Ko te Patireia o te Atua, te tumu manako puapinga rava atu i roto i te Pipiria. Ka taangaanga a Iehova i te Patireia ei akatupu i tona akakoroanga mua no te enua. Eaa ra te Patireia? Akapeea tatou e kite ei e te tutara ra i teia tuatau? Eaa tana i akatupu takere? E eaa tana ka akatupu a te tuatau ki mua? Ka pau teia apii e te nga apii ka aru mai i teia au uianga.

1. Eaa te Patireia o te Atua, e koai te Ariki?

E kavamani teia Patireia tei akanooia e te Atua ko Iehova. Ko Iesu Karaiti te Ariki, te tutara maira i te rangi. (Mataio 4:17; Ioane 18:36) Karanga te Pipiria no Iesu: “Ei iaia te au [Ariki] . . . e tuatau ua atu.” (Luka 1:​32, 33) Ei Ariki no te Patireia o te Atua, ka tutara a Iesu ki rungao i te tangata o te enua.

2. Koai mā ka tutara kapiti kia Iesu?

Kare a Iesu e tutara koia anake ua. Ka kapiti mai tetai aronga mei ‘te au kopu ravarai, te au reo, te au iti-tangata, e te pa enua katoa e ka riro ei ui ariki ki rungao i te enua.’ (Apokalupo 5:9, 10) Tokoia ratou ka tutara ma Karaiti? Mei te tuatau i aere mai ei a Iesu ki te enua nei, e mirioni ua atu au Kerititiano tei riro mai ei pipi nana. Inara e 144,000 ka aere ki te rangi kia tutara ma Iesu. (E tatau ia Apokalupo 14:​1-4.) Te katoa anga o te au Kerititiano i te enua nei, ka riro mai ratou ei iti tangata no te Patireia.​—Salamo 37:29.

3. Akapeea te Patireia o te Atua i meitaki atu ei i te kavamani a te tangata?

Noatu te tauta anga meitaki a te au tutara tangata, kare o ratou mana no te akatupu i to ratou inangaro. Ka tupauia ratou e tetai atu au tutara kino kare e akono i te tangata. Kareka te Tutara o te Patireia o te Atua, a Iesu, kare rava aia e tupauia e tetai ke. Kua “akatupu . . . te Atua no te rangi i tetai basileia, te ka kore rava e akakoreia e tuatau uatu.” (Daniela 2:44) Ka tutara a Iesu ki rungao i te enua, e kare aia e iriiri i te tangata. E tu aroa, takinga meitaki, e te tu tika tona, e ka apii aia i te tangata kia akono i tetai e tetai​—ma te aroa, takinga meitaki e te tu tika.​—E tatau ia Isaia 11:9.

4. Ka tutara tetai kavamani ririnui ki rungao i te enua

E maata atu to Iesu Karaiti mana ririnui ei tutara. E tatau ia Mataio 28:18, e oti uriuri i teia uianga:

• Akapeea to Iesu mana taoonga i meitaki atu ei i to tetai tutara tangata?

E taui ana te kavamani a te tangata, ka tutara ratou i tetai tuanga o te enua. Akapeea te Patireia o te Atua? E tatau ia Daniela 7:14, e oti uriuri i teia au uianga:

• Eaa i meitaki ei e kare te Patireia o te Atua “e pou”?

• Eaa i meitaki ei e ka tutara te reira ki rungao i te enua katoa?

5. Ka tupauia te tutara a te tangata

Eaa te Patireia o te Atua ka tupau ei i te au kavamani a te tangata? Akatangi i te VITIO, e oti uriuri i te uianga ka aru mai.

VITIO: Eaa te Patireia o te Atua?​—Potonga Ua (1:41)

• Eaa ta te tangata tutara anga i akatupu?

E tatau ia Koheleta 8:9, e oti uriuri i teia au uianga:

• I toou manako e tau ainei kia tupau te Patireia o te Atua i te kavamani a te tangata? Eaa te tumu?

6. Kua mārama te au tutara o te Patireia o te Atua i to tatou tu

No te mea kua noo ana to tatou Ariki, ko Iesu ei tangata, kua “aroa mai [aia] ia tatou i to tatou au paruparu nei.” (Ebera 4:15) Na Iehova i iki i te 144,000 au tane e te au vaine tiratiratu kia tutara ma Iesu “no roto i te au kopu ravarai, e te au reo katoa, e te au iti-tangata katoa, e te pa enua katoa.”​—Apokalupo 5:9.

• Pumaana ainei koe, e kua kite a Iesu e tona au taeake i to tatou oraanga ei tangata? Eaa te tumu?

7. E au ture meitaki ta te Patireia o te Atua

E maani ana te au kavamani i te au ture puapinga ei paruru i te iti tangata. E au ture ta te Patireia o te Atua kia aru tona iti tangata. E tatau ia 1 Korinetia 6:​9-11, e oti uriuri i teia au uianga:

• Eaa toou manako i te oraanga o te tangata i teianei ao me aru ratou i te au ture meitaki a te Atua?a

• I toou manako e tau ainei kia tapapa mai a Iehova i te iti tangata o te Patireia kia akono i tana au ture? Eaa te tumu?

• Eaa te akaari maira e ka rauka i te aronga akarongo kore i te taui?​—Akara i te irava 11.

APIIANGA

E kavamani tika tikai te Patireia o te Atua i te rangi, te ka tutara ki rungao i te enua.

Uriurianga

• Koai te au tutara o te Patireia o te Atua?

• Akapeea te Patireia o te Atua i meitaki atu ei i tetai ua atu kavamani a te tangata?

• Eaa tetai au mea te tapapa maira a Iehova i tona iti tangata o te Patireia kia rave?

KIMI KIMI

Akamanako i ta Iesu i apii e teiea te Patireia.

“Tei Roto Ainei te Patireia o te Atua i Toou Ngakau?” (Web atikara)

Eaa te Au Kite o Iehova i tiratiratu ei ki te Patireia o te Atua kare ki te tutara a te tangata?

Tiratiratu ki te Patireia o te Atua (1:43)

Akara matatio i te akakite anga Pipiria no te 144,000 ta Iehova i iki kia tutara ma Iesu.

“Koai Mā ka Aere ki te Rangi?” (Web atikara)

Eaa tei akakeu i tetai vaine i roto i te are auri kia irinaki e ko te Atua anake te ka rauka i te tutara i te ao katoa ma te tika?

“Akapeea i Kitea ai e Au te Pauanga ki te Tu Tika Kore” (E Ara!, Noema 2011)

Kua apii a Iesu i tana au pipi “kare kotou i to teianei ao.” (Ioane 15:19) Te aiteanga kia vai takake ua​—kare ratou e piri ki roto i te angaanga poritiki e te au tamaki o teianei ao. Kare i te mea māmā kia vai takake ua. Penei ka akavaavaaia tatou. Akapeea tatou me vai takake ua e kia vai tiratiratu ki te Atua ko Iehova?

1. Eaa te manako o te au Kerititiano mou no te au kavamani a te tangata?

Te akangateitei ra te au Kerititiano i te kavamani. Mei ta Iesu i karanga “ka apai mari i ta Kaisara ra kia Kaisara”​—koia oki, kia aru tatou i te ture o te enua, mei te tutaki i te tero. (Mareko 12:17) Te apii maira te Pipiria e te tutara ra te au kavamani a te tangata no te mea te akatika ra a Iehova ia ratou kia tutara. (Roma 13:1) Kua mārama tatou e kua kotingaia te mana tutara o te au kavamani a te tangata. Irinaki tatou i te Atua e tona Patireia i te rangi kia rapakau i te au manamanata o te tangata.

2. Akapeea tatou me akaari kia vai takake ua?

Mei ia Iesu, kare tatou e ō ki roto i te angaanga poritiki. Te kite anga te tangata i tetai o te au semeio a Iesu kua tauta ratou i te akariro iaia ei ariki i te enua nei, kare ra aia i akatika ana. (Ioane 6:15) Eaa te tumu? No te mea, mei tana i tuatua i muri mai, “kare to teianei ao taku basileia.” (Ioane 18:36) Ei pipi na Iesu, ka vai takake ua tatou. Ei akaraanga, kare tatou e aere ki te tamaki. (E tatau ia Mika 4:3.) Ka akangateitei tatou i te au akairo o te enua​—mei te au reva​—kare ra tatou e akamori i te reira. (1 Ioane 5:21) E kare tatou e piri ki tetai tua e kare e patoi i tetai ua atu pupu e te au mema poritiki. Te akaari ra tatou e te vai tiratiratu ra tatou ki te kavamani a te Atua​—ko tona Patireia.

KIMI OONU

3. Vai takake ua te au Kerititiano mou

Kua akanoo a Iesu e tana au pipi i te akaraanga no tatou. E tatau ia Roma 13:​1, 5-7 e 1 Petero 2:​13, 14. E oti, akatangi i te VITIO e te uriuri i te au uianga ka aru mai.

VITIO: Vai Takake Ua te au Kerititiano Mou​—Tuanga 1 (4:28)

• Eaa tatou ka akangateitei ei i te au kavamani a te tangata?

• Eaa tetai au mataara ka kauraro tatou ia ratou?

I te tuatau tamaki, penei ka vai takake ua tetai au enua, inara kua tauturu i te nga tua o te tamaki. Eaa tikai te turanga kia vai takake ua? E tatau ia Ioane 17:16. E oti, akatangi i te VITIO e te uriuri i te uianga ka aru mai.

VITIO: Vai Takake Ua te au Kerititiano Mou​—Tuanga 2 (3:11)

• Eaa te aiteanga kia vai takake ua?

Akapeea me akaue te kavamani kia rave koe i tetai angaanga tei patoi i te ture a te Atua? E tatau ia Angaanga 5:​28, 29. E oti, akatangi i te VITIO e te uriuri i te au uianga ka aru mai.

VITIO: Vai Takake Ua te au Kerititiano Mou​—Tuanga 3 (1:18)

• Me e taumaro anga tetai i rotopu i te ture a te tangata e ta te Atua, koai ta tatou ka akarongo?

• Akakite mai i tetai au turanga kare te au Kerititiano e akarongo ki te au kavamani?

4. Kia vai takake ua i te pae o te manako e taau ka rave

E tatau ia 1 Ioane 5:21. E oti, akatangi i te VITIO e te uriuri i te au uianga ka aru mai.

VITIO: Kia Ngakau Toa te au Kerititiano Mou​—Kia Vai Takake (2:49)

• I roto i te vitio, eaa te tumu kare a Ayenge i piri ana ki roto i te pupu poritiki e te au tarekareka anga a te kavamani mei te akaepaepa anga i te reva?

• I toou manako kua rave ainei aia i te iki anga tau?

Eaa atu tetai au ngai ka timataia to tatou turanga kia vai takake ua? Akatangi i te VITIO, e oti uriuri i te au uianga ka aru mai.

VITIO: Apiianga Mei Te Punanga Tiaki​—Vai Takake Ua Mei Teianei Ao Oripu Ua (5:16)

• Akapeea me vai takake ua i te tuatau tarekareka anga tipoti?

• Akapeea me vai takake ua noatu me takinokinoia e me ka puapingaia mei te au iki anga a te aronga poritiki?

• Akapeea te au nuti me kore te au pirianga tangata me takino i to tatou turanga vai takake ua?

APIIANGA

Ka angaanga pakari te au Kerititiano kia vai takake ua i te pae o te manako, te tuatua, e ta ratou ka rave.

Uriurianga

• Eaa ta tatou kaiou ki te au kavamani?

• Eaa tatou ka vai takake ei i te pae o te poritiki?

• Eaa te au turanga te ka timata i to tatou tu vai takake ua?

KIMI KIMI

Eaa ta tatou ka rave kia vai takake ua?

Kare a Iehova i Akangaropoina Ana ia Matou (3:14)

Eaa ta te au pamiri ka akapapa no te au timata anga kia vai takake ua?

Kia Vai Takake Ua i te Ngai Tangata (4:25)

Eaa te tumu kare te paruru anga i to tetai enua i te turanga ngateitei rava atu ka rauka i tetai tangata?

“Kare Rava e Mea e Kore ei e Tika i te Atua” (5:19)

Akamanako akapeea me vai takake ua i teianei ao me rave i te au iki anga i te ngai angaanga.

“Ei Runga Iaia Uaorai ta te Tangata Ravarai Apainga” (Te Punanga Tiaki, Mati 15, 2006)