au ruru sitona i runga i te ngai pāpā sitona.

13 Ka tu, ka pāpā, e te tamaine a Ziona: e akariro oki au i toou ra tara ei auri, e akariro au i toou ra maikuku ei veo: e ungaungātiti te pa enua e manganui ia koe; e naau e akatapu atu i tei rauka ia ratou ra na Iehova, e ta ratou au apinga, na te Atu ïa o te ao katoa nei.