Kua Rave Ratou i to Iehova Anoano

Kua Papetito a Philipa i Tetai Opita Etiopia

IAIA e oro ra i roto i tona kariota, kua taangaanga meitaki tetai tangata Etiopia i tona tuatau. Te tatau maata ra aia​—e peu matauia i rotopu i te aronga teretere i te anere mataiti mua. E opita teia “tangata mana ki o Kanedake i te ariki vaine no Etiopia ra.”a Koia te “tiaki i te apinga tini nona ra”​—vaitata rai, e minita aia i te pae o te moni. Te tatau nei teia opita mei ta te Atua Tuatua e raukaʼi i te kimi i te kite.​—Angaanga 8:27, 28.

Tei te pae mai tetai tangata evangeria ko Philipa. Na tetai angera i arataki iaia ki teia ngai, i teianei kua akakiteia aia e: “Ka aere koe e akapiri atu ki te pae i tera ra kariota.” (Angaanga 8:26, 29) Ka rauka ia tatou i te akamanako ia Philipa e ui ra kiaia uaorai, ‘Koai ra teia tangata? Eaa tana e tatau ra? Eaa ra au i aratakiia atu ei kiaia?’

I te oro anga a Philipa i te pae i te kariota, kua rongo atu aia i te tangata Etiopia e tatau ra i teia au tuatua: “I aratakiia aia mei te mamoe ki te tainga ra, e mei te punua mamoe e muteki ua ki mua i te aroaro o tei pakoti i tona uruuru ra, kare katoa oki tona vaa i tuatua mai: I akakoreia tana tuatua-tau i tona akaaka anga ra, e naai tona uki e akakite? i tipu keia tona ora i te ao nei.”​—Angaanga 8:32, 33.

Kua kite viviki a Philipa i te reira irava. No roto mai te reira i te tataanga a Isaia. (Isaia 53:7, 8) Kua umere tikai te tangata Etiopia no tana e tatau ra. Kua tuatua atu a Philipa na te uianga: “Te kite na koe i taau e tatau na?” Kua pau atu te tangata Etiopia: “Eaa au e kite ei, naringa e tangata te akakite mai kiaku?” I reira kua pati aia ia Philipa kia kake mai ki runga i tona kariota.​—Angaanga 8:30, 31.

“Eaa Au nei e Kore ei e Bapetizoia?”

“Ka akakite mai ana koe,” kua karanga atu te tangata Etiopia kia Philipa, “noai ta te peroveta nei tuatua? nona uaorai ainei? e no tetai tangata ke ainei?” (Angaanga 8:34) Kare to te tangata Etiopia umere anga e e mea poitirere, i te mea kua roa ana e e tuatua ngaro te tu tika o te “mamoe,” me kore te “tavini,” o ta Isaia totou. (Isaia 53:11) Mei teaa ra te taka meitaki tikai i teia i te akakite anga a Philipa ki te tangata Etiopia “te tuatua no Iesu”! I muri maira kua karanga atu te tangata Etiopia e: “I na e vai teia, eaa au nei e kore ei e bapetizoia?” No reira kua papetito a Philipa iaia i reira rai.​—Angaanga 8:35-38.

E rave anga rapurapu ainei teia? Kare rava! E tangata poroteraita ngati Iuda te tangata Etiopia.b No reira e tangata akamori takere aia no Iehova ma te kite i te au Tuatua Tapu, kapiti mai i te au totou no runga i te Mesia. Inara, kare i oti meitaki tona kite. I teianei e kua rauka iaia i teia akakite anga puapinga no runga i ta Iesu Karaiti tuanga angaanga, kua marama te tangata Etiopia e eaa ta te Atua e umuumu maira nona ra e kua papa no te ariki atu i te reira. Kua tau te papetito anga.​—Mataio 28:18-20; 1 Petero 3:21.

I muri mai, “kua rave maira te Vaerua o te Atu ia Philipa.” Kua aere atura aia ki tetai atu tukuanga angaanga. I te tangata Etiopia ra kua “aere atura aia i tona aerenga ma te rekareka.”​—Angaanga 8:39, 40.

E Apiianga no Tatou

Ei au tavini no Iehova i teia tuatau, e apainga ta tatou no te tauturu i te au tangata ngakau tika kia apii i te tuatua mou o te Tuatua a te Atua. E manganui kua manuia no te orongaanga i te tuatua meitaki ki tetai atu iaia e teretere ua ra me kore i roto i tetai atu au turanga akapapa koreia. Tei tupu mai i te angaanga tutu aereanga i te Patireia, i te au mataiti tataki tai e au anere e te tauatini ua atu kua akatutu i to ratou akatapu anga ki te Atua ko Iehova na te papetito anga.

E tika, auraka e rapurapu e kia papetitoia te aronga ou. Te mea mua ka tau ratou i te kimi i te kite mou tikai o te Atua ko Iehova e tana Tamaiti, ko Iesu Karaiti. (Ioane 17:3) E oti ka tau ratou kia tataraara, te akarukeanga i te au rave anga kino e te ariu mai anga e tau ei kia akatano ki ta te Atua au turanga. (Angaanga 3:19) Ka anoanoia te taime, koia tikai me kua akaoonuia te au manakoanga kino e te rave anga kino. I te aronga ou e tare ra i te ka pou no te maanianga pipi Kerititiano, ka tupu maata te au akameitaki anga no te tomoanga atu ki roto i tetai pirianga akatapuia ma te Atua ko Iehova. (Akaaite ia Luka 9:23; 14:25-33.) Te arataki rekareka ra te aronga e Au Kite no Iehova i taua aronga ou ki te akaaerenga ta te Atua e taangaanga ra no te rave i tona anoano. (Mataio 24:45-47) Mei te tangata Etiopia ra, ka rekareka teia aronga no te apiianga e te akatanoanga ki ta te Atua e umuumu maira no ratou.

[Au Tataanga Rikiriki i Raro]

[Pia i te kapi 8]

Eaa ra i Kapikiiaʼi e Eunuka?

I roto i te papaanga ia Angaanga pene 8, kua taikuia te tangata Etiopia ei “eunuka.” Inara, i te mea kare te Ture a Mose i akatika ana i tetai tane tei tataaia i roto i te putuputuanga, i te akara anga kare teia tangata i te eunuka i te tu tika tikai. (Deuteronomi 23:1) Ka rauka kia taikuia te tuatua Ereni “eunuka” ki tetai tangata i roto i te opati teitei. No reira, e opita te tangata Etiopia i raro ake i te ariki vaine Etiopia.